કેન્દ્રીય ગૃહમંત્રી અને સહકારિતા મંત્રી શ્રી અમિત શાહે કહ્યું છે કે મોદી સરકારના ઐતિહાસિક 11 વર્ષ સંકલ્પ, સમર્પણ અને જાહેર સેવા પ્રત્યેની નિષ્ઠાનો સુવર્ણ યુગ રહ્યા છે.

શ્રી અમિત શાહે 'X' પર શ્રેણીબદ્ધ પોસ્ટ્સમાં કહ્યું કે સેવાના આ 11 વર્ષ દરમિયાન, દેશમાં આર્થિક પુનરુત્થાન, સામાજિક ન્યાય, સાંસ્કૃતિક ગૌરવ અને રાષ્ટ્રીય સુરક્ષાનો નવો યુગ જોવા મળ્યો છે. મોદી સરકારે સાબિત કર્યું છે કે, જ્યારે નેતૃત્વ સ્પષ્ટ, અટલ અને જાહેર સેવા પર કેન્દ્રિત હોય છે, ત્યારે સેવા, સુરક્ષા અને સુશાસનમાં નવા સીમાચિહ્નો પ્રાપ્ત થાય છે.

કેન્દ્રીય ગૃહમંત્રી અને સહકારિતા મંત્રીએ કહ્યું કે જ્યારે મોદીજીએ 2014માં દેશની કમાન સંભાળી ત્યારે નીતિગત અડચણો હતી. સ્પષ્ટ નીતિઓ કે નેતૃત્વ નહોતું અને સરકારમાં ભ્રષ્ટાચાર ચરમસીમાએ હતો. અર્થતંત્ર નાજુક હતું અને શાસન વ્યવસ્થા દિશાહીન હતી. જાહેર સેવાના આ 11 વર્ષોમાં, 'લઘુત્તમ સરકાર, મહત્તમ શાસન'ના અભિગમે દેશના વિકાસની ગતિ અને માપદંડ બંનેને બદલી નાખ્યા છે. પ્રધાનમંત્રી શ્રી નરેન્દ્ર મોદીએ ખેડૂતો, મહિલાઓ, પછાત વર્ગો, દલિતો અને વંચિતોને શાસનના કેન્દ્રમાં લાવ્યા છે. તુષ્ટિકરણને બદલે "સબકા સાથ, સબકા વિકાસ, સબકા વિશ્વાસ અને સબકા પ્રયાસ" પર આધારિત કાર્ય સંસ્કૃતિ અપનાવી છે.

શ્રી અમિત શાહે કહ્યું કે જાહેર સેવાના આ 11 વર્ષો દરમિયાન, રાષ્ટ્રીય સુરક્ષાના ક્ષેત્રમાં પણ મહત્વપૂર્ણ સિદ્ધિઓ પ્રાપ્ત થઈ છે. નક્સલવાદ તેના છેલ્લા શ્વાસ લઈ રહ્યો છે, જમ્મુ અને કાશ્મીર અને ઉત્તરપૂર્વમાં શાંતિ સ્થાપિત થઈ છે અને ભારત હવે આતંકવાદીઓના પોતાના વિસ્તારમાં હુમલો કરીને આતંકવાદી હુમલાઓનો જવાબ આપે છે. આ મોદી સરકાર હેઠળ ભારતની બદલાતી છબીને પ્રતિબિંબિત કરે છે. મોદી 3.0 માં, નવું ભારત સુધારા, પ્રદર્શન અને પરિવર્તનની શક્તિ દ્વારા વિકાસ અને આત્મનિર્ભરતા તરફ ઝડપથી આગળ વધી રહ્યું છે. નાગરિકોના જીવનમાં સકારાત્મક પરિવર્તન લાવવા અને ભારતને દરેક ક્ષેત્રમાં નંબર વન બનાવવાની આ યાત્રા એ જ રીતે ચાલુ રહેશે.

AP/IJ/GP/JD