पत्र सूचना कार्यालय

ಕಾರ್ಮಿಕ ಸುಧಾರಣೆಗಳು ಮತ್ತು ಐಟಿ ವಲಯ: ಬೆಳವಣಿಗೆ ಮತ್ತು ಕಲ್ಯಾಣಕ್ಕಾಗಿ ಒಂದು ಆಧುನಿಕ ಚೌಕಟ್ಟು

ಚುರುಕಾದ ಐಟಿ ವಲಯಕ್ಕಾಗಿ ಆಧುನಿಕ ಕಾರ್ಮಿಕ ನಿಯಮಗಳು

ಭಾರತದ ಮಾಹಿತಿ ತಂತ್ರಜ್ಞಾನ ವಲಯವು ದೇಶದ ಆರ್ಥಿಕ ಬೆಳವಣಿಗೆ ಮತ್ತು ಜಾಗತಿಕ ಸ್ಪರ್ಧಾತ್ಮಕತೆಯ ಮೂಲಾಧಾರವಾಗಿ ಹೊರಹೊಮ್ಮಿದೆ. ಕಳೆದ ಕೆಲವು ದಶಕಗಳಿಂದ, ಭಾರತವು ವಿಶ್ವಾದ್ಯಂತ ಗ್ರಾಹಕರಿಗೆ ಸಾಫ್ಟ್‌ವೇರ್ ಸೇವೆಗಳು, ಡಿಜಿಟಲ್ ಪರಿಹಾರಗಳು ಮತ್ತು ವ್ಯವಹಾರ ಪ್ರಕ್ರಿಯೆ ಹೊರಗುತ್ತಿಗೆಯನ್ನು ಒದಗಿಸುವ ಜಾಗತಿಕ ಐಟಿ ಕೇಂದ್ರವಾಗಿ ರೂಪಾಂತರಗೊಂಡಿದೆ.

ಭಾರತದಲ್ಲಿ ಭವಿಷ್ಯಕ್ಕೆ ಸಿದ್ಧವಾದ ಕಾರ್ಯಪಡೆಗೆ ಅಡಿಪಾಯವನ್ನು ಸೃಷ್ಟಿಸುವ ಸಲುವಾಗಿ, ಹೊಸ ಕಾರ್ಮಿಕ ಸಂಹಿತೆಗಳು ಅಂದರೆ ವೇತನ ಸಂಹಿತೆ, 2019 (ಡಬ್ಲುಸಿ), ಕೈಗಾರಿಕಾ ಸಂಬಂಧಗಳ ಸಂಹಿತೆ, 2020, ಸಾಮಾಜಿಕ ಭದ್ರತೆಯ ಸಂಹಿತೆ, 2020, ಮತ್ತು ಉದ್ಯೋಗ ಸುರಕ್ಷತೆ, ಆರೋಗ್ಯ ಮತ್ತು ಕೆಲಸದ ಪರಿಸ್ಥಿತಿಗಳ ಸಂಹಿತೆ, 2020 (ಒಎಸ್‌ಎಚ್‌ & ಡಬ್ಲುಸಿ), ಅನುಸರಣೆಯನ್ನು ಸರಳೀಕರಿಸುವುದು, ನಮ್ಯತೆಯನ್ನು ಉತ್ತೇಜಿಸುವುದು ಮತ್ತು ಗುತ್ತಿಗೆ ಹಾಗೂ ಗೀಗ್ ಉದ್ಯೋಗಿಗಳು ಸೇರಿದಂತೆ ಎಲ್ಲಾ ರೀತಿಯ ಕಾರ್ಮಿಕರಿಗೆ ಸಾಮಾಜಿಕ ಭದ್ರತೆಯನ್ನು ಒದಗಿಸುವ ಗುರಿಯನ್ನು ಹೊಂದಿವೆ. ಐಟಿ ವಲಯಕ್ಕೆ, ಈ ಸುಧಾರಣೆಗಳು ವಿಶೇಷವಾಗಿ ಮಹತ್ವದ್ದಾಗಿವೆ ಏಕೆಂದರೆ ಅವು ವೇತನ, ನಿರ್ದಿಷ್ಟ-ಅವಧಿಯ ಉದ್ಯೋಗ, ಮನೆಯಿಂದ ಕೆಲಸದ ವ್ಯವಸ್ಥೆಗಳು  ಮತ್ತು ಕಾರ್ಯಸ್ಥಳದ ಸುರಕ್ಷತಾ ಮಾನದಂಡಗಳ ಕುರಿತು ಸ್ಪಷ್ಟತೆಯನ್ನು ನೀಡುತ್ತವೆ. ನಿಯಂತ್ರಕ ಪ್ರಕ್ರಿಯೆಗಳನ್ನು ಸುಗಮಗೊಳಿಸುವುದು, ಲಿಂಗ ಸಮಾನತೆಯನ್ನು ಹೆಚ್ಚಿಸುವುದು ಮತ್ತು ಡಿಜಿಟಲ್ ದಾಖಲೆ ನಿರ್ವಹಣೆಯನ್ನು ಪ್ರೋತ್ಸಾಹಿಸುವುದರ ಮೂಲಕ, ಈ ಸಂಹಿತೆಗಳು ಉದ್ಯೋಗಿಗಳ ಕಲ್ಯಾಣವನ್ನು ರಕ್ಷಿಸುತ್ತಾ, ಐಟಿ ಕಂಪನಿಗಳು ತಮ್ಮ ಕಾರ್ಯಪಡೆಯನ್ನು ಸಮರ್ಥವಾಗಿ ನಿರ್ವಹಿಸಲು ಸಹಾಯ ಮಾಡುತ್ತವೆ ಮತ್ತು ಅಂತಿಮವಾಗಿ ಸುಸ್ಥಿರ ಬೆಳವಣಿಗೆ ಮತ್ತು ಜಾಗತಿಕ ಸ್ಪರ್ಧಾತ್ಮಕತೆಗೆ ಕೊಡುಗೆ ನೀಡುತ್ತವೆ.

ಐಟಿ ವಲಯದಲ್ಲಿ ವ್ಯಾಪಾರ ಸುಗಮತೆಗೆ ಕಾರ್ಮಿಕ ಸುಧಾರಣೆಗಳ ಉತ್ತೇಜನ

ಐಟಿ ವಲಯವು ಗಣನೀಯ ಆದಾಯವನ್ನು ಗಳಿಸುವುದಲ್ಲದೆ, ಲಕ್ಷಾಂತರ ನೇರ ಮತ್ತು ಪರೋಕ್ಷ ಉದ್ಯೋಗಾವಕಾಶಗಳನ್ನು ಸೃಷ್ಟಿಸುತ್ತದೆ. ಇದು ಕೌಶಲ್ಯ ಅಭಿವೃದ್ಧಿ, ನಾವೀನ್ಯತೆ ಮತ್ತು ತಾಂತ್ರಿಕ ಪ್ರಗತಿಗೆ ಕೊಡುಗೆ ನೀಡುತ್ತದೆ. ಐಟಿ ಕಾರ್ಯಪಡೆಯ ಪ್ರಮಾಣ ಮತ್ತು ಸಂಕೀರ್ಣತೆಯನ್ನು ಗಮನಿಸಿದರೆ, ಸಮತೋಲಿತ ಮತ್ತು ಉತ್ಪಾದಕ ಕೆಲಸದ ವಾತಾವರಣವನ್ನು ಖಚಿತಪಡಿಸಿಕೊಳ್ಳುವಲ್ಲಿ ಕಾರ್ಮಿಕ ನಿಯಮಗಳು ನಿರ್ಣಾಯಕ ಪಾತ್ರ ವಹಿಸುತ್ತವೆ.

ಕಾರ್ಯಪಡೆ ನಮ್ಯತೆ ಮತ್ತು ಉದ್ಯೋಗ ಮಾದರಿಗಳು

• ನಿರ್ದಿಷ್ಟ-ಅವಧಿಯ ಉದ್ಯೋಗ: ಉದ್ಯೋಗದಾತರು ಶಾಶ್ವತ ಕಾರ್ಮಿಕರಂತೆಯೇ ಅದೇ ವೇತನ, ಪ್ರಯೋಜನಗಳು ಮತ್ತು ಸಾಮಾಜಿಕ ಭದ್ರತೆಯೊಂದಿಗೆ ನೌಕರರನ್ನು ನಿರ್ದಿಷ್ಟ ಅವಧಿಗೆ ನೇಮಿಸಿಕೊಳ್ಳಬಹುದು. ಈ ನಿಬಂಧನೆಯು ಐಟಿ ಸಂಸ್ಥೆಗಳಿಗೆ ದೀರ್ಘಾವಧಿಯ ಒಪ್ಪಂದಗಳಿಗೆ ಬದ್ಧರಾಗದೆ, ಸಮಯ-ಬದ್ಧ ಯೋಜನೆಗಳು, ಪೈಲಟ್ ಕಾರ್ಯಕ್ರಮಗಳು ಅಥವಾ ಕಾಲೋಚಿತ ಜಾಗತಿಕ ನಿಯೋಜನೆಗಳಿಗಾಗಿ ನುರಿತ ವೃತ್ತಿಪರರನ್ನು ನೇಮಿಸಿಕೊಳ್ಳಲು ಅನುವು ಮಾಡಿಕೊಡುತ್ತದೆ. ಇದು ಉದ್ಯೋಗದಾತರಿಗೆ ಕಾರ್ಯಪಡೆಯ ಚುರುಕುತನ ಮತ್ತು ವೆಚ್ಚದ ಅತ್ಯುತ್ತಮೀಕರಣವನ್ನು ನೀಡುತ್ತದೆ, ಉದ್ಯೋಗದ ಚಕ್ರಗಳನ್ನು ಯೋಜನೆಯ ಕಾಲಮಿತಿಗಳೊಂದಿಗೆ ಜೋಡಿಸುತ್ತದೆ, ಅದೇ ಸಮಯದಲ್ಲಿ ಅನುಭವಿ ಪ್ರತಿಭೆಗಳ ಪ್ರವೇಶವನ್ನು ಉಳಿಸಿಕೊಳ್ಳುತ್ತದೆ.

• ಮನೆಯಿಂದ ಕೆಲಸವನ್ನು ಒಳಗೊಂಡಂತೆ ಹೊಂದಿಕೊಳ್ಳುವ ಕೆಲಸದ ವ್ಯವಸ್ಥೆಗಳು: ಸಂಹಿತೆಗಳಲ್ಲಿ ಸೇರಿಸಲಾದ ಈ ನಿಬಂಧನೆಗಳು ಸರ್ಕಾರಗಳಿಗೆ ನಿರ್ದಿಷ್ಟ ವಲಯಗಳಿಗೆ ಹೊಂದಿಕೊಳ್ಳುವ ಕೆಲಸ, ಮನೆ-ಆಧಾರಿತ ಕೆಲಸ, ಅಥವಾ ದೂರಸ್ಥ ಉದ್ಯೋಗಕ್ಕಾಗಿ ನಿಯಮಗಳನ್ನು ರೂಪಿಸಲು ಅಧಿಕಾರ ನೀಡುತ್ತವೆ. ಇಂತಹ ನಿಬಂಧನೆಗಳು ಸಾಂಕ್ರಾಮಿಕದ ನಂತರ ಪ್ರಮಾಣಿತವಾದ ಹೈಬ್ರಿಡ್ ಮತ್ತು ದೂರಸ್ಥ ಕೆಲಸದ ಮಾದರಿಗಳಿಗೆ ಕಾನೂನು ಅಡಿಪಾಯವನ್ನು ಒದಗಿಸುತ್ತವೆ. ಇದು ಐಟಿ ಉದ್ಯೋಗದಾತರಿಗೆ ಹೊಂದಿಕೊಳ್ಳುವ ಕೆಲಸವನ್ನು ಔಪಚಾರಿಕಗೊಳಿಸಲು, ಹೊಣೆಗಾರಿಕೆ ಮತ್ತು ಕೆಲಸದ-ಗಂಟೆಗಳ ದಾಖಲೆಗಳನ್ನು ನಿರ್ವಹಿಸಲು ಮತ್ತು ಉದ್ಯೋಗಿಗಳು ದೂರದಿಂದ ಕೆಲಸ ಮಾಡುವಾಗಲೂ ಅನುಸರಣೆಯನ್ನು ಖಚಿತಪಡಿಸಿಕೊಳ್ಳಲು ಸಹಾಯ ಮಾಡುತ್ತದೆ—ಇದು ವ್ಯವಹಾರದ ನಿರಂತರತೆ ಮತ್ತು ಜಾಗತಿಕ ಸ್ಪರ್ಧಾತ್ಮಕತೆಗೆ ನಿರ್ಣಾಯಕವಾಗಿದೆ.

• ಕೆಲಸದ ಅವಧಿಗಳಲ್ಲಿ ನಮ್ಯತೆ ಮತ್ತು ಮಹಿಳಾ ಉದ್ಯೋಗ: ಒಎಸ್‌ಎಚ್‌ ಸಂಹಿತೆಯು ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳಿಗೆ, ಸೂಕ್ತ ಸುರಕ್ಷತೆ, ಸಾರಿಗೆ ಮತ್ತು ವಿಶ್ರಾಂತಿ ಸೌಲಭ್ಯಗಳಿಗೆ ಒಳಪಟ್ಟು, ಮಹಿಳೆಯರು ಎಲ್ಲಾ ರೀತಿಯ ಸಂಸ್ಥೆಗಳಲ್ಲಿ ಮತ್ತು ರಾತ್ರಿಯ ಅವಧಿಯಲ್ಲಿ ಕೆಲಸ ಮಾಡಲು ಅವಕಾಶ ನೀಡುವ ನಿಯಮಗಳನ್ನು ರೂಪಿಸಲು ಅಧಿಕಾರ ನೀಡುತ್ತದೆ. ಐಟಿ ಮತ್ತು ಐಟಿಇಎಸ್ ಕಂಪನಿಗಳು ಸಾಮಾನ್ಯವಾಗಿ 24×7 ಬೆಂಬಲ ಮತ್ತು ರಾತ್ರಿ ಪಾಳಿಗಳ ಅಗತ್ಯವಿರುವ ಜಾಗತಿಕ ಸಮಯ ವಲಯಗಳಲ್ಲಿ ಕಾರ್ಯನಿರ್ವಹಿಸುತ್ತವೆ. ಈ ನಿಬಂಧನೆಯು ಸ್ಪಷ್ಟ ಅನುಸರಣಾ ಮಾನದಂಡಗಳೊಂದಿಗೆ ಮಹಿಳೆಯರಿಗೆ ರಾತ್ರಿ ಕೆಲಸವನ್ನು ಕಾನೂನುಬದ್ಧಗೊಳಿಸುತ್ತದೆ, ಸಂಸ್ಥೆಗಳು ಲಿಂಗ ವೈವಿಧ್ಯತೆಯನ್ನು ಕಾಪಾಡಿಕೊಳ್ಳಲು ಮತ್ತು ಅಂತರರಾಷ್ಟ್ರೀಯ ಸೇವಾ ಬಾಧ್ಯತೆಗಳನ್ನು ಪೂರೈಸಲು ಸಹಾಯ ಮಾಡುತ್ತದೆ.

ಅನುಸರಣಾ ಸರಳೀಕರಣ ಮತ್ತು ವ್ಯಾಪಾರ ಸುಗಮತೆ

• ಏಕ ಪರವಾನಗಿ, ನೋಂದಣಿ ಮತ್ತು ರಿಟರ್ನ್ಸ್: ಸಂಹಿತೆಗಳು ವಿವಿಧ ಕಾಯಿದೆಗಳ ಅಡಿಯಲ್ಲಿನ ಬಹು ನೋಂದಣಿಗಳನ್ನು ಬದಲಿಸಿ, ಏಕ ನೋಂದಣಿ, ಏಕ ರಿಟರ್ನ್ ಫೈಲಿಂಗ್ ಮತ್ತು ಭಾರತದಾದ್ಯಂತ ಮಾನ್ಯವಾಗಿರುವ ಏಕ ಪರವಾನಗಿಯನ್ನು ಪರಿಚಯಿಸುತ್ತವೆ. . ಬಹು ರಾಜ್ಯಗಳು ಅಥವಾ ಕ್ಯಾಂಪಸ್‌ಗಳಾದ್ಯಂತ ಕಾರ್ಯನಿರ್ವಹಿಸುವ ಐಟಿ ಕಂಪನಿಗಳಿಗೆ, ಇದು ಅನುಸರಣಾ ನಕಲು, ಆಡಳಿತಾತ್ಮಕ ವೆಚ್ಚಗಳು ಮತ್ತು ಅಧಿಕಾರಶಾಹಿ ವಿಳಂಬಗಳನ್ನು ಕಡಿಮೆ ಮಾಡುತ್ತದೆ. ಎಲ್ಲಾ ನೋಂದಣಿಗಳಿಗಾಗಿ ಏಕ ಡಿಜಿಟಲ್ ಇಂಟರ್ಫೇಸ್ (ಕಾರ್ಖಾನೆಗಳು, ಅಂಗಡಿಗಳು, ಇಪಿಎಫ್‌ಒ, ಇಎಸ್‌ಈಸಿ) ಐಟಿ ವಲಯದ ಡಿಜಿಟಲೀಕರಣಗೊಂಡ ಎಚ್‌ಆರ್‌ ಮತ್ತು ಅನುಸರಣಾ ವ್ಯವಸ್ಥೆಗಳೊಂದಿಗೆ ಸಂಪೂರ್ಣವಾಗಿ ಹೊಂದಿಕೆಯಾಗುತ್ತದೆ.

• ಡಿಜಿಟೈಸೇಶನ್ ಮತ್ತು ಸ್ವಯಂ-ಪ್ರಮಾಣೀಕರಣ: ಸಂಹಿತೆಗಳು ಡಿಜಿಟಲೀಕರಣಗೊಂಡ ದಾಖಲೆ ನಿರ್ವಹಣೆ, ರಿಟರ್ನ್‌ಗಳ ಆನ್‌ಲೈನ್ ಫೈಲಿಂಗ್, ವೆಬ್-ಆಧಾರಿತ ತಪಾಸಣೆಗಳು ಮತ್ತು ಸ್ವಯಂ-ಪ್ರಮಾಣೀಕರಣ ಕಾರ್ಯವಿಧಾನಗಳನ್ನು ಪ್ರೋತ್ಸಾಹಿಸುತ್ತವೆ. ಡಿಜಿಟೈಸೇಶನ್‌ಗೆ ಇರುವ ನಿಬಂಧನೆಗಳು ಎಚ್‌ಆರ್‌ ಲೆಕ್ಕಪರಿಶೋಧನೆಗಳನ್ನು ಸುಗಮಗೊಳಿಸುತ್ತದೆ ಮತ್ತು ಕಾಗದರಹಿತ ಅನುಸರಣೆಗೆ ಅನುವು ಮಾಡಿಕೊಡುತ್ತದೆ. ಈಗಾಗಲೇ ತಂತ್ರಜ್ಞಾನ-ಚಾಲಿತವಾಗಿರುವ ಐಟಿ/ಐಟಿಇಎಸ್ ಕಂಪನಿಗಳು ಈ ವ್ಯವಸ್ಥೆಗಳನ್ನು ಅಸ್ತಿತ್ವದಲ್ಲಿರುವ ಎಚ್‌ಆರ್‌ಎಂಎಸ್‌ (ಮಾನವ ಸಂಪನ್ಮೂಲ ನಿರ್ವಹಣಾ ವ್ಯವಸ್ಥೆ) ಅಥವಾ ಇಆರ್‌ಪಿ (ಎಂಟರ್‌ಪ್ರೈಸ್ ರಿಸೋರ್ಸ್ ಪ್ಲ್ಯಾನಿಂಗ್) ವೇದಿಕೆಗಳಲ್ಲಿ ಸಂಯೋಜಿಸಬಹುದು, ಇದರಿಂದಾಗಿ ಹಸ್ತಚಾಲಿತ ದೋಷಗಳು ಮತ್ತು ತಪಾಸಣೆಯ ತೊಂದರೆಗಳು ಕಡಿಮೆಯಾಗುತ್ತವೆ. ಸ್ವಯಂ-ಪ್ರಮಾಣೀಕರಣವು ವಿಶ್ವಾಸ-ಆಧಾರಿತ ಅನುಸರಣಾ ಆಡಳಿತವನ್ನು ನಿರ್ಮಿಸುತ್ತದೆ, "ಇನ್ಸ್‌ಪೆಕ್ಟರ್ ರಾಜ್" ಅನ್ನು ಕಡಿಮೆ ಮಾಡುತ್ತದೆ ಮತ್ತು ನಿರ್ವಹಣೆಗೆ ವ್ಯಾಪಾರದ ಬೆಳವಣಿಗೆಯತ್ತ ಗಮನಹರಿಸಲು ಅವಕಾಶ ನೀಡುತ್ತದೆ.

• ಅಪರಾಧಗಳ ಅಪರಾಧಮುಕ್ತಗೊಳಿಸುವಿಕೆ ಮತ್ತು "ಸುಧಾರಣಾ ಸೂಚನೆಗಳ" ಪರಿಚಯ: ಸಣ್ಣ ಕಾರ್ಯವಿಧಾನದ ಉಲ್ಲಂಘನೆಗಳಿಗೆ ಕ್ರಿಮಿನಲ್ ಮೊಕದ್ದಮೆಯ ಬದಲಿಗೆ ಹಣಕಾಸಿನ ದಂಡಗಳನ್ನು ವಿಧಿಸಲು ಸಂಹಿತೆಗಳು ಅವಕಾಶ ನೀಡುತ್ತವೆ. ದಂಡವನ್ನು ಅನ್ವಯಿಸುವ ಮೊದಲು ಉದ್ಯೋಗದಾತರಿಗೆ ಅನುಸರಣೆ-ಅಲ್ಲದ್ದನ್ನು ಸರಿಪಡಿಸಲು 30 ದಿನಗಳನ್ನು ನೀಡಲಾಗುತ್ತದೆ. ಇಂತಹ ನಿಬಂಧನೆಗಳು ಸಹಕಾರಿ ಅನುಸರಣಾ ಪರಿಸರವನ್ನು ಪ್ರೋತ್ಸಾಹಿಸುತ್ತವೆ. ಸಂಕೀರ್ಣ ಉದ್ಯೋಗ ರಚನೆಗಳೊಂದಿಗೆ ವ್ಯವಹರಿಸುವ ಐಟಿ ಕಂಪನಿಗಳು (ಆನ್‌ಸೈಟ್–ಆಫ್‌ಶೋರ್, ಜಾಗತಿಕ ಚಲನಶೀಲತೆ) ಅಜಾಗರೂಕ ವಿಳಂಬಗಳು ಅಥವಾ ತಾಂತ್ರಿಕ ಲೋಪಗಳಿಗಾಗಿ ಕ್ರಿಮಿನಲ್ ಆರೋಪಗಳ ಭಯದಿಂದ ಪರಿಹಾರವನ್ನು ಪಡೆಯುತ್ತವೆ, ಇದರಿಂದ ವ್ಯಾಪಾರ ಸುಗಮತೆ ಹೆಚ್ಚುತ್ತದೆ.

ಕಾರ್ಯಸ್ಥಳದ ಸುರಕ್ಷತೆ, ಮಾನದಂಡಗಳು ಮತ್ತು ಮೂಲಸೌಕರ್ಯ

• ರಾಷ್ಟ್ರೀಯ ಉದ್ಯೋಗ ಸುರಕ್ಷತಾ ಮಾನದಂಡಗಳು ಮತ್ತು ತೃತೀಯ-ಪಕ್ಷದ ಲೆಕ್ಕಪರಿಶೋಧನೆ ನಿಬಂಧನೆ: ಸಂಹಿತೆಗಳು ಸರ್ಕಾರಕ್ಕೆ ಏಕರೂಪದ ರಾಷ್ಟ್ರೀಯ ಸುರಕ್ಷತಾ ಮಾನದಂಡಗಳನ್ನು ರೂಪಿಸಲು ಅಧಿಕಾರ ನೀಡುತ್ತವೆ ಮತ್ತು ಸಂಸ್ಥೆಗಳ ತೃತೀಯ-ಪಕ್ಷದ ಪ್ರಮಾಣೀಕರಣಕ್ಕೆ ಅವಕಾಶ ನೀಡುತ್ತವೆ. ಈ ನಿಬಂಧನೆಗಳು ಭಾರತದಾದ್ಯಂತ ಇರುವ ಎಲ್ಲಾ ಕಚೇರಿಗಳಲ್ಲಿ ಕಾರ್ಯಸ್ಥಳದ ಸುರಕ್ಷತಾ ನಿಯಮಗಳಲ್ಲಿ - ಉದಾಹರಣೆಗೆ ದಕ್ಷತಾಶಾಸ್ತ್ರದ ಕಾರ್ಯಸ್ಥಳಗಳು, ಒಳಾಂಗಣ ಗಾಳಿಯ ಗುಣಮಟ್ಟ, ಅಥವಾ ಅಗ್ನಿ ಸುರಕ್ಷತೆ – ಸ್ಪಷ್ಟತೆ ಮತ್ತು ಏಕರೂಪತೆಯನ್ನು ಖಚಿತಪಡಿಸುತ್ತವೆ. ತೃತೀಯ-ಪಕ್ಷದ ಲೆಕ್ಕಪರಿಶೋಧನೆಗಳು ವ್ಯಕ್ತಿನಿಷ್ಠ ತಪಾಸಣೆಗಳನ್ನು ಕಡಿಮೆ ಮಾಡುತ್ತದೆ ಮತ್ತು ಕಾರ್ಯಸ್ಥಳದ ಸುರಕ್ಷತೆಯ ಭರವಸೆಯನ್ನು ಬಯಸುವ ಜಾಗತಿಕ ಗ್ರಾಹಕರಿಗೆ ಪ್ರಮಾಣೀಕೃತ ಐಟಿ ಪಾರ್ಕ್‌ಗಳು ಮತ್ತು ಎಸ್‌ಇಝಡ್‌ ಗಳಿಗೆ ಅನುಸರಣೆಯನ್ನು ಪ್ರದರ್ಶಿಸಲು ಅನುವು ಮಾಡಿಕೊಡುತ್ತವೆ.
• ಸಾಮಾನ್ಯ ಕಲ್ಯಾಣ ಸೌಲಭ್ಯಗಳ ನಿಬಂಧನೆ: ಒಎಸ್‌ಎಚ್‌&ಡಬ್ಲುಸಿ ಸಂಹಿತೆಯಲ್ಲಿನ ನಿಬಂಧನೆಗಳು ಒಂದೇ ಪ್ರದೇಶದಲ್ಲಿ ಅಥವಾ ಪಾರ್ಕ್‌ನಲ್ಲಿರುವ ಸಂಸ್ಥೆಗಳಿಗೆ (ಉದಾಹರಣೆಗೆ, ಐಟಿ ಎಸ್‌ಇಝಡ್‌ ಗಳು ಅಥವಾ ಟೆಕ್ ಪಾರ್ಕ್‌ಗಳು) ಶಿಶುಪಾಲನಾ ಕೇಂದ್ರಗಳು, ಕ್ಯಾಂಟೀನ್‌ಗಳು ಅಥವಾ ವಿಶ್ರಾಂತಿ ಪ್ರದೇಶಗಳಂತಹ ಕಲ್ಯಾಣ ಸೌಲಭ್ಯಗಳನ್ನು ಹಂಚಿಕೊಳ್ಳಲು ಅವಕಾಶ ನೀಡುತ್ತವೆ. ಈ ನಿಬಂಧನೆಗಳು ಮೂಲಸೌಕರ್ಯದ ನಕಲು ಮತ್ತು ಕಾರ್ಯಾಚರಣೆಯ ವೆಚ್ಚಗಳನ್ನು ಕಡಿಮೆ ಮಾಡುತ್ತವೆ, ಅದೇ ಸಮಯದಲ್ಲಿ ಶಾಸನಬದ್ಧ ಅನುಸರಣೆಯನ್ನು ಖಚಿತಪಡಿಸುತ್ತವೆ. ಅನೇಕ ಕಂಪನಿಗಳನ್ನು ಹೊಂದಿರುವ ದೊಡ್ಡ ಐಟಿ ಕ್ಯಾಂಪಸ್‌ಗಳಲ್ಲಿ ಇದು ವಿಶೇಷವಾಗಿ ಉಪಯುಕ್ತವಾಗಿರುತ್ತದೆ.

ವಿವಾದ ಪರಿಹಾರ ಮತ್ತು ನೌಕರರ ರಕ್ಷಣೆ

• ಸರಳೀಕೃತ ವಿವಾದ ಪರಿಹಾರ ಮತ್ತು ಕುಂದುಕೊರತೆ ನಿರ್ವಹಣೆ: 20 ಅಥವಾ ಅದಕ್ಕಿಂತ ಹೆಚ್ಚು ಕಾರ್ಮಿಕರನ್ನು ನೇಮಿಸುವ ಸಂಸ್ಥೆಗಳಿಗಾಗಿ ಆಂತರಿಕ ಕುಂದುಕೊರತೆ ಪರಿಹಾರ ಸಮಿತಿಗಳನ್ನು  ಸ್ಥಾಪಿಸಲು ಸಂಹಿತೆಗಳು ಅವಕಾಶ ನೀಡುತ್ತವೆ; ಇದು ಕಾಲಮಿತಿಯ ಸಂಧಾನ ಮತ್ತು ಮಧ್ಯಸ್ಥಿಕೆಯನ್ನು ಪರಿಚಯಿಸುತ್ತದೆ. ಈ ನಿಬಂಧನೆಯು ವ್ಯಾಜ್ಯದ ಅಪಾಯವನ್ನು ಕಡಿಮೆ ಮಾಡುತ್ತದೆ ಮತ್ತು ಕಾರ್ಯಸ್ಥಳದ ವಿವಾದಗಳ (ಉದಾಹರಣೆಗೆ, ವಜಾ, ವೇತನ ಸಮಸ್ಯೆಗಳು, ಕಿರುಕುಳದ ದೂರುಗಳು) ತ್ವರಿತ, ಆಂತರಿಕ ಪರಿಹಾರಕ್ಕೆ ಅನುವು ಮಾಡಿಕೊಡುತ್ತದೆ. ಇದು ಸಾಮರಸ್ಯವನ್ನು ಕಾಪಾಡಿಕೊಳ್ಳಲು ಮತ್ತು ಯೋಜನೆಯ ವಿತರಣೆ ಅಥವಾ ಗ್ರಾಹಕರ ಸಂಬಂಧಗಳಲ್ಲಿನ ಅಡೆತಡೆಗಳನ್ನು ಕಡಿಮೆ ಮಾಡಲು ಸಹ ಸಹಾಯ ಮಾಡುತ್ತದೆ.

• ವಜಾಗೊಳಿಸಿದ ನೌಕರರಿಗೆ ಮರುಕೌಶಲ್ಯ ನಿಧಿ: ಐಆರ್‌ ಸಂಹಿತೆ, 2020 ರ ಅಡಿಯಲ್ಲಿ, ವಜಾಗೊಳಿಸಿದ ನೌಕರರಿಗೆ 15 ದಿನಗಳ ವೇತನವನ್ನು ಮರುಕೌಶಲ್ಯ ನಿಧಿಗೆ ನೀಡಲು ಉದ್ಯೋಗದಾತರಿಗೆ ಆದೇಶಿಸಲಾಗಿದೆ, ನಂತರ ಅದನ್ನು 45 ದಿನಗಳಲ್ಲಿ ಕಾರ್ಮಿಕರಿಗೆ ಪಾವತಿಸಲಾಗುತ್ತದೆ. ವ್ಯಾಪಾರದ ಪುನರ್ರಚನೆ ಅಥವಾ ಯಾಂತ್ರೀಕರಣದ ಹಂತಗಳಲ್ಲಿ ನೈತಿಕವಾಗಿ ಕಡಿತಗೊಳಿಸುವಿಕೆಗೆ ಈ ನಿಬಂಧನೆಯು ಅನುಕೂಲ ಕಲ್ಪಿಸುತ್ತದೆ. ಇದು ಕಾರ್ಪೊರೇಟ್ ಇಮೇಜ್ ಅನ್ನು ಹೆಚ್ಚಿಸುತ್ತದೆ ಮತ್ತು ಜಾಗತಿಕ ESG (ಪರಿಸರ, ಸಾಮಾಜಿಕ, ಆಡಳಿತ) ನಿರೀಕ್ಷೆಗಳನ್ನು ಪೂರೈಸುತ್ತದೆ.

ಗೀಗ್ ಕಾರ್ಯಪಡೆ ಮತ್ತು ಅಸಂಘಟಿತ ವಲಯದ ಸಂಪರ್ಕಗಳು

• ಗೀಗ್ ಮತ್ತು ಪ್ಲಾಟ್‌ಫಾರ್ಮ್ ಕಾರ್ಮಿಕರಿಗೆ ಸಾಮಾಜಿಕ ಭದ್ರತಾ ವ್ಯಾಪ್ತಿ: ಅಗ್ರಿ ಗೇಟರ್‌ಗಳ ಕೊಡುಗೆಗಳ ಮೂಲಕ ಗೀಗ್ ಮತ್ತು ಪ್ಲಾಟ್‌ಫಾರ್ಮ್ ಕಾರ್ಮಿಕರಿಗೆ ಕಲ್ಯಾಣ ಯೋಜನೆಗಳನ್ನು ರೂಪಿಸಲು ಸಂಹಿತೆಯು ಅವಕಾಶ ನೀಡುತ್ತದೆ. ಐಟಿ ಸಂಸ್ಥೆಗಳು ಕ್ಲೌಡ್, ಸೈಬರ್‌ ಸುರಕ್ಷತೆ ಮತ್ತು ವಿಶ್ಲೇಷಣಾ ಯೋಜನೆಗಳಿಗಾಗಿ ಫ್ರೀಲ್ಯಾನ್ಸರ್‌ಗಳು ಮತ್ತು ಗುತ್ತಿಗೆ ವೃತ್ತಿಪರರನ್ನು ಹೆಚ್ಚಾಗಿ ತೊಡಗಿಸಿಕೊಳ್ಳುತ್ತಿವೆ. ಈ ನಿಬಂಧನೆಯು ಅಂತಹ ನೇಮಕಾತಿಗಳನ್ನು ಔಪಚಾರಿಕಗೊಳಿಸುತ್ತದೆ, ಫ್ರೀಲ್ಯಾನ್ಸರ್‌ಗಳಿಗೆ ಸಾಮಾಜಿಕ ರಕ್ಷಣೆಯನ್ನು ಒದಗಿಸುತ್ತದೆ ಮತ್ತು ದೊಡ್ಡ ಗೀಗ್ ಕಾರ್ಯಪಡೆಯೊಂದಿಗೆ ಕೆಲಸ ಮಾಡುವ ಕಂಪನಿಗಳಿಗೆ ಪ್ರತಿಷ್ಠೆಯ ಅಪಾಯವನ್ನು ಕಡಿಮೆ ಮಾಡುತ್ತದೆ.

• ಅಸಂಘಟಿತ ಕಾರ್ಮಿಕರಿಗಾಗಿ ರಾಷ್ಟ್ರೀಯ ಡೇಟಾಬೇಸ್: SS ಸಂಹಿತೆ, 2020 ರ ಅಡಿಯಲ್ಲಿ, ಅಸಂಘಟಿತ ಕಾರ್ಮಿಕರ ನೋಂದಣಿ ಮತ್ತು ಕೌಶಲ್ಯ ವಿವರಗಳೊಂದಿಗೆ ರಾಷ್ಟ್ರೀಯ ಡಿಜಿಟಲ್ ವೇದಿಕೆಯನ್ನು  ರಚಿಸಲು ಅವಕಾಶವಿದೆ. ಐಟಿ ಸಂಸ್ಥೆಗಳು ಸುದೀರ್ಘ ನೇಮಕಾತಿ ಚಕ್ರಗಳಿಲ್ಲದೆ, ಕೋರ್-ಅಲ್ಲದ ಕಾರ್ಯಗಳಿಗಾಗಿ (ಡೇಟಾ ಎಂಟ್ರಿ, ಬಿಪಿಒ ಬೆಂಬಲ ಇತ್ಯಾದಿ) ಪರಿಶೀಲಿಸಿದ ನುರಿತ ಅಭ್ಯರ್ಥಿಗಳ ಪೂಲ್ ಅನ್ನು ಪ್ರವೇಶಿಸಬಹುದು. ಇದು ಪಾರದರ್ಶಕ, ಪರಿಣಾಮಕಾರಿ ಕಾರ್ಯಪಡೆ ಸೋರ್ಸಿಂಗ್ ಅನ್ನು ಉತ್ತೇಜಿಸುತ್ತದೆ ಮತ್ತು ಪರಿಶೀಲಿಸದ ತಾತ್ಕಾಲಿಕ ನೇಮಕಾತಿ ಮಾರ್ಗಗಳಿಂದಾಗಿ ಉದ್ಯೋಗಿ ಬಿಡುವ ಪ್ರಮಾಣವನ್ನು ಕಡಿಮೆ ಮಾಡುತ್ತದೆ.

ಕಾರ್ಮಿಕ ಸುಧಾರಣೆಗಳು ಐಟಿ ವಲಯದ ಕಾರ್ಮಿಕರಿಗೆ ಹೇಗೆ ಸಬಲೀಕರಣ ನೀಡುತ್ತವೆ

ಈ ಕಾರ್ಮಿಕ ಸುಧಾರಣೆಗಳು ಭಾರತದ ವೇಗವಾಗಿ ವಿಸ್ತರಿಸುತ್ತಿರುವ ಐಟಿ ವಲಯ ಮತ್ತು ಅದರ ಕಾರ್ಮಿಕರಿಗೆ ನಿರ್ದಿಷ್ಟ ಪ್ರಾಮುಖ್ಯತೆಯನ್ನು ಹೊಂದಿವೆ. ದಕ್ಷ ಪ್ರತಿಭಾ ನಿರ್ವಹಣೆಯನ್ನು ಬಲವಾದ ಕಾರ್ಮಿಕ ರಕ್ಷಣೆಗಳೊಂದಿಗೆ ಸಂಯೋಜಿಸುವ ಮೂಲಕ, ಈ ಸುಧಾರಣೆಗಳು ಸುಸ್ಥಿರ ಕೈಗಾರಿಕಾ ಬೆಳವಣಿಗೆಯನ್ನು ನಡೆಸುತ್ತವೆ ಮತ್ತು ಜಾಗತಿಕವಾಗಿ ಭಾರತದ ಸ್ಪರ್ಧಾತ್ಮಕ ಸ್ಥಾನವನ್ನು ಹೆಚ್ಚಿಸುತ್ತವೆ.

ಉದ್ಯೋಗ ರಚನೆ ಮತ್ತು ಉದ್ಯೋಗ ಭದ್ರತೆ

• ಸಮಾನ ವೇತನ ಮತ್ತು ಪ್ರಯೋಜನಗಳೊಂದಿಗೆ ನಿರ್ದಿಷ್ಟ-ಅವಧಿಯ ಉದ್ಯೋಗ: ನಿರ್ದಿಷ್ಟ-ಅವಧಿಯ ಉದ್ಯೋಗಿಗಳು ಶಾಶ್ವತ ಉದ್ಯೋಗಿಗಳಂತೆಯೇ ಅದೇ ವೇತನ, ಭತ್ಯೆಗಳು, ಕೆಲಸದ ಪರಿಸ್ಥಿತಿಗಳು ಮತ್ತು ಶಾಸನಬದ್ಧ ಪ್ರಯೋಜನಗಳಿಗೆ (ಒಂದು ಅನುಪಾತದ ಆಧಾರದ ಮೇಲೆ ಗ್ರಾಚುಟಿ ಸೇರಿದಂತೆ) ಅರ್ಹರಾಗಿರುತ್ತಾರೆ. ಈ ನಿಬಂಧನೆಯು ಯೋಜನೆ-ಆಧಾರಿತ ಕಾರ್ಯಯೋಜನೆಗಳಿಗಾಗಿ ನೇಮಕಗೊಂಡ ವೃತ್ತಿಪರರಿಗೆ ಅಲ್ಪಾವಧಿಯ ಅವಧಿಗಳಿಗೂ ಸಹ ಪೂರ್ಣ ಉದ್ಯೋಗ ಪ್ರಯೋಜನಗಳನ್ನು (EPF, ESIC, ಗ್ರಾಚುಟಿ, ಮತ್ತು ರಜೆ) ಆನಂದಿಸಲು ಅನುವು ಮಾಡಿಕೊಡುತ್ತದೆ. ನಿರ್ದಿಷ್ಟ-ಅವಧಿಯ ಅಥವಾ ಗುತ್ತಿಗೆ ಯೋಜನೆಗಳಲ್ಲಿರುವ ಐಟಿ ಕಾರ್ಮಿಕರು ಉದ್ಯೋಗ ಗೌರವ, ಸೇವೆಯ ನಿರಂತರತೆಯ ಪ್ರಯೋಜನಗಳು ಮತ್ತು ಶೋಷಣೆಯ ಗುತ್ತಿಗೆಗಳ ವಿರುದ್ಧ ರಕ್ಷಣೆಯನ್ನು ಪಡೆಯುತ್ತಾರೆ.

• ನೇಮಕಾತಿ ಪತ್ರಗಳು ಮತ್ತು ಲಿಖಿತ ಉದ್ಯೋಗ ನಿಯಮಗಳ ಮೂಲಕ ಔಪಚಾರಿಕಗೊಳಿಸುವಿಕೆ: ಪ್ರತಿ ಉದ್ಯೋಗಿಯು ಉದ್ಯೋಗ ವಿವರಗಳು, ವರ್ಗ, ವೇತನ ಮತ್ತು ಸಾಮಾಜಿಕ ಭದ್ರತಾ ಪ್ರಯೋಜನಗಳನ್ನು ನಿರ್ದಿಷ್ಟಪಡಿಸುವ ಲಿಖಿತ ನೇಮಕಾತಿ ಪತ್ರವನ್ನು ಸ್ವೀಕರಿಸಬೇಕು ಎಂದು ಸಂಹಿತೆಗಳು ಒದಗಿಸುತ್ತವೆ. ಈ ನಿಬಂಧನೆಯು ಬಹು ಯೋಜನಾ ಕಾರ್ಯಯೋಜನೆಗಳಲ್ಲಿ ಅಥವಾ ಸೇವಾ ಪೂರೈಕೆದಾರರ ಮೂಲಕ ಕೆಲಸ ಮಾಡುವ ಐಟಿ ಸಿಬ್ಬಂದಿಗೆ ನಿರ್ಣಾಯಕವಾದ ಗುತ್ತಿಗೆ ಸ್ಪಷ್ಟತೆ ಮತ್ತು ಉದ್ಯೋಗದ ಪುರಾವೆಯನ್ನು ಒದಗಿಸುತ್ತದೆ. ಇದು ವೇತನ, ಸೂಚನೆ ಅವಧಿ, ಅಥವಾ ಸೇವಾ ನಿರಂತರತೆಯ ಕುರಿತಾದ ವಿವಾದಗಳನ್ನು ಸಹ ತಡೆಯುತ್ತದೆ.

• ವಜಾಗೊಳಿಸಿದ ನೌಕರರಿಗೆ ಮರು-ಕೌಶಲ್ಯ ನಿಧಿ : ಈ ನಿಬಂಧನೆಯು ಯಾಂತ್ರೀಕರಣ ಅಥವಾ ಪುನರ್ರಚನೆಯಿಂದಾಗಿ ಕೆಲಸ ಕಳೆದುಕೊಂಡವರಿಗೆ ಕೌಶಲ್ಯ ನವೀಕರಣ ಮತ್ತು ಉದ್ಯೋಗಾವಕಾಶವನ್ನು ಖಚಿತಪಡಿಸುತ್ತದೆ. ಈ ನಿಧಿಯು ಉದಯೋನ್ಮುಖ ತಂತ್ರಜ್ಞಾನಗಳಲ್ಲಿ ಆರ್ಥಿಕ ನೆರವು ಮತ್ತು ಮರು ತರಬೇತಿ ಅವಕಾಶಗಳನ್ನು ಒದಗಿಸುತ್ತದೆ.

ವೇತನ, ಸಮಾನತೆ ಮತ್ತು ತಾರತಮ್ಯರಹಿತತೆ

• ವೇತನಗಳ ಸಕಾಲಿಕ ಪಾವತಿ ಮತ್ತು ಅನಧಿಕೃತ ಕಡಿತಗಳಿಂದ ರಕ್ಷಣೆ: ಮುಂದಿನ ತಿಂಗಳ ಏಳು ದಿನಗಳೊಳಗೆ ವೇತನವನ್ನು ಪಾವತಿಸಬೇಕು (ಮಾಸಿಕ ಉದ್ಯೋಗಿಗಳಿಗೆ) ಮತ್ತು ಕಾನೂನುಬದ್ಧವಾಗಿ ಅನುಮತಿಸಲಾದ ಹೊರತು ಯಾವುದೇ ಕಡಿತಗಳನ್ನು ಮಾಡಬಾರದು ಎಂದು ಸಂಹಿತೆಗಳು ಒದಗಿಸುತ್ತವೆ. ಈ ರಕ್ಷಣೆಯು ಈಗ ವೇತನದ ಮಿತಿಯನ್ನು ಲೆಕ್ಕಿಸದೆ ಎಲ್ಲಾ ಉದ್ಯೋಗಿಗಳಿಗೆ ಅನ್ವಯಿಸುತ್ತದೆ. ಈ ನಿಬಂಧನೆಗಳು ಸಕಾಲಿಕ ಸಂಬಳದ ಜಮಾ ಮತ್ತು ಕಡಿತಗಳಲ್ಲಿ ಪಾರದರ್ಶಕತೆಯನ್ನು (ಉದಾಹರಣೆಗೆ, ತೆರಿಗೆ, ಭವಿಷ್ಯ ನಿಧಿ, ಅಥವಾ ಸೂಚನೆ ಪಾವತಿ) ಖಚಿತಪಡಿಸುತ್ತವೆ. ಇದು ವಿಶೇಷವಾಗಿ ವಿಳಂಬಿತ ಪಾವತಿಗಳಿಂದ ಆಗಾಗ್ಗೆ ಪ್ರಭಾವಿತರಾಗುವ ಕೆಳ-ಹಂತದ ಐಟಿ/ಬಿಪಿಒ ಸಿಬ್ಬಂದಿ ಮತ್ತು ಗುತ್ತಿಗೆ ಕಾರ್ಮಿಕರಿಗೆ ಪ್ರಯೋಜನ ನೀಡುತ್ತದೆ.

• ಸಮಾನ ಸಂಭಾವನೆ ಮತ್ತು ತಾರತಮ್ಯರಹಿತತೆ: ಸಂಹಿತೆಗಳಲ್ಲಿನ ನಿಬಂಧನೆಗಳು ಅದೇ ಅಥವಾ ಒಂದೇ ರೀತಿಯ ಕೆಲಸಕ್ಕೆ ನೇಮಕಾತಿ, ವೇತನ ಮತ್ತು ಉದ್ಯೋಗ ಪರಿಸ್ಥಿತಿಗಳಲ್ಲಿ ಲಿಂಗಾಧಾರಿತ ತಾರತಮ್ಯವನ್ನು ನಿಷೇಧಿಸುತ್ತವೆ. ಇದು ಹೆಚ್ಚುತ್ತಿರುವ ಮಹಿಳಾ ಪಾಲ್ಗೊಳ್ಳುವಿಕೆಯೊಂದಿಗೆ ಒಂದು ಉದ್ಯಮದಲ್ಲಿ ವೇತನ ಸಮಾನತೆಯನ್ನು ಉತ್ತೇಜಿಸುತ್ತದೆ. ಇದು ಲಿಂಗ-ತಟಸ್ಥ ನೇಮಕಾತಿ ಮತ್ತು ಬೆಳವಣಿಗೆಯನ್ನು ಪ್ರೋತ್ಸಾಹಿಸುತ್ತದೆ, ಲಿಂಗ ವೇತನದ ಅಂತರವನ್ನು ಮುಚ್ಚುತ್ತದೆ ಮತ್ತು ಉದ್ಯೋಗ ಪಾತ್ರಗಳಾದ್ಯಂತ ಎಲ್ಲರನ್ನೂ ಒಳಗೊಳ್ಳುವಿಕೆಯನ್ನು ಬಲಪಡಿಸುತ್ತದೆ.

ಮಹಿಳಾ ಸುರಕ್ಷತೆ, ಒಳಗೊಳ್ಳುವಿಕೆ ಮತ್ತು ಕೆಲಸದ ನಮ್ಯತೆ

• ರಾತ್ರಿ ಪಾಳಿಗಳು ಸೇರಿದಂತೆ ಎಲ್ಲಾ ಸಂಸ್ಥೆಗಳಲ್ಲಿ ಮಹಿಳೆಯರಿಗೆ ಕೆಲಸ ಮಾಡಲು ಅನುಮತಿ: ಒಎಸ್‌ಎಚ್‌ & ಡಬ್ಲುಸಿ ಸಂಹಿತೆಯಲ್ಲಿನ ನಿಬಂಧನೆಗಳು, ಉದ್ಯೋಗದಾತರು ಸುರಕ್ಷತೆ, ಸಾರಿಗೆ ಮತ್ತು ವಿಶ್ರಾಂತಿ ಸೌಲಭ್ಯಗಳನ್ನು ಖಚಿತಪಡಿಸಿದರೆ, ಮಹಿಳೆಯರು ರಾತ್ರಿ ಅವಧಿಗಳು ಸೇರಿದಂತೆ ಎಲ್ಲಾ ರೀತಿಯ ಉದ್ಯೋಗಗಳಲ್ಲಿ ಕೆಲಸ ಮಾಡಲು ಅವಕಾಶ ನೀಡುತ್ತವೆ. ಇಂತಹ ನಿಬಂಧನೆಗಳು ಸಮಯ ವಲಯಗಳಾದ್ಯಂತ ಕಾರ್ಯನಿರ್ವಹಿಸುವ ಜಾಗತಿಕ ಬೆಂಬಲ ಮತ್ತು ಅಭಿವೃದ್ಧಿ ಯೋಜನೆಗಳಲ್ಲಿ ಮಹಿಳೆಯರಿಗೆ ಅವಕಾಶಗಳನ್ನು ವಿಸ್ತರಿಸುತ್ತವೆ. ಸುರಕ್ಷತಾ ಮಾನದಂಡಗಳೊಂದಿಗೆ ಸಂಯೋಜಿತವಾದ ಕಾನೂನು ರಕ್ಷಣೆಯು ಮಹಿಳಾ ವೃತ್ತಿಪರರಿಗೆ ನಾಯಕತ್ವ ಮತ್ತು ಅಂತರರಾಷ್ಟ್ರೀಯ ಪಾತ್ರಗಳನ್ನು ಅನುಸರಿಸಲು ಸಬಲೀಕರಣ ನೀಡುತ್ತದೆ.

• ಹೊಂದಿಕೊಳ್ಳುವ ಮತ್ತು ದೂರಸ್ಥ ಕೆಲಸದ ವ್ಯವಸ್ಥೆಗಳು: ನಿರ್ದಿಷ್ಟ ವಲಯಗಳಿಗೆ ಹೊಂದಿಕೊಳ್ಳುವ ಕೆಲಸದ ಸಮಯ ಅಥವಾ ಮನೆಯಿಂದ ಕೆಲಸದ ವ್ಯವಸ್ಥೆಗಳನ್ನು ತಿಳಿಸಲು ನಿಯಮಗಳನ್ನು ಅಧಿಸೂಚಿಸಲು ಈ ಸಂಹಿತೆಯು ಸರ್ಕಾರಗಳಿಗೆ ಅಧಿಕಾರ ನೀಡುತ್ತದೆ. ಈ ನಿಬಂಧನೆಯು ಹೈಬ್ರಿಡ್ ಮತ್ತು ದೂರಸ್ಥ ಕೆಲಸವನ್ನು ಕಾನೂನುಬದ್ಧಗೊಳಿಸುತ್ತದೆ - ಇದು ಈಗ ಐಟಿ ಉದ್ಯೋಗದ ಒಂದು ಪ್ರಮುಖ ಲಕ್ಷಣವಾಗಿದೆ. ಇದು ಔಪಚಾರಿಕ ಮನ್ನಣೆಯನ್ನು ಒದಗಿಸುತ್ತದೆ, ನೌಕರರು ದೂರದಿಂದ ಕೆಲಸ ಮಾಡುವಾಗಲೂ ಸಾಮಾಜಿಕ ಭದ್ರತೆ, ವೇತನ ಮತ್ತು ರಜೆಯ ಹಕ್ಕುಗಳನ್ನು ಉಳಿಸಿಕೊಳ್ಳುವುದನ್ನು ಖಚಿತಪಡಿಸುತ್ತದೆ.

• ಕಲ್ಯಾಣ ಸೌಲಭ್ಯಗಳು: ಸಾಮಾನ್ಯ ಶಿಶುಪಾಲನಾ ಕೇಂದ್ರಗಳು ಮತ್ತು ವಿಶ್ರಾಂತಿ ಕೊಠಡಿಗಳು: ಒಎಸ್‌ಎಚ್‌ & ಡಬ್ಲುಸಿ ಸಂಹಿತೆ, 2020 ರ ಅಡಿಯಲ್ಲಿ, ಸಂಸ್ಥೆಗಳಲ್ಲಿ ಶಿಶುಪಾಲನಾ ಕೇಂದ್ರಗಳು, ವಿಶ್ರಾಂತಿ ಕೊಠಡಿಗಳು ಮತ್ತು ಕ್ಯಾಂಟೀನ್‌ಗಳ ನಿಬಂಧನೆಯನ್ನು ಕಡ್ಡಾಯಗೊಳಿಸುತ್ತದೆ, ಒಂದೇ ಪ್ರದೇಶದಲ್ಲಿನ ಬಹು ಉದ್ಯೋಗದಾತರ ನಡುವೆ ಹಂಚಿಕೆಯ ಸೌಲಭ್ಯಗಳಿಗೆ ಅವಕಾಶವಿದೆ. ಈ ನಿಬಂಧನೆಗಳು ಐಟಿ ಪಾರ್ಕ್‌ಗಳು ಮತ್ತು ಎಸ್‌ಇಝಡ್‌ ಗಳಲ್ಲಿ ಕುಟುಂಬ-ಸ್ನೇಹಿ ಕೆಲಸದ ವಾತಾವರಣವನ್ನು ಪ್ರೋತ್ಸಾಹಿಸುತ್ತವೆ. ಮಹಿಳಾ ಉದ್ಯೋಗಿಗಳು ಮಕ್ಕಳ ಆರೈಕೆ ಬೆಂಬಲದಿಂದ ಪ್ರಯೋಜನ ಪಡೆಯುತ್ತಾರೆ, ಇದು ಕೆಲಸ ಮತ್ತು ಜೀವನದ ಸಮತೋಲನವನ್ನು ಸುಧಾರಿಸುತ್ತದೆ ಮತ್ತು ವೃತ್ತಿಜೀವನದ ಧಾರಣವನ್ನು ಹೆಚ್ಚಿಸುತ್ತದೆ.

ಸಾಮಾಜಿಕ ಭದ್ರತೆ, ಪೋರ್ಟಬಿಲಿಟಿ ಮತ್ತು ಗೀಗ್ ಕಾರ್ಯಪಡೆಯ ರಕ್ಷಣೆ

• ಎಲ್ಲಾ ಕಾರ್ಮಿಕರಿಗೆ ಸಾಮಾಜಿಕ ಭದ್ರತಾ ವ್ಯಾಪ್ತಿ (ಗೀಗ್/ಪ್ಲಾಟ್‌ಫಾರ್ಮ್ ಕಾರ್ಮಿಕರು ಸೇರಿದಂತೆ) : ಸಾಮಾಜಿಕ ಭದ್ರತೆ ಸಂಹಿತೆ, 2020 ರ ಅಡಿಯಲ್ಲಿ, ಇಪಿಎಫ್‌, ಇಎಸ್‌ಐಸಿ, ಗ್ರಾಚುಟಿ ಮತ್ತು ಹೆರಿಗೆ ಪ್ರಯೋಜನಗಳನ್ನು ಸಾರ್ವತ್ರಿಕವಾಗಿ ವಿಸ್ತರಿಸಲು ನಿಬಂಧನೆಗಳಿವೆ. ಇದು ಡಿಜಿಟಲ್ ಸೇವೆಗಳಲ್ಲಿ ತೊಡಗಿರುವ ಗೀಗ್ ಮತ್ತು ಪ್ಲಾಟ್‌ಫಾರ್ಮ್ ಕಾರ್ಮಿಕರಿಗೆ ಕಲ್ಯಾಣ ಯೋಜನೆಗಳನ್ನು ಪರಿಚಯಿಸುತ್ತದೆ. ಈ ನಿಬಂಧನೆಯು ಸಾಂಪ್ರದಾಯಿಕ ಪೂರ್ಣಾವಧಿಯ ಪಾತ್ರಗಳನ್ನು ಮೀರಿ ಫ್ರೀಲ್ಯಾನ್ಸರ್‌ಗಳು, ಐಟಿ ಸಲಹೆಗಾರರು ಮತ್ತು ದೂರಸ್ಥ ಡೆವಲಪರ್‌ಗಳಿಗೆ ರಕ್ಷಣೆಯನ್ನು ವಿಸ್ತರಿಸುತ್ತದೆ. ಗಮನಾರ್ಹವಾಗಿ, ಇದು ತಂತ್ರಜ್ಞಾನದಲ್ಲಿ ಬೆಳೆಯುತ್ತಿರುವ ಡಿಜಿಟಲ್ ಗೀಗ್ ಕಾರ್ಯಪಡೆಗೆ ಆರ್ಥಿಕ ಭದ್ರತೆ ಮತ್ತು ಒಳಗೊಳ್ಳುವಿಕೆಯನ್ನು ಖಚಿತಪಡಿಸುತ್ತದೆ.

• ಸಾರ್ವತ್ರಿಕ ಖಾತೆ ಸಂಖ್ಯೆಗಳ ಮತ್ತು ಆಧಾರ್ ಸಂಪರ್ಕದ ಮೂಲಕ ಪ್ರಯೋಜನಗಳ ಪೋರ್ಟಬಿಲಿಟಿ: ಪಿಎಫ್, ಇಎಸ್ಐಸಿ ಮತ್ತು ಇತರ ಪ್ರಯೋಜನಗಳ ಉದ್ಯೋಗದಾತರು ಮತ್ತು ರಾಜ್ಯಗಳಾದ್ಯಂತ ಪೋರ್ಟಬಿಲಿಟಿಯನ್ನು ಖಚಿತಪಡಿಸಿಕೊಳ್ಳಲು ಕೇಂದ್ರೀಕೃತ ಡೇಟಾಬೇಸ್ ಮತ್ತು ಆಧಾರ್-ಸಂಪರ್ಕಿತ ಯುಎಎನ್ ಅನ್ನು ಸ್ಥಾಪಿಸಲು ಎಸ್‌ಎಸ್ ಸಂಹಿತೆಗಳು ಅವಕಾಶ ನೀಡುತ್ತವೆ. ಈ ನಿಬಂಧನೆಯು ಉದ್ಯೋಗಗಳನ್ನು ಬದಲಾಯಿಸುವ ಅಥವಾ ನಗರಗಳ ನಡುವೆ ಸ್ಥಳಾಂತರಗೊಳ್ಳುವ ವೃತ್ತಿಪರರಿಗೆ (ಐಟಿ ವೃತ್ತಿಗಳಲ್ಲಿ ಸಾಮಾನ್ಯ ಲಕ್ಷಣ) ಸಾಮಾಜಿಕ ಭದ್ರತಾ ಪ್ರಯೋಜನಗಳ ತಡೆರಹಿತ ವರ್ಗಾವಣೆಗೆ ಅನುಕೂಲ ಕಲ್ಪಿಸುತ್ತದೆ. ಇದು ಸೇವಾ ದಾಖಲೆಗಳ ನಿರಂತರತೆಯನ್ನು ಖಚಿತಪಡಿಸುತ್ತದೆ ಮತ್ತು ಅನುಸರಣೆಯನ್ನು ಸರಳೀಕರಿಸುತ್ತದೆ.

• ಪೋರ್ಟಬಿಲಿಟಿ ಮತ್ತು ಪ್ಯಾನ್-ಇಂಡಿಯಾ ಇಎಸ್‌ಐಸಿ ವ್ಯಾಪ್ತಿ: ಎಸ್‌ಎಸ್‌ ಸಂಹಿತೆಯಲ್ಲಿನ ಈ ನಿಬಂಧನೆಯು ESIC ವ್ಯಾಪ್ತಿಯನ್ನು ಭಾರತದಾದ್ಯಂತ ವಿಸ್ತರಿಸುತ್ತದೆ, "ಅಧಿಸೂಚಿತ ಪ್ರದೇಶ" ನಿರ್ಬಂಧವನ್ನು ತೆಗೆದುಹಾಕುತ್ತದೆ, ಜೊತೆಗೆ ವೈದ್ಯಕೀಯ ಮತ್ತು ವಿಮಾ ಪ್ರಯೋಜನಗಳ ಪೋರ್ಟಬಿಲಿಟಿಯನ್ನು ಒದಗಿಸುತ್ತದೆ. ಇದು ಭಾರತದಲ್ಲಿ ಎಲ್ಲಿಯಾದರೂ ವೈದ್ಯಕೀಯ ಸೌಲಭ್ಯಗಳಿಗೆ ಪ್ರವೇಶವನ್ನು ಖಚಿತಪಡಿಸುತ್ತದೆ - ಇದು ಮೊಬೈಲ್ ತಂತ್ರಜ್ಞಾನ ವೃತ್ತಿಪರರು, ದೂರಸ್ಥ ಕಾರ್ಮಿಕರು ಮತ್ತು ಸ್ಥಳಾಂತರಗೊಂಡ ನೌಕರರಿಗೆ ಉಪಯುಕ್ತವಾಗಿದೆ.

ಆರೋಗ್ಯ, ಸುರಕ್ಷತೆ ಮತ್ತು ಕಾರ್ಯಸ್ಥಳದ ಯೋಗಕ್ಷೇಮ

• ವಾರ್ಷಿಕ ಆರೋಗ್ಯ ತಪಾಸಣೆ ಮತ್ತು ಕಾರ್ಯಸ್ಥಳದ ಸುರಕ್ಷತಾ ಮಾನದಂಡಗಳು : ಒಎಸ್‌ಎಚ್‌ & ಡಬ್ಲು ಸಿ ಸಂಹಿತೆ, 2020 ರ ಅಡಿಯಲ್ಲಿ, ಪ್ರತಿ ಉದ್ಯೋಗಿಗೆ ಉಚಿತ ವಾರ್ಷಿಕ ಆರೋಗ್ಯ ತಪಾಸಣೆಗೆ ಅರ್ಹತೆ ಇದೆ ಎಂದು ಒದಗಿಸುತ್ತದೆ. ಉದ್ಯೋಗದಾತರು ಸುರಕ್ಷಿತ, ಆರೋಗ್ಯಕರ ಮತ್ತು ದಕ್ಷತಾಶಾಸ್ತ್ರದ ಕಾರ್ಯಸ್ಥಳಗಳನ್ನು ಖಚಿತಪಡಿಸಿಕೊಳ್ಳಬೇಕು. ಇಂತಹ ನಿಬಂಧನೆಗಳು ಮೇಜಿನ ಕೆಲಸದಲ್ಲಿ ಸಾಮಾನ್ಯವಾಗಿರುವ ಕಣ್ಣಿನ ಆಯಾಸ, ಬೆನ್ನು ನೋವು ಅಥವಾ ಒತ್ತಡ-ಸಂಬಂಧಿತ ಕಾಯಿಲೆಗಳಂತಹ ಔದ್ಯೋಗಿಕ ಆರೋಗ್ಯ ಸಮಸ್ಯೆಗಳಿಂದ ಉದ್ಯೋಗಿಗಳನ್ನು ರಕ್ಷಿಸುತ್ತವೆ. ನಿಯಮಿತ ಆರೋಗ್ಯ ತಪಾಸಣೆ ಮತ್ತು ಸುರಕ್ಷತಾ ಲೆಕ್ಕಪರಿಶೋಧನೆಗಳು ಯೋಗಕ್ಷೇಮ ಮತ್ತು ಉತ್ಪಾದಕತೆಯನ್ನು ಉತ್ತೇಜಿಸುತ್ತವೆ.

• ಉದ್ಯೋಗಿ ಪರಿಹಾರದ ಅಡಿಯಲ್ಲಿ ಪ್ರಯಾಣದ ಅಪಘಾತಗಳನ್ನು ಸೇರಿಸುವುದು: ಈ ನಿಬಂಧನೆಯ ಪ್ರಕಾರ, ಕೆಲಸದ ಸ್ಥಳಕ್ಕೆ ಅಥವಾ ಅಲ್ಲಿಂದ ಪ್ರಯಾಣಿಸುವಾಗ ಸಂಭವಿಸುವ ಅಪಘಾತಗಳನ್ನು ಉದ್ಯೋಗದ ಸಂದರ್ಭದಲ್ಲಿ ಸಂಭವಿಸಿದ ಅಪಘಾತಗಳೆಂದು ಪರಿಗಣಿಸಲಾಗುತ್ತದೆ. ಇದು ದೀರ್ಘ ದೂರ ಪ್ರಯಾಣಿಸುವ ಅಥವಾ ಗ್ರಾಹಕರ ಸೈಟ್‌ಗಳಿಗೆ ಪ್ರಯಾಣಿಸುವ ಟೆಕ್ ಉದ್ಯೋಗಿಗಳಿಗೆ ವಿಮಾ ವ್ಯಾಪ್ತಿ ಮತ್ತು ಪರಿಹಾರಕ್ಕೆ ಅನುಕೂಲ ಕಲ್ಪಿಸುತ್ತದೆ.

ಕೌಶಲ್ಯ ಮತ್ತು ವೃತ್ತಿ ಅಭಿವೃದ್ಧಿ

• ಕೌಶಲ್ಯಗಳ ಗುರುತಿಸುವಿಕೆ ಮತ್ತು ರಾಷ್ಟ್ರೀಯ ಕೌಶಲ್ಯ ಅರ್ಹತಾ ಚೌಕಟ್ಟು ವೇತನ ಸಂಹಿತೆಯ ಈ ನಿಬಂಧನೆಯು NSQF ಅಡಿಯಲ್ಲಿ ಪ್ರಮಾಣೀಕರಿಸಿದ ಕೌಶಲ್ಯ ಮಟ್ಟಗಳ ಆಧಾರದ ಮೇಲೆ ವೇತನ ನಿಗದಿಪಡಿಸಲು ಅವಕಾಶ ನೀಡುತ್ತದೆ. ಇಂತಹ ನಿಬಂಧನೆಯು ಔಪಚಾರಿಕವಾಗಿ ವೃತ್ತಿಪರ ಕೌಶಲ್ಯಗಳನ್ನು ಗುರುತಿಸುತ್ತದೆ, ಹೆಚ್ಚಿನ ವೇತನ ಮತ್ತು ವೃತ್ತಿ ಪ್ರಗತಿಯೊಂದಿಗೆ ಪ್ರಮಾಣೀಕರಣ ಮತ್ತು ಕೌಶಲ್ಯ ವರ್ಧನೆಯನ್ನು ಪುರಸ್ಕರಿಸುತ್ತದೆ. ಇದು ಹೊಸ ತಂತ್ರಜ್ಞಾನಗಳಲ್ಲಿ ನಿರಂತರ ಕೌಶಲ್ಯ ವರ್ಧನೆಯನ್ನು ಸಹ ಪ್ರೋತ್ಸಾಹಿಸುತ್ತದೆ.

 ಕುಂದುಕೊರತೆ ಪರಿಹಾರ ಮತ್ತು ವಿವಾದ ಇತ್ಯರ್ಥ

• ಕುಂದುಕೊರತೆ ಪರಿಹಾರ ಮತ್ತು ವಿವಾದ ಇತ್ಯರ್ಥ ಸಮಿತಿಗಳು: ಐಆರ್‌ ಸಂಹಿತೆಯ ಈ ನಿಬಂಧನೆಯು ಕಾರ್ಯಸ್ಥಳದ ಸಮಸ್ಯೆಗಳನ್ನು - ಉದಾಹರಣೆಗೆ ತಾರತಮ್ಯ, ಕಿರುಕುಳ, ಅಥವಾ ವೇತನ ವಿವಾದಗಳು - ಆಂತರಿಕವಾಗಿ ಮತ್ತು ಪರಿಣಾಮಕಾರಿಯಾಗಿ, ಪ್ರತೀಕಾರದ ಭಯವಿಲ್ಲದೆ, ಪರಿಹರಿಸಲು ರಚನಾತ್ಮಕ, ಕಾಲಮಿತಿಯ ವ್ಯವಸ್ಥೆಯನ್ನು ರಚಿಸುತ್ತದೆ.

ಉಪಸಂಹಾರ

ಹೊಸ ಕಾರ್ಮಿಕ ಸಂಹಿತೆಗಳು ಭಾರತದ ಕಾರ್ಮಿಕ ಚೌಕಟ್ಟಿನಲ್ಲಿ ಪರಿವರ್ತಕ ಬದಲಾವಣೆಯನ್ನು ಗುರುತಿಸುತ್ತವೆ, ಇದು ನಮ್ಯತೆ, ರಕ್ಷಣೆ ಮತ್ತು ಆಧುನೀಕರಣದ ಸಮತೋಲಿತ ಮಿಶ್ರಣವನ್ನು ನೀಡುತ್ತದೆ. ಭಾರತದ ಅತ್ಯಂತ ಕ್ರಿಯಾತ್ಮಕ ಮತ್ತು ಜಾಗತಿಕವಾಗಿ ಸ್ಪರ್ಧಾತ್ಮಕ ಕೈಗಾರಿಕೆಗಳಲ್ಲಿ ಒಂದಾದ ಐಟಿ ವಲಯಕ್ಕೆ, ಈ ಸುಧಾರಣೆಗಳು ಉದ್ಯೋಗದಾತರ ಸಾಮರ್ಥ್ಯಗಳು ಮತ್ತು ನೌಕರರ ಕಲ್ಯಾಣ ಎರಡನ್ನೂ ಬಲಪಡಿಸುತ್ತವೆ. ಅನುಸರಣೆಯನ್ನು ಸರಳೀಕರಿಸುವ ಮೂಲಕ, ವೈವಿಧ್ಯಮಯ ಕೆಲಸದ ವ್ಯವಸ್ಥೆಗಳನ್ನು ಔಪಚಾರಿಕಗೊಳಿಸುವ ಮೂಲಕ, ಸಾಮಾಜಿಕ ಭದ್ರತೆಯನ್ನು ವಿಸ್ತರಿಸುವ ಮೂಲಕ ಮತ್ತು ಕಾರ್ಯಸ್ಥಳದ ಸುರಕ್ಷತೆಯನ್ನು ಹೆಚ್ಚಿಸುವ ಮೂಲಕ, ಈ ಸಂಹಿತೆಗಳು ನಾವೀನ್ಯತೆ, ಉತ್ಪಾದಕತೆ ಮತ್ತು ಎಲ್ಲರನ್ನೂ ಒಳಗೊಳ್ಳುವ ಬೆಳವಣಿಗೆಗೆ ಬೆಂಬಲ ನೀಡುವ ಅನುಕೂಲಕರ ಪರಿಸರ ವ್ಯವಸ್ಥೆಯನ್ನು ಸೃಷ್ಟಿಸುತ್ತವೆ.

Click here for pdf file.

*****

(तथ्य सामग्री आईडी: 150595) आगंतुक पटल : 33