ભારત સરકારના નવી અને નવીનીકરણીય ઉર્જા મંત્રાલય હેઠળ કાર્યરત નવરત્ન સેન્ટ્રલ પબ્લિક સેક્ટર એન્ટરપ્રાઇઝ, સોલાર એનર્જી કોર્પોરેશન ઓફ ઈન્ડિયા લિમિટેડ, 60 ગીગાવોટ (GW)થી વધુ નવીનીકરણીય ઉર્જા (RE) ક્ષમતા માટે પાવર સેલ્સ એગ્રીમેન્ટ્સ (PSA) અમલમાં મૂકવાનો સીમાચિહ્ન હાંસલ કર્યો છે. આ સ્વચ્છ અને ટકાઉ ઉર્જા ભવિષ્ય તરફ રાષ્ટ્રની પ્રગતિમાં એક મહત્વપૂર્ણ પગલું છે અને દેશભરમાં નવીનીકરણીય ઉર્જા અપનાવવાના સકારાત્મક વલણને પ્રતિબિંબિત કરે છે.

પાવર સેલ્સ એગ્રીમેન્ટ્સ સૌર, પવન અને હાઇબ્રિડ ઉર્જા પ્રોજેક્ટ્સના વિવિધ પોર્ટફોલિયોને આવરી લે છે, જે સામૂહિક રીતે ભારતની વધતી જતી નવીનીકરણીય ઉર્જા ક્ષમતાનો નોંધપાત્ર ભાગ બનાવે છે. આ કરારો દ્વારા, SECI દેશમાં નવીનીકરણીય ઉર્જા સાહસોની કાર્યક્ષમતા દર્શાવતી વખતે, ઉત્પન્ન થતી વીજળીની લાંબા ગાળાની ખરીદીની ખાતરી આપે છે, વિકાસકર્તાઓ અને રોકાણકારોને ચૂકવણી સુરક્ષા પૂરી પાડે છે. આવી લાંબા ગાળાની વ્યવસ્થા ભારતના નવીનીકરણીય ઉર્જા ક્ષેત્રની સંપૂર્ણ સંભાવનાને અનલૉક કરવા માટે મહત્વપૂર્ણ છે. નવીનીકરણીય ઉર્જા માટે ખરીદી સુરક્ષિત કરીને, SECI નવીનીકરણીય ઉર્જા બજારને મજબૂત બનાવે છે, વિકાસકર્તાઓ અને નાણાકીય હિસ્સેદારોને આકર્ષે છે અને ભારતના ઓછા કાર્બન અર્થતંત્રમાં મૂડીના પ્રવાહને સરળ બનાવે છે.

SECIના ચેરમેન અને મેનેજિંગ ડિરેક્ટર શ્રી સંતોષ કુમાર સારંગીએ જણાવ્યું હતું કે, “સ્થાપનાના માત્ર ચૌદ વર્ષમાં 60 GWના વીજ વેચાણ કરારો પર હસ્તાક્ષર કરવા એ SECIની સફરમાં એક સીમાચિહ્નરૂપ ક્ષણ છે. SECI એ સુનિશ્ચિત કરવામાં મોખરે છે કે ભારત તેના મહત્વાકાંક્ષી સ્વચ્છ ઉર્જા લક્ષ્યોને પૂર્ણ કરવા માટે ટ્રેક પર રહે. અમને ટકાઉ અને ઓછા કાર્બનવાળા ભવિષ્ય તરફ દેશના પરિવર્તનમાં યોગદાન આપવાનો ગર્વ છે.”

ભવિષ્યની પહેલ નવીન ઉર્જા સંગ્રહ ઉકેલો, નવીનીકરણીય ઉર્જા સપ્લાય ચેઇનને મજબૂત બનાવવા, ગ્રીન હાઇડ્રોજન અને ગ્રીન એમોનિયાના ઉત્પાદનને આગળ વધારવા, તેમજ નવીન વીજ પુરવઠા મોડેલો પર ધ્યાન કેન્દ્રિત કરશે. આ પ્રયાસો નવીનીકરણીય ઉર્જા સંક્રમણને વેગ આપશે અને ભારતની આબોહવા પ્રતિબદ્ધતાઓને ટેકો આપશે.

AP/IJ/GP/JT