વિકસિત ભારત માટે તમામ રાજ્યોને "ટીમ ઇન્ડિયા" તરીકે એકસાથે લેવાની તેમની પ્રતિબદ્ધતાને અનુરૂપ, પ્રધાનમંત્રી શ્રી નરેન્દ્ર મોદી 24 મે, 2025ના રોજ નવી દિલ્હીના ભારત મંડપમ ખાતે નીતિ આયોગની 10મી ગવર્નિંગ કાઉન્સિલ બેઠકની અધ્યક્ષતા કરશે. આ વર્ષની થીમ 'વિકસિત રાજ્ય ફોર વિકસિત ભારત@2047' છે, જેમાં રાજ્યો પર ધ્યાન કેન્દ્રિત કરવામાં આવશે અને તેના દ્વારા ભારતને વિકસિત રાષ્ટ્ર બનાવવામાં આવશે. ગવર્નિંગ કાઉન્સિલની બેઠકમાં 'વિકસિત રાજ્ય ફોર વિકસિત ભારત@2047' પરના અભિગમની ચર્ચા કરવામાં આવશે.

'વિકસિત રાજ્ય ફોર વિકસિત ભારત@2047' વિચાર એ રાજ્યોને રાષ્ટ્રીય પ્રાથમિકતાઓ સાથે જોડાયેલા પરંતુ સ્થાનિક વાસ્તવિકતાઓ પર આધારિત બોલ્ડ, લાંબા ગાળાના અને સમાવિષ્ટ વિઝન દસ્તાવેજો બનાવવા માટેનું આહ્વાન છે. આ વિઝનમાં સમય-મર્યાદાવાળા લક્ષ્યોનો સમાવેશ થવો જોઈએ. રાજ્યોએ માનવ વિકાસ, આર્થિક વિકાસ, ટકાઉપણું, ટેકનોલોજી અને શાસન સુધારા પર ધ્યાન કેન્દ્રિત કરતી વખતે તેમના અનન્ય ભૌગોલિક અને વસ્તી વિષયક ફાયદાઓનો લાભ લેવો જોઈએ. જવાબદારી અને મધ્યવર્તી સુધારણા સુનિશ્ચિત કરવા માટે પ્રોજેક્ટ મોનિટરિંગ યુનિટ્સ, આઇસીટી-સક્ષમ ઇન્ફ્રાસ્ટ્રક્ચર અને મોનિટરિંગ અને મૂલ્યાંકન કોષો દ્વારા સમર્થિત ડેટા-આધારિત પ્રક્રિયાઓ અને પરિણામ-આધારિત પરિવર્તન પર ધ્યાન કેન્દ્રિત કરી શકાય છે.

10મી ગવર્નિંગ કાઉન્સિલની બેઠક કેન્દ્ર અને રાજ્યો/કેન્દ્રશાસિત પ્રદેશોને રાષ્ટ્ર સામેના વિકાસ પડકારો પર ચર્ચા કરવા અને ભારતને વિકસિત રાષ્ટ્ર, એટલે કે, વિકસિત બનાવવા માટે રાજ્યો કેવી રીતે મુખ્ય ભૂમિકા ભજવી શકે છે તેના પર સર્વસંમતિ બનાવવા માટે એક પ્લેટફોર્મ પૂરું પાડે છે. જેમકે, 'વિકસિત રાજ્ય ફોર વિકસિત ભારત@2047'. આ બેઠકમાં ઉદ્યોગસાહસિકતાને પ્રોત્સાહન આપવા, કૌશલ્ય વધારવા અને દેશભરમાં ટકાઉ રોજગારની તકો ઊભી કરવા માટેના પગલાં પર પણ ચર્ચા કરવામાં આવશે.

આયોગની ગવર્નિંગ કાઉન્સિલ 13-15 ડિસેમ્બર, 2024 દરમિયાન યોજાનારી મુખ્ય સચિવોની ચોથી રાષ્ટ્રીય પરિષદના વિષયો પર સર્વસંમતિ બનાવવા પર પણ ધ્યાન કેન્દ્રિત કરશે. ભારત સરકારના સચિવો અને તમામ રાજ્યો અને કેન્દ્રશાસિત પ્રદેશોના મુખ્ય સચિવો 'વિકસિત ભારત@2047'ની કાર્યસૂચિ માટે માળખાને વ્યાખ્યાયિત કરવા અને સૂચનો આપવા માટેની સલાહકાર પ્રક્રિયાનો ભાગ હતા. પ્રમોટિંગ એન્ટરપ્રેનોરશિપ, એમ્પ્લોયમેન્ટ એન્ડ સ્કિલિંગ- લેવરેજિંગ ધ ડેમોગ્રાફિક ડિવિડન્ડ'ની વ્યાપક થીમ હેઠળ, મુખ્ય સચિવોની ચોથી રાષ્ટ્રીય પરિષદ દરમિયાન નીચેના છ મુખ્ય વિષયો પર ભલામણો કરવામાં આવી હતી:

1. સક્ષમ ઇકોસિસ્ટમ બનાવવી - ટાયર 2 અને 3 શહેરો પર ધ્યાન કેન્દ્રિત કરવું: ઉત્પાદન;

2. સક્ષમ ઇકોસિસ્ટમ બનાવવી - ટાયર 2, 3 શહેરો પર ધ્યાન કેન્દ્રિત કરવું: સેવાઓ;

3. MSME અને અનૌપચારિક રોજગાર: ગ્રામીણ બિન-ખેતી;

4. MSME અને અનૌપચારિક રોજગાર: શહેરી;

5. ગ્રીન ઇકોનોમીમાં તકો: નવીનીકરણીય ઉર્જા; અને

6. ગ્રીન ઇકોનોમીમાં તકો: સર્ક્યુલર ઈકોનોમી

10મી ગવર્નિંગ કાઉન્સિલની બેઠકમાં રાજ્યો અને કેન્દ્રશાસિત પ્રદેશોના મુખ્યમંત્રીઓ અને ઉપરાજ્યપાલો, કેન્દ્રીય મંત્રીઓ અને નીતિ આયોગના ઉપાધ્યક્ષ, સભ્યો અને સીઈઓ હાજરી આપશે.

AP/IJ/GP/JD