ગુજરાત અને રાજસ્થાનમાં મુખ્ય ઇન્ફ્રાસ્ટ્રક્ચર પ્રોજેક્ટ્સને અસર કરતા મુખ્ય મુદ્દાઓની સમીક્ષા કરવા માટે 03.07.2025ના રોજ એક ઉચ્ચ સ્તરીય બેઠક બોલાવવામાં આવી હતી. જેમાં પ્રોજેક્ટ મોનિટરિંગ ગ્રુપ (PMG) મિકેનિઝમ દ્વારા અવરોધોને દૂર કરવા પર ધ્યાન કેન્દ્રિત કરવામાં આવ્યું હતું. 18 મહત્વપૂર્ણ પ્રોજેક્ટ્સ સાથે સંબંધિત કુલ 22 મુદ્દાઓ - જેનું સામૂહિક મૂલ્ય ₹36,296 કરોડથી વધુ છે - ચર્ચા માટે લેવામાં આવ્યા હતા.

ચર્ચા કરાયેલી મુખ્ય પહેલોમાં રાજસ્થાન અને ગુજરાતમાં સૌર ઊર્જા ઝોનમાંથી વીજળી ખાલી કરવા માટે ટ્રાન્સમિશન સિસ્ટમ મજબૂતીકરણ યોજનાનો સમાવેશ થાય છે, જેમાં ₹14,147 કરોડનું રોકાણ કરવાનો અંદાજ છે. આ યોજનાનો ઉદ્દેશ્ય સબસ્ટેશન અને ટ્રાન્સમિશન લાઇન સહિત ઉચ્ચ-ક્ષમતાવાળા ટ્રાન્સમિશન ઇન્ફ્રાસ્ટ્રક્ચરનો વિકાસ કરીને રાષ્ટ્રીય ગ્રીડમાં નવીનીકરણીય ઊર્જાના સીમલેસ એકીકરણને સરળ બનાવવાનો છે.

રાજસ્થાનમાં, આ યોજના જેસલમેર, બિકાનેર અને બાડમેરમાં સૌર ઝોનને લક્ષ્ય બનાવે છે. જ્યારે ગુજરાતમાં, સુરેન્દ્રનગર, પાટણ અને કચ્છનો સમાવેશ થાય છે. આ પ્રોજેક્ટ્સ નવીનીકરણીય ઊર્જાથી સમૃદ્ધ પ્રદેશોમાંથી સૌર ઊર્જાને ખાલી કરવા અને તેને સમગ્ર ભારતમાં વપરાશ કેન્દ્રો સુધી વિશ્વસનીય રીતે પહોંચાડવા માટે મહત્વપૂર્ણ છે. બેઠકમાં રાઇટ-ઓફ-વે (RoW) અને પ્રગતિને વેગ આપવા માટે જમીન સંપાદન જેવા મુખ્ય પડકારોને સંબોધવા પર ધ્યાન કેન્દ્રિત કરવામાં આવ્યું હતું.

બેઠકમાં રિલાયન્સ જિયોના 5G/4G નેટવર્ક વિસ્તરણ પ્રોજેક્ટની પણ સમીક્ષા કરવામાં આવી હતી. જેને રાષ્ટ્રીય મહત્વના પ્રોજેક્ટ તરીકે માન્યતા આપવામાં આવી હતી. આ પહેલ 5G મોબાઇલ સેવાઓને અનકવર અને દૂરના વિસ્તારોમાં વિસ્તારવાનો પ્રયાસ કરે છે, જ્યારે હાલના 4G ઇન્ફ્રાસ્ટ્રક્ચરને પણ મજબૂત બનાવે છે. વન-સંબંધિત મુદ્દાઓના નિરાકરણને ઝડપી બનાવવા માટે રાજ્ય સરકાર સાથે ચર્ચા કરવામાં આવી હતી. એકવાર પૂર્ણ થયા પછી, આ પ્રોજેક્ટ ડિજિટલ કનેક્ટિવિટીમાં ખાસ કરીને દૂરના અને વ્યૂહાત્મક રીતે મહત્વપૂર્ણ પ્રદેશોમાં નોંધપાત્ર સુધારો કરશે.

આ બેઠકનું અધ્યક્ષપદ સંભાળતા ઉદ્યોગ અને આંતરિક વેપાર વિભાગ (DPIIT) ના મુખ્ય આર્થિક સલાહકાર શ્રી પ્રવીણ મહતોએ પ્રોજેક્ટ મોનિટરિંગ માટે સંસ્થાકીય માળખાને મજબૂત બનાવવાની સરકારની પ્રતિબદ્ધતાને પુનઃપુષ્ટિ આપી. તેમણે સંબંધિત અધિકારીઓને બાકી રહેલા મુદ્દાઓના ઉકેલ માટે સક્રિય અભિગમ અપનાવવાનો નિર્દેશ આપ્યો હતો. શ્રી મહતોએ અમલીકરણને વેગ આપવા માટે પ્રોજેક્ટ મોનિટરિંગ ગ્રુપ (PMG) પ્લેટફોર્મ (https://pmg.dpiit.gov.in/) નો સક્રિયપણે ઉપયોગ કરવાના ખાનગી પ્રોજેક્ટ સમર્થકોના મહત્વ પર પણ ભાર મૂક્યો હતો. તેમણે જણાવ્યું કે પ્રોજેક્ટ સંબંધિત ચિંતાઓના સમયસર અને કાર્યક્ષમ નિરાકરણ માટે કેન્દ્રીય મંત્રાલયો, રાજ્ય સરકારો અને ખાનગી હિસ્સેદારો વચ્ચે અસરકારક સંકલન જરૂરી છે.

આ બેઠકમાં કેન્દ્રીય મંત્રાલયો, રાજ્ય સરકારો અને મુખ્ય પ્રોજેક્ટ સમર્થકોના વરિષ્ઠ અધિકારીઓએ હાજરી આપી હતી, જે સહયોગી માળખાગત વિકાસ પ્રત્યે મજબૂત પ્રતિબદ્ધતા દર્શાવે છે.

AP/IJ/GP/JD

(Release ID: 2142976)