Social Welfare
ಪೋಷಣ್ ಟ್ರಾಕರ್
प्रविष्टि तिथि:
08 JUL 2026 15:11 PM
ಭಾರತದ ನೈಜ-ಸಮಯದ ಪೌಷ್ಟಿಕಾಂಶ ಮೇಲ್ವಿಚಾರಣಾ ವೇದಿಕೆ
ಪೋಷಣ್ ಟ್ರಾಕರ್: ತಂತ್ರಜ್ಞಾನ-ಚಾಲಿತ ಪೌಷ್ಟಿಕಾಂಶ ಆಡಳಿತವನ್ನು ಸಕ್ರಿಯಗೊಳಿಸುವುದು
ಪೋಷಣ್ ಅಭಿಯಾನ (ಪ್ರಧಾನಮಂತ್ರಿಯ ಸಮಗ್ರ ಪೌಷ್ಟಿಕಾಂಶ ಅಭಿಯಾನ) ಭಾರತದ ಪ್ರಮುಖ ರಾಷ್ಟ್ರೀಯ ಪೌಷ್ಟಿಕಾಂಶ ಮಿಷನ್ ಆಗಿದ್ದು, ಇದು ಒಮ್ಮುಖ, ತಂತ್ರಜ್ಞಾನ ಮತ್ತು ಸಮುದಾಯ ಸಜ್ಜುಗೊಳಿಸುವಿಕೆಯ ಮೂಲಕ ಪೌಷ್ಟಿಕಾಂಶದ ಫಲಿತಾಂಶಗಳನ್ನು ಸುಧಾರಿಸುವತ್ತ ಗಮನಹರಿಸುತ್ತದೆ. ಮಾರ್ಚ್ 8, 2018 ರಂದು ಪ್ರಾರಂಭವಾದ ಇದು, ಭಾರತ ಸರ್ಕಾರದ ಪ್ರಮುಖ ಬಹು-ಸಚಿವಾಲಯಗಳ ಮಿಷನ್ ಆಗಿದ್ದು, ಇದು ಸಮಯಬದ್ಧ ಗುರಿಗಳು, ಡಿಜಿಟಲ್ ಮೇಲ್ವಿಚಾರಣೆ ಮತ್ತು 'ಜನ್ ಆಂದೋಲನ' (ಜನ ಚಳವಳಿ) ವಿಧಾನದೊಂದಿಗೆ ಏಕೀಕೃತ ಚೌಕಟ್ಟಿನ ಅಡಿಯಲ್ಲಿ ಕಾರ್ಯನಿರ್ವಹಿಸುತ್ತದೆ. ಮಹಿಳಾ ಮತ್ತು ಮಕ್ಕಳ ಅಭಿವೃದ್ಧಿ ಸಚಿವಾಲಯದ ಅಡಿಯಲ್ಲಿ ಬರುವ ಈ ಮಿಷನ್, ಪೌಷ್ಟಿಕಾಂಶವನ್ನು ಕೇವಲ ಕಲ್ಯಾಣ ಕಾಳಜಿಯಿಂದ ರಾಷ್ಟ್ರೀಯ ಅಭಿವೃದ್ಧಿಯ ಆದ್ಯತೆಯಾಗಿ ಪರಿವರ್ತಿಸಿದೆ.
ನಂತರ, 2021-22ರ ಬಜೆಟ್ ಅಡಿಯಲ್ಲಿ, ಪೌಷ್ಟಿಕಾಂಶಕ್ಕೆ ಸಂಬಂಧಿಸಿದ ಮೂರು ಯೋಜನೆಗಳಾದ ಪೋಷಣ್ ಅಭಿಯಾನ, ಅಂಗನವಾಡಿ ಸೇವೆಗಳು ಮತ್ತು ಹದಿಹರೆಯದ ಹುಡುಗಿಯರಿಗಾಗಿನ ಯೋಜನೆಗಳನ್ನು 'ಮಿಷನ್ ಪೋಷಣ್ 2.0' (ಮಿಷನ್ ಸಕ್ಷಮ್ ಅಂಗನವಾಡಿ ಮತ್ತು ಪೋಷಣ್ 2.0) ಅಡಿಯಲ್ಲಿ ಕ್ರೋಢೀಕರಿಸಲಾಯಿತು.
ಪೋಷಣ್ ಟ್ರಾಕರ್ ಎನ್ನುವುದು ಪೋಷಣ್ ಅಭಿಯಾನದ ಡಿಜಿಟಲ್ ಬೆನ್ನೆಲುಬಾಗಿ ಕಾರ್ಯನಿರ್ವಹಿಸುವ ಮೊಬೈಲ್-ಆಧಾರಿತ ಆಡಳಿತಾತ್ಮಕ ಅಪ್ಲಿಕೇಶನ್ ಆಗಿದೆ. ಇದು ಅಭಿಯಾನದ ಅಡಿಯಲ್ಲಿ ಡಿಜಿಟಲ್ ಮೇಲ್ವಿಚಾರಣೆಯನ್ನು ಬಲಪಡಿಸುವ ಪ್ರಾಥಮಿಕ ಆಡಳಿತ ಸಾಧನವಾಗಿ ಕಾರ್ಯನಿರ್ವಹಿಸುತ್ತದೆ. ಇದನ್ನು ಮಾರ್ಚ್ 2021 ರಲ್ಲಿ ಮಹಿಳಾ ಮತ್ತು ಮಕ್ಕಳ ಅಭಿವೃದ್ಧಿ ಸಚಿವಾಲಯ ಮತ್ತು ರಾಷ್ಟ್ರೀಯ ಇ-ಆಡಳಿತ ವಿಭಾಗದ ಮೂಲಕ ಸಕ್ಷಮ್ ಅಂಗನವಾಡಿ ಮತ್ತು ಪೋಷಣ್ 2.0 ಅಡಿಯಲ್ಲಿ ಪ್ರಾರಂಭಿಸಲಾಯಿತು. ಇದು ಏಕೀಕೃತ ಡಿಜಿಟಲ್ ವೇದಿಕೆಯ ಮೂಲಕ ಅಂಗನವಾಡಿ ಸೇವೆಗಳ ಅಡಿಯಲ್ಲಿ ಪೌಷ್ಟಿಕಾಂಶ ಮತ್ತು ಸೇವಾ ವಿತರಣೆಯ ನೈಜ-ಸಮಯದ ಮೇಲ್ವಿಚಾರಣೆಯನ್ನು ಸಕ್ರಿಯಗೊಳಿಸುತ್ತದೆ.
ಪೋಷಣ್ ಟ್ರಾಕರ್ ಅಂಗನವಾಡಿ ಮೂಲಸೌಕರ್ಯ, ಸೇವಾ ವಿತರಣೆ, ಫಲಾನುಭವಿಗಳ ವ್ಯಾಪ್ತಿ ಮತ್ತು ಬೆಳವಣಿಗೆಯ ಮೇಲ್ವಿಚಾರಣೆಯ ದತ್ತಾಂಶವನ್ನು ಸೆರೆಹಿಡಿಯುತ್ತದೆ. ಸ್ಮಾರ್ಟ್ಫೋನ್ಗಳು ಮತ್ತು ಇಂಟರ್ನೆಟ್ ಸಂಪರ್ಕವು ಅಂಗನವಾಡಿ ಕಾರ್ಯಕರ್ತೆಯರಿಂದ ಸುಗಮವಾಗಿ ಮಾಹಿತಿ ದಾಖಲಿಸಲು ಸಹಕಾರಿಯಾಗಿದೆ. ನೈಜ-ಸಮಯದ ಡ್ಯಾಶ್ಬೋರ್ಡ್ಗಳು ಜಿಲ್ಲಾ, ರಾಜ್ಯ ಮತ್ತು ರಾಷ್ಟ್ರೀಯ ಮಟ್ಟದಲ್ಲಿ ಪಾರದರ್ಶಕ ಮತ್ತು ಸಾಕ್ಷ್ಯಾಧಾರಿತ ನಿರ್ಧಾರಗಳನ್ನು ತೆಗೆದುಕೊಳ್ಳಲು ಬೆಂಬಲಿಸುತ್ತವೆ. ಪೋಷಣ್ ಟ್ರಾಕರ್ ಅಂಗನವಾಡಿ ಕಾರ್ಯಕರ್ತೆಯರಿಗೆ ನೆರವಾಗುತ್ತಿದ್ದು, ಮಕ್ಕಳಲ್ಲಿ ಕಂಡುಬರುವ ಕುಂಠಿತ ಬೆಳವಣಿಗೆ, ಕೃಶತೆ ಮತ್ತು ಕಡಿಮೆ ತೂಕದ ಸಮಸ್ಯೆಗಳನ್ನು ಕ್ರಿಯಾತ್ಮಕವಾಗಿ ಗುರುತಿಸಲು ಮತ್ತು ಪೌಷ್ಟಿಕಾಂಶ ಸೇವಾ ವಿತರಣೆಯ ಅಂತಿಮ ಹಂತದ ಟ್ರ್ಯಾಕಿಂಗ್ಗಾಗಿ ಇದನ್ನು ಬಳಸಲಾಗುತ್ತಿದೆ.
|
ನಿಮಗೆ ಗೊತ್ತೇ?
ಭಾರತ ಸರ್ಕಾರದ 'ಸಕ್ಷಮ್ ಅಂಗನವಾಡಿ ಮತ್ತು ಪೋಷಣ್ 2.0' ಸಂಯೋಜಿತ ಕಾರ್ಯಕ್ರಮವು ಅಪೌಷ್ಟಿಕತೆಯನ್ನು ಹೋಗಲಾಡಿಸುವತ್ತ ಮತ್ತು ಆರೋಗ್ಯ, ಕ್ಷೇಮ ಹಾಗೂ ರೋಗನಿರೋಧಕ ಶಕ್ತಿಯನ್ನು ಉತ್ತೇಜಿಸುವತ್ತ ಗಮನಹರಿಸುತ್ತದೆ. ಈ ಪುನರ್ರಚಿತ ಮಿಷನ್, ಮಕ್ಕಳು, ಗರ್ಭಿಣಿಯರು, ಬಾಣಂತಿಯರು ಮತ್ತು ಹದಿಹರೆಯದ ಹುಡುಗಿಯರಿಗೆ ಪೌಷ್ಟಿಕಾಂಶದ ಬೆಂಬಲ; ಬಾಲ್ಯದ ಆರಂಭಿಕ ಆರೈಕೆ ಮತ್ತು ಶಿಕ್ಷಣ (3-6 ವರ್ಷದ ಮಕ್ಕಳಿಗೆ) ಹಾಗೂ ಆರಂಭಿಕ ಪ್ರಚೋದನೆ (0-3 ವರ್ಷದ ಮಕ್ಕಳಿಗೆ); ಮತ್ತು ಅಂಗನವಾಡಿ ಕೇಂದ್ರಗಳನ್ನು 'ಸಕ್ಷಮ್ ಅಂಗನವಾಡಿ'ಗಳಾಗಿ ಮೇಲ್ದರ್ಜೆಗೇರಿಸುವುದನ್ನು ಒಳಗೊಂಡಿದೆ. ಸಕ್ಷಮ್ ಅಂಗನವಾಡಿ ಉಪಕ್ರಮವು ಎಲ್ಇಡಿ ಪರದೆಗಳು, ನೀರಿನ ಶುದ್ಧೀಕರಣ ಘಟಕಗಳು, ಸ್ಮಾರ್ಟ್ ಕಲಿಕಾ ಸಾಧನಗಳು ಮತ್ತು ಪೋಷಣ್ ವಾಟಿಕಾಗಳ (ಪೌಷ್ಟಿಕಾಂಶದ ತೋಟಗಳು)ಂತಹ ಆಧುನಿಕ ಸೌಲಭ್ಯಗಳೊಂದಿಗೆ ಅಸ್ತಿತ್ವದಲ್ಲಿರುವ ಅಂಗನವಾಡಿ ಕೇಂದ್ರಗಳನ್ನು ಮೇಲ್ದರ್ಜೆಗೇರಿಸುವ ಮೂಲಕ ಸೇವಾ ಗುಣಮಟ್ಟವನ್ನು ಸುಧಾರಿಸುವುದರ ಮೇಲೆ ಕೇಂದ್ರೀಕರಿಸುತ್ತದೆ.
|
ಪೋಷಣ್ ಟ್ರಾಕರ್ನ ಸುಧಾರಿತ ವೈಶಿಷ್ಟ್ಯಗಳು
ಪೋಷಣ್ ಟ್ರಾಕರ್ ಬರುವ ಮುನ್ನ, ಅಂಗನವಾಡಿ ಕಾರ್ಯಕರ್ತೆಯರು 11 ಕೈಪಿಡಿ ರಿಜಿಸ್ಟರ್ಗಳನ್ನು ನಿರ್ವಹಿಸಬೇಕಾಗಿತ್ತು. ಇದು ನಿರ್ಧಾರ ತೆಗೆದುಕೊಳ್ಳುವಿಕೆಯನ್ನು ವಿಳಂಬಗೊಳಿಸಿತು ಮತ್ತು ಸೇವಾ ವಿತರಣೆಯಲ್ಲಿ ಅಂತರಗಳನ್ನು ಸೃಷ್ಟಿಸಿತು. ಮನೆಗಳಿಗೆ ಭೇಟಿ ನೀಡುವುದು ಹೆಚ್ಚಾಗಿ ವೈಯಕ್ತಿಕ ಜ್ಞಾನ ಮತ್ತು ಅನುಭವವನ್ನು ಅವಲಂಬಿಸಿತ್ತು, ಇದರಿಂದಾಗಿ ಮೌಲ್ಯಮಾಪನಗಳಲ್ಲಿ ಅಸಂಗತತೆ ಉಂಟಾಗುತ್ತಿತ್ತು. ಅಲ್ಲದೆ, ಫಲಾನುಭವಿಗಳ ದೃಢೀಕರಣ ವ್ಯವಸ್ಥೆ ಅಥವಾ ರಾಜ್ಯ ಮತ್ತು ಕೇಂದ್ರ ಯೋಜನೆಗಳೊಂದಿಗೆ ಯಾವುದೇ ಸಂಯೋಜನೆ ಇರಲಿಲ್ಲ, ಇದು ಅಪೌಷ್ಟಿಕತೆಯನ್ನು ಎದುರಿಸುವಲ್ಲಿ ದಕ್ಷತೆಯನ್ನು ಕಡಿಮೆ ಮಾಡಿತ್ತು.
ಈ ಅಂತರಗಳನ್ನು ನೀಗಿಸಲು ಪೋಷಣ್ ಟ್ರಾಕರ್ ಹಲವಾರು ತಂತ್ರಜ್ಞಾನ-ಚಾಲಿತ ವೈಶಿಷ್ಟ್ಯಗಳನ್ನು ಪರಿಚಯಿಸಿದೆ:
- ಆಧಾರ್ ಆಧಾರಿತ ಪರಿಶೀಲನೆ: ಇದು ಸೋರಿಕೆಯನ್ನು ತಡೆಯುತ್ತದೆ, ನಕಲಿ ಫಲಾನುಭವಿಗಳನ್ನು (ghost entries) ತೆಗೆದುಹಾಕುತ್ತದೆ ಮತ್ತು ನೋಂದಾಯಿತ ಫಲಾನುಭವಿಗಳಿಗೆ ಮಾತ್ರ ಸೌಲಭ್ಯಗಳು ತಲುಪುವುದನ್ನು ಖಚಿತಪಡಿಸುತ್ತದೆ.
- ಮುಖ ಗುರುತಿಸುವಿಕೆ ವ್ಯವಸ್ಥೆ: ಕೊನೆಯ ಹಂತದ ಟ್ರ್ಯಾಕಿಂಗ್ ಮತ್ತು ಸೇವಾ ವಿತರಣೆಯ ದೃಢೀಕರಣಕ್ಕಾಗಿ ಇದನ್ನು ಸಂಯೋಜಿಸಲಾಗಿದೆ.
- ಐಟಿ-ಸಕ್ರಿಯಗೊಳಿಸಿದ ಮನೆ ಭೇಟಿಗಳ ವೇಳಾಪಟ್ಟಿ : ಇದು ಸ್ವಯಂ-ವೇಳಾಪಟ್ಟಿ ಮತ್ತು ವಯಸ್ಸಿಗೆ ಅನುಗುಣವಾದ ಕೌನ್ಸೆಲಿಂಗ್ ಸೂಚನೆಗಳೊಂದಿಗೆ 23 ರಚನಾತ್ಮಕ ಮನೆ ಭೇಟಿಗಳನ್ನು ಬೆಂಬಲಿಸುತ್ತದೆ. ಇವುಗಳಲ್ಲಿ ಗರ್ಭಾವಸ್ಥೆಯಲ್ಲಿ 4 ಭೇಟಿಗಳು, ಪ್ರಸವಾನಂತರದ ಮೊದಲ ತಿಂಗಳಲ್ಲಿ 4 ಭೇಟಿಗಳು, 2 ತಿಂಗಳಿಂದ 1 ವರ್ಷದವರೆಗೆ 7 ಭೇಟಿಗಳು, 1–2 ವರ್ಷದವರೆಗೆ 5 ಭೇಟಿಗಳು ಮತ್ತು 2–3 ವರ್ಷದವರೆಗೆ 3 ಭೇಟಿಗಳು ಸೇರಿವೆ.
- ಇಸಿಸಿಇ ವಿಷಯ ವಿತರಣೆ: 3–6 ವರ್ಷದ ಮಕ್ಕಳಿಗೆ 'ಆಧಾರ್ಶಿಲಾ' ಆಧಾರಿತ 249 ವಿಡಿಯೋಗಳು, 190 ಧ್ವನಿ ಟಿಪ್ಪಣಿಗಳು ಮತ್ತು 159 ಇಸಿಸಿಇ ಚಟುವಟಿಕೆಗಳ ಪಿಡಿಎಫ್ಗಳನ್ನು ಇದು ಒದಗಿಸುತ್ತದೆ.
|
ನಿಮಗೆ ಗೊತ್ತೇ?
ಮಾರ್ಚ್ 2024ರಲ್ಲಿ ಪ್ರಾರಂಭಿಸಲಾದ 'ಆಧಾರ್ಶಿಲಾ', 3–6 ವರ್ಷ ವಯಸ್ಸಿನ ಮಕ್ಕಳಿಗಾಗಿ ರೂಪಿಸಲಾದ ಆರಂಭಿಕ ಬಾಲ್ಯದ ಆರೈಕೆ ಮತ್ತು ಶಿಕ್ಷಣದ ರಾಷ್ಟ್ರೀಯ ಪಠ್ಯಕ್ರಮವಾಗಿದೆ. ಅಂಗನವಾಡಿ ಕೇಂದ್ರಗಳ ಮೂಲಕ ಅನುಷ್ಠಾನಗೊಳಿಸಲಾದ ಈ ಪಠ್ಯಕ್ರಮವು ಆಟಿಕೆಗಳು, ಕಲೆ, ಸಂಗೀತ ಮತ್ತು ಕಥೆ ಹೇಳುವಿಕೆಯ ಮೂಲಕ ಆಟದ ಆಧಾರಿತ ಕಲಿಕೆಯನ್ನು ಉತ್ತೇಜಿಸುತ್ತದೆ. "ಅಡಿಪಾಯದ ಕಲ್ಲು" ಎಂಬ ಅರ್ಥವನ್ನು ಹೊಂದಿರುವ 'ಆಧಾರ್ಶಿಲಾ', ಮಕ್ಕಳ ಬೌದ್ಧಿಕ, ಸಾಮಾಜಿಕ, ಭಾವನಾತ್ಮಕ ಮತ್ತು ದೈಹಿಕ ಬೆಳವಣಿಗೆಯನ್ನು ಬೆಂಬಲಿಸುತ್ತದೆ ಮತ್ತು ಅವರನ್ನು 1ನೇ ತರಗತಿಗೆ ಸಿದ್ಧಗೊಳಿಸುತ್ತದೆ.
|
- ಪೋಷಣ್ ಕ್ಯಾಲ್ಕುಲೇಟರ್: ಇದು ವಿಶ್ವ ಆರೋಗ್ಯ ಸಂಸ್ಥೆಯ ಮಕ್ಕಳ ಬೆಳವಣಿಗೆಯ ಮಾನದಂಡಗಳನ್ನು ಬಳಸಿಕೊಂಡು ಎತ್ತರ, ತೂಕ, ವಯಸ್ಸು ಮತ್ತು ಲಿಂಗವನ್ನು ಆಧರಿಸಿ ಮಕ್ಕಳ ಬೆಳವಣಿಗೆಯನ್ನು ಮೌಲ್ಯಮಾಪನ ಮಾಡುತ್ತದೆ. ಇದು ಮಕ್ಕಳನ್ನು ಕುಂಠಿತ ಬೆಳವಣಿಗೆ, ಕಡಿಮೆ ತೂಕ, ಕೃಶತೆ, ಎಸ್ಎಎಂ/ಎಂಎಎಂ ಮತ್ತು ಅಧಿಕ ತೂಕ/ಬೊಜ್ಜು ಎಂದು ವರ್ಗೀಕರಿಸುವ ಮೂಲಕ ಪ್ರಮಾಣಿತ ಮತ್ತು ನಿಖರವಾದ ಬೆಳವಣಿಗೆಯ ಮೇಲ್ವಿಚಾರಣೆಯನ್ನು ಖಚಿತಪಡಿಸುತ್ತದೆ.
- ಪೋಷಣ್ ಸಹಾಯವಾಣಿ: ಕುಂದುಕೊರತೆಗಳನ್ನು ನೋಂದಾಯಿಸಲು ಟೋಲ್-ಫ್ರೀ ಸಂಖ್ಯೆ 1515 (ನವೆಂಬರ್ 2025 ರಿಂದ ಜಾರಿಯಲ್ಲಿದೆ).
- ಸ್ಮಾರ್ಟ್ಫೋನ್ ಮತ್ತು ಸಂಪರ್ಕ: ಎಲ್ಲಾ ಅಂಗನವಾಡಿ ಕಾರ್ಯಕರ್ತೆಯರಿಗೆ ಸ್ಮಾರ್ಟ್ಫೋನ್ಗಳನ್ನು ಒದಗಿಸಲಾಗಿದೆ; ಪ್ರತಿ ಅಂಗನವಾಡಿ ಕಾರ್ಯಕರ್ತೆಗೆ ವಾರ್ಷಿಕ ₹2,000 ಇಂಟರ್ನೆಟ್ ಸಂಪರ್ಕ ಶುಲ್ಕವನ್ನು ನೀಡಲಾಗುತ್ತದೆ. ಪ್ರತಿಯೊಂದು ಅಂಗನವಾಡಿ ಕೇಂದ್ರದಲ್ಲಿ ಬೆಳವಣಿಗೆ ಮೇಲ್ವಿಚಾರಣಾ ಸಾಧನಗಳನ್ನು ಒದಗಿಸಲಾಗಿದೆ.
ಈ ಸುಧಾರಿತ ವೈಶಿಷ್ಟ್ಯಗಳು ತಳಮಟ್ಟದಲ್ಲಿ ಪೌಷ್ಟಿಕಾಂಶದ ಮಧ್ಯಸ್ಥಿಕೆಗಳ ದಕ್ಷತೆ, ಸ್ಥಿರತೆ ಮತ್ತು ಸ್ಪಂದನಶೀಲತೆಯನ್ನು ಹೆಚ್ಚಿಸಿವೆ.
ಪೌಷ್ಟಿಕಾಂಶಯುಕ್ತ ಭಾರತದತ್ತ ಒಂದು ಹೆಜ್ಜೆ: ಪ್ರಗತಿಯ ಮೇಲ್ವಿಚಾರಣೆ
ಪೋಷಣ್ ಟ್ರಾಕರ್ ಅನ್ನು ಹಂತ ಹಂತವಾಗಿ ಜಾರಿಗೆ ತರಲಾಯಿತು. ರಾಷ್ಟ್ರವ್ಯಾಪಿ ವಿಸ್ತರಣೆಗೂ ಮುನ್ನ ಪ್ರಾಯೋಗಿಕ ಯೋಜನೆಗಳ ಮೂಲಕ ಇದನ್ನು ಪ್ರಾರಂಭಿಸಲಾಯಿತು. ಕ್ಲೌಡ್ ಮೂಲಸೌಕರ್ಯವನ್ನು ಬಳಸುವ ಮೂಲಕ, ಈ ವೇದಿಕೆಯು ಹೆಚ್ಚಿನ ಪ್ರಮಾಣದ ದತ್ತಾಂಶಗಳನ್ನು ಮತ್ತು ಏಕಕಾಲದಲ್ಲಿ ಬಳಸುವ ಬಳಕೆದಾರರನ್ನು ಸಮರ್ಥವಾಗಿ ನಿರ್ವಹಿಸುತ್ತದೆ, ಇದು ವ್ಯವಸ್ಥೆಯ ಮಾಪನೀಯತೆಯನ್ನು ಖಚಿತಪಡಿಸುತ್ತದೆ. ಸುಧಾರಿತ ಡ್ಯಾಶ್ಬೋರ್ಡ್ಗಳು ನೈಜ-ಸಮಯದ ದೃಶ್ಯ ಒಳನೋಟಗಳನ್ನು ಒದಗಿಸುತ್ತವೆ, ಇದು ಸಂಬಂಧಪಟ್ಟ ಅಧಿಕಾರಿಗಳು ಪೌಷ್ಟಿಕಾಂಶದ ಅಂತರಗಳನ್ನು ತ್ವರಿತವಾಗಿ ಪರಿಹರಿಸಲು ಅನುವು ಮಾಡಿಕೊಡುತ್ತದೆ. ರಾಜ್ಯ ಮಟ್ಟದ ಸಂಯೋಜಕರು ಮತ್ತು ನಿಯಮಿತ ವರ್ಚುವಲ್ ಸಂವಹನಗಳ ಬೆಂಬಲದೊಂದಿಗೆ 'ತರಬೇತುದಾರರಿಗೆ ತರಬೇತಿ' ಮಾದರಿಯು ನಿರಂತರ ತರಬೇತಿಯನ್ನು ಸುಗಮಗೊಳಿಸುತ್ತದೆ. ನಿರಂತರ ಮೇಲ್ವಿಚಾರಣೆ ಮತ್ತು ಸಮಯಬದ್ಧ ನಿರ್ದೇಶನಗಳು ಯೋಜನೆಯ ಅನುಸರಣೆಯನ್ನು ಖಚಿತಪಡಿಸುತ್ತವೆ.
- ಮೇ 2026 ರವರೆಗೆ, ಭಾರತ ಸರ್ಕಾರವು ಎಲ್ಲಾ 28 ರಾಜ್ಯಗಳು ಮತ್ತು 8 ಕೇಂದ್ರಾಡಳಿತ ಪ್ರದೇಶಗಳಲ್ಲಿ ಪೋಷಣ್ ಟ್ರಾಕರ್ನ ರಾಷ್ಟ್ರವ್ಯಾಪಿ ವ್ಯಾಪ್ತಿಯನ್ನು ಸಾಧಿಸಿದೆ.
- ಮೇ 2026 ರ ಅಂತ್ಯದ ವೇಳೆಗೆ, ಪೋಷಣ್ ಟ್ರಾಕರ್ 8.93 ಕೋಟಿಗೂ ಹೆಚ್ಚು ಫಲಾನುಭವಿಗಳನ್ನು ನೋಂದಾಯಿಸಿದೆ. ಈ ವೇದಿಕೆಯು ಬಾಲ್ಯ ಮತ್ತು ಹದಿಹರೆಯದಿಂದ ಹಿಡಿದು ಗರ್ಭಧಾರಣೆ ಮತ್ತು ಮಾತೃತ್ವದವರೆಗೆ ಜೀವನಚಕ್ರದ ಆರು ಫಲಾನುಭವಿ ವರ್ಗಗಳನ್ನು ಒಳಗೊಂಡಿದೆ, ಇದು 'ಪೋಷಣ್ ಅಭಿಯಾನ'ದ ಸಮಗ್ರ ಮತ್ತು ಅಂತರ್ಗತ ವಿಧಾನವನ್ನು ಪ್ರತಿಬಿಂಬಿಸುತ್ತದೆ.
- ಅಂಗನವಾಡಿ ಸೇವೆಗಳ ಅಡಿಯಲ್ಲಿ ಬರುವ 'ಪೂರಕ ಪೌಷ್ಟಿಕಾಂಶ ಕಾರ್ಯಕ್ರಮ'ವನ್ನು ಪೋಷಣ್ ಟ್ರಾಕರ್ ಕ್ರಿಯಾತ್ಮಕವಾಗಿ ಮೇಲ್ವಿಚಾರಣೆ ಮಾಡಲು ನೆರವಾಗುತ್ತದೆ. ಮೇ 2026ರ ದತ್ತಾಂಶದ ಪ್ರಕಾರ, 5.5 ಕೋಟಿಗೂ ಹೆಚ್ಚು ಫಲಾನುಭವಿಗಳು ಕನಿಷ್ಠ 15 ದಿನಗಳ ಕಾಲ SNP ಸೌಲಭ್ಯವನ್ನು ಪಡೆದಿದ್ದರೆ, 5.17 ಕೋಟಿ ಫಲಾನುಭವಿಗಳು ಕನಿಷ್ಠ 21 ದಿನಗಳ ಕಾಲ SNP ಸೌಲಭ್ಯವನ್ನು ಪಡೆದುಕೊಂಡಿದ್ದಾರೆ.
|
ನಿಮಗೆ ಗೊತ್ತೇ?
ಮಹಿಳಾ ಮತ್ತು ಮಕ್ಕಳ ಅಭಿವೃದ್ಧಿ ಸಚಿವಾಲಯವು ಮಹಿಳೆಯರು ಮತ್ತು ಮಕ್ಕಳ ಪೌಷ್ಟಿಕಾಂಶದ ಮಟ್ಟವನ್ನು ಸುಧಾರಿಸಲು 'ಸಮಗ್ರ ಶಿಶು ಅಭಿವೃದ್ಧಿ ಸೇವೆಗಳ' ಯೋಜನೆಯಡಿ 'ಪೂರಕ ಪೌಷ್ಟಿಕಾಂಶ ಕಾರ್ಯಕ್ರಮ'ವನ್ನು ಅನುಷ್ಠಾನಗೊಳಿಸುತ್ತಿದೆ. ಈ ಕಾರ್ಯಕ್ರಮವು 6 ತಿಂಗಳಿಂದ 6 ವರ್ಷದೊಳಗಿನ ಮಕ್ಕಳು, ಗರ್ಭಿಣಿಯರು, ಬಾಣಂತಿಯರು ಮತ್ತು ಶಾಲೆಯಿಂದ ಹೊರಗುಳಿದ 11–14 ವರ್ಷ ವಯಸ್ಸಿನ ಹದಿಹರೆಯದ ಹುಡುಗಿಯರನ್ನು ಒಳಗೊಂಡಿದೆ.
|
- ಜುಲೈ 2026ರಂತೆ, ಪೋಷಣ್ ಟ್ರಾಕರ್ [Aadhaar Redacted] ಸಂಖ್ಯೆಯ ಮೂಲಕ ದೃಢೀಕರಿಸಲ್ಪಟ್ಟ ದತ್ತಾಂಶವನ್ನು ಬಳಸಿಕೊಂಡು 7.7 ಕೋಟಿಗೂ ಹೆಚ್ಚು ಮಕ್ಕಳ ಪೌಷ್ಟಿಕಾಂಶ ಸೂಚಕಗಳನ್ನು ಟ್ರ್ಯಾಕ್ ಮಾಡುವ ಲೈವ್ ಮಾಸಿಕ ಡೇಟಾಬೇಸ್ ಅನ್ನು ನಿರ್ವಹಿಸುತ್ತಿದೆ. ಈ ವೇದಿಕೆಯು ನೈಜ-ಸಮಯದ ಡ್ಯಾಶ್ಬೋರ್ಡ್ಗಳು, ಹೀಟ್ ಮ್ಯಾಪ್ಗಳು ಮತ್ತು ಸಾಕ್ಷ್ಯಾಧಾರಿತ ನೀತಿ ನಿರೂಪಣೆಗೆ ಅನುವು ಮಾಡಿಕೊಡುತ್ತದೆ.
- ಅಲ್ಲದೆ, ಮೇ 2026ರವರೆಗೆ ನೋಂದಾಯಿತ ಫಲಾನುಭವಿಗಳಲ್ಲಿ ಸುಮಾರು 94% ರಷ್ಟು ಅಂದರೆ, 0–5 ವರ್ಷ ವಯಸ್ಸಿನ 6.3 ಕೋಟಿಗೂ ಹೆಚ್ಚು ಮಕ್ಕಳ ಬೆಳವಣಿಗೆಯನ್ನು ಈ ಟ್ರ್ಯಾಕರ್ ಮೂಲಕ ಮೇಲ್ವಿಚಾರಣೆ ಮಾಡಲಾಗಿದೆ. ಈ ಅಪ್ಲಿಕೇಶನ್ ಮಕ್ಕಳಲ್ಲಿನ ಕುಂಠಿತ ಬೆಳವಣಿಗೆ, ಕಡಿಮೆ ತೂಕ, ಕೃಶತೆ ಮತ್ತು ಅಧಿಕ ತೂಕ/ಬೊಜ್ಜು ಸೂಚಕಗಳನ್ನು ಟ್ರ್ಯಾಕ್ ಮಾಡುತ್ತದೆ.
ಪೋಷಣ್ ಟ್ರಾಕರ್: ಡಿಜಿಟಲ್ ಇಂಡಿಯಾದ ಯಶಸ್ಸಿನ ಕಥೆ
ಪೋಷಣ್ ಟ್ರಾಕರ್, ಬೃಹತ್ ಪ್ರಮಾಣದ ಸಾರ್ವಜನಿಕ ಸೇವಾ ವಿತರಣೆಗಾಗಿ ಸರ್ಕಾರವು ತಂತ್ರಜ್ಞಾನವನ್ನು ಹೇಗೆ ಯಶಸ್ವಿಯಾಗಿ ಬಳಸುತ್ತಿದೆ ಎಂಬುದಕ್ಕೆ ಉತ್ತಮ ನಿದರ್ಶನವಾಗಿದೆ. ಇದು ಕಾಗದ-ಆಧಾರಿತ ವರದಿಗಾರಿಕೆಯನ್ನು ನೈಜ-ಸಮಯದ, ಸಾಕ್ಷ್ಯಾಧಾರಿತ ಪೌಷ್ಟಿಕಾಂಶ ಆಡಳಿತವನ್ನಾಗಿ ಪರಿವರ್ತಿಸಿದೆ. ಈ ವೇದಿಕೆಯು ಸಕಾಲಿಕ, ತಳಮಟ್ಟದ ದತ್ತಾಂಶದ ಮೂಲಕ ಪಾರದರ್ಶಕ ಮತ್ತು ಉತ್ತರದಾಯಿತ್ವದ ನಿರ್ಧಾರಗಳನ್ನು ಬಲಪಡಿಸುತ್ತದೆ. ವಿಶ್ವ ಆರೋಗ್ಯ ಇದನ್ನು ಒಂದು ಮಾದರಿ ಪೌಷ್ಟಿಕಾಂಶ ದತ್ತಾಂಶ ಪರಿಸರ ವ್ಯವಸ್ಥೆ ಎಂದು ಉಲ್ಲೇಖಿಸಿದೆ. ಯುನಿಸೆಫ್ ಇದರ ಸರಳತೆ ಮತ್ತು ಅಂಗನವಾಡಿ ಕಾರ್ಯಕರ್ತೆಯರಿಗಾಗಿ ಇರುವ ಫಲಾನುಭವಿಗಳ ಟ್ರ್ಯಾಕಿಂಗ್ ವೈಶಿಷ್ಟ್ಯಗಳನ್ನು ಶ್ಲಾಘಿಸಿದೆ. 2023 ರಲ್ಲಿ, ಮಹಿಳಾ ಸಬಲೀಕರಣದ ಕುರಿತಾದ ಜಿ20 ಸಚಿವರ ಸಮ್ಮೇಳನದಲ್ಲಿ ಪೋಷಣ್ ಟ್ರಾಕರ್ ಅನ್ನು ಪ್ರದರ್ಶಿಸಲಾಯಿತು. ಅಧ್ಯಕ್ಷರ ಹೇಳಿಕೆಯು ಪೌಷ್ಟಿಕಾಂಶ ಮೇಲ್ವಿಚಾರಣೆ ಮತ್ತು ಇಸಿಸಿಇ ವಿತರಣೆಯಲ್ಲಿ ಇದರ ಪಾತ್ರವನ್ನು ಗುರುತಿಸಿದೆ. 2024 ರಲ್ಲಿ, ಮಹಿಳಾ ಮತ್ತು ಮಕ್ಕಳ ಅಭಿವೃದ್ಧಿ ಸಚಿವಾಲಯವು ಸಾರ್ವಜನಿಕ ಆಡಳಿತದಲ್ಲಿನ ಶ್ರೇಷ್ಠತೆಗಾಗಿ ಪ್ರಧಾನ ಮಂತ್ರಿಯ ಪ್ರಶಸ್ತಿಯನ್ನು ಪಡೆದುಕೊಂಡಿದೆ. ಪೋಷಣ್ ಟ್ರಾಕರ್, ಡಿಜಿಟಲ್ ಇಂಡಿಯಾ ದೃಷ್ಟಿಕೋನದ ಅಡಿಯಲ್ಲಿ ಭಾರತದ ಬೆಳೆಯುತ್ತಿರುವ ಡಿಜಿಟಲ್ ಸಾಮರ್ಥ್ಯವನ್ನು ಪ್ರತಿಬಿಂಬಿಸುತ್ತದೆ ಮತ್ತು ಸುಪೋಷಿತ 'ವಿಕ್ಷಿತ್ ಭಾರತ'ವನ್ನು (ಅಭಿವೃದ್ಧಿ ಹೊಂದಿದ ಭಾರತ) ನಿರ್ಮಿಸುವಲ್ಲಿ ಕೇಂದ್ರಬಿಂದುವಾಗಿ ಉಳಿಯಲಿದೆ.
References:
Ministry of Women and Child Development
Poshan Tracker
Digital India Corporation
DD News
Click here to see pdf
*****
(तथ्य सामग्री आईडी: 150746)
आगंतुक पटल : 18
Provide suggestions / comments