રાજ્યમાં અગ્રણી જિલ્લા બેંક દ્વારા જિલ્લાની વિવિધ બેંકોના માધ્યમથી દાવો ન કરાયેલ થાપણો, વીમાની આવક, ડિવિડન્ડ, મ્યુચ્યુઅલ ફંડ બેલેન્સ અને પેન્શનની રકમ પાછી મેળવવા માટે પ્રથમ તબક્કામાં ગુજરાતમાં કુલ 6 જિલ્લાઓ ગાંધીનગર, ભાવનગર, જામનગર, ભરુચ, નવસારી અને વલસાડમાં આજે  શિબિરોનું આયોજન કરવામાં આવ્યું હતું. શિબિરમાં નાણાકીય સેવા વિભાગ ભારત સરકારના પ્રતિનિધિઓ, જિલ્લા પ્રતિનિધિ, ભારતીય રિઝર્વ બેંકના અધિકારીઓ, અન્ય વિત્તીય વિભાગના પ્રતિનિધિઓ અને તમામ બેંકોના અધિકારીઓ ઉપસ્થિત રહ્યા હતા.

ગાંધીનગરમાં આયોજિત આ શિબિર દરમ્યાન 15 દાવેદારોને કુલ 27 લાખ રૂપિયાના દાવાઓના સર્ટિફિકેટ એનાયત કરવામાં આવ્યા હતા. તેમજ વિવિધ નાણાકીય સંસ્થાઓના કુલ 48 દાવેદારોના 54 લાખ દાવાઓ મંજૂર કરવામાં આવ્યા હતા.

 વલસાડમાં શિબિર દ્વારા 15 દાવેદારોને દાવાઓના સર્ટિફિકેટ એનાયત કરવામાં આવ્યા તથા વિવિધ નાણાકીય સંસ્થાઓના કુલ 35 દાવેદારોના કુલ 54 લાખ રૂપિયાના દાવાઓ મંજૂર કરવામાં આવ્યા હતા.

જ્યારે નવસારીમાં શિબિર દરમ્યાન 22 દાવેદારોને દાવાઓના સર્ટિફિકેટ એનાયત કરવામાં આવ્યા અને વિવિધ નાણાકીય સંસ્થાઓના કુલ 31 દાવેદારોના કુલ 29 લાખ રૂપિયાના દાવાઓ મંજૂર કરવામાં આવ્યા હતા.

એ જ રીતે, જામનગરમાં આ શિબિર દરમ્યાન 30 દાવેદારોને કુલ 30 લાખ રૂપિયાના દાવાઓના સર્ટિફિકેટ એનાયત કરવામાં આવ્યા તથા વિવિધ નાણાકીય સંસ્થાઓના કુલ 55 દાવેદારોના કુલ 52 લાખ રૂપિયાના દાવાઓ મંજૂર કરવામાં આવ્યા હતા.

તેમજ ભાવનગરમાં શિબિર દ્વારા 12 દાવેદારોને દાવાઓના સર્ટિફિકેટ એનાયત કરવામાં આવ્યા હતા. તથા વિવિધ નાણાકીય સંસ્થાઓના કુલ 22 દાવેદારોના દાવાઓ મંજૂર કરવામાં આવ્યા હતા.

એવી જ રીતે, ભરૂચમાં પણ 200થી વધારે નાગરિકોની ઉપસ્થિતિમાં યોજાયેલા કાર્યક્રમમાં 20 દાવેદારોને 30 લાખના દાવાઓના સર્ટિફિકેટ એનાયત કરવામાં આવ્યા હતા.

ભારત સરકાર અને રિઝર્વ બેંક ઓફ ઇન્ડિયાના માધ્યમથી દેશભરમાં 1 ઓક્ટોબર 2025થી 31 ડિસેમ્બર 2025ના સમયગાળા દરમિયાન એક વિશેષ જાગૃતિ ઝુંબેશ ચલાવવામાં આવી રહી છે. જે અંતર્ગત આગામી સમયમાં અન્ય જિલ્લાઓમાં પણ આવી શિબિરોનું આયોજન કરવામાં આવશે.

 

(Release ID: 2180164) Visitor Counter : 45