#IFFIWood, 23 नोव्‍हेंबर 2024

गच्च भरिल्ल्या हॉलांत भितर सरून उमेदीन येवकार दिलो, तेन्ना गोंयच्या कला अकादेमींतल्या सभाघरांत ताळयो आनी शिट्टीचो आवाज गुंजायमान जालो. तमिळ सुपरस्टार शिवाकार्तिकेयनाची पडद्याचेर आनी पडद्या भायर अशीच वळख आसा.

नम्र सुरवाती सावन तमिळ सिनेमांतलो एक सुपरस्टार जावपा मेरेनचो शिवकार्थिकेयन हांचो प्रवास हो जिद्द, चिकाटी आनी प्रामाणीकपणाची  एक कथा आसा. 55व्या भारतीय आंतरराष्ट्रीय चित्रपट महोत्सवांत उलयतना तांणी, अभिनेतो आनी राजकारणी खुशबू सुंदर हांचे कडेन आकर्शक संवाद सादलो आनी ताच्या जिविताची, कारकिर्दीची आनी प्रेरणाांची झलक दिली.

“सुरवाती सावन सिनेमा हीच म्हजी सदांची आवड आशिल्ली आनी प्रेक्षकांची मनरिजवण करपाची म्हाका सदांच इत्सा आशिल्ली”, अशें शिवाकार्तिकेयनान सांगलें. “हांवें टीव्ही एंकरिंगांतल्यान सुरवात केली, जाका लागून म्हाका मनरिजवणेंतल्या करिअरांत साहस करपाची संद मेळ्ळी आनी ताचो हांवें अत्यंत आवडीन फाटलाव केलो.”

मिमिक्री  कलाकार म्हणून सुरवातीच्या दिसांचो अणभव सांगतना शिवकार्तिकेयन हांणी उगडास करून सांगलें, कि अभियांत्रिकी महाविद्यालयांतल्या म्हज्या प्राध्यापकांची आपूण नक्कल करतालो. उपरांत हांवें तांची माफी मागली तेन्ना तांणी म्हाका प्रोत्साहन दिलें, हें प्रतिभेचो योग्य रितीन उपेग करचो, अशें सांगलें.”

तांच्या बापायचे अकाली निधन हो ताच्या जिवितांतलो एक वळण दिवपी खीण आशिल्लो, अशें अभिनेत्यान सांगलें. “बापायचे निधन जाले उपरांत, हांव जवळजवळ डिप्रेशनांत गेलो. म्हज्या वावरान म्हाका भायर काडलो आनी म्हज्या प्रेक्षकांकडल्यान शिट्टी आनी ताळयो हीच म्हजी थेरपी जाली,” असो ताणें आपल्या फॅनाच्या मोगाक आनी आदाराक श्रेय दिले.

खुशबू सुंदरान ताच्या निर्धाराची आनी प्रामाणीकपणाची तोखणाय केली, हांका तिणें ताच्या जिविताचे सगळ्यांत व्हड आधारस्तंभ म्हणलें. ते मान्य करून शिवकार्तिकेयनान सांगलें, कि “सामान्य मनशा कडेन जोडिल्लो आसतनाच, लाखांनी लोकांमदीं वेगळो दिसपाची म्हाका सदांच उमळशीक आशिल्ली. जिवीत आडमेळ्यांनी भरिल्लें आसता, पूण आपल्या आवडीचे अनुसरण केल्यार, त्यो पयस करपाक आदार जाता. एक काळ आसलो जेन्ना म्हाका हे सगळे सोडून दिवपाची इत्सा जाली, पूण म्हज्या प्रेक्षकांच्या मोगान म्हाका टिकून दवरलो.”

मिमिक्री कलाकार ते दूरचित्रवाणी होस्ट आनी तमिळ सिनेमांतलो एक नामनेचो कलाकार शिवकार्थिकेयन हाणें जायत्यो भूमिका केल्यात. तशेंच प्लेबॅक गायक, गीतकार, निर्मातो म्हणून ताणें पुरस्कार मेळयल्यात. आपल्या करिअर निवडी विशीं उलयतना तांणी स्पश्ट केलें, कि “म्हज्या करिअराचे सुरवेक म्हज्याकडेन  येवपी दरेक प्रकल्प हांवें घेतलो. पूण आतां, कथा म्हाका वेंचून काडटा, अशें म्हाका दिसता.” ताणें डॉक्टर, डॉन, हालींच्या काळांतल्या अमरान ह्या चित्रपटांचो उल्लेख केलो, जातूंत ताणें वास्तव जिणेंतलो झुजारी नायक मुकुंद वरदराजन हांचें चित्रण केलां, ताका लागून तो हालींच्या काळांत अर्थपूर्ण भुमिका कशी वेंचता, हाचीं हि उदाहरणां ताणें दिली.

विनोदाक साधन म्हणून वापरिल्ल्याचेर भासाभास करतना शिवकार्थिकेयन हांणी टिप्पणी केली, कि “दूरचित्रवाणी ते चित्रपट हे संक्रमण कठीण आशिल्लें. ल्हान पडद्याचेर आसूं वा व्हडल्या पडद्याचेर आसूं, प्रेक्षकांक खोस हाडटा हें जाणून घेवन, हांवें विनोदाचो कवच म्हणून वापर केलो.”

तरणाट्या पिळगे खातीर ताणें सांगलें: कि “मुक्त सुकण्या भशेन उडून वच, पूण सदांच तुमच्या घोंटेरांत परत यो. म्हजे खातीर म्हजें कुटुंब म्हजें सर्वस्व आनी आपल्या मुळांनी  रुजून रावप खूब गरजेचें, अशें म्हाका दिसता. आमच्या आवय-बापायक फकत आमचे बरेंच जाल्ले जाय.” लाखांनी लोकां मदीं प्रतिध्वनीत जावपी एका असामान्य प्रतिभेचे हे सत्र आशि;ल्ले. मध्यमवर्गीय घरापसून तमिळ सिनेमाच्या शिखरामेरेनचो शिवकार्थिकेयनाचो हो प्रवास एक आकर्शण, लवचीकपण आनी सपनांच्या बळग्याची प्रेरणादायक कथा सांगता.

* * *

PIB IFFI CAST AND CREW | Subhash/Manali/Darshana | IFFI 55