ભારત સરકાર અને રિઝર્વ બેંક ઓફ ઇન્ડિયાના માધ્યમથી દેશભરમાં 01  ઓક્ટોબર 2025 થી 31  ડિસેમ્બર 2025 દરમિયાન એક વિશેષ જાગૃતિ ઝુંબેશ ચલાવવામાં આવી રહી છે. જે અંતર્ગત વિવિધ જિલ્લાઓમાં શિબિરોનું આયોજન કરી લોકોને પોતાના જૂના ખાતાઓની યોગ્ય જાણકારી, મૃત વ્યક્તિના વારસદારો ને દાવો કરવાની પ્રક્રિયાની જાણકારી અને રકમના યોગ્ય હકદારને મૂડી પરત આપવામાં આવે છે. 

રાજ્યમાં અગ્રણી જિલ્લા બેંક દ્વારા જિલ્લાની વિવિધ બેંકોના માધ્યમથી દાવો ન કરાયેલ થાપણો, વીમાની આવક, ડિવિડન્ડ, મ્યુચ્યુઅલ ફંડ બેલેન્સ અને પેન્શનની રકમ પાછી મેળવવા માટે પાંચમા તબક્કામાં નર્મદાજિલ્લા માટે તારીખ 21  નવેમ્બર, 2025ના રોજ આંબેડકર ભવન, ગાંધી ચોક, રાજપીપળા ખાતે શિબિરનું આયોજન કરવામાં આવ્યું છે. આ શિબિરના માધ્યમથી દાવો ન કરાયેલી અંદાજે 20 કરોડથી વધુ રકમ ખાતાઓમાં પડેલી છે.

જ્યારે દાહોદમાં પહેલો માળ, સભાખંડ ડીઆરડીએ, છાપરી ખાતે આયોજિત શિબિરમાં દાવો ન કરાયેલી અંદાજે 60 કરોડથી વધુની રકમ ખાતાઓમાં પડેલી છે. તેવી જ રીતે ડાંગ જિલ્લાની શિબિર ડાંગ દરબાર હોલ, તાલુકા પંચાયત આહવા-ડાંગમાં આયોજિત થશે. જ્યાં ખાતાઓમાં રૂપિયા 10 કરોડથી વધુ રકમ પડેલી છે.

દેવભૂમિ દ્વારકા જિલ્લાની શિબિર નગરપાલિકા ટાઉન હોલ, પોરબંદર રોડ, જામ ખંભાળીયામાં યોજાશે. અહીં દાવો ન કરાયેલી અંદાજે રૂપિયા 25 કરોડથી વધુ રકમ ખાતાઓમાં પડેલી છે.

જ્યારે કેન્દ્રશાસિત પ્રદેશ દીવમાં કમ્યુનિટિ હૉલ, ગાંધીપરા, દીવ ખાતે 8650 ખાતામાં અંદાજે રૂપિયા 11 કરોડથી વધુની રકમ પડેલી છે.

આ શિબિરમાં નાણાકીય સેવા વિભાગ ભારત સરકારના પ્રતિનિધિઓ, જિલ્લા પ્રતિનિધિ, ભારતીય રિઝર્વ બેંકના અધિકારીઓ, અન્ય વિત્તીય વિભાગના પ્રતિનિધિઓ અને તમામ બેંકોના અધિકારીઓ ઉપસ્થિત રહેશે. આ મહામેળાવડામાં જે લોકોના દાવા વગરના નાણાં નાણાકીય સંસ્થાઓમાં (દાવો ન કરાયેલ થાપણો, વીમાની આવક, ડિવિડન્ડ, મ્યુચ્યુઅલ ફંડ બેલેન્સ અને પેન્શન) પડ્યા છે, તેવા તમામ લોકોને ભાગ લેવા માટે અનુરોધ કરવામાં આવે છે.

 

SM/IJ/GP/JT

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com

(Release ID: 2191643) Visitor Counter : 48