આજરોજ 36મી ઓલ ઇન્ડિયા પોસ્ટલ એથ્લેટિકસ અને સાઈકલીંગ ટુર્નામેન્ટ 2025-26ના ત્રીજા અને અંતિમ દિવસે રાષ્ટ્રીય લેવલની પોસ્ટ ખાતાની ટુર્નામેન્ટનું સવારે 11 વાગ્યે સમાપન થયું. આજના સમાપનના દિવસે મુખ્ય અતિથિ તરીકે માનનીય પોસ્ટમાસ્તર જનરલ રાજકોટ શ્રી દિનેશ કુમાર શર્મા સાહેબ ઉપસ્થિત રહ્યા હતા અને ચાલુ રમતોનો આનંદ પણ માણ્યો હતો. તેમના જ હસ્તે તેમજ અન્ય પોસ્ટ ખાતાના ઉચ્ચ અધિકારીઓના હસ્તે મેડલ અને ટ્રોફીઓનું વિતરણ પણ કરાયું. સૌપ્રથમ સ્વાગત પ્રવર્ચનમાં માનનીય ડાયરેક્ટર પોસ્ટલ સર્વિસીસ, રાજકોટ ડૉ એસ. શિવરામ સાહેબે આ સમગ્ર ટૂર્નામેન્ટના આયોજનને સફળતાપૂર્વક પાર પાડવા માટે શ્રી દિનેશ કુમાર શર્મા સાહેબના માર્ગદર્શનને બિરદાવેલ હતું અને બધા પ્રતિયોગીઓને ઉત્સાહથી ભાગ લેવા બદલ પ્રોત્સાહન આપેલું હતું. મુખ્ય અતિથિ શ્રી દિનેશ કુમાર શર્મા સાહેબે પોતાના પ્રાસંગિક ઉદબોધનમાં દરેક ખેલાડી, કોચ, રેફરી, મેનેજર અને આયોજક ટીમને ઉત્સાહવર્ધક શબ્દો કીધા હતા. એક સ્વરચિત કવિતા દ્વારા રમતમાં હારેલા ખેલાડીઓનું પણ મનોબળ વધે અને વધુ સારું કરવા માટે તેઓ માનસિક રીતે મજબૂત બને તેવા પ્રયાસ કર્યા હતા. ત્યારબાદ શ્રી એસ. કે. બુનકર, SSP રાજકોટએ તેમની આભારવિધિમાં માનનીય પોસ્ટમાસ્તર જનરલ રાજકોટ શ્રી  દિનેશ કુમાર શર્મા સાહેબ, માનનીય ડાયરેક્ટર પોસ્ટલ સર્વિસીસ રાજકોટ ડૉ એસ. શિવરામ સાહેબ, રાજકોટ રિજિયનના આ આયોજન માં સામેલ અન્ય અધિકારીગણ, દિલ્લીથી પધારેલા પોસ્ટના અધિકારી, સ્પૉર્ટસ ઓથોરિટી ઓફ ગુજરાત પોરબંદરના અધિકારી ડૉ પ્રવિણાબેન અને શ્રી મનીશકુમાર, સાંદિપની સંકૂલ, પોરબંદર જિલ્લા પ્રશાસન, પોલીસ ઓથોરીટી અને મેડિકલ સ્ટાફનો આભાર માનેલ.

એથ્લેટિક્સમાં તમિલનાડુ પ્રથમ, ગુજરાત દ્વિતીય અને કેરળ તૃતીય - રાજ્યની ટીમોનો ક્રમાંક આવેલ હતો. પુરુષ શ્રેણીમાં એથ્લેટિક્સમાં સર્વ-શ્રેષ્ઠ પ્રદર્શન તમિલનાડુ રાજ્યની ટીમનું રહેલ હતું જ્યારે સ્ત્રી શ્રેણીમાં ગુજરાત રાજ્યની ટીમનું રહેલ હતું. બેસ્ટ એથ્લેટનો એવાર્ડ પુરુષ શ્રેણીમાં શ્રી કિરણ પી. ભોંસલે, મહારાષ્ટ્ર જ્યારે સ્ત્રી શ્રેણીમાં કુ. આર. પુનિથા, તમિલનાડુ ને મળેલ હતો. સાઈકલીંગ ટુર્નામેન્ટમાં કેરળ પ્રથમ, તમિલનાડુ દ્વિતીય અને મહારાષ્ટ્ર તૃતીય - રાજ્યની ટીમોનો ક્રમાંક આવેલ હતો. જ્યારે બેસ્ટ સાયકલીસ્ટનો પુરસ્કાર કેરળના શ્રી સુબીન બી. ને મળેલ હતો. 

આમ એક રાષ્ટ્રીય લેવલની પોસ્ટ ખાતાની ટુર્નામેંટનું ભવ્યાતિભવ્ય સમાપન થયેલ હતું.

(रिलीज़ आईडी: 2186013) आगंतुक पटल : 34