કેન્દ્રીય ગૃહમંત્રી અને સહકારિતા મંત્રી શ્રી અમિત શાહે આજે નવી દિલ્હીમાં યમુનાના પુનર્જીવન અંગે એક ઉચ્ચ સ્તરીય સમીક્ષા બેઠકની અધ્યક્ષતા કરી હતી. આ બેઠકમાં કેન્દ્રીય આવાસ અને શહેરી બાબતોના મંત્રી શ્રી મનોહર લાલ, કેન્દ્રીય જળ શક્તિ મંત્રી શ્રી સીઆર પાટીલ, દિલ્હીના મુખ્યમંત્રી શ્રીમતી રેખા ગુપ્તા, કેન્દ્રીય ગૃહ સચિવ, સચિવો અને સંબંધિત મંત્રાલયો અને દિલ્હી સરકારના વરિષ્ઠ અધિકારીઓ હાજર રહ્યા હતા.

બેઠકને સંબોધતા કેન્દ્રીય ગૃહમંત્રી અને સહકારિતા મંત્રી શ્રી અમિત શાહે જણાવ્યું હતું કે દિલ્હી પ્રદૂષણ નિયંત્રણ સમિતિ (DPCC) એ જળ પ્રદૂષણને નિયંત્રિત કરવા માટે એક્શન મોડમાં કામ કરવું જોઈએ. તેમણે કહ્યું કે દિલ્હી સરકારે ઔદ્યોગિક એકમોમાંથી વધતા પ્રદૂષણને રોકવા માટે સતત અને અસરકારક પગલાં લેવા જોઈએ. શ્રી અમિત શાહે કહ્યું હતું કે દિલ્હી ઉપરાંત, અન્ય રાજ્યોના કચરા દ્વારા પણ રસાયણો યમુના નદીમાં આવી રહ્યા છે, તેથી આ બધા રાજ્યોએ યમુના નદીને સાફ કરવા માટે સાથે મળીને કામ કરવું જોઈએ.

નજફગઢ અને શાહદરાના મુખ્ય નાળાઓમાં બાયોકેમિકલ ઓક્સિજન ડિમાન્ડ (BOD) સુધારવા માટે એક્શન મોડ પર કામ કરવા પર ભાર મૂક્યો . શ્રી અમિત શાહે દિલ્હીના બે મુખ્ય નાળા, નજફગઢ અને શાહદરાના નાળાઓનો ડ્રોન સર્વે કરવા પર ભાર મૂક્યો . તેમણે કહ્યું કે દિલ્હી સરકાર દ્વારા નદીઓને સાફ કરવા માટે કરવામાં આવી રહેલા પ્રયાસો ઉપરાંત, રાષ્ટ્રીય સ્વચ્છ ગંગા મિશન (NMCG) ના બજેટમાં વધારો કરવાની જરૂર છે.

કેન્દ્રીય ગૃહમંત્રી અને સહકારિતા મંત્રી શ્રી અમિત શાહે યમુનાની સફાઈ તેમજ સુએજ ટ્રીટમેન્ટ પ્લાન્ટ (STP) ની ક્ષમતા વધારવા પર ખાસ ભાર મૂક્યો. તેમણે 2028 સુધીમાં STP ક્ષમતા 1500 MGD સુધી વધારવાનો નિર્દેશ આપ્યો. શ્રી શાહે કહ્યું કે ત્રણેય રાજ્યો, હરિયાણા, દિલ્હી અને ઉત્તર પ્રદેશે, યમુનાના પુનર્જીવન માટે પ્રયાસો કરવા જોઈએ અને તેમના STP માંથી વહેતા પાણીના પરીક્ષણમાં નિયમિતતા અને પારદર્શિતા હોવી જોઈએ. તેમણે STP આઉટફ્લોના તૃતીય પક્ષ ગુણવત્તા પરીક્ષણ પર ભાર મૂક્યો.

શ્રી અમિત શાહે કહ્યું કે દિલ્હીમાં ઘણા જળાશયો છે જેમાં દિલ્હી સરકારે વરસાદી પાણીનો સંગ્રહ કરવાની વ્યવસ્થા કરવી જોઈએ. શ્રી શાહે કહ્યું કે આ જળાશયો વિકસાવવાથી પર્યટનને પણ પ્રોત્સાહન મળશે. કેન્દ્રીય ગૃહમંત્રીએ કહ્યું કે દિલ્હી સરકારે ડેરીઓ અને ગૌશાળાઓ દ્વારા ઉત્પાદિત કચરાનું સંચાલન કરવા માટે રાષ્ટ્રીય ડેરી વિકાસ બોર્ડ (NDDB) સાથે સહયોગમાં કામ કરવું જોઈએ. શ્રી અમિત શાહે રાષ્ટ્રીય રાજધાનીમાં અનધિકૃત ડેરીઓનું સંચાલન કરવા પર ભાર મૂક્યો.

શ્રી અમિત શાહે યમુનામાં ઈ-ફ્લો વધારવા પર ખાસ ભાર મૂક્યો અને કહ્યું કે આ મુદ્દા પર ઉત્તર પ્રદેશ સરકાર સાથે વાત કરવાની અને ઉકેલ શોધવાની જરૂર છે જેથી દિલ્હીમાં પ્રવેશ સમયે યમુનાના પ્રવાહમાં સુધારો થઈ શકે. તેમણે કહ્યું કે ઓખલા એસટીપીનું ટ્રીટેડ પાણી યમુનાના નીચે તરફ છોડવું જોઈએ જે નદીના પાણીની ગુણવત્તા સુધારવામાં મદદ કરશે.

કેન્દ્રીય ગૃહમંત્રીએ જણાવ્યું હતું કે દિલ્હીમાં પાણી પુરવઠા અંગે એક વિગતવાર સર્વેક્ષણ હાથ ધરવું જોઈએ, જેથી એ જાણી શકાય કે દિલ્હીમાં રહેતા તમામ લોકોને કેટલું પાણી પૂરું પાડવાની જરૂર છે. બોરવેલ દ્વારા અનિયંત્રિત પાણી નિષ્કર્ષણ દિલ્હીમાં એક મોટી સમસ્યા છે, જેના પર દિલ્હી જળ બોર્ડે એક એક્શન પ્લાન બનાવીને કામ કરવાની જરૂર છે. તેમણે કહ્યું કે આ બોરવેલને તબક્કાવાર નિયમિત કરવા જોઈએ.

AP/NP/GP/JD