નાણા મંત્રાલય હેઠળના સેન્ટ્રલ બોર્ડ ઓફ ડાયરેક્ટ ટેક્સ (CBDT) એ ઇન્ડિયન રિન્યુએબલ એનર્જી ડેવલપમેન્ટ એજન્સી લિમિટેડ (IREDA) દ્વારા જારી કરાયેલા બોન્ડ્સને આવકવેરા અધિનિયમ, 1961ની કલમ 54EC હેઠળ 'લાંબા ગાળાની ચોક્કસ સંપત્તિ' તરીકે સૂચિત કર્યા છે. આ સૂચના 9 જુલાઈ, 2025થી અમલમાં આવશે.

સૂચના અનુસાર, પાંચ વર્ષ પછી રિડીમ કરી શકાય તેવા અને IREDA દ્વારા સૂચના આપ્યાની તારીખ અથવા તે પછી જારી કરાયેલા બોન્ડ્સ આવકવેરા અધિનિયમ, 1961ની કલમ 54EC હેઠળ કર મુક્તિ માટે પાત્ર રહેશે, જે ચોક્કસ બોન્ડ્સમાં રોકાણ પર મૂડીગત લાભને કરમાંથી મુક્તિ આપે છે. આ બોન્ડ્સમાંથી મળેલી રકમનો ઉપયોગ ફક્ત નવીનીકરણીય ઉર્જા પ્રોજેક્ટ્સ માટે કરવામાં આવશે, જે તેમના પ્રોજેક્ટની આવક દ્વારા લોન ચૂકવી શકે છે, અને લોનની ચૂકવણી માટે રાજ્ય સરકારો પર નિર્ભર રહેશે નહીં.

લાયક રોકાણકારો એક નાણાકીય વર્ષમાં આ બોન્ડ્સમાં રોકાણ કરીને રૂ. 50 લાખ સુધીના લાંબા ગાળાના મૂડી લાભ (LTCG) પર કર બચાવી શકે છે. IREDAને ઓછા ખર્ચે ભંડોળનો લાભ મળશે, જે નવીનીકરણીય ઉર્જા ક્ષેત્ર માટે એક મહત્વપૂર્ણ પગલું છે, અને બદલામાં નવીનીકરણીય ઉર્જા ક્ષેત્રના ઝડપી વિકાસમાં મદદ કરશે.

સૂચનાનું સ્વાગત કરતા, IREDAના ચેરમેન અને મેનેજિંગ ડિરેક્ટર શ્રી પ્રદીપ કુમાર દાસે જણાવ્યું હતું કે, “આ મૂલ્યવાન નીતિગત પહેલ માટે અમે નાણા મંત્રાલય, નવી અને નવીનીકરણીય ઉર્જા મંત્રાલય અને સેન્ટ્રલ બોર્ડ ઓફ ડાયરેક્ટ ટેક્સીસના ખૂબ આભારી છીએ. સરકાર દ્વારા આ માન્યતા દેશમાં નવીનીકરણીય ઉર્જા ધિરાણને વેગ આપવામાં IREDAની મહત્વપૂર્ણ ભૂમિકાને મજબૂત બનાવે છે. અમારા બોન્ડ્સની કરમુક્ત સ્થિતિ આકર્ષક રોકાણ તક પૂરી પાડશે અને ગ્રીન એનર્જી પ્રોજેક્ટ્સ માટે મૂડીની ઉપલબ્ધતામાં વધારો સુનિશ્ચિત કરશે, જેનાથી 2030 સુધીમાં ભારતના 500 GW નોન-ફોસિલ ઇંધણ ક્ષમતાના લક્ષ્યાંકમાં ફાળો મળશે.”

આ પગલાંથી કર-બચત તકો શોધી રહેલા રોકાણકારોની વ્યાપક ભાગીદારી થવાની અને દેશમાં નવીનીકરણીય ઉર્જા ધિરાણ ઇકોસિસ્ટમને મજબૂત બનાવવાની અપેક્ષા છે.

AP/NP/GP/JT

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com