પ્રધાનમંત્રી શ્રી નરેન્દ્ર મોદી અને યુકેના પ્રધાનમંત્રી સર કીર સ્ટાર્મરે આજે ઐતિહાસિક ભારત-યુકે વ્યાપક આર્થિક અને વેપાર કરાર [CETA] પર હસ્તાક્ષર કર્યા બાદ ભારત અને યુકેના ઉદ્યોગપતિઓને મળ્યા. આ બેઠકમાં આરોગ્યસંભાળ, ફાર્માસ્યુટિકલ્સ, રત્નો અને ઝવેરાત, ઓટોમોબાઇલ્સ, ઉર્જા, ઉત્પાદન, ટેલિકોમ્યુનિકેશન, ટેકનોલોજી, IT, લોજિસ્ટિક્સ, કાપડ અને નાણાકીય સેવાઓ ક્ષેત્રોના બંને પક્ષોના અગ્રણી ઉદ્યોગપતિઓએ હાજરી આપી હતી. આ ક્ષેત્રો બંને દેશોમાં રોજગાર સર્જન અને સમાવિષ્ટ આર્થિક વિકાસમાં નોંધપાત્ર ફાળો આપે છે.

બંને નેતાઓએ તાજેતરના વર્ષોમાં દ્વિપક્ષીય વેપાર અને રોકાણ સંબંધોમાં થયેલા વિસ્તરણની નોંધ લીધી. ઉદ્યોગપતિઓ સાથે વાતચીત કરીને, તેઓએ તેમને વેપાર, રોકાણ અને નવીનતા ભાગીદારીને વધુ ગાઢ બનાવવા માટે CETA દ્વારા ઓફર કરવામાં આવતી તકોની સંપૂર્ણ સંભાવનાનો લાભ લેવા પ્રોત્સાહિત કર્યા. દ્વિપક્ષીય સહયોગ વધારીને આર્થિક વિકાસને વેગ આપવા માટે તેમની સહિયારી પ્રતિબદ્ધતાને પુનરાવર્તિત કરતા, તેમણે કહ્યું કે આ નવો કરાર બંને અર્થતંત્રો અને વૈશ્વિક આર્થિક પરિદૃશ્યમાં વ્યવસાયિક ભાવનાને વેગ આપશે. CETAના નક્કર ફાયદાઓ પર પ્રકાશ પાડતા, બંને નેતાઓએ બંને દેશોના મુખ્ય ઉત્પાદનો અને નવીનતાઓની પ્રભાવશાળી શ્રેણી પ્રદર્શિત કરી. પ્રદર્શનોમાં રત્નો અને ઝવેરાત, એન્જિનિયરિંગ માલ, ગુણવત્તાયુક્ત ગ્રાહક ઉત્પાદનો અને અદ્યતન તકનીકી ઉકેલોનો સમાવેશ થતો હતો.

ભારત-યુકે ઉદ્યોગના નેતાઓએ સીમાચિહ્નરૂપ વેપાર કરારની પ્રશંસા કરી અને આશા વ્યક્ત કરી કે તે વ્યાપક વ્યૂહાત્મક ભાગીદારીમાં એક નવા યુગની શરૂઆત કરશે અને માત્ર વેપાર અને અર્થતંત્રમાં જ નહીં, પરંતુ ઉભરતી તકનીકો, શિક્ષણ, નવીનતા, સંશોધન અને આરોગ્ય ક્ષેત્રોમાં પણ સહયોગને વધુ ગાઢ બનાવશે.

બંને નેતાઓએ નવા કરારની સંભાવનાનો ઉપયોગ કરવા અને આગામી વર્ષોમાં આર્થિક સહયોગના બંધનને વધુ ગાઢ બનાવવા માટે નાના અને મોટા વ્યવસાયોને ટેકો આપવાની તેમની પ્રતિબદ્ધતાનો પુનરોચ્ચાર કર્યો હતો.

AP/IJ/NP/GP/JD