કેન્દ્રીય ગ્રામીણ વિકાસ અને કૃષિ અને ખેડૂત કલ્યાણ મંત્રી, શ્રી શિવરાજ સિંહ ચૌહાણે, રાષ્ટ્રીય હાથવણાટ દિવસ નિમિત્તે, આજે નવી દિલ્હીના કૃષિ ભવનથી સ્વ-સહાય જૂથોની લાખો બહેનો સાથે વર્ચ્યુઅલ વાર્તાલાપ કર્યો હતો. આ પ્રસંગે કેન્દ્રીય ગ્રામીણ વિકાસ રાજ્યમંત્રી શ્રી ચંદ્રશેખર પેમ્માસાની, ગ્રામીણ વિકાસ મંત્રાલયના સચિવ શ્રી શૈલેષ કુમાર સિંહ અને મંત્રાલયના વરિષ્ઠ અધિકારીઓ હાજર રહ્યા હતા.

કાર્યક્રમમાં, વિવિધ રાજ્યોના સ્વ-સહાય જૂથોની બહેનોએ પોતાના અનુભવો શેર કર્યા અને પોતાના જીવનમાં થયેલી પ્રગતિ વ્યક્ત કરી હતી. બહેનોએ જણાવ્યું કે કેન્દ્રીય ગ્રામીણ વિકાસ મંત્રાલય દ્વારા સંચાલિત રાષ્ટ્રીય ગ્રામીણ આજીવિકા મિશન (NRLM) એ તેમના જીવનમાં આર્થિક સ્થિરતા તો લાવી જ છે, પરંતુ મિશનના યોગદાનને કારણે તેમની સામાજિક પ્રતિષ્ઠામાં પણ વધારો થયો છે.

આ પ્રસંગે, કેન્દ્રીય મંત્રી શ્રી શિવરાજ સિંહે કહ્યું કે મહિલાઓ શક્તિ અને સર્જનાત્મકતાનું એક અનોખું ઉદાહરણ છે. તેમણે કહ્યું કે હાથવણાટ એ આત્મનિર્ભરતા સાથે સંબંધિત વિષય છે. હાથવણાટ સ્વતંત્રતા માટે અહિંસક ચળવળનું એક શસ્ત્ર પણ હતું. હજારો વર્ષ પહેલાં, આપણા ગ્રામીણ કારીગરોની અદ્ભુત કલાએ માત્ર ભારતમાં જ નહીં પરંતુ વિશ્વના દેશોમાં પણ પોતાની ઓળખ સ્થાપિત કરી હતી.

કેન્દ્રીય મંત્રીએ કહ્યું કે સ્વ-સહાય જૂથની બહેનોની અદ્ભુત કુશળતાએ સ્થાનિક કલા અને સંસ્કૃતિને પુનર્જીવિત કરવાનું ઉત્તમ કાર્ય કર્યું છે. તેમની રચનાઓ ભારતની સાંસ્કૃતિક ઓળખ સ્થાપિત કરવા અને લોક કલાઓને વ્યક્ત કરવા માટે એક માધ્યમ બની છે.

કેન્દ્રીય મંત્રી શિવરાજ સિંહે જણાવ્યું હતું કે માર્કેટિંગ અને બ્રાન્ડિંગ અંગે બહેનો દ્વારા કેટલાક વિષયો ધ્યાનમાં લાવવામાં આવ્યા છે, જેના પર ગંભીરતાથી વિચારણા કરવામાં આવશે અને તેના પર કામ કરવામાં આવશે. તેમણે કહ્યું કે આજનો સમય ડિઝાઇનની માંગ પર આધારિત છે, તાલીમ અંગે આ દિશામાં વધુ પગલાં લેવામાં આવશે. તેમણે સ્વ-સહાય જૂથોની બહેનોને સ્પર્ધાત્મક રહેવા માટે ઉત્પાદનોની ગુણવત્તા હંમેશા ઊંચી રાખવાનું પણ આહ્વાન કર્યું હતું.

વધુમાં, શ્રી શિવરાજ સિંહ ચૌહાણે કહ્યું કે પ્રધાનમંત્રી શ્રી નરેન્દ્ર મોદીએ દેશને એક મહત્વપૂર્ણ સંદેશ આપ્યો છે.  પ્રધાનમંત્રીએ સ્વદેશી ઉત્પાદનો અપનાવવાનો મંત્ર આપ્યો છે. આજે પ્રધાનમંત્રીએ ફરીથી સ્પષ્ટતા કરી છે કે 'દેશના ખેડૂતો, કારીગરો અને નાના ઉદ્યોગસાહસિકોને અવગણીને દુનિયામાં કોઈ પણ કરાર કરવામાં આવશે નહીં. રાષ્ટ્રીય હિત સર્વોપરી છે, તેના પર કોઈ સમાધાન થશે નહીં, ભલે તેમને તેના માટે પોતાને વ્યક્તિગત નુકસાન સહન કરવું પડે. ભારત આત્મસન્માન સાથે ઊભું રહેશે અને દેશના નાગરિકોના હિતોનું હંમેશા રક્ષણ કરવામાં આવશે. પ્રધાનમંત્રીના આ શબ્દો ઉર્જાવાન છે. તેઓ વિકસિત ભારતની વિભાવનાને મજબૂત બનાવે છે, તેથી આપણે બધાએ આપણા પોતાના દેશમાં ઉત્પાદિત ઉત્પાદનો તરફ વળવું જોઈએ, રાષ્ટ્રની ભાવનાને પહેલા ઉજાગર કરવી જોઈએ.

કેન્દ્રીય મંત્રી શ્રી ચૌહાણે સ્વ-સહાય જૂથોમાં બહેનોની સંખ્યામાં સતત વધારો થવા પર ખુશી વ્યક્ત કરી અને કહ્યું કે આ મિશન પ્રધાનમંત્રી શ્રી મોદીના હૃદયની ખૂબ નજીક છે. અત્યાર સુધીમાં દેશમાં 1.5 કરોડથી વધુ બહેનો લાખપતિ બની છે. અમે 2 કરોડ લાખપતિ બહેનો બનાવવા તરફ આગળ વધી રહ્યા છીએ અને ટૂંક સમયમાં આ મિશન હેઠળ 3 કરોડ બહેનોને લાખપતિ બનાવવાનું લક્ષ્ય પ્રાપ્ત થશે.

સ્વદેશી અપનાવવાના સંકલ્પને પુનરાવર્તિત કરતા, કેન્દ્રીય મંત્રી શિવરાજ સિંહે દેશવાસીઓને વસ્તીને શક્તિમાં ફેરવવા માટે કામ કરવા હાકલ કરી છે કે,રક્ષાબંધન અને આગામી અન્ય તહેવારો દરમિયાન દેશમાં ઉત્પાદિત ઉત્પાદનોનો જ ઉપયોગ કરો. તેમણે કહ્યું કે આ કાર્યક્રમ દ્વારા હું સંદેશ આપવા માંગુ છું કે આપણે રાષ્ટ્રની ભાવનાને પહેલા રાખવી જોઈએ અને નક્કી કરવું જોઈએ કે આપણે ફક્ત દેશમાં બનેલી વસ્તુઓ જ ખરીદીશું. શ્રી શિવરાજ સિંહે કહ્યું કે સ્વદેશીના મંત્રને અપનાવવાથી બજારના વિકલ્પો વ્યાપક સ્તરે ખુલશે, આપણી અર્થવ્યવસ્થાને મજબૂત કરવા માટે, આપણે વોકલ ફોર લોકલની દિશામાં આગળ વધવું પડશે.

કાર્યક્રમનું સમાપન કેન્દ્રીય મંત્રી શ્રી શિવરાજ સિંહ ચૌહાણના 'સ્વદેશી અપનાવો અને આત્મસન્માન વધારો' ના સંકલ્પ સાથે થયું હતું. અહીં બહેનોએ સ્ટોલ પર તેમના ઉત્પાદનો પણ પ્રદર્શિત કર્યા, જેને શ્રી ચૌહાણે નિહાળ્યા અને તેમની મહેનતની પ્રશંસા કરી હતી.

AP/IJ/GP/JD