ଭାରତୀୟ ଜନଔଷଧି ପରିଯୋଜନା ତଥା କେନ୍ଦ୍ର ସରକାରଙ୍କ ଅନ୍ୟାନ୍ୟ ସ୍ୱାସ୍ଥ୍ୟସେବା ଯୋଜନା ଅଧୀନରେ ଦେଶର ବିଭିନ୍ନ ସ୍ଥାନରେ ରହୁଥିବା ହିତାଧିକାରୀଙ୍କ ସହ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଭିଡିଓ ବ୍ରିଜ କାର୍ଯ୍ୟକ୍ରମ ମାଧ୍ୟମରେ ଆଜି ମତ ବିନିମୟ କରିଛନ୍ତି । ବିଭିନ୍ନ ସରକାରୀ ଯୋଜନାର ହିତାଧିକାରୀମାନଙ୍କ ସହ ଭିଡିଓ ବ୍ରିଜ ମାଧ୍ୟମରେ ମତ ବିନିମୟ କରିବା କ୍ରମରେ ଏହା ହେଉଛି ପ୍ରଧାନମନ୍ତ୍ରୀଙ୍କର ପଞ୍ଚମ କାର୍ଯ୍ୟକ୍ରମ ।

ସ୍ୱାସ୍ଥ୍ୟସେବା ଏବଂ ସୁସ୍ଥତାର ଗୁରୁତ୍ୱ ସମ୍ବନ୍ଧରେ ବୁଝାଇ ପ୍ରଧାନମନ୍ତ୍ରୀ କହିଲେ ଯେ ସ୍ୱାସ୍ଥ୍ୟ ହେଉଛି ସମସ୍ତ ସଫଳତା ଓ ସମୃଦ୍ଧିର ମୂଳ ଆଧାର । ସେ କହିଲେ ଯେ ଭାରତର 120 କୋଟି ନାଗରିକ ସୁସ୍ଥ ହେଲେ ଯାଇଁ ଭାରତ ମହାନ ଓ ସୁସ୍ଥ ହୋଇପାରିବ ।

ହିତାଧିକାରୀମାନଙ୍କ ସହ ମତ ବିନିମୟ କରି ଶ୍ରୀ ମୋଦୀ କହିଲେ ଯେ ଅସୁସ୍ଥତା ପରିବାର ଉପରେ ବିଶେଷ କରି ଗରିବ ଏବଂ ମଧ୍ୟବିତ୍ତ ପରିବାର ଉପରେ କେବଳ ଏକ ବଡ ଆର୍ଥିକ ବୋଝ ସୃଷ୍ଟି କରିନଥାଏ ବରଂ ଏହା ଆମର ସାମାଜିକ ଓ ଅର୍ଥନୈତିକ କ୍ଷେତ୍ରକୁ ମଧ୍ୟ ପ୍ରଭାବିତ କରିଥାଏ । ତେଣୁ ସମସ୍ତ ନାଗରିକଙ୍କୁ ସୁଲଭ ମୂଲ୍ୟରେ ସ୍ୱାସ୍ଥ୍ୟସେବା ପ୍ରଦାନ କରିବା ନିଶ୍ଚିତ କରିବା ଲାଗି ଆମ ସରକାର ପ୍ରୟାସ କରୁଛନ୍ତି । ପ୍ରଧାନମନ୍ତ୍ରୀ କହିଲେ ଯେ ପ୍ରଧାନମନ୍ତ୍ରୀ ଭାରତୀୟ ଜନୌଷଧି ଯୋଜନା ଏହି ଉଦ୍ଦେଶ୍ୟରେ ଅରମ୍ଭ କରାଯାଇଛି ଯେପରି କି ଗରିବ ଓ ମଧ୍ୟବିତ୍ତ ପରିବାର ସୁଲଭ ମୂଲ୍ୟରେ ଔଷଧ ପାଇପାରିବେ ଏବଂ ସେମାନଙ୍କ ଉପରୁ ଆର୍ଥିକ ବୋଝ ହ୍ରାସ ପାଇବ ।

ସରକାର ଦେଶବ୍ୟାପୀ 3600ରୁ ଅଧିକ ଜନୌଷଧି କେନ୍ଦ୍ର ଖୋଲିଛନ୍ତି, ଯେଉଁଠାରେ କି 700ରୁ ଉର୍ଦ୍ଧ୍ଵ ଜେନେରିକ ଔଷଧ ସୁଲଭ ମୂଲ୍ୟରେ ମିଳୁଛି । ଜନୌଷଧି କେନ୍ଦ୍ରମାନଙ୍କରେ ଔଷଧର ମୂଲ୍ୟ ବଜାର ଦରଠାରୁ ଶତକଡା 50ରୁ 80 ପ୍ରତିଶତ କମ । ପ୍ରଧାନମନ୍ତ୍ରୀ ପ୍ରକାଶ କରିଥିଲେ ଯେ ଭବିଷ୍ୟତରେ ଜନୌଷଧି କେନ୍ଦ୍ର ସଂଖ୍ୟା 5000ରେ ପହଂଚିବ ।

ହୃତପିଣ୍ଡ ଷ୍ଟେଂଟ ବିଷୟରେ ବର୍ଣ୍ଣନା କରି ପ୍ରଧାନମନ୍ତ୍ରୀ ଶ୍ରୀ ମୋଦୀ କହିଲେ ଯେ ପୂର୍ବରୁ ଷ୍ଟେଂଟ କ୍ରୟ କରିବା ପାଇଁ ନାଗରିକମାନଙ୍କୁ ଜମିବାଡି ବିକ୍ରି କିମ୍ବା ବନ୍ଧକ ରଖିବାକୁ ପଡୁଥିଲା । ସେ କହିଲେ ଯେ ଗରିବ ଓ ମଧ୍ୟବିତ୍ତମାନଙ୍କୁ ସହାୟତା କରିବା ପାଇଁ ସରକାର ଷ୍ଟେଂଟର ମୂଲ୍ୟକୁ ବହୁ ପରିମାଣରେ କମାଇ ଦେଇଛନ୍ତି । ହାର୍ଟ ଷ୍ଟେଂଟର ମୂଲ୍ୟ ପାଖାପାଖି 2 ଲକ୍ଷ ଟଙ୍କାରୁ ହ୍ରାସ ପାଇ 2900 ଟଙ୍କାରେ ପହଂଚିଛି ।

ମତ ବିନିମୟ ସମୟରେ ଶ୍ରୀ ନରେନ୍ଦ୍ର ମୋଦୀ କହିଲେ ଯେ ସରକାର ଆଣ୍ଠୁ ପ୍ରତିରୋପଣ ମୂଲ୍ୟକୁ ପ୍ରାୟ ଶତକଡା 60ରୁ 70 ପ୍ରତିଶତ ହ୍ରାସ କରିଛନ୍ତି । ଏହାଫଳରେ ଏ ବାବଦରେ ଖର୍ଚ୍ଚ 2.5 ଲକ୍ଷ ଟଙ୍କାରୁ ହ୍ରାସ ପାଇ ପ୍ରାୟ 70 ହଜାରରୁ 80 ହଜାର ଟଙ୍କା ମଧ୍ୟରେ ପହଂଚିଛି । ଏକ ଆକଳନରୁ ଜଣାପଡିଛି ଯେ ଭାରତରେ ପ୍ରତିବର୍ଷ ପାଖାପାଖି 1.5 ଲକ୍ଷ ଆଣ୍ଠୁ ଅସ୍ତ୍ରୋପଚାର ହୋଇଥାଏ । ଏହା ଦ୍ୱାରା ଆଣ୍ଠୁ ପ୍ରତିରୋପଣ ବାବଦରେ ଜନସାଧାରଣଙ୍କ ମୋଟ ଖର୍ଚ୍ଚରୁ 1500 କୋଟି ଟଙ୍କା ସଂଚୟ ହୋଇଛି ।

ପ୍ରଧାନମନ୍ତ୍ରୀ ରାଷ୍ଟ୍ରୀୟ ଡାଏଲିସିସ କାର୍ଯ୍ୟକ୍ରମ ମାଧ୍ୟମରେ ସରକାର 500 ଜିଲ୍ଲାରୁ ଅଧିକ ତଥା 2.25 ଲକ୍ଷ ରୋଗୀଙ୍କ ପାଇଁ 22 ଲକ୍ଷ ଡାଏଲିସିସ ସେସନ କାର୍ଯ୍ୟକାରୀ କରିଛନ୍ତି । ମିଶନ ଇନ୍ଦ୍ରଧନୁଷ ମାଧ୍ୟମରେ 528ଟି ଜିଲ୍ଲାର 3.15 କୋଟି ଶିଶୁ ଏବଂ 80 ଲକ୍ଷ ଗର୍ଭବତୀ ମହିଳାଙ୍କୁ ଟୀକାକରଣ କରାଯାଇଛି । ଅଧିକ ଶଯ୍ୟା, ଅଧିକ ଡାକ୍ତରଖାନା ଏବଂ ଅଧିକ ଡାକ୍ତର ନିଶ୍ଚିତ କରିବା ଲାଗି ସରକାର 92ଟି ମେଡିକାଲ କଲେଜ ଖୋଲିବା ସହ ଏମବିବିଏସ ସିଟ ସଂଖ୍ୟା ଆହୁରି 15 ହଜାର ବୃଦ୍ଧି କରିଛନ୍ତି ।

ପ୍ରଧାନମନ୍ତ୍ରୀ କହିଲେ ଯେ ସ୍ୱାସ୍ଥ୍ୟସେବାକୁ ସହଜ ଓ ସୁଲଭ କରିବା ପାଇଁ ସରକାର ଆୟୁଷ୍ମାନ ଭାରତ ଯୋଜନା ଆରମ୍ଭ କରିଛନ୍ତି । ଆୟୁଷ୍ମାନ ଭାରତ ଅନ୍ତର୍ଗତ 5 ଲକ୍ଷ ଟଙ୍କାର ସ୍ୱାସ୍ଥ୍ୟବୀମା ସହିତ 10 କୋଟି ପରିବାରକୁ ଅନ୍ତର୍ଭୁକ୍ତ କରାଯିବ । ‘ସ୍ୱଚ୍ଛ ଭାରତ ମିଶନ’ ବାବଦରେ ପ୍ରକାଶ କରି ପ୍ରଧାନମନ୍ତ୍ରୀ କହିଲେ ଯେ ଏକ ସୁସ୍ଥ ଭାରତ ଗଠନ କରିବାରେ ଏହି ଯୋଜନା ଏକ ପ୍ରମୁଖ ଭୂମିକା ଗ୍ରହଣ କରୁଛି । ସ୍ୱଚ୍ଛ ଭାରତ ଅଭିଯାନ ଫଳରେ ଭାରତରେ ଏବେ 3.5 ଲକ୍ଷ ଗ୍ରାମ  ବାହାରେ ମଳତ୍ୟାଗ ମୁକ୍ତ ଗ୍ରାମରେ ପରିଣତ ହୋଇଛି ଏବଂ ସ୍ୱଚ୍ଛତା ଶତକଡା 38 ପ୍ରତିଶତ ବୃଦ୍ଧି ପାଇଛି ।

ପ୍ରଧାନମନ୍ତ୍ରୀଙ୍କ ସହ ମତ ବିନିମୟ କରି ହିତାଧିକାରୀମାନେ ବର୍ଣ୍ଣନା କରିଥିଲେ ଯେ କିପରି ଭାବେ ପ୍ରଧାନମନ୍ତ୍ରୀ ଭାରତୀୟ ଜନୌଷଧି ପରିଯୋଜନା ଫଳରେ ଔଷଧର ମୂଲ୍ୟ ହ୍ରାସ ପାଇବା ସହ ଏହା ସୁଲଭ ହୋଇପାରିଛି । ହାର୍ଟ ଷ୍ଟେଂଟ ଏବଂ ଆଣ୍ଠୁ ପ୍ରତିରୋପଣ ମୂଲ୍ୟ ହ୍ରାସ ପାଇବା ଫଳରେ ସେମାନଙ୍କ ଜୀବନରେ କିପରି ପରିବର୍ତ୍ତନ ଆସିଛି ସେ ସମ୍ବନ୍ଧରେ ମଧ୍ୟ ହିତାଧିକାରୀମାନେ ବର୍ଣ୍ଣନା କରିଥିଲେ ।

ପ୍ରଧାନମନ୍ତ୍ରୀ ମଧ୍ୟ ଯୋଗକୁ ଜୀବନ ଶୈଳୀର ଏକ ଅଙ୍ଗ ଭାବେ ଗ୍ରହଣ କରି ଏକ ସୁସ୍ଥ ଦେଶ ଗଠନ କରିବାରେ ସହାୟତା କରିବା ପାଇଁ ଜନସାଧାରଣଙ୍କୁ ଅନୁରୋଧ କରିଥିଲେ ।

 

******

(ରିଲିଜ ଆଡି: 1534947) ପରିଦର୍ଶକ କାଉଣ୍ଟର : 22