કેન્દ્રીય કૃષિ અને ખેડૂત કલ્યાણ અને ગ્રામીણ વિકાસ મંત્રી શ્રી શિવરાજ સિંહ ચૌહાણને મધ્યપ્રદેશના ઘણા ખેડૂતો તરફથી ફરિયાદો મળી હતી કે ક્લોરીમુરોન ઇથિલ 25% WP નામના નીંદણનાશકના ઉપયોગને કારણે ખેડૂતોના સોયાબીનના પાકને નુકસાન થઈ રહ્યું છે. આ ફરિયાદોને ગંભીરતાથી લેતા, તેમણે તાત્કાલિક કંપની અને ડીલરો સામે કડક કાર્યવાહી કરવાનો નિર્દેશ આપ્યો, ત્યારબાદ નમૂનાઓ જપ્ત કરીને પરીક્ષણ કરવામાં આવ્યું અને જ્યારે નમૂનાઓ હલકી ગુણવત્તાવાળા હોવાનું જાણવા મળ્યું, ત્યારે મધ્યપ્રદેશના 3 જિલ્લાઓ, વિદિશા, દેવાસ અને ધારમાં ડિફોલ્ટર કંપની સામે FIR નોંધવામાં આવી હતી. આ સાથે બાકીના સ્ટોકના વેચાણ પર પ્રતિબંધ મૂકવા અને ડીલરોના લાઇસન્સ સસ્પેન્ડ કરવાનો આદેશ આપ્યો હતો. શ્રી શિવરાજ સિંહે દેશભરમાં વ્યાપક ઓચિંતા દરોડાની ઝુંબેશ ચલાવવાની સૂચના પણ આપી છે.

કેન્દ્રીય કૃષિ મંત્રી શ્રી શિવરાજ સિંહ ચૌહાણના નિર્દેશો પછી, કૃષિ વિભાગે બજારમાંથી ઉપરોક્ત હર્બિસાઇડના નમૂના જપ્ત કર્યા હતા અને તેનું પરીક્ષણ કરાવ્યું હતું. તપાસ અહેવાલમાં જાણવા મળ્યું કે સંબંધિત હર્બિસાઇડ નબળી ગુણવત્તાનું હતું અને આ પાકને નુકસાનનું કારણ હતું. આ સંદર્ભમાં, વિદિશા (ગ્રામીણ), દેવાસ (કન્નૌડ), ધાર (બદનાવર) જિલ્લાઓમાં ડિફોલ્ટર કંપની સામે FIR નોંધવામાં આવી છે.

અસરગ્રસ્ત વિસ્તારોમાં આ નબળી ગુણવત્તાવાળા હર્બિસાઇડ વેચનારા ડીલરોના લાઇસન્સ સસ્પેન્ડ કરવામાં આવ્યા છે. શ્રી શિવરાજ સિંહ ચૌહાણે સ્પષ્ટતા કરી છે કે રાજ્ય સરકારોને તમામ તપાસ પરિણામો ન આવે ત્યાં સુધી ડિફોલ્ટર કંપનીના ઉત્પાદન લાઇસન્સ તાત્કાલિક સ્થગિત કરવાનો નિર્દેશ આપવામાં આવ્યો છે. આ ઉપરાંત, કંપની પાસે ઉપલબ્ધ બાકીના સ્ટોકના વેચાણ પર પણ પ્રતિબંધ મૂકવામાં આવ્યો છે. ખેડૂતોના હિતોને સર્વોપરી ગણાવતા, શ્રી શિવરાજ સિંહે ખેડૂતોને અપીલ કરી છે કે તેઓ હાલમાં ક્લોરીમુરોન ઇથિલ 25% WP (બેચ નંબર KE-04) નો ઉપયોગ ન કરે, જેથી પાકને વધુ નુકસાન ન થાય. તેમણે કહ્યું હતું કે કેન્દ્ર અને રાજ્ય સરકારો સાથે મળીને ગુનેગારો સામે કડક કાર્યવાહી કરશે અને ખેડૂતોને ન્યાય અપાવવા માટે દરેક જરૂરી પગલાં લેશે.

SM/NP/GP/JD