કેન્દ્રીય કૃષિ, ખેડૂત કલ્યાણ અને ગ્રામીણ વિકાસ મંત્રી શ્રી શિવરાજ સિંહ ચૌહાણે આજે પંજાબની મુલાકાત દરમિયાન લુધિયાણાના નુરપુર બેટ ગામમાં કિસાન ચૌપાલ ખાતે ખેડૂતો સાથે વાર્તાલાપ કર્યો, કૃષિ મશીનરીના લાઈવ પ્રદર્શન નિહાળ્યા અને દોરાહા ગામમાં 'સમન્યુ હની' મધમાખી ઉછેર કેન્દ્રની મુલાકાત લીધી હતી.

નુરપુર બેટ ખાતે, શ્રી ચૌહાણે ડાંગરની કાપણી માટે ઉપયોગમાં લેવાતા સુપર સ્ટ્રો મેનેજમેન્ટ સિસ્ટમ (SSMS) દ્વારા ફિટેડ કમ્બાઈન હાર્વેસ્ટર અને ઘઉંની વાવણી માટે રચાયેલ હેપ્પી સ્માર્ટ સીડર મશીનનું જીવંત પ્રદર્શન નિહાળ્યું હતું.

મીડિયા સાથે વાત કરતા, કેન્દ્રીય મંત્રીએ નુરપુર બેટના ખેડૂતોની પ્રશંસા કરી, નોંધ્યું કે ગામ 2017થી પરાળી બાળી રહ્યું નથી અને તેના બદલે ટકાઉ અવશેષ વ્યવસ્થાપન પદ્ધતિઓ અપનાવી છે. શ્રી ચૌહાણે સમજાવ્યું કે કમ્બાઈનનો ઉપયોગ કર્યા પછી, પરાળીનો મોટો ભાગ ખેતરમાં સમાનરૂપે ફેલાયેલો રહે છે, જેનાથી તેનું સંચાલન સરળ બને છે. કેન્દ્રીય મંત્રીએ જણાવ્યું હતું કે હેપ્પી સ્માર્ટ સીડર એક અદ્યતન તકનીકનું પ્રતિનિધિત્વ કરે છે જે એકસાથે પરાળીને ઢાંકે છે, જમીનને સંકુચિત કરે છે અને કાર્યક્ષમ બીજ પ્લેસમેન્ટ સુનિશ્ચિત કરે છે. શ્રી ચૌહાણે ભાર મૂક્યો કે આધુનિક કૃષિ મશીનોનો ઉપયોગ ખેડૂતોના શ્રમ, સમય અને નાણાં બચાવે છે.

કેન્દ્રીય કૃષિ મંત્રીએ વધુમાં સમજાવ્યું કે યોગ્ય પરાળી વ્યવસ્થાપન અને સીધી બીજ પદ્ધતિઓ અપનાવવાથી સમય જતાં જમીનની ફળદ્રુપતામાં સુધારો થાય છે. "બે વર્ષમાં, જમીનમાં નાઇટ્રોજનનું પ્રમાણ વધશે, જેનાથી યુરિયાની જરૂરિયાત ઓછી થશે, જ્યારે પાકનું ઉત્પાદન પ્રતિ એકર લગભગ બે ક્વિન્ટલ વધશે," શ્રી ચૌહાણે જણાવ્યું હતું કે, તમામ ખેડૂતોને પરાળી બાળવાનું ટાળવા અને પાકના અવશેષોનું જવાબદારીપૂર્વક સંચાલન કરવા વિનંતી કરી હતી.

બાદમાં, કેન્દ્રીય મંત્રીએ દોરાહામાં 'સમન્યુ હની' મધમાખી ઉછેર કેન્દ્રની મુલાકાત લીધી, જ્યાં તેમણે સ્થાનિક ખેડૂતો સાથે વાતચીત કરી અને મધમાખી ઉછેર પદ્ધતિઓમાં નવા મોડેલો અને નવીનતાઓની સમીક્ષા કરી હતી. તેમણે મધમાખી ઉછેર અને ગ્રામીણ આજીવિકા સંબંધિત વિવિધ સરકારી યોજનાઓની પણ ચર્ચા કરી અને આવી ટકાઉ આવક ઉત્પન્ન કરતી પ્રવૃત્તિઓને પ્રોત્સાહન આપવા માટે સતત સમર્થન આપવાની ખાતરી આપી હતી.

SM/IJ/GP/JD

(રીલીઝ આઈડી: 2179163) મુલાકાતી સંખ્યા : 42