पत्र सूचना कार्यालय

ബിസിനസ് സജ്ജമായ ഒരു ഇന്ത്യ കെട്ടിപ്പടുക്കൽ

ബിസിനസ് എളുപ്പമാക്കുന്നു, സംരംഭങ്ങളെ ശാക്തീകരിക്കുന്നു

സംരംഭങ്ങളുടെ നേതൃത്വത്തിലുള്ള വളർച്ച സാധ്യമാക്കുന്നു

ഇന്ത്യയുടെ 80-ാം സ്വാതന്ത്ര്യദിനം ആഘോഷിക്കുമ്പോൾ സ്വയംപര്യാപ്തവും പ്രതിരോധശേഷിയുള്ളതും വികസിക്കുന്നതുമായ ഒരു സാമ്പത്തിക വ്യവസ്ഥയുടെ അടിത്തറ ശക്തിപ്പെടുത്തുന്നത് രാജ്യം തുടരുകയാണ്. നിയമാനുവർത്തന ബുദ്ധിമുട്ടുകൾ കുറയ്ക്കുക, സുതാര്യത വർധിപ്പിക്കുക, സംരംഭകത്വം പ്രോത്സാഹിപ്പിക്കുക, എല്ലാത്തരം സംരംഭങ്ങൾക്കും കൂടുതൽ അവസരങ്ങൾ സൃഷ്ടിക്കുക എന്നിവ ലക്ഷ്യമിട്ടുള്ള പരിഷ്കാരങ്ങൾ ഗവൺമെന്റ് നടപ്പിലാക്കിയിട്ടുണ്ട്.

ഡിജിറ്റൽ ഏകജാലക സംവിധാനങ്ങൾ, ലളിതമാക്കിയ ലയന നടപടിക്രമങ്ങൾ, വിപുലമായ വിപണിലഭ്യത, ധനസഹായത്തിനുള്ള മെച്ചപ്പെട്ട അവസരങ്ങൾ, വിശ്വാസ്യതയിലധിഷ്ഠിതമായ ചട്ടങ്ങൾ എന്നിവയിലൂടെ ഈ ശ്രമങ്ങൾ ബിസിനസ് എളുപ്പമാക്കൽ അന്തരീക്ഷത്തെ മുന്നോട്ട് നയിക്കുന്നു.

ഇന്ത്യയുടെ ബിസിനസ്സ് അന്തരീക്ഷം പരിഷ്കരിക്കൽ

ഡിജിറ്റൽ ഏകജാലകാനുമതികൾ മുതൽ വലിയ തോതിലുള്ള നിയമ ലളിതവൽക്കരണങ്ങൾ വരെ മുൻകൂട്ടി പ്രവചിക്കാവുന്നതും സഹായകരവുമായ ഒരു ബിസിനസ്സ് അന്തരീക്ഷം സൃഷ്ടിക്കുന്നതിലാണ് പരിഷ്കാരങ്ങൾ ശ്രദ്ധ കേന്ദ്രീകരിക്കുന്നത്.

• ദേശീയ ഏകജാലക സംവിധാനം (NSWS): ബിസിനസ്സ് ആവശ്യകതകൾക്ക് അനുസൃതമായി അനുമതികൾ കണ്ടെത്തുന്നതിനും അപേക്ഷിക്കുന്നതിനും വഴികാട്ടുന്ന ഒരു ഡിജിറ്റൽ പ്ലാറ്റ്‌ഫോമാണിത്. ഈ സംവിധാനം 32 കേന്ദ്ര മന്ത്രാലയങ്ങളിലെയും 34 സംസ്ഥാനങ്ങളിലെയും അനുമതികളെ സംയോജിപ്പിക്കുന്നു. ഇത് 686-ലധികം കേന്ദ്ര അനുമതികളിലേക്കും 7,498-ലധികം സംസ്ഥാന അനുമതികളിലേക്കും പ്രവേശനം നൽകുന്നു. 2021-ൽ ആരംഭിച്ചതിനുശേഷം ഈ സംവിധാനം വഴി 8.29 ലക്ഷത്തിലധികം അനുമതികൾ നൽകിയിട്ടുണ്ട് (2025 നവംബർ വരെ).
• സ്റ്റാർട്ടപ്പ് ഇന്ത്യ (2016): സംരംഭകരെ പിന്തുണയ്ക്കാനും ശക്തമായ ഒരു നവസംരംഭക ആവാസവ്യവസ്ഥ കെട്ടിപ്പടുക്കാനും ഈ പദ്ധതി ലക്ഷ്യമിടുന്നു. ഇന്ത്യയെ തൊഴിലന്വേഷകരുടെ രാജ്യത്തിന് പകരം തൊഴിൽ സ്രഷ്ടാക്കളുടെ രാജ്യമാക്കി മാറ്റാൻ ഇത് ശ്രമിക്കുന്നു. കേന്ദ്ര വാണിജ്യ, വ്യവസായ മന്ത്രാലയത്തിന്റെ അംഗീകാരമുള്ള സ്റ്റാർട്ടപ്പുകളുടെ എണ്ണം 2016-ലെ 502-ൽ നിന്ന് 2026 ഓഗസ്റ്റ് 12 വരെയുള്ള കണക്കനുസരിച്ച് 2.47 ലക്ഷത്തിലധികമായി വർധിച്ചു.

• SPICe+ പ്ലസ് ഫോം (2020): ഈ വെബ്-അധിഷ്ഠിത ഫോം 3 കേന്ദ്ര മന്ത്രാലയങ്ങളിൽ നിന്നും വകുപ്പുകളിൽ നിന്നുമുള്ള 11 സേവനങ്ങളെ സംയോജിപ്പിക്കുന്നു. ഡൽഹിയിൽ രജിസ്റ്റർ ചെയ്യുന്ന എല്ലാ പുതിയ കമ്പനികൾക്കുമായി പേര് റിസർവ് ചെയ്യൽ, കമ്പനി രൂപീകരണം, ഡയറക്ടർ ഐഡന്റിഫിക്കേഷൻ നമ്പർ അനുവദിക്കൽ, PAN വിതരണം, TAN വിതരണം, പ്രൊവിഡന്റ് ഫണ്ട് രജിസ്ട്രേഷൻ, ഇൻഷുറൻസ് രജിസ്ട്രേഷൻ, തൊഴിൽ നികുതി രജിസ്ട്രേഷൻ, ബാങ്ക് അക്കൗണ്ട് ആരംഭിക്കൽ, ചരക്കുസേവന നികുതി നമ്പർ അനുവദിക്കൽ, കടകളുടെയും സ്ഥാപനങ്ങളുടെയും ആദ്യത്തെ രജിസ്ട്രേഷൻ എന്നിവയുൾപ്പെടെ 10 പ്രധാന നടപടിക്രമങ്ങൾ ഈ ഫോം സംയോജിപ്പിക്കുന്നു. ഇതിലൂടെ ഇത് നടപടിക്രമങ്ങളുടെ ബുദ്ധിമുട്ട് കുറയ്ക്കുകയും സമയം ലാഭിക്കുകയും ബിസിനസ്സുകളുടെ നിയമാനുവർത്തന ചെലവുകൾ കുറയ്ക്കുകയും ചെയ്യുന്നു.
• MCA21 V3: നിർമിത ബുദ്ധിയിലധിഷ്ഠിതമായതും ഭാവി മുൻനിർത്തിയുള്ളതുമായ ഈ പദ്ധതി ഇന്ത്യയുടെ കോർപ്പറേറ്റ് മേഖലയിലെ സുതാര്യത ഗണ്യമായി വർധിപ്പിക്കുന്നു. കമ്പനികളുടെയും പരിമിത ബാധ്യത പങ്കാളിത്തങ്ങളുടെയും (LLP) രജിസ്ട്രേഷൻ സംബന്ധമായ പൂർണ്ണ സേവനങ്ങൾക്കായി ഈ പ്ലാറ്റ്‌ഫോം ഉപയോഗിക്കുന്നു. 2021-നും 2025-നും ഇടയിൽ ഇത് 3.84 കോടി അപേക്ഷകൾ കൈകാര്യം ചെയ്തു. അതിൽ 3.33 കോടിയും നേരിട്ട് അംഗീകരിച്ചു.
• ഉദ്യം രജിസ്ട്രേഷൻ (2020): ഇത് സൂക്ഷ്മ, ചെറുകിട, ഇടത്തരം സംരംഭങ്ങൾക്ക് സൗജന്യവും കടലാസുരഹിതവും സ്വയം സാക്ഷ്യപ്പെടുത്തൽ അധിഷ്ഠിതവുമായ ഒരു സംവിധാനം വാഗ്ദാനം ചെയ്യുന്നു. ഉദ്യം പോർട്ടലിലെ സംരംഭക രജിസ്ട്രേഷനുകൾ 2020 ഒക്ടോബറിലെ 10000-ത്തിൽ നിന്ന് 2026 ഓഗസ്റ്റ് 13-ഓടെ 9.27 ലക്ഷത്തിലധികമായി വർധിച്ചു.
• ബിസിനസ് പരിഷ്കരണ കർമ്മ പദ്ധതി: 2015-ൽ ആരംഭിച്ച ഈ പദ്ധതി സംസ്ഥാനങ്ങളിലും കേന്ദ്രഭരണ പ്രദേശങ്ങളിലും നിയന്ത്രണങ്ങൾ ലളിതമാക്കിക്കൊണ്ടും സുതാര്യത മെച്ചപ്പെടുത്തിക്കൊണ്ടും ബിസിനസ് എളുപ്പമാക്കുന്നത് പ്രോത്സാഹിപ്പിക്കുന്നു. ഏകജാലക അനുമതികൾ, ഭൂമി, തൊഴിൽ, പരിശോധനകൾ, നികുതി ചുമത്തൽ, പരിസ്ഥിതി അനുമതികൾ തുടങ്ങിയ മേഖലകളിലെ പരിഷ്കാരങ്ങൾ ഇതിൽ ഉൾപ്പെടുന്നു.

സംരംഭകത്വ വളർച്ചയ്ക്കായി ധനസഹായ അവസരങ്ങൾ തുറക്കുന്നു

വായ്പാ ഗ്യാരന്റികൾ, ഡിജിറ്റൽ വായ്പകൾ എന്നിവ പ്രത്യേകിച്ച് സൂക്ഷ്മ-ചെറുകിട സംരംഭങ്ങൾക്ക് ഔദ്യോഗിക സാമ്പത്തിക സഹായങ്ങളിലേക്കുള്ള പ്രവേശനം വിപുലമാക്കുന്നു.

• പ്രധാൻ മന്ത്രി മുദ്ര യോജന: കമ്പനിയിതര, കാർഷികേതര വരുമാനദായക പ്രവർത്തനങ്ങളെ പിന്തുണയ്ക്കുന്നതിനായി 20 ലക്ഷം രൂപ വരെയുള്ള ഈടില്ലാത്ത വായ്പകൾ നൽകി സാമ്പത്തിക ലഭ്യതയിലെ വിടവ് ഈ പദ്ധതി നികത്തുന്നു. പദ്ധതി ആരംഭിച്ചതിനുശേഷം 2026 മാർച്ച് 27 വരെയുള്ള കണക്കനുസരിച്ച് 57.79 കോടി വായ്പകളിലൂടെ 40.07 ലക്ഷം കോടി രൂപയുടെ വായ്പകൾ അനുവദിച്ചിട്ടുണ്ട്.
• വായ്പാ ഗ്യാരന്റി പദ്ധതി: 10 കോടി രൂപ വരെയുള്ള വായ്പാ സൗകര്യങ്ങളുടെ പിന്തുണയോടെ ഈടോ മൂന്നാം കക്ഷി ഗ്യാരന്റിയോ ഇല്ലാതെ വായ്പ നേടാൻ സൂക്ഷ്മ-ചെറുകിട സംരംഭങ്ങളെ ഇത് പ്രാപ്തമാക്കുന്നു. 2026 മാർച്ച് വരെയുള്ള കണക്കനുസരിച്ച് ഈ പദ്ധതി വഴി 1.41 കോടി ഗ്യാരന്റികൾക്ക് പ്രയോജനം ചെയ്തുകൊണ്ട് ആകെ 13.67 ലക്ഷം കോടി രൂപയുടെ സുരക്ഷാ പരിരക്ഷയ്ക്ക് അംഗീകാരം നൽകി.
• വായ്പാ വിലയിരുത്തൽ മാതൃക (CAM): പൊതുമേഖലാ ബാങ്കുകൾ 2025-ൽ ആരംഭിച്ച ഈ സംവിധാനം ഡിജിറ്റലായി ശേഖരിച്ച വിവരങ്ങൾ ഉപയോഗിച്ച് സംരംഭങ്ങളുടെ വായ്പാ വിലയിരുത്തലുകൾ നടത്തുന്നു. 2025 ഏപ്രിലിനും ഡിസംബറിനും ഇടയിൽ ഈ മാതൃകയ്ക്ക് കീഴിൽ 52,300 കോടിയിലധികം രൂപയുടെ 3.96 ലക്ഷത്തിലധികം അപേക്ഷകൾക്ക് അംഗീകാരം നൽകി.
• TReDS (ട്രേഡ് റിസീവബിൾസ് ഡിസ്കൗണ്ടിംഗ് സിസ്റ്റം): വിവിധ ധനകാര്യ സ്ഥാപനങ്ങൾ വഴി സൂക്ഷ്മ-ചെറുകിട-ഇടത്തരം സംരംഭങ്ങളുടെ ബിസിനസ് കുടിശ്ശിക തുകകൾക്ക് വായ്പ ലഭ്യമാക്കുന്നതിനും ഡിസ്കൗണ്ട് ചെയ്യുന്നതിനും സഹായിക്കുന്ന ഒരു ഇലക്ട്രോണിക് പ്ലാറ്റ്‌ഫോമാണിത്. ഇൻവോയ്സ് ഡിസ്കൗണ്ടിംഗിനായുള്ള വായ്പാ സുരക്ഷാ സംവിധാനവും കേന്ദ്ര പൊതുമേഖലാ സ്ഥാപനങ്ങളുടെ ഇടപാടുകൾക്കായി ഇത് ഉപയോഗിക്കുന്നതും ഉൾപ്പെടെ ഈ സംവിധാനത്തെ ശക്തിപ്പെടുത്തുന്നതിനുള്ള നടപടികൾ 2026-27 കേന്ദ്ര ബജറ്റിൽ നിർദ്ദേശിച്ചിട്ടുണ്ട്. ഈ പ്ലാറ്റ്‌ഫോം വൻ വളർച്ച കൈവരിച്ചിട്ടുണ്ട്, ഇൻവോയ്സ് ഡിസ്കൗണ്ടിംഗ് 2021-22-ലെ 40,000 കോടി രൂപയിൽ നിന്ന് 2025-26-ൽ 3.47 ലക്ഷം കോടി രൂപയായി വർധിച്ചു.

നിയമാനുവർത്തനത്തിൽ നിന്ന് വിശ്വാസ്യതയിലൂന്നിയ ഭരണത്തിലേക്ക്

ഇന്ത്യയുടെ നിയമ പരിഷ്കാരങ്ങൾ നടപടിക്രമങ്ങൾ ഡിജിറ്റലാക്കുന്നതിനപ്പുറം അനാവശ്യ ആവശ്യകതകൾ കുറയ്ക്കുന്നതിലേക്കും ചെറിയ രീതിയിലുള്ള ലംഘനങ്ങളെ കുറ്റകൃത്യമല്ലാതാക്കി മാറ്റുന്നതിലേക്കും ബിസിനസ്സുകൾക്ക് കൂടുതൽ വ്യക്തത സൃഷ്ടിക്കുന്നതിലേക്കും പുരോഗമിക്കുകയാണ്.

• ജൻ വിശ്വാസ് (വ്യവസ്ഥകളുടെ ഭേദഗതി) നിയമം, 2026: 23 മന്ത്രാലയങ്ങൾക്ക് കീഴിലുള്ള 79 കേന്ദ്ര നിയമങ്ങളിലായി 717 വ്യവസ്ഥകളെ കുറ്റകൃത്യമല്ലാതാക്കുകയും 784 വ്യവസ്ഥകളിൽ ഭേദഗതി വരുത്തുകയും ചെയ്യുന്നു. ചെറിയതും സാങ്കേതികവുമായ ലംഘനങ്ങൾക്കുള്ള ക്രിമിനൽ ഉത്തരവാദിത്തം കുറച്ചുകൊണ്ട് ഇത് വിശ്വാസ്യതയിലൂന്നിയ ഭരണത്തെ ശക്തിപ്പെടുത്തുന്നു.
• നിയമാനുവർത്തന ബുദ്ധിമുട്ട്: ഈ പദ്ധതി നിയമങ്ങൾ ലളിതമാക്കുകയും അനാവശ്യ ആവശ്യകതകൾ കുറയ്ക്കുകയും ചെയ്തുകൊണ്ട് നിയമാനുവർത്തന ചെലവുകൾ കുറയ്ക്കുകയും ബിസിനസ് എളുപ്പമാക്കൽ അന്തരീക്ഷം ശക്തിപ്പെടുത്തുകയും ചെയ്യുന്നു. 2025 നവംബർ വരെയുള്ള കണക്കനുസരിച്ച് 16,108 എണ്ണം ലളിതമാക്കിയതും 22,287 എണ്ണം ഡിജിറ്റലാക്കിയതും 4,458 എണ്ണം കുറ്റകൃത്യമല്ലാതാക്കിയതും 4,270 അനാവശ്യ നിയമങ്ങൾ നീക്കം ചെയ്തതും ഉൾപ്പെടെ 47,000-ത്തിലധികം നിയമാനുസരണ ബുദ്ധിമുട്ടുകൾ കുറച്ചിട്ടുണ്ട്.
• GST 2.0: 2017-ൽ അവതരിപ്പിച്ച GST നിരവധി പരോക്ഷ നികുതികൾക്ക് പകരം ഏകീകൃത ദേശീയ നികുതി ഘടന കൊണ്ടുവന്നു. 2025 സെപ്റ്റംബറിൽ പ്രഖ്യാപിച്ച പരിഷ്കാരങ്ങൾ നികുതി നിരക്കുകൾ കൂടുതൽ യുക്തിസഹമാക്കുകയും ലളിതമായ രണ്ട് നിരക്കുകളുള്ള ഘടനയിലേക്ക് മാറുകയും ചെയ്തു. ഇത് നിയമാനുവർത്തന, ഇടപാട് ചെലവുകൾ കുറച്ചു. രജിസ്റ്റർ ചെയ്ത നികുതിദായകരുടെ എണ്ണം 2017-ലെ ഏകദേശം 60 ലക്ഷത്തിൽ നിന്ന് 2026 ജൂലൈ 31 ഓടെ 1.68 കോടിയിലധികമായി വർധിച്ചു, ഇത് ഔദ്യോഗിക സാമ്പത്തിക മേഖലയുടെ വളർച്ചയെ പ്രതിഫലിപ്പിക്കുന്നു.
• ഫേസ്‍ലെസ് നികുതി നിർണ്ണയ പദ്ധതി: ഈ പദ്ധതി നികുതിദായകരും നികുതി ഉദ്യോഗസ്ഥരും തമ്മിലുള്ള നേരിട്ടുള്ള സമ്പർക്കം ഒഴിവാക്കുന്നു. കേസുകളുടെ ഓട്ടോമേറ്റഡ് തിരഞ്ഞെടുപ്പ്, ക്രമരഹിത വിതരണം, നികുതിദായകരുമായുള്ള ആശയവിനിമയത്തിനായുള്ള കേന്ദ്രീകൃത സംവിധാനം എന്നിവ തുടർച്ചയായ സന്ദർശനങ്ങളും കാത്തിരിപ്പ് സമയവും കുറയ്ക്കുന്നു. ഈ രീതി ആധികാരികവും വസ്തുനിഷ്ഠവും സുസ്ഥിരവുമായ നികുതി നിർണ്ണയങ്ങളെ പ്രോത്സാഹിപ്പിക്കുകയും നികുതി നിയമാനുവർത്തനം കൂടുതൽ കാര്യക്ഷമവും സുതാര്യവുമാക്കുകയും ചെയ്യുന്നു.

ഇന്ത്യൻ സംരംഭങ്ങൾക്കായി വിപണികൾ വികസിപ്പിക്കുന്നു

ഇന്ത്യയുടെ ഡിജിറ്റൽ പൊതു അടിസ്ഥാനസൗകര്യങ്ങൾ സംരംഭങ്ങൾക്കായി പുതിയ വിപണികൾ തുറന്നുനൽകുന്നു. ചരക്കുനീക്കത്തിലും വിവിധ ഗതാഗത മാർഗ്ഗങ്ങളെ ബന്ധിപ്പിക്കുന്നതിലുമുള്ള നിക്ഷേപങ്ങൾ ബിസിനസ്സുകൾക്ക് സാധനങ്ങൾ വേഗത്തിലും കൂടുതൽ കാര്യക്ഷമമായും എത്തിക്കാൻ സഹായിക്കുന്നു.

• ഗവൺമെന്റ് ഇ-മാർക്കറ്റ്‌പ്ലേസ് ((GeM - 2016): ഗവൺമെന്റ് ഇ-മാർക്കറ്റ്‌പ്ലേസ് പൊതുസംഭരണത്തെ ഡിജിറ്റലാക്കുകയും വിവിധ ബിസിനസ്സുകൾക്കുള്ള വിപണി ലഭ്യത വിപുലീകരിക്കുകയും ചെയ്യുന്നു. 2026 ഓഗസ്റ്റ് 6 വരെയുള്ള കണക്കനുസരിച്ച് ഈ സംവിധാനം 1.37 ലക്ഷത്തിലധികം ഗവൺമെന്റ് ഉപഭോക്താക്കളുടെ സംഘടനകളെ ഏകദേശം 25 ലക്ഷം വിൽപ്പനക്കാരുമായും സേവന ദാതാക്കളുമായും ബന്ധിപ്പിക്കുന്നു. ഇത് 20 ലക്ഷം കോടിയിലധികം രൂപയുടെ മൊത്തം സംഭരണം സാധ്യമാക്കി. 2025-26-ൽ 75 ലക്ഷത്തിലധികം ഓർഡറുകൾ പൂർത്തിയാക്കി.

• പി.എം ഗതിശക്തി (2021): ഇത് ഒരു ഏകീകൃത ഡിജിറ്റൽ പ്ലാറ്റ്‌ഫോം വഴി സംയോജിത അടിസ്ഥാനസൗകര്യ ആസൂത്രണവും വിവിധ ഗതാഗത മാർഗ്ഗങ്ങളെ ബന്ധിപ്പിക്കുന്ന കണക്റ്റിവിറ്റിയും സാധ്യമാക്കുന്നു. ഈ പ്ലാറ്റ്‌ഫോം 3,291 വിവര ശേഖരങ്ങളോടെ 58 മന്ത്രാലയങ്ങളെയും വകുപ്പുകളെയും 36 സംസ്ഥാനങ്ങളെയും കേന്ദ്രഭരണ പ്രദേശങ്ങളെയും ഒരുമിച്ച് കൊണ്ടുവരുന്നു. 2026 ഫെബ്രുവരി വരെയുള്ള കണക്കനുസരിച്ച് നെറ്റ്‌വർക്ക് പ്ലാനിംഗ് ഗ്രൂപ്പ് 16.10 ലക്ഷം കോടി രൂപ മൂല്യമുള്ള 352 പദ്ധതികൾ വിലയിരുത്തുകയും അതിൽ 201 എണ്ണത്തിന് അംഗീകാരം നൽകുകയും 167 പദ്ധതികൾ നടപ്പിലാക്കിക്കൊണ്ടിരിക്കുകയും ചെയ്യുന്നു. ഈ പദ്ധതി ബിസിനസ്സുകൾക്ക് അനുയോജ്യമായ സ്ഥലങ്ങൾ കണ്ടെത്താനും നിക്ഷേപങ്ങൾ ആസൂത്രണം ചെയ്യാനും മുൻകൂട്ടിയുള്ള ഗതാഗത സൗകര്യങ്ങളും അടിസ്ഥാനസൗകര്യങ്ങളും ലഭ്യമാക്കാനും സഹായിക്കുന്നു. ഇത് ബിസിനസ് എളുപ്പമാക്കുന്ന അന്തരീക്ഷത്തെ ശക്തിപ്പെടുത്തുന്നു.
• ഡിജിറ്റൽ വാണിജ്യത്തിനായുള്ള തുറന്ന ശൃംഖല (2022): ഇത് തുറന്ന ഡിജിറ്റൽ വാണിജ്യ ശൃംഖലകളെ പ്രോത്സാഹിപ്പിക്കുകയും പ്രത്യേക പ്ലാറ്റ്‌ഫോമുകളിലുള്ള ആശ്രിതത്വം കുറയ്ക്കുകയും ചെയ്യുന്നു. 616-ലധികം നഗരങ്ങളിലായി ഇതിൽ 7.64 ലക്ഷത്തിലധികം വിൽപ്പനക്കാരുണ്ട്. ഇത് വിപുലവും എല്ലാവരെയും ഉൾക്കൊള്ളുന്നതുമായ വിപണി ലഭ്യതയെ പിന്തുണയ്ക്കുന്നു.

ഇന്ത്യയുടെ ആഗോള ബിസിനസ്സ് സാന്നിധ്യം ശക്തിപ്പെടുത്തുന്നു

മെച്ചപ്പെട്ട ചരക്കുനീക്കം, ഡിജിറ്റൽ ബിസിനസ് സൗകര്യം, ശക്തമായ പ്രാദേശിക ഉൽപ്പാദന ശേഷി എന്നിവയുമായി കയറ്റുമതി പ്രോത്സാഹനത്തെ സംയോജിപ്പിച്ച് ഇന്ത്യ ആഗോള വിപണിയിൽ തങ്ങളുടെ സ്ഥാനം ശക്തിപ്പെടുത്തുകയാണ്.

• കയറ്റുമതി പ്രോത്സാഹന ദൗത്യം (2025): സൂക്ഷ്മ-ചെറുകിട-ഇടത്തരം സംരംഭങ്ങൾ, ആദ്യമായി കയറ്റുമതി ചെയ്യുന്നവർ, തൊഴിലാളിയധിഷ്ഠിത മേഖലകൾ, ഉൾനാടൻ-കുറഞ്ഞ കയറ്റുമതി മേഖലകളിൽ നിന്നുള്ള കയറ്റുമതിക്കാർ എന്നിവരിൽ പ്രത്യേക ശ്രദ്ധ കേന്ദ്രീകരിച്ച് ഇന്ത്യയുടെ കയറ്റുമതി മത്സരശേഷി വർധിപ്പിക്കുന്നതിനാണ് ഈ ദൗത്യം രൂപകൽപ്പന ചെയ്തിരിക്കുന്നത്. സാമ്പത്തികവും സാമ്പത്തികേതരവുമായ പിന്തുണ ഒരൊറ്റ ചട്ടക്കൂടിന് കീഴിൽ കൊണ്ടുവരുന്നതിലൂടെ ഈ ദൗത്യം കയറ്റുമതിക്കുള്ള തടസ്സങ്ങൾ കുറയ്ക്കുകയും ബിസിനസ്സുകൾക്ക് ആഗോള വിപണി ലഭ്യത എളുപ്പമാക്കുകയും ചെയ്യുന്നു.
• ട്രേഡ് കണക്ട് ഇ-പ്ലാറ്റ്‌ഫോം: സൂക്ഷ്മ-ചെറുകിട-ഇടത്തരം സംരംഭങ്ങൾ ഉൾപ്പെടെയുള്ള കയറ്റുമതിക്കാർക്ക് ബിസിനസ് വിവരങ്ങളും വിപണി അവസരങ്ങളും ആഗോള ഉപഭോക്താക്കളിലേക്കുള്ള പ്രവേശനവും നൽകുന്നു. 2026 ഓഗസ്റ്റ് വരെയുള്ള കണക്കനുസരിച്ച് ഇതിൽ രജിസ്റ്റർ ചെയ്ത ഉപഭോക്താക്കൾ 20 ലക്ഷം പിന്നിട്ടു. 40 ലക്ഷത്തിലധികം ഉത്ഭവ സാക്ഷ്യപത്രങ്ങൾ വിതരണം ചെയ്തു.
• ICEGATE (ഇന്ത്യൻ കസ്റ്റംസ് ഇലക്ട്രോണിക് ഗേറ്റ്‌വേ): ഈ സംവിധാനം ഇലക്ട്രോണിക് ഫയലിംഗ്, നികുതി അടയ്ക്കൽ, രേഖകളുടെ തിരുത്തലുകൾ, സംശയ നിവാരണം, റീഫണ്ട് നടപടികൾ എന്നിവ സാധ്യമാക്കുന്നു, ഇത് അതിർത്തി കടന്നുള്ള ബിസിനസ് കൂടുതൽ കാര്യക്ഷമമാക്കുന്നു. കസ്റ്റംസ് അപേക്ഷകളുടെ ഫയലിംഗ് 2020 ഏപ്രിലിലെ 1.43 ലക്ഷത്തിൽ നിന്ന് 2026 ജൂണിൽ 6.14 ലക്ഷത്തിലധികമായി വർധിച്ചു. ഇത് ഡിജിറ്റൽ കസ്റ്റംസ് നടപടികളുടെയും ബിസിനസ് പ്രവർത്തനങ്ങളുടെയും വളർച്ചയെ പ്രതിഫലിപ്പിക്കുന്നു.

അനുയോജ്യമായ ഒരു സംരംഭകത്വ ആവാസവ്യവസ്ഥ സൃഷ്ടിക്കുന്നു

ഇന്ത്യയുടെ ബിസിനസ് എളുപ്പമാക്കൽ പ്രയാണം വ്യക്തിഗത പ്രക്രിയകൾ ലളിതമാക്കുന്നതിൽ നിന്ന് കൂടുതൽ പ്രതികരണശേഷിയുള്ളതും സംരംഭക സൗഹൃദവുമായ ഒരു ആവാസവ്യവസ്ഥ കെട്ടിപ്പടുക്കുന്നതിലേക്ക് വികസിക്കുകയാണ്. ശക്തമായ ഡിജിറ്റൽ അടിസ്ഥാനസൗകര്യങ്ങൾ, വിപണികളിലേക്കും ധനസഹായത്തിലേക്കുമുള്ള വിപുലമായ പ്രവേശനം, കൂടുതൽ വ്യക്തതയുള്ള നിയമനിർമ്മാണം എന്നിവയോടെ ബിസിനസ്സുകൾക്ക് അവസരങ്ങൾ പ്രയോജനപ്പെടുത്താനും സുസ്ഥിരമായി വളരാനും ആഗോളതലത്തിൽ മത്സരിക്കാനും മികച്ച അന്തരീക്ഷമൊരുങ്ങുന്നു.

അവലംബം

Ministry of Commerce & Industry

https://www.pib.gov.in/PressReleaseIframePage.aspx?PRID=2090097&reg=3&lang=2

https://www.pib.gov.in/PressReleasePage.aspx?PRID=2154136&reg=3&lang=2

https://www.pib.gov.in/PressReleaseDetail.aspx?PRID=2204665&reg=1&lang=1

https://www.pib.gov.in/PressReleasePage.aspx?PRID=2253019&reg=3&lang=2

https://www.startupindia.gov.in/content/sih/en/about-startup-india-initiative.html

https://www.pib.gov.in/PressReleasePage.aspx?PRID=2201280&reg=3&lang=2

https://www.pib.gov.in/PressReleasePage.aspx?PRID=2168993&reg=3&lang=2

https://www.pib.gov.in/PressReleasePage.aspx?PRID=2244401&reg=3&lang=1

https://www.pib.gov.in/PressReleasePage.aspx?PRID=2246226&reg=3&lang=2

Ministry Of Finance

https://www.pib.gov.in/PressReleasePage.aspx?PRID=2216047&reg=3&lang=2

https://www.icegate.gov.in/services/statistics-reports

https://www.pib.gov.in/PressReleasePage.aspx?PRID=1643250&reg=3&lang=2

Ministry of Corporate Affairs

https://www.pib.gov.in/PressReleasePage.aspx?PRID=2099226&reg=3&lang=2

https://www.pib.gov.in/PressReleasePage.aspx?PRID=1656755&reg=3&lang=2

MSME

https://udyamregistration.gov.in/

PIB Archives

https://www.pib.gov.in/FactsheetDetails.aspx?id=150812&NoteId=150812&ModuleId=16&reg=48&lang=1

https://www.pib.gov.in/PressReleasePage.aspx?PRID=2236804&reg=3&lang=1

https://www.pib.gov.in/PressReleasePage.aspx?PRID=2269961&reg=48&lang=2

https://www.pib.gov.in/PressNoteDetails.aspx?NoteId=154772&ModuleId=3&reg=3&lang=2

https://static.pib.gov.in/WriteReadData/specificdocs/documents/2026/apr/doc202648842601.pdf

https://www.pib.gov.in/PressReleasePage.aspx?PRID=2236804&reg=3&lang=1

https://www.pib.gov.in/PressReleasePage.aspx?PRID=2232079&reg=3&lang=1

Click here to see Pdf

***

SK

(तथ्य सामग्री आईडी: 150908) आगंतुक पटल : 11