पत्र सूचना कार्यालय

അപകടകരമായ തൊഴിൽ മേഖലയിലെ തൊഴിലാളികൾക്ക് തൊഴിൽ കോഡുകൾ സുരക്ഷ വർദ്ധിപ്പിക്കുന്നു

അപകടകരമായ തൊഴിൽ മേഖലയിലെ തൊഴിലാളികൾക്ക് തൊഴിൽ കോഡുകൾ സുരക്ഷ വർദ്ധിപ്പിക്കുന്നു

ഇന്ത്യയിലെ അപകടകരമായ തൊഴിൽ മേഖലയിലെ സുരക്ഷ ശക്തിപ്പെടുത്തുന്നു

ഖനനം, പെട്രോളിയം, മെറ്റലർജി, രാസവസ്തുക്കൾ,വൻകിട നിർമ്മാണം തുടങ്ങിയ വ്യവസായങ്ങൾ ഇന്ത്യയുടെ സാമ്പത്തിക വളർച്ചയിൽ സുപ്രധാന പങ്ക് വഹിക്കുന്നു. ഈ വ്യവസായങ്ങളിലെ പല തൊഴിലാളികളും ഉയർന്ന അപകടസാധ്യതയുള്ള ചുറ്റുപാടുകളിലാണ് പ്രവർത്തിക്കുന്നത്. തൊഴിലാളികൾക്കായി ശക്തവും ഭാവിക്ക് അനുയോജ്യമായതുമായ ഒരു സുരക്ഷാ സംവിധാനത്തിൻ്റെ ആവശ്യകത തിരിച്ചറിഞ്ഞ്, ​ഗവൺമെന്റ് 29 കേന്ദ്ര തൊഴിൽ നിയമങ്ങളെ ഏകീകരിച്ചുകൊണ്ട് പുതിയ തൊഴിൽ കോഡുകൾ അവതരിപ്പിച്ചു. തൊഴിൽ സുരക്ഷ, ആരോഗ്യം, തൊഴിൽ സാഹചര്യ കോഡ് (OSH&WC) പ്രകാരം, റിസ്‌ക് അസസ്‌മെൻ്റ്, സൗജന്യ വാർഷിക ആരോഗ്യ പരിശോധന, പരിശീലനം, PPE, അടിയന്തര ആസൂത്രണം എന്നിവയോടുകൂടിയ കൂടുതൽ സംയോജിതവും പ്രതിരോധപരവുമായ സുരക്ഷാ സംവിധാനം വ്യവസ്ഥ ചെയ്തിട്ടുണ്ട്. ഈ പരിഷ്കാരങ്ങൾ സുരക്ഷാ പ്രോട്ടോക്കോളുകൾ ശക്തിപ്പെടുത്തുകയും അപകടസാധ്യത ലഘൂകരിക്കുന്നതിനുള്ള രീതികൾ നിർബന്ധമാക്കുകയും ഉത്തരവാദിത്തം വർദ്ധിപ്പിക്കുകയും ചെയ്യുന്നതിനൊപ്പം തൊഴിലുടമകൾക്ക് വ്യക്തവും ലളിതവും കൂടുതൽ പ്രവചനാതീതവുമായ നിയന്ത്രണ മാർഗ്ഗങ്ങൾ നൽകുന്നു. ശ്രദ്ധേയമായി, ഇന്ത്യയിലെ അപകടകരമായ തൊഴിൽ മേഖലയിലെ തൊഴിലാളികൾക്ക് സുരക്ഷിതമായ തൊഴിലിടങ്ങൾ, ശക്തമായ സംരക്ഷണം, കൂടുതൽ അന്തസ്സുള്ള സാഹചര്യങ്ങൾ എന്നിവ ഉറപ്പാക്കാൻ പുതിയ ചട്ടക്കൂട് ലക്ഷ്യമിടുന്നു.

അപകടകരമായ പ്രവർത്തനങ്ങളിലെ തൊഴിലാളികൾക്കുള്ള പ്രധാന നേട്ടങ്ങൾ

തൊഴിൽ കോഡുകൾ ഇന്ത്യയിലെ അപകടകരമായ മേഖലയിലെ തൊഴിലാളികൾക്കായി മെച്ചപ്പെട്ട സുരക്ഷാ-ക്ഷേമ ചട്ടക്കൂട് അവതരിപ്പിക്കുന്നു, ഇത് ഉയർന്ന അപകടസാധ്യതയുള്ള വ്യവസായങ്ങളിലുടനീളം സംരക്ഷണവും ഉത്തരവാദിത്തവും റിസ്‌ക് മാനേജ്‌മെൻ്റും വർദ്ധിപ്പിക്കുന്നു. രാസവസ്തുക്കൾ, സ്ഫോടകവസ്തുക്കൾ, വാതകം, റേഡിയേഷൻ, ഖനനം, നിർമ്മാണം, ഡോക്ക്, വൻകിട എഞ്ചിനീയറിംഗ് മേഖലകൾ ഉൾപ്പെടെയുള്ള അപകടകരമായ പ്രക്രിയകളിലോ വ്യവസായങ്ങളിലോ ഏർപ്പെട്ടിരിക്കുന്ന എല്ലാ തൊഴിലാളികളെയും OSH&WC കോഡിന് കീഴിൽ സമഗ്രമായി ഉൾപ്പെടുത്തിയിട്ടുണ്ട്.

• സുരക്ഷാ മാനദണ്ഡങ്ങൾ: അപകടകരമായ വസ്തുക്കളുടെ ഉപയോഗം, കൈകാര്യം ചെയ്യൽ, സംഭരണം, ഗതാഗതം എന്നിവയ്ക്കായി പാലിക്കേണ്ട ദേശീയ മാനദണ്ഡങ്ങൾ OSH&WC കോഡ് എടുത്തുകാണിക്കുന്നു. സുരക്ഷാ സംരക്ഷണം കൂടുതൽ മെച്ചപ്പെടുത്തുന്നതിനായി തൊഴിലുടമകൾ റിസ്‌ക് അസസ്‌മെൻ്റ് നടത്തുകയും അംഗീകാരം നേടുകയും എമർജൻസി റെസ്‌പോൺസ് സിസ്റ്റങ്ങൾ നിലനിർത്തുകയും വേണം.
• ആരോഗ്യ-വൈദ്യപരിരക്ഷ: മുമ്പ്, മെഡിക്കൽ, ആരോഗ്യ രേഖകൾ മാനുവലായി സൂക്ഷിച്ചിരുന്നു, അതിന് കൈമാറ്റ സാധ്യതയോ ദീർഘകാലത്തേക്ക് സൂക്ഷിച്ചുവെക്കാനും കണ്ടെത്താനുമുള്ള സാധ്യതയോ കുറവായിരുന്നു. ഇപ്പോൾ, ആരോഗ്യ രേഖകൾ നിർബന്ധമാണ്, കൂടാതെ ജീവനക്കാർക്കും ഇൻസ്പെക്ടർമാർക്കും അവ പ്രാപ്യവുമാണ്. ഇത് സുതാര്യതയും ദീർഘകാല കൈമാറ്റ സാധ്യതയും സാധ്യമാക്കുന്നു. കൂടാതെ, പുതിയ കോഡുകൾ പ്രകാരം, പ്രീ-എംപ്ലോയ്‌മെൻ്റ് (ജോലിക്ക് പ്രവേശിക്കുന്നതിനു മുമ്പുള്ള), പീരിയോഡിക് (ഇടയ്ക്കിടെയുള്ള), പോസ്റ്റ്-എക്‌സ്‌പോഷർ (അപകടത്തിന് ശേഷമുള്ള) വൈദ്യപരിശോധനകൾ നിർബന്ധമാണ്. എല്ലാ തൊഴിലാളികൾക്കും സൗജന്യ വാർഷിക ആരോഗ്യ പരിശോധന ഉറപ്പാക്കുന്നതിലൂടെ, തൊഴിൽജന്യ രോഗങ്ങൾ നേരത്തേ കണ്ടെത്താനും ഇത് സഹായിക്കുന്നു, ഇത് ചികിത്സാ ചെലവുകൾ കുറയ്ക്കുകയും ആരോഗ്യകരവും കൂടുതൽ ഉൽപ്പാദനക്ഷമവുമായ തൊഴിൽ ശക്തിയെ പിന്തുണയ്ക്കുകയും ചെയ്യുന്നു.
• സംരക്ഷണ-ക്ഷേമ നടപടികൾ: പുതിയ വ്യവസ്ഥകൾ പ്രകാരം, ഹെൽമറ്റുകൾ, കൈയുറകൾ, റെസ്പിറേറ്ററുകൾ, കണ്ണടകൾ തുടങ്ങിയ വ്യക്തിഗത സംരക്ഷണ ഉപകരണങ്ങൾ (PPE) തൊഴിലുടമകൾ നൽകുകയും നിലനിർത്തുകയും വേണം. കൂടാതെ, കാൻ്റീനുകൾ, വിശ്രമ ഷെൽട്ടറുകൾ, കഴുകാനുള്ള സൗകര്യങ്ങൾ, പ്രഥമശുശ്രൂഷ, ആംബുലൻസ് മുറികൾ, ഉയർന്ന താപനിലയുള്ള ജോലിസ്ഥലങ്ങളിൽ കൂളിംഗ് ഏരിയകൾ എന്നിവ നിർബന്ധമാക്കുന്നതിലൂടെ മെച്ചപ്പെട്ട ശുചിത്വ മാനദണ്ഡങ്ങൾ ഉറപ്പാക്കാനും ആവശ്യപ്പെടുന്നു. തൊഴിലുടമകൾ പ്രതിദിനം 8 മണിക്കൂറും ആഴ്ചയിൽ 48 മണിക്കൂറും എന്ന നിശ്ചിത പരമാവധി പ്രവൃത്തി സമയം പാലിക്കേണ്ടതുണ്ട്.
• പരിശീലനവും അവബോധവും: മുമ്പ്, പരിശീലനങ്ങൾ നിർബന്ധമായിരുന്നില്ല, അവ ഓരോ മേഖലയിലും വ്യത്യാസപ്പെട്ടിരുന്നു. ഇപ്പോൾ, തൊഴിലാളികളെ സഹായിക്കുന്നതിനായി അപകടകരമായ വസ്തുക്കൾ സുരക്ഷിതമായി കൈകാര്യം ചെയ്യൽ, സംഭരണം, ഗതാഗതം, നീക്കം ചെയ്യൽ എന്നിവയെക്കുറിച്ചുള്ള നിർബന്ധിത പരിശീലന സെഷനുകൾ അവതരിപ്പിച്ചു.
• സാമൂഹിക സുരക്ഷ: കാര്യക്ഷമമായ സാമൂഹിക സുരക്ഷാ വ്യവസ്ഥകൾ ഉറപ്പാക്കുന്നതിനായി, 2020-ലെ സാമൂഹിക സുരക്ഷാ കോഡ് (SS) / ESIC പ്രകാരം തൊഴിൽജന്യ രോഗങ്ങൾക്കോ അപകടങ്ങൾക്കോ ഉടനടി നഷ്ടപരിഹാരം ഉറപ്പാക്കുന്നു. കൂടാതെ, തൊഴിലാളികൾക്ക് ESIC ആനുകൂല്യങ്ങൾക്കും (മെഡിക്കൽ, തൊഴിൽജന്യ രോഗം, പരിക്ക്, വൈകല്യം, ആശ്രിതർക്കുള്ള ആനുകൂല്യങ്ങൾ) അർഹതയുണ്ട്. PF, ഗ്രാറ്റുവിറ്റി, പ്രസവാനുകൂല്യം, തൊഴിൽ പരിക്കിനുള്ള നഷ്ടപരിഹാരം, വാർദ്ധക്യകാല സംരക്ഷണം (പെൻഷൻ) തുടങ്ങിയ മറ്റ് ആനുകൂല്യങ്ങളും നൽകുന്നു. സുതാര്യതയും കൈമാറ്റ സാധ്യതയും വർദ്ധിപ്പിക്കുന്ന ഡിജിറ്റൽ ആരോഗ്യ, സാമൂഹിക സുരക്ഷാ രേഖകളും ലഭ്യമാക്കുന്നു.
• പ്രത്യേക അവകാശങ്ങൾ: ഗുരുതരമായ പരിക്കിനോ മരണത്തിനോ കാരണമാകുന്ന അപകടകരമായ ജോലിയിൽ നിന്ന് തൊഴിലാളികൾക്ക് വിട്ടുനിൽക്കാൻ കഴിയുന്ന അവകാശം OSH&WC കോഡിന് കീഴിൽ വ്യക്തമായി ഉറപ്പുനൽകുന്നു. തൊഴിലുടമ നിർബന്ധമായും അന്വേഷണം നടത്തുകയും വിട്ടുനിൽക്കുന്ന തൊഴിലാളികൾക്ക് യാതൊരു പിഴയും ചുമത്താതിരിക്കുകയും വേണം. കൂടാതെ, ഗർഭിണികൾക്കും കൗമാരക്കാർക്കും പ്രത്യേക അവകാശങ്ങൾ ലഭിക്കുന്നു, കാരണം അപകടകരമായ പ്രക്രിയകളിൽ ഏർപ്പെടുന്നതിൽ നിന്ന് അവർ കർശനമായി വിലക്കപ്പെട്ടിരിക്കുന്നു. അനുവദനീയമായ ജോലികളിൽ വനിതാ തൊഴിലാളികൾക്ക് സുരക്ഷാ മേൽനോട്ടം നിർബന്ധമാണ്.

മുൻ നിയമങ്ങളും പുതിയ തൊഴിൽ കോഡുകളും തമ്മിലുള്ള താരതമ്യ വിശകലനം

മുമ്പ്, അപകടകരമായ ജോലികളിലെ തൊഴിലാളികൾ ഭിന്നിപ്പിച്ച വ്യവസ്ഥകൾക്ക് കീഴിലായിരുന്നു, അതിൽ നിയമനടത്തിപ്പ് സ്ഥിരമായിരുന്നില്ല, മെഡിക്കൽ പരിരക്ഷ പരിമിതമായിരുന്നു. ഇപ്പോൾ, OSH&WC കോഡിന് കീഴിൽ, മാനദണ്ഡങ്ങളുള്ള സംയോജിതവും പ്രതിരോധപരവുമായ ഒരു സുരക്ഷാ സംവിധാനം നിലവിലുണ്ട്, ഇത് സൗജന്യ വാർഷിക ആരോഗ്യ പരിശോധനകൾ, പരിശീലനം, PPE, അടിയന്തര ആസൂത്രണം തുടങ്ങിയ വ്യവസ്ഥകൾ വാഗ്ദാനം ചെയ്യുന്നു. അതുപോലെ, സാർവത്രിക സാമൂഹിക സുരക്ഷയുടെ പിന്തുണയോടെ നഷ്ടപരിഹാരവും SS കോഡിന് കീഴിൽ നൽകിയിട്ടുണ്ട്.

നിയമ ചട്ടക്കൂട്

മുമ്പ്, ഫാക്ടറീസ് ആക്ട് (അപകടകരമായ പ്രക്രിയ), മൈൻസ് ആക്ട്, ഡോക്ക് വർക്കേഴ്സ് ആക്ട്, ബിൽഡിംഗ് & മറ്റ് കൺസ്ട്രക്ഷൻ വർക്കേഴ്സ് ആക്ട് (BOCW Act) എന്നിവയ്ക്ക് കീഴിൽ പ്രത്യേക വ്യവസ്ഥകളുള്ള ഭിന്നിപ്പിച്ച നിയമങ്ങളായിരുന്നു ഉണ്ടായിരുന്നത്, അവയ്ക്ക് അവരുടേതായ അപകടകരമായ പ്രവർത്തനങ്ങളുടെ പട്ടികയുണ്ടായിരുന്നു. എന്നിരുന്നാലും, 2020-ലെ OSH&WC കോഡ് പ്രകാരം രാസ, ജൈവ, ഭൗതിക അപകടങ്ങൾ ഉൾപ്പെടുന്ന എല്ലാ വ്യവസായങ്ങൾക്കും ഇപ്പോൾ ഏകീകൃത നിർവചനങ്ങളുണ്ട്. അപകടകരമായ വസ്തുക്കളുടെ ഉപയോഗം, കൈകാര്യം ചെയ്യൽ, സംഭരണം, ഗതാഗതം എന്നിവയ്ക്കുള്ള മാനദണ്ഡങ്ങൾ പ്രത്യേക വ്യവസ്ഥകൾ നിർണ്ണയിക്കുന്നു. സുരക്ഷ, ആരോഗ്യം, ക്ഷേമം, അടിയന്തര പ്രതികരണം എന്നിവയ്ക്കായി ഒരു ഏകീകൃത ദേശീയ ചട്ടക്കൂടുമുണ്ട്.

അപകടകരമായ പ്രക്രിയകളുടെ തിരിച്ചറിയൽ

മുമ്പ്, ഒന്നിലധികം നിയമങ്ങൾക്ക് കീഴിലുള്ള വ്യത്യസ്ത പട്ടികകളും നിയമങ്ങളും ദുർബലമായ നിയമനടത്തിപ്പിലേക്ക് നയിച്ചു. ഇപ്പോൾ, OSH&WC കോഡിന് കീഴിലുള്ള ഏകീകൃത ഷെഡ്യൂൾ എല്ലാ അപകടകരമായ പ്രക്രിയകളും (ആസ്ബറ്റോസ്, വിഷ രാസവസ്തുക്കൾ, കീടനാശിനികൾ, റേഡിയോ ആക്ടീവ് വസ്തുക്കൾ മുതലായവ) പട്ടികപ്പെടുത്തുന്നു. കൂടാതെ, അപകടകരമായ പ്രക്രിയകൾ ആരംഭിക്കുന്നതിന് മുമ്പ് തൊഴിലുടമകൾ റിസ്‌ക് അസസ്‌മെൻ്റ് നടത്തുകയും മുൻകൂട്ടി അറിയിപ്പ് നൽകുകയും വേണം.

അടിയന്തര-ദുരന്ത മുന്നൊരുക്കം

ഫാക്ടറി ഇൻസ്പെക്ടറേറ്റുകളെയോ ദേശീയ ദുരന്ത നിവാരണ അതോറിറ്റിയുടെ (NDMA) മാർഗ്ഗനിർദ്ദേശങ്ങളെയോ ആശ്രയിച്ചിരുന്ന ഒരു ഏകീകൃത അടിയന്തര മാനേജ്മെൻ്റ് സംവിധാനം മുമ്പ് ഉണ്ടായിരുന്നില്ല. ഇപ്പോൾ, തൊഴിൽ കോഡുകൾ നിലവിൽ വന്നതോടെ, എല്ലാ അപകടകരമായ സ്ഥാപനങ്ങൾക്കും നിർബന്ധിത ഓൺ-സൈറ്റ് എമർജൻസി പ്ലാൻ, അടിയന്തര പ്രതികരണ സംവിധാനങ്ങൾ, ആറ് മാസത്തിലൊരിക്കലുള്ള മോക്ക് ഡ്രില്ലുകൾ എന്നിവ ആവശ്യമാണ്. കൂടാതെ, ബാഹ്യ ഏകോപനത്തിനായി പ്രാദേശിക ദുരന്ത നിവാരണ അതോറിറ്റിയുമായി ഔപചാരിക ബന്ധം സ്ഥാപിക്കേണ്ടതും ആവശ്യമാണ്.

പരിശോധനയും നിർവ്വഹണവും

മുമ്പ്, വ്യത്യസ്ത നിയമങ്ങൾക്കനുസരിച്ച് ഒന്നിലധികം ഇൻസ്പെക്ടറേറ്റുകളും അധികാരപരിധികൾ തമ്മിൽ ഓവർലാപ്പിംഗും നിലനിന്നിരുന്നു. എന്നാൽ ഇപ്പോൾ, റിസ്‌ക് അടിസ്ഥാനമാക്കിയുള്ള ഡിജിറ്റൽ പരിശോധനകൾ, സംയുക്ത കംപ്ലയൻസ് ഓഡിറ്റുകൾ, ലംഘനങ്ങൾക്കുള്ള കർശനമായ പിഴകൾ എന്നിവയോടുകൂടിയ ഏകീകൃത ഇൻസ്പെക്ടർ-കം-ഫെസിലിറ്റേറ്റർ സംവിധാനം നിലവിലുണ്ട്.

കൂടുതൽ സുരക്ഷിതവും ശാക്തീകരിക്കപ്പെട്ടതുമായ തൊഴിൽ ശക്തി

പുതിയ തൊഴിൽ കോഡുകൾ സുരക്ഷിതവും നീതിയുക്തവും കൂടുതൽ ഉത്തരവാദിത്തവുമുള്ള തൊഴിലിടങ്ങളിലേക്ക് – പ്രത്യേകിച്ച് അപകടകരമായ മേഖലയിലുള്ളവർക്ക് – ഒരു ഫലപ്രദമായ മാറ്റം അടയാളപ്പെടുത്തുന്നു. ശക്തമായ സുരക്ഷാ മാനദണ്ഡങ്ങൾ, സാർവത്രിക സാമൂഹിക സുരക്ഷ, ക്ഷേമ സൗകര്യങ്ങൾ, അടിയന്തര പ്രതികരണ സംവിധാനങ്ങൾ എന്നിവയിലൂടെ, സുരക്ഷ എന്നത് ഒരു പദവിയല്ല, ഒരു ഉറപ്പാണ് എന്ന നിലയിലേക്ക് ഇന്ത്യ ഒരു തൊഴിൽ ആവാസവ്യവസ്ഥ കെട്ടിപ്പടുക്കുകയാണ്. ഇന്ത്യ കൂടുതൽ ഉൽപ്പാദനക്ഷമവും എല്ലാവരെയും ഉൾക്കൊള്ളുന്നതും ഭാവിക്കായി തയ്യാറെടുക്കുന്നതുമായ സമ്പദ്‌വ്യവസ്ഥയിലേക്ക് നീങ്ങുമ്പോൾ, അത് ശ്രമേവ ജയതേ എന്ന മനോഭാവവുമായി യോജിക്കുന്നു – രാജ്യത്തെ മുന്നോട്ട് കൊണ്ടുപോകുന്ന ഓരോ തൊഴിലാളിയുടെയും സംഭാവനയെ ആദരിക്കുന്നു.

See in PDF

***

SK

(तथ्य सामग्री आईडी: 150607) आगंतुक पटल : 72