કેન્દ્રીય કૃષિ, ખેડૂત કલ્યાણ અને ગ્રામીણ વિકાસ મંત્રી શ્રી શિવરાજ સિંહ ચૌહાણ આજે રશિયાના નાયબ પ્રધાનમંત્રી શ્રી દિમિત્રી પાત્રુશેવ સાથે મુલાકાત કરી અને નવી દિલ્હીના કૃષિ ભવનમાં રશિયન પ્રતિનિધિમંડળ સાથે મુલાકાત કરી. રશિયન પ્રતિનિધિમંડળ સહિત રશિયાના નાયબ કૃષિ મંત્રી પણ હાજર રહ્યા હતા. બેઠક દરમિયાન કૃષિ, વિજ્ઞાન, ટેકનોલોજી, નવીનતા, શૈક્ષણિક અને સાંસ્કૃતિક આદાનપ્રદાન પર વિગતવાર ચર્ચા થઈ.

કેન્દ્રીય કૃષિ મંત્રી શ્રી શિવરાજ સિંહ ચૌહાણે બેઠક વિશે માહિતી આપતા કહ્યું, "અમારી રશિયાના નાયબ પ્રધાનમંત્રી અને તેમની સમગ્ર ટીમ સાથે ખૂબ જ સૌહાર્દપૂર્ણ અને ઉત્પાદક બેઠક થઈ. અમે કૃષિ અને ખાદ્ય સુરક્ષામાં પરસ્પર સહયોગ, દ્વિપક્ષીય વેપારને સંતુલિત કરવા અને ટેકનોલોજીકલ ભાગીદારીને વધુ મજબૂત બનાવવા પર વ્યાપક ચર્ચા કરી. ભારતીય બટાકા અને અનાજના રશિયામાં પ્રવેશ અંગે પણ ચર્ચા કરવામાં આવી."

શ્રી ચૌહાણે જણાવ્યું કે અમે અમારા મત્સ્યઉદ્યોગ ક્ષેત્રની પણ ચર્ચા કરી, જેમાં નોંધપાત્ર નિકાસ ક્ષમતા છે. ચર્ચાઓ મરઘાં ઉત્પાદનોની નિકાસ અને રશિયન બજારમાં પ્રવેશ પર પણ કેન્દ્રિત હતી. શ્રી ચૌહાણે જણાવ્યું હતું કે, "મને વિશ્વાસ છે કે ફાયટોસેનિટરી ધોરણો અને નોન-ટેરિફ અવરોધો સંબંધિત મુદ્દાઓ ટૂંક સમયમાં ઉકેલાઈ જશે." તેમણે ઉમેર્યું હતું કે, "અમે સંશોધન અને નવીનતા પર પણ ચર્ચા કરી હતી." વિજ્ઞાન અને ટેકનોલોજીના આદાનપ્રદાનને સરળ બનાવવા માટે ICAR અને તેના સમકક્ષ સંગઠનો વચ્ચે વ્યાપક સહયોગ પર ચર્ચા ચાલી રહી છે. આ વિષયો પર ખૂબ જ સકારાત્મક દ્રષ્ટિકોણથી ચર્ચા કરવામાં આવી છે.

કેન્દ્રીય કૃષિ મંત્રી શ્રી ચૌહાણે જણાવ્યું હતું કે રશિયામાં અભ્યાસ કરતા ભારતીય વિદ્યાર્થીઓ અને ભારતીય કૃષિ સંસ્થાઓમાં અભ્યાસ કરતા રશિયન વિદ્યાર્થીઓ અંગે ચર્ચા થઈ હતી અને આ અંગે કરાર થયા હતા. કેન્દ્રીય મંત્રીએ જણાવ્યું હતું કે રશિયાએ ચાર ભારતીય વિદ્યાર્થીઓને મફતમાં અભ્યાસ કરવાની મંજૂરી આપવાની પણ ઓફર કરી છે. તેમણે જણાવ્યું હતું કે રશિયન વિદ્યાર્થીઓને ભારતમાં ફેલોશિપનો પણ લાભ મળશે. આનાથી બંને દેશો વચ્ચે માત્ર શૈક્ષણિક જ નહીં પરંતુ સાંસ્કૃતિક આદાનપ્રદાનને પણ પ્રોત્સાહન મળશે. બીજ અને કૃષિ ટેકનોલોજી આધારિત ઉકેલો પર સહયોગ વધારવા પર પણ ચર્ચા થઈ હતી.

અંતે, કેન્દ્રીય કૃષિ મંત્રી શ્રી શિવરાજ સિંહ ચૌહાણે જણાવ્યું હતું કે તેમને વિશ્વાસ છે કે રશિયાના સમર્થન અને સહયોગથી, બાકી રહેલા વેપાર મુદ્દાઓ ઉકેલાઈ જશે, જેનાથી આપણા ખેડૂતો, ગ્રાહકો અને બંને દેશોના નાગરિકોને ફાયદો થશે. કેન્દ્રીય મંત્રીએ ભાર મૂક્યો કે રશિયા અને ભારત વચ્ચેની મિત્રતા શાંતિ અને સ્થિરતા માટે જરૂરી છે. તેમણે કહ્યું કે ભારતની "વસુધૈવ કુટુંબકમ" (વિશ્વ એક પરિવાર છે) ની ભાવના સાચી ભાવના છે, અને આખું વિશ્વ અમારું કુટુંબ છે. આ ભાવનામાં, અમે રશિયા સાથે મળીને વેપાર, નવીનતા, ખાદ્ય સુરક્ષા અને શિક્ષણને વધુ વધારવા માટે કામ કરીશું, સાથે સાથે અમારા રાષ્ટ્રીય હિતોનું રક્ષણ કરીશું.

SM/DK/GP/JD