पत्र सूचना कार्यालय

ഇന്ത്യഹാൻഡ്‌മെയ്ഡ്: ഇന്ത്യയുടെ കരകൗശല പൈതൃകത്തിനായി ഒരു ഡിജിറ്റൽ പ്ലാറ്റ്‌ഫോം

കരകൗശല ജീവനോപാധികൾക്കായി ഒരു ഡിജിറ്റൽ ഇന്ത്യ പാലം

ലോകത്തിലെ തന്നെ ഏറ്റവും സമ്പന്നമായ കൈത്തറി-കരകൗശല പാരമ്പര്യങ്ങളിലൊന്നിന്റെ കേന്ദ്രമാണ് ഇന്ത്യ. ഈ മേഖല ഇന്ത്യയുടെ സാംസ്കാരിക പൈതൃകത്തെ പ്രതിനിധീകരിക്കുന്നുവെന്ന് മാത്രമല്ല, എല്ലാവരെയും ഉൾക്കൊള്ളുന്ന ജീവനോപാധികളുടെ ഒരു പ്രധാന സ്രോതസ്സ് കൂടിയാണ്.

വലിയൊരു വിഭാഗം കരകൗശല തൊഴിലാളികളും നെയ്ത്തുകാരുമുള്ളതിനാൽ ഇന്ത്യയുടെ വികസിച്ചുകൊണ്ടിരിക്കുന്ന വിപണിയിൽ ഈ മേഖലയ്ക്ക് ഇപ്പോഴും ഒരു സുപ്രധാന സ്ഥാനമുണ്ട്. വാണിജ്യം കൂടുതൽ ഡിജിറ്റലായി മാറിക്കൊണ്ടിരിക്കുമ്പോൾ ഓൺലൈൻ പ്രവേശനം ഈ കരകൗശല സമൂഹങ്ങളെ വിപണിയിൽ കൂടുതൽ നേരിട്ട് പങ്കെടുക്കാൻ സഹായിക്കുന്നു. ഡിജിറ്റൽ ഇന്ത്യ പദ്ധതിയിലൂടെ പരമ്പരാഗത ജീവനോപാധികൾക്ക് ഡിജിറ്റൽ വാണിജ്യത്തിനുള്ള അവസരങ്ങൾ കൂടുതലായി ലഭ്യമായിക്കൊണ്ടിരിക്കുകയാണ്.

2023-ൽ ആരംഭിച്ച ഇന്ത്യഹാൻഡ്‌മെയ്ഡ് ഈ ദർശനത്തെ ഒരു സമർപ്പിത ഡിജിറ്റൽ വിപണിയാക്കി മാറ്റുന്നു. കേന്ദ്ര ടെക്സ്റ്റൈൽസ് മന്ത്രാലയത്തിന് കീഴിലുള്ള ഡിജിറ്റൽ ഇന്ത്യ കോർപ്പറേഷൻ വികസിപ്പിച്ചെടുത്ത ഈ പ്ലാറ്റ്‌ഫോം, കൈകൊണ്ട് നിർമ്മിച്ച ഉൽപ്പന്നങ്ങളുടെ ദൃശ്യപരത ശക്തിപ്പെടുത്തുകയും വിൽപനക്കാർക്ക് കൂടുതൽ വിപുലമായ വിപണി അവസരങ്ങൾ തുറന്നുനൽകുകയും ചെയ്യുന്നു.

ഇന്ത്യഹാൻഡ്‌മെയ്ഡ് പ്ലാറ്റ്‌ഫോമിന്റെ പ്രധാന സവിശേഷതകൾ

വിൽപനക്കാരെയും വാങ്ങുന്നവരെയും കരകൗശല പൈതൃകത്തെയും പിന്തുണയ്ക്കുന്നതിനായി രൂപകൽപ്പന ചെയ്‌തിരിക്കുന്ന ഒരു കൂട്ടം സവിശേഷതകളിലൂടെ ഇന്ത്യഹാൻഡ്‌മെയ്ഡ് പാരമ്പര്യങ്ങളെ ഓൺലൈൻ വിപണിയിലേക്ക് കൊണ്ടുവരുന്നു:

• പ്രത്യേക ഓൺലൈൻ വിപണി: ഇത് നെയ്ത്തുകാർക്കും കരകൗശല തൊഴിലാളികൾക്കും അവരുടെ കൈത്തറി-കരകൗശല ഉൽപ്പന്നങ്ങൾ ഓൺലൈനായി വിൽക്കാൻ അവസരമൊരുക്കുന്നു.
• ഉപഭോക്താക്കളിലേക്ക് നേരിട്ടുള്ള പ്രവേശനം: കരകൗശല തൊഴിലാളികളും നെയ്ത്തുകാരും നേരിട്ട് ഉപഭോക്താക്കളുമായി ബന്ധിപ്പിക്കപ്പെടുന്നു; ഇത് ഇടനിലക്കാരെ കുറയ്ക്കുന്നതിനും ന്യായമായ പ്രതിഫലം ഉറപ്പാക്കുന്നതിനും സഹായിക്കുന്നു.
• കൂടുതൽ ദൃശ്യപരത: കരകൗശല ഉൽപ്പന്നങ്ങൾ കൂടുതൽ വിപുലമായ ഉപഭോക്തൃ ശൃംഖലയ്ക്ക് മുന്നിൽ ഈ പ്ലാറ്റ്‌ഫോം പ്രദർശിപ്പിക്കുന്നു. ഇത് വിൽപനക്കാർക്ക് വിപണി അവസരങ്ങൾ വർധിപ്പിക്കുന്നു.
• ഡിജിറ്റൽ ശാക്തീകരണം: ഓൺലൈൻ വാണിജ്യത്തിൽ കൂടുതൽ ഫലപ്രദമായി പങ്കെടുക്കുന്നതിനായി കരകൗശല തൊഴിലാളികൾക്കും നെയ്ത്തുകാർക്കും ഡിജിറ്റൽ ഉപകരണങ്ങളും ദൃശ്യപരതയും നൽകുന്നു.
• സാമ്പത്തിക-സാമൂഹിക ശാക്തീകരണം: വിപുലമായ വിപണി പ്രവേശനം ജീവനോപാധികളെ ശക്തിപ്പെടുത്തുകയും വരുമാന അവസരങ്ങളെ പിന്തുണയ്ക്കുകയും ചെയ്യുന്നു.
• സാംസ്കാരിക സംരക്ഷണം: വൈവിധ്യമാർന്ന കരകൗശല അധിഷ്ഠിത ഉൽപ്പന്നങ്ങൾ ഇന്ത്യയുടെ കരകൗശല പൈതൃകത്തെ സജീവമായി നിലനിർത്തുകയും പരമ്പരാഗത നൈപുണ്യങ്ങളെ ഭാവി തലമുറകൾക്കായി സംരക്ഷിക്കാൻ സഹായിക്കുകയും ചെയ്യുന്നു.

എന്തുകൊണ്ടാണ് ഇന്ത്യഹാൻഡ്‌മെയ്ഡ് വേറിട്ടുനിൽക്കുന്നത്

വിശ്വാസം, എളുപ്പത്തിലുള്ള പ്രവേശം, വിൽപനക്കാരുടെ ശാക്തീകരണം എന്നിവയെ മുൻനിർത്തിയാണ് ഈ പോർട്ടൽ രൂപകൽപ്പന ചെയ്തിരിക്കുന്നത്. കരകൗശല തൊഴിലാളികൾക്കും നെയ്ത്തുകാർക്കും ഉപഭോക്താക്കളിലേക്ക് എത്തിച്ചേരാനും ഉപഭോക്താക്കൾക്ക് കൂടുതൽ വിശ്വാസത്തോടെ കരകൗശല ഉൽപ്പന്നങ്ങൾ കണ്ടെത്താനും കഴിയുന്ന സുഗമമായ ഒരു വിപണിയാണ് ഇത് വാഗ്ദാനം ചെയ്യുന്നത്.

കരകൗശല വൈവിധ്യവും പ്രാദേശിക സ്വത്വവും

ദൈനംദിന ഉപയോഗത്തിനുള്ള കരകൗശല ഉൽപ്പന്നങ്ങൾക്കും അംഗീകൃത പ്രാദേശിക കരകൗശല വസ്തുക്കൾക്കുമായി ഒരുക്കിയ ഒരു ഡിജിറ്റൽ ഇടം ഈ പ്ലാറ്റ്‌ഫോം നൽകുന്നു. വസ്ത്രങ്ങൾ, ഗൃഹാലങ്കാര വസ്തുക്കൾ, ഫർണിഷിംഗുകൾ, പെയിന്റിംഗുകൾ, ഫർണിച്ചറുകൾ, പൂജാ/ആരാധനാ സാമഗ്രികൾ, സ്റ്റേഷനറി സാധനങ്ങൾ, സംഗീതോപകരണങ്ങൾ, ആഭരണങ്ങൾ, ബാഗുകൾ, പാദരക്ഷകൾ എന്നിവയുൾപ്പെടെ വിപുലമായ ഉൽപ്പന്നങ്ങൾ ഇത് വാഗ്ദാനം ചെയ്യുന്നു.

ജി.ഐ ടാഗുള്ളവയും ODOP ഉൽപ്പന്നങ്ങളും പോലുള്ള പ്രത്യേക ഉൽപ്പന്ന വിഭാഗങ്ങളെയും ഇത് എടുത്തുകാട്ടുന്നു. ഇത് അംഗീകൃത പ്രാദേശിക കരകൗശല ഉൽപ്പന്നങ്ങൾക്ക് കൂടുതൽ ദൃശ്യപരതയും ഒരു സവിശേഷ സ്വത്വവും നൽകുന്നു.

ODOP ഉൽപ്പന്നങ്ങൾ

സന്തുലിതമായ പ്രാദേശിക വളർച്ചയെ പിന്തുണയ്ക്കുന്നതിനായി ഓരോ ജില്ലയിൽ നിന്നും തനതായ ഒരു ഉൽപ്പന്നത്തെ കണ്ടെത്തുകയും പ്രോത്സാഹിപ്പിക്കുകയും ചെയ്യുന്ന പദ്ധതിയാണ് 'ഒരു ജില്ല ഒരു ഉൽപ്പന്നം' (ODOP). തങ്കൈൽ സാരികൾ, ബനാറസി സിൽക്ക് ഉൽപ്പന്നങ്ങൾ, ഇക്കത്ത്, ടസ്സർ സിൽക്ക് സാരികൾ, ചന്ദേരി സിൽക്ക്, ടെറാക്കോട്ട ഉൽപ്പന്നങ്ങൾ എന്നിവ ഈ പ്ലാറ്റ്‌ഫോമിൽ ഉൾപ്പെടുത്തിയിട്ടുണ്ട്.

ജി.ഐ ടാഗുള്ള ഉൽപ്പന്നങ്ങൾ

ജി.ഐ ടാഗുള്ള ഉൽപ്പന്നങ്ങൾക്ക് ഒരു ഭൗമസൂചിക ഉണ്ടായിരിക്കും. ഇത് അവയെ ഒരു പ്രത്യേക പ്രദേശത്തോടും ഗുണനിലവാരത്തോടും പ്രശസ്തിയോടും ബന്ധിപ്പിക്കുന്നു. ഈ പ്ലാറ്റ്‌ഫോം ഐപൻ കല, ശുദ്ധമായ പഷ്മിന ഷാളുകൾ, ഡോക്ര അലങ്കാര വസ്തുക്കൾ, മുണ്ട് ഉൽപ്പന്നങ്ങൾ എന്നിവ പോലുള്ള വൈവിധ്യമാർന്ന ജി.ഐ ടാഗുള്ള ഉൽപ്പന്നങ്ങൾ വാഗ്ദാനം ചെയ്യുന്നു.

വിശ്വാസ്യത വളർത്തലും വിൽപനക്കാരുടെ പങ്കാളിത്തം എളുപ്പമാക്കലും

മെച്ചപ്പെട്ട പ്രവേശം, മികച്ച ഉറപ്പ്: സൗജന്യ ഷിപ്പിംഗ്, പർച്ചേസ് പ്രൊട്ടക്ഷൻ, സുരക്ഷിത പേയ്‌മെന്റുകൾ, ഉപഭോക്താക്കൾക്കുള്ള പിന്തുണാ സംവിധാനങ്ങൾ എന്നിവയിലൂടെ കൂടുതൽ വിശ്വസനീയമായ ഒരു ഷോപ്പിംഗ് അനുഭവം ഉപഭോക്താക്കൾക്ക് ലഭിക്കുന്നു. കരകൗശല ഉൽപ്പന്നങ്ങൾ ആകർഷകമായ വിലയിൽ ലഭ്യമാക്കുന്നതിലൂടെ ഇത് വിശ്വാസ്യത കൂടുതൽ ശക്തമാക്കുകയും ചെയ്യുന്നു.

വിൽപനക്കാർക്ക് ലളിതമായ ഓൺബോർഡിംഗ്: കരകൗശല തൊഴിലാളികൾക്കും നെയ്ത്തുകാർക്കും ഉൽപാദക സംഘടനകൾക്കും ഈ വിപണിയിലേക്ക് പ്രവേശിക്കുന്നതിനായി വ്യക്തമായ മാർഗ്ഗനിർദ്ദേശങ്ങളോടെയുള്ള ഒരു ഓൺബോർഡിംഗ് രീതി ഈ പ്ലാറ്റ്‌ഫോം നൽകുന്നു.

വിപണിക്ക് പിന്നിലെ വിജയഗാഥകൾ

ഡിജിറ്റൽ വാണിജ്യത്തിലൂടെ പരമ്പരാഗത കരകൗശല വിദ്യകൾ അഭിവൃദ്ധിപ്പെടുത്തുന്ന കരകൗശല തൊഴിലാളികളും നെയ്ത്തുകാരും സംരംഭങ്ങളുമാണ് ഈ പ്ലാറ്റ്‌ഫോമിന് പിന്നിലുള്ളത്.

സാന്റാംസ് കരകൗശലത്തിന്റെ ഊഷ്മളത ദൈനംദിന ജീവിതത്തിലേക്ക് എത്തിക്കുന്നു. തടി കൊണ്ടുള്ള അലങ്കാര വസ്തുക്കളും സുഗന്ധപൂരിത മെഴുകുതിരികളും മുതൽ ടെറാക്കോട്ട വിളക്കുകൾ, മാർബിൾ വിഗ്രഹങ്ങൾ, കൈത്തറി സാരികൾ എന്നിവ വരെയുള്ള ഇവരുടെ ഓരോ ഉൽപ്പന്നങ്ങളിലും അതീവ ശ്രദ്ധയും പാരമ്പര്യവും സൗന്ദര്യബോധവും പ്രതിഫലിക്കുന്നു.

ദസ്ത്കർ ക്രാഫ്റ്റ് ചൂരൽ, മുള ഉൽപ്പന്നങ്ങളിലൂടെ അഞ്ഞൂറിലധികം കരകൗശല തൊഴിലാളികളുടെ നൈപുണ്യത്തെ ആധുനിക വീടുകളിലേക്ക് എത്തിക്കുന്നു. സമകാലിക വീടുകൾക്ക് തികച്ചും അനുയോജ്യമാകുന്നതോടൊപ്പം ഇന്ത്യയുടെ പൈതൃകത്തെ ഉയർത്തിപ്പിടിക്കുന്നതുമായ ഉയർന്ന ഗുണനിലവാരമുള്ള, കയറ്റുമതി യോഗ്യമായ ഉൽപ്പന്നങ്ങളാണ് അവർ നിർമ്മിക്കുന്നത്.

വില്ലേജസ് ക്രാഫ്റ്റ് കൈത്തറി പാരമ്പര്യങ്ങളുടെ ലാളിത്യത്തെയും കരുത്തിനെയും ആഘോഷമാക്കുന്നു. വിദഗ്ധരായ കരകൗശല തൊഴിലാളികൾ അതീവ ശ്രദ്ധയോടെ നിർമ്മിക്കുന്ന ഇവരുടെ കോട്ടൺ തോർത്തുകൾ, ഗംച്ഛകൾ, ബെഡ്ഷീറ്റുകൾ എന്നിവ ദൈനംദിന അത്യാവശ്യ വസ്തുക്കളെ സുഖസൗകര്യങ്ങളിലും ഗുണനിലവാരത്തിലും പൈതൃകത്തിലും വേരൂന്നിയ ഉൽപ്പന്നങ്ങളാക്കി മാറ്റുന്നു.

ഈ കഥകൾ കരകൗശല ഉൽപ്പന്നങ്ങൾക്ക് പിന്നിലുള്ള മനുഷ്യമുഖങ്ങളെ വെളിപ്പെടുത്തുന്നു. പാരമ്പര്യവും നൈപുണ്യവും ജീവനോപാധിയും എങ്ങനെയാണ് ഈ ഡിജിറ്റൽ വിപണിയിൽ ഒത്തുചേരുന്നതെന്ന് ഇത് കാണിച്ചുതരുന്നു.

ഇന്ത്യയുടെ പൈതൃകത്തെ ഡിജിറ്റൽ ഭാവിയിലേക്ക് നയിക്കുന്നു

കരകൗശല മേഖലയെ ഒരു ജീവനോപാധി എന്ന നിലയിലും ഇന്ത്യയുടെ സാംസ്കാരിക വ്യക്തിത്വത്തിന്റെ പ്രതിഫലനമെന്ന നിലയിലും അംഗീകരിച്ചുകൊണ്ട് ഡിജിറ്റൽ ഇന്ത്യയുടെ യഥാർത്ഥ മനോഭാവത്തെയാണ് ഇന്ത്യഹാൻഡ്‌മെയ്ഡ് പ്രതിഫലിപ്പിക്കുന്നത്. 60 ലക്ഷത്തിലധികം കരകൗശല തൊഴിലാളികളെ പ്ലാറ്റ്‌ഫോമിൽ ഉൾപ്പെടുത്താനുള്ള പദ്ധതികളോടെ ഇത് ആത്മനിർഭർ ഭാരത് എന്ന ദർശനത്തെ പിന്തുണയ്ക്കുന്നു. ഇത് കരകൗശല തൊഴിലാളികൾക്കും നെയ്ത്തുകാർക്കും കൂടുതൽ വിപുലമായ വിപണി പ്രവേശം നൽകുന്നതോടൊപ്പം വിശ്വസ്തതയോടും എളുപ്പത്തോടും കൂടി കരകൗശല ഉൽപ്പന്നങ്ങൾ കണ്ടെത്താൻ ഉപഭോക്താക്കളെ സഹായിക്കുകയും ചെയ്യുന്നു.

ഓരോ കരകൗശല ഉൽപ്പന്നത്തിലൂടെയും ഇന്ത്യയുടെ പരമ്പരാഗത പൈതൃകം വരുംതലമുറകൾക്കായി ജീവനോപാധികൾക്കും അവസരങ്ങൾക്കും തുടർന്നും പ്രചോദനമേകുന്നുവെന്ന് ഈ പ്ലാറ്റ്‌ഫോം ഉറപ്പാക്കുന്നു.

അവലംബം

Ministry of Electronics & Information Technology:

https://www.digitalindia.gov.in/initiative/india-handmade/

Ministry of Commerce & Industry:

https://ipindia.gov.in/page-content/geographical-indications-an-introduction

Ministry of Textiles:

https://www.pib.gov.in/PressReleasePage.aspx?PRID=2152551&reg=48&lang=2

https://www.pib.gov.in/PressReleaseIframePage.aspx?PRID=1919216&reg=48&lang=2

Ministry of Development of North-East Region:

https://www.pib.gov.in/PressReleasePage.aspx?PRID=2201421&reg=48&lang=2

Indiahandmade Platform:

https://www.indiahandmade.com

https://www.indiahandmade.com/marketplace/?srsltid=AfmBOookWpSt6aCR_kyx8SK_SyVuchTGhk8pJGa7WO7Bq1SdXhXPQ1vL&utm_source=chatgpt.com#account_info

https://www.indiahandmade.com/static/version1782981084/frontend/ESHILP/theme/en_US/images/SOP_Seller-Registration-English.pdf

PIB Archives:

https://www.pib.gov.in/PressNoteDetails.aspx?ModuleId=3&NoteId=156396&id=156396&lang=1&reg=3

Click here to see pdf 

***

NK

(तथ्य सामग्री आईडी: 150731) आगंतुक पटल : 11