કેન્દ્રીય ગૃહ અને સહકાર મંત્રી શ્રી અમિત શાહે ઑપરેશન "ક્રિસ્ટલ ફોર્ટ્રેસ" હેઠળ મેગા ટ્રાન્સ-નેશનલ મેથામ્ફેટામાઇન કાર્ટેલનો પર્દાફાશ કરવા બદલ NCB અને દિલ્હી પોલીસની સંયુક્ત ટીમને અભિનંદન પાઠવ્યા હતા.

X પરની એક પોસ્ટમાં કેન્દ્રીય ગૃહ અને સહકાર મંત્રી શ્રી અમિત શાહે જણાવ્યું કે, "અમારી સરકાર ખૂબ જ ઝડપથી ડ્રગ કાર્ટેલને ખતમ કરી રહી છે." તેમણે કહ્યું કે ડ્રગ્સની તપાસ માટે ટોપ-ટુ-બોટમ અને બોટમ-ટુ-ટોપ અભિગમને સખત રીતે અપનાવીને, નવી દિલ્હીમાં ₹262 કરોડની કિંમતના 328 કિલોગ્રામ મેથામ્ફેટામાઇનની જપ્તી અને બે લોકોની ધરપકડથી એક મોટી સફળતા મળી છે. શ્રી શાહે કહ્યું કે આ ઑપરેશન પ્રધાનમંત્રી શ્રી નરેન્દ્ર મોદીજીના નશામુક્ત ભારતના વિઝનની દિશામાં અનેક એજન્સીઓ વચ્ચેના સીમલેસ તાલમેલનું એક શાનદાર ઉદાહરણ હતું. NCB અને દિલ્હી પોલીસની સંયુક્ત ટીમને અભિનંદન.

એક મોટી સફળતામાં, નાર્કોટિક્સ કંટ્રોલ બ્યૂરો (ઓપીએસ બ્રાન્ચ) એ સ્પેશિયલ સેલ (CI) દિલ્હી પોલીસ સાથે મળીને 20.11.2025 ના રોજ ઑપરેશન ક્રિસ્ટલ ફોર્ટ્રેસ હેઠળ છતરપુર, દિલ્હીના એક ઘરમાંથી લગભગ 328 કિલોગ્રામ ઉચ્ચ ગુણવત્તાવાળા મેથામ્ફેટામાઇન જપ્ત કરીને એક ટ્રાન્સ-નેશનલ ટ્રાફિકિંગ નેટવર્કનો પર્દાફાશ કર્યો છે. ઑપરેશન ક્રિસ્ટલ ફોર્ટ્રેસ એક સંકલિત અને ઇન્ટેલિજન્સ-ડ્રિવન અભિયાન હતું જે સિન્થેટિક ડ્રગની વધુ માત્રાવાળા નેટવર્કને લક્ષ્ય બનાવી રહ્યું હતું.

આ મહત્વપૂર્ણ ઓપરેશન ગુપ્ત માહિતી અને તકનીકી ઇન્ટરસેપ્ટના આધારે છેલ્લા કેટલાક મહિનાઓથી સતત તપાસનું પરિણામ છે, જેના કારણે ટ્રાફિકિંગ ચેઇનનો પર્દાફાશ થયો અને આ મોટી સફળતા મળી છે.

નાગાલેન્ડ પોલીસના સહયોગથી બે વ્યક્તિઓ, જેમાં નાગાલેન્ડની એક મહિલાનો પણ સમાવેશ થાય છે, જેની પાસેથી મોટી માત્રામાં ડ્રગ્સનો જથ્થો જપ્ત કરવામાં આવ્યો હતો, તેમની ધરપકડ કરવામાં આવી છે. વધુમાં, અન્ય વ્યક્તિઓની ઓળખ કરવામાં આવી છે, જેમાં ગેંગ લીડર પણ સામેલ છે, જે વિદેશથી કામ કરે છે. ગયા વર્ષે દિલ્હીમાં NCB દ્વારા 82.5 કિલો ઉચ્ચ-ગ્રેડ કોકેઇન જપ્ત કરવાના સંબંધમાં પણ તે વોન્ટેડ છે. આંતરરાષ્ટ્રીય અમલીકરણ ભાગીદારો સાથે મળીને, તેને કાનૂની કાર્યવાહી માટે ભારત લાવવાના પ્રયાસો ચાલી રહ્યા છે.

દિલ્હીમાં મેથામ્ફેટામાઇનનો આ સૌથી મોટો જથ્થો જપ્ત કરવામાં આવ્યો છે. પ્રારંભિક તપાસમાં જાણવા મળ્યું છે કે આ કાર્ટેલ બહુવિધ કુરિયર્સ, સેફ હાઉસ અને સ્તરીય હેન્ડલર્સ દ્વારા કાર્યરત હતું, અને દિલ્હીનો ઉપયોગ ભારત અને વિદેશી બજારોમાં વિતરણ માટે કરવામાં આવી રહ્યો હતો.

ઓપરેશન "ક્રિસ્ટલ ફોર્ટ્રેસ" એ સિન્થેટિક ડ્રગ કાર્ટેલ અને તેમના આંતરરાષ્ટ્રીય નેટવર્કને તોડી પાડવા માટે NCB ની પ્રતિબદ્ધતા દર્શાવે છે. નાગરિકોએ ડ્રગ હેરફેર સામે લડવામાં NCB ને મદદ કરવી જોઈએ. કોઈપણ વ્યક્તિ ટોલ-ફ્રી નંબર 1933, MANAS - રાષ્ટ્રીય નાર્કોટિક્સ હેલ્પલાઇન પર કૉલ કરીને ડ્રગ હેરફેર સંબંધિત માહિતી શેર કરી શકે છે.

SM/IJ/GP/JD