ગઈકાલે વિયેનામાં આયોજિત 9માં OPEC આંતરરાષ્ટ્રીય સેમિનારમાં ભાગ લેવા દરમિયાન, પેટ્રોલિયમ અને કુદરતી ગેસ મંત્રી શ્રી હરદીપ સિંહ પુરીએ ભારતની ઊર્જા ભાગીદારીને વધુ ગાઢ બનાવવા અને દેશની વધતી જતી ઊર્જા જરૂરિયાતોને ટેકો આપવાના હેતુથી મહત્વપૂર્ણ દ્વિપક્ષીય અને વ્યાપારિક બેઠકોની શ્રેણી યોજી હતી.

શ્રી પુરીએ કુવૈતના ઓઈલ મંત્રી અને કુવૈત પેટ્રોલિયમ કોર્પોરેશનના અધ્યક્ષ મહામહિમ તારેક સુલેમાન અલ-રૌમી સાથે મુલાકાત કરી, જ્યાં બંને પક્ષોએ હાલના જોડાણને વધુ મજબૂત બનાવવાના માર્ગો પર ચર્ચા કરી હતી. કુવૈત હાલમાં ક્રૂડ ઓઇલના છઠ્ઠા સૌથી મોટા સ્ત્રોત, LPGના ચોથા સૌથી મોટા સ્ત્રોત અને ભારતના 8મા સૌથી મોટા હાઇડ્રોકાર્બન વેપાર ભાગીદાર તરીકે સ્થાન ધરાવે છે, જે આ દ્વિપક્ષીય ઊર્જા સંબંધોની ઊંડાઈ અને વ્યૂહાત્મક મહત્વને પ્રકાશિત કરે છે.

એક અલગ બેઠકમાં, શ્રી પુરીએ નાઇજીરીયાના પેટ્રોલિયમ સંસાધન રાજ્યમંત્રી મહામહિમ સેનેટર હેઈનકેન લોકપોબિરીને મળ્યા હતા. આ વાતચીત 2024માં દાવોસ ખાતે તેમની અગાઉની મુલાકાત પછી થઈ હતી. ભારતીય કંપનીઓ નાઇજીરીયાના ક્રૂડ ઓઈલની સતત ખરીદદાર રહી છે, અને ચર્ચાઓ બંને દેશો વચ્ચે હાઇડ્રોકાર્બન વેપારને વધુ વિસ્તૃત કરવા અને લાંબા સમયથી ચાલતી ભાગીદારીને મજબૂત બનાવવાના માર્ગો શોધવા પર કેન્દ્રિત હતી.

વધુમાં, શ્રી પુરીએ શેલના સીઈઓ શ્રી વાએલ સાવન સાથે એક ટૂંકી મુલાકાત કરી, જેમાં ભારતની મહત્વાકાંક્ષી શોધ અને ઉત્પાદન (E&P) યોજનાઓના પ્રકાશમાં સંભવિત સહયોગની ચર્ચા કરવામાં આવી હતી. પ્રધાનમંત્રી શ્રી નરેન્દ્ર મોદીના નેતૃત્વ હેઠળ, ભારત નવા ઓફશોર અને ઓનશોર વિસ્તારોમાં લગભગ 2.5 લાખ ચોરસ કિલોમીટરનું અન્વેષણ કરવા માટે તૈયાર છે, જે વિશ્વના સૌથી મોટા બિડિંગ રાઉન્ડમાંનું એક છે. શ્રી પુરીએ ભાર મૂક્યો કે ભારતના ઊર્જા મિશ્રણમાં કુદરતી ગેસનો હિસ્સો 6% થી વધારીને 15% કરવાના પ્રયાસો અદ્યતન ટેકનોલોજીકલ ભાગીદારી માટે નોંધપાત્ર તકો રજૂ કરે છે. તેમણે નોંધ્યું હતું કે શેલની અદ્યતન ટેકનોલોજીઓથી વધુ E&P પ્રવૃત્તિ તરફનો પ્રવાહ લાભદાયક રહેશે, જે ભારતના ઊર્જા સુરક્ષા ઉદ્દેશ્યોને ટેકો આપતા પરસ્પર ફાયદાકારક સહયોગ માટે માર્ગ મોકળો કરશે.

સેમિનારમાં, શ્રી હરદીપ સિંહ પુરી, OPECના સેક્રેટરી જનરલ HE હૈથમ અલ ​​ગૈસને પણ મળ્યા હતા. શ્રી પુરીએ ટ્વીટ કર્યું કે તેઓ તેમના પ્રિય મિત્ર અને OPECના સેક્રેટરી જનરલ HE હૈથમ અલ ​​ગૈસ સાથે રસપ્રદ ચર્ચા કરીને ખુશ છે. તેમણે OPEC સાથે ભારતની મજબૂત ભાગીદારી અને ખાસ કરીને તાજેતરના ભૂ-રાજકીય પડકારોને ધ્યાનમાં રાખીને, ઓઈલ બજારો સંતુલિત અને અનુમાનિત રહે તે સુનિશ્ચિત કરવાના માર્ગો પર ચર્ચા કરી હતી. વિશ્વના ત્રીજા સૌથી મોટા ઓઈલ આયાતકાર તરીકે, ભારત અને OPEC, મુખ્ય ઓઈલ ઉત્પાદકોના જૂથ, એક અનન્ય અને સહજીવન સંબંધ ધરાવે છે.

BPના CEO શ્રી મુરે ઓચિનક્લોસ સાથેની તેમની મુલાકાતમાં, શ્રી પુરીએ શેર કર્યું કે તેમની ચર્ચાઓ આકર્ષક અને સમજદાર હતી. તેમણે ભારતના અપસ્ટ્રીમ અને ડાઉનસ્ટ્રીમ ઊર્જા ક્ષેત્રમાં BPની ભાગીદારીને મજબૂત બનાવવા પર ચાલી રહેલા સંવાદને આગળ ધપાવ્યો હતો. BP ઊર્જા મૂલ્ય શૃંખલામાં ભારતમાં લાંબા સમયથી અને વ્યાપક જોડાણ ધરાવે છે અને OALP ના 9મા રાઉન્ડમાં ભાગ લીધો છે. ચર્ચામાં OALP રાઉન્ડ-10 હેઠળ 2.5 લાખ ચોરસ કિમીનું અન્વેષણ કરીને ભારતની સ્થાનિક E&P ક્ષમતાઓને આક્રમક રીતે વધારવાની યોજનાઓને પણ આવરી લેવામાં આવી હતી. વર્ષોથી, ભારતીય PSUs એ વૈશ્વિક સ્તરે BP સાથે E&P રોકાણ માટે ભાગીદારી કરી છે અને હવે રિટેલ, કુદરતી ગેસ અને કોમ્પ્રેસ્ડ બાયોગેસમાં સહયોગ કરી રહ્યા છે, જે PM નરેન્દ્ર મોદીજીના નેતૃત્વ હેઠળ ભારતના ગ્રીન એનર્જી સંક્રમણમાં કેન્દ્રિય છે. BP એ પુણેમાં એક વિશ્વ-સ્તરીય ગ્લોબલ બિઝનેસ એન્ડ ટેકનોલોજી સેન્ટરની પણ સ્થાપના કરી છે. જે તેમની વૈશ્વિક કામગીરીને અદ્યતન સેવાઓ પૂરી પાડે છે.

શ્રી પુરીએ વિટોલના ગ્રુપ સીઈઓ શ્રી રસેલ હાર્ડીને પણ મળ્યા, જ્યાં તેમણે વૈશ્વિક ઊર્જા બજારોમાં વર્તમાન પડકારો અને હાઇડ્રોકાર્બન મૂલ્ય શૃંખલામાં સહયોગની ચર્ચા કરી હતી. શ્રી પુરીએ નોંધ્યું કે PM શ્રી નરેન્દ્ર મોદીજીના નેતૃત્વ હેઠળ ઊર્જા માળખાના વિસ્તરણ અને વૃદ્ધિ તરફ ભારતના અભૂતપૂર્વ દબાણથી ઉદ્ભવતા વિશાળ સહયોગની તકો - જેમાં સંશોધન અને ઉત્પાદન, રિફાઇનિંગ અને ગેસ-આધારિત ઊર્જા સંક્રમણનો સમાવેશ થાય છે, જે વિશ્વભરમાં ગુંજતી રહી છે અને વૈશ્વિક સ્તરે ચર્ચા પેદા કરી રહી છે.

રશિયન ઓઈલ ખરીદવા અંગે ભારતનું વલણ:

પ્રેસ ઇન્ટરવ્યુ દરમિયાન રશિયન ઓઈલ ખરીદવા અંગે પૂછવામાં આવતા, મંત્રી શ્રી પુરીએ સમજાવ્યું કે રશિયા દરરોજ 9 મિલિયન બેરલથી વધુનું ઉત્પાદન કરે છે અને ક્રૂડ ઓઇલના સૌથી મોટા ઉત્પાદકોમાંનો એક છે. જો, લગભગ 97 મિલિયન બેરલના વૈશ્વિક ઓઈલ પુરવઠામાંથી, 9 મિલિયન બેરલ અચાનક ગાયબ થઈ ગયા હોત, તો સમગ્ર વિશ્વએ વપરાશમાં 10% થી વધુ ઘટાડો કરવો પડ્યો હોત, જે અશક્ય છે. આ અંધાધૂંધીથી વૈશ્વિક ઓઈલના ભાવ પ્રતિ બેરલ 130-200 ડોલરથી વધુ થઈ ગયા હોત કારણ કે બધા ગ્રાહકો ઘટાડેલા પુરવઠાનો પીછો કરતા હોત.

ભારતે ક્યારેય કોઈ મંજૂર કાર્ગો ખરીદ્યો નથી. રશિયન ઓઈલ ક્યારેય વૈશ્વિક પ્રતિબંધો હેઠળ નહોતું. કારણ કે સમજદાર નિર્ણય લેનારાઓ વૈશ્વિક ઓઈલ પુરવઠા શૃંખલાઓની વાસ્તવિકતાઓથી વાકેફ હતા. તેને ફક્ત કિંમત મર્યાદા હેઠળ મૂકવામાં આવ્યું હતું. ફક્ત તે જ ટીકાકારો જેમને ઓઈલ બજારોની સમજ નથી તેઓ અમારી નીતિઓ પર બિનજરૂરી નિર્ણયો લે છે.

પ્રધાનમંત્રી શ્રી નરેન્દ્ર મોદીના નેતૃત્વમાં, ભારત વૈશ્વિક ઊર્જા ભાવ સ્થિરતામાં ચોખ્ખો હકારાત્મક ફાળો આપનાર રહ્યો છે. ગયા વર્ષે વૈશ્વિક સ્તરે LPGના ભાવમાં વધારો થયો હોવા છતાં, પ્રધાનમંત્રીએ ખાતરી કરી કે આપણા 330 મિલિયન પરિવારોને વૈશ્વિક સ્તરે સૌથી નીચા ભાવે સ્વચ્છ રસોઈ ગેસની સુવિધા મળતી રહે, જેનાથી આપણા ઉજ્જવલા લાભાર્થીઓને માત્ર $0.4 પ્રતિ કિલોગ્રામના ભાવે, અથવા સરેરાશ ઉજ્જવલા પરિવાર માટે ફક્ત 7-8 સેન્ટ પ્રતિ દિવસના ભાવે સાર્વત્રિક સ્વચ્છ રસોઈ સુવિધા મળી રહે.

AP/IJ/GP/JD