કેન્દ્રીય ગૃહ અને સહકારિતા મંત્રી શ્રી અમિત શાહે આજે અમદાવાદમાં દુર્ઘટનાગ્રસ્ત થયેલા એર ઈન્ડિયાના વિમાનના દુર્ઘટના સ્થળની મુલાકાત લીધી હતી. ગૃહમંત્રીએ કેન્દ્રીય નાગરિક ઉડ્ડયન મંત્રી શ્રી રામ મોહન નાયડુ, ગુજરાતના મુખ્યમંત્રી શ્રી ભૂપેન્દ્ર પટેલ અને વરિષ્ઠ અધિકારીઓ સાથે બેઠક યોજીને રાહત અને બચાવ કામગીરીની સમીક્ષા પણ કરી હતી.

બેઠક બાદ પત્રકારો સાથે વાત કરતા કેન્દ્રીય ગૃહમંત્રીએ કહ્યું કે એર ઇન્ડિયા ફ્લાઇટ નંબર AI-171 ની દુર્ભાગ્યપૂર્ણ ઘટનાથી સમગ્ર દેશ આઘાતમાં છે, આ અકસ્માતમાં માર્યા ગયેલા મુસાફરોના પરિવારો સાથે તમામ દેશવાસીઓ ઉભા છે. શ્રી શાહે કહ્યું કે ભારત સરકાર, ગુજરાત સરકાર અને  પ્રધાનમંત્રી વતી, તેઓ તમામ જાનહાનિ પ્રત્યે ઊંડી સંવેદના વ્યક્ત કરે છે.

ગૃહમંત્રીએ કહ્યું કે વિમાન દુર્ઘટનાની માહિતી મળતાની સાથે જ ગુજરાત સરકારે આરોગ્ય વિભાગ, ફાયર બ્રિગેડ, પોલીસ વિભાગ અને ભારત સરકારના કેન્દ્રીય સશસ્ત્ર પોલીસ દળો (CAPF)ના એકમો સહિત આપત્તિ વ્યવસ્થાપનના તમામ એકમોને સતર્ક કર્યા અને બધા સાથે મળીને રાહત અને બચાવ કાર્યમાં જોડાયા હતા. ભારત સરકાર અને ગુજરાત સરકાર સાથે મળીને રાહત અને બચાવ કાર્યમાં રોકાયેલા છે.

શ્રી અમિત શાહે જણાવ્યું હતું કે વિમાનમાં ભારત અને વિદેશના કુલ 230 મુસાફરો અને 12 ક્રૂ સભ્યો હતા. ગૃહમંત્રીએ હોસ્પિટલમાં અકસ્માતમાં બચી ગયેલા ઘાયલ મુસાફરને મળ્યા હતા. તેમણે કહ્યું હતું કે DNA ટેસ્ટ પછી જ મૃતકોની સત્તાવાર સંખ્યા સત્તાવાર રીતે જાહેર કરવામાં આવશે. જે મુસાફરોના સંબંધીઓ અકસ્માત સ્થળે પહોંચ્યા છે તેમના DNA નમૂના લેવાની પ્રક્રિયા પણ આગામી 2-3 કલાકમાં પૂર્ણ કરવામાં આવશે. શ્રી શાહે કહ્યું હતું કે વિદેશમાં રહેલા મૃતક મુસાફરોના સંબંધીઓને જાણ કરવામાં આવી છે અને તેઓ ભારત પહોંચતાની સાથે જ તેમના DNA નમૂના લેવામાં આવશે.

કેન્દ્રીય ગૃહમંત્રીએ કહ્યું કે ગુજરાતની FSL (ફોરેન્સિક સાયન્સ લેબોરેટરી) અને NFSU (નેશનલ ફોરેન્સિક સાયન્સ યુનિવર્સિટી) સાથે મળીને શક્ય તેટલા ઓછા સમયમાં DNA પરીક્ષણ પૂર્ણ કરશે અને ત્યારબાદ મૃતકોના મૃતદેહ તેમના સંબંધીઓને સોંપવામાં આવશે. તેમણે કહ્યું કે ઉડ્ડયન વિભાગે તેની તપાસ ઝડપી ગતિએ શરૂ કરી છે. ગૃહમંત્રીએ રાહત અને બચાવ કાર્યમાં સામેલ એજન્સીઓનો આભાર વ્યક્ત કર્યો હતો.

AP/IJ/GP/JT

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com