કૃષક ભારતી કોઓપરેટિવ લિમિટેડ (KRIBHCO) દ્વારા 24 ડિસેમ્બર 2025ના રોજ ઇન્દ્રધનુષ ઓડિટોરિયમ, પંચકુલા, હરિયાણા ખાતે “સહકારથી સમૃદ્ધિ – ટકાઉ ખેતીમાં સહકારી મંડળીઓની ભૂમિકા” શીર્ષક હેઠળ રાષ્ટ્રીય સહકારી સંમેલનનું આયોજન કરવામાં આવી રહ્યું છે. આ સંમેલનનો ઉદ્દેશ્ય ટકાઉ ખેતીને પ્રોત્સાહન આપવા, પ્રાથમિક કૃષિ ધિરાણ મંડળીઓ (PACS) ની ભૂમિકાનો વિસ્તાર કરવા, નાના અને સીમાંત ખેડૂતોની આવકની સ્થિરતા સુનિશ્ચિત કરવા અને આબોહવા પરિવર્તન દ્વારા ઉભા થયેલા પડકારોને અનુરૂપ સહકારી-આધારિત કૃષિ મોડલને મજબૂત કરવા માટે નીતિ અને અમલીકરણ સંબંધિત પાસાઓ પર ચર્ચા કરવાનો છે. કેન્દ્રીય ગૃહ અને સહકારિતા મંત્રી શ્રી અમિત શાહ આ સંમેલનના મુખ્ય અતિથિ રહેશે. માનનીય પ્રધાનમંત્રી શ્રી નરેન્દ્ર મોદીના “સહકારથી સમૃદ્ધિ” ના વિઝનરી ખ્યાલને સાકાર કરવા અને માનનીય કેન્દ્રીય ગૃહ અને સહકારિતા મંત્રી શ્રી અમિત શાહના નેતૃત્વ હેઠળ ખેડૂતોની સમૃદ્ધિ સુનિશ્ચિત કરવા માટે પાયાના સ્તરે સહકારી મોડલને મજબૂત કરવાની દિશામાં આ સંમેલન એક મહત્વપૂર્ણ પહેલ છે.

હરિયાણાના મુખ્યમંત્રી શ્રી નાયબ સિંહ સૈની વિશેષ અતિથિ તરીકે સંમેલનમાં ભાગ લેશે. આ ઉપરાંત, કેન્દ્રીય રાજ્ય મંત્રીઓ (સહકાર મંત્રાલય) શ્રી કૃષ્ણ પાલ ગુર્જર અને શ્રી મુરલીધર મોહોલ, હરિયાણાના સહકારિતા મંત્રી ડૉ. અરવિંદ કુમાર શર્મા અને કૃષિ અને ખેડૂત કલ્યાણ મંત્રી શ્રી શ્યામ સિંહ રાણા પણ સંમેલનમાં હાજર રહેશે.

આ પ્રસંગે, કેન્દ્રીય ગૃહ અને સહકારિતા મંત્રી શ્રી અમિત શાહ મિલ્ક કૂલિંગ સેન્ટર, સાલેમપુર (ભિવાની) પ્લાન્ટ અને જતુસાણા (રેવાડી) ખાતે HAFED આટા મિલનું ઇ-ઉદ્ઘાટન કરશે. કેન્દ્રીય મંત્રી હરિયાણા રાજ્યની સહકારી બેંકોના લાભાર્થીઓને RuPay પ્લેટિનમ ડેબિટ કાર્ડનું વિતરણ પણ કરશે અને આ પ્રસંગે હરિયાણા KRIBHCO દ્વારા સ્થાપિત M-PACS ના પ્રમુખોને નોંધણી પ્રમાણપત્રો પણ આપશે. આ તકે, કેન્દ્રીય ગૃહ અને સહકારિતા મંત્રી આંતરરાષ્ટ્રીય સહકાર વર્ષ (IYC) દરમિયાન હાથ ધરવામાં આવતી વિવિધ પ્રવૃત્તિઓ દર્શાવતા પોર્ટલનું પણ ઉદ્ઘાટન કરશે.

આ સંમેલનમાં અદ્યતન કૃષિ જ્ઞાનના આદાનપ્રદાન, સસ્તું ધિરાણ ઉપલબ્ધ કરાવવા, આધુનિક ટેકનોલોજી અપનાવવા અને સહકારી માળખા દ્વારા ખેડૂતો સુધી જૈવિક અને આબોહવા-સ્થિતિસ્થાપક કૃષિ પદ્ધતિઓ પહોંચાડવા પર વિશેષ ભાર મૂકવામાં આવશે. સહકાર મંત્રાલયની તાજેતરની નીતિવિષયક પહેલો, PACSનું મજબૂતીકરણ અને KRIBHCO જેવી રાષ્ટ્રીય સહકારી સંસ્થાઓની ભૂમિકા વિશે પણ આ સંમેલન દરમિયાન વિગતવાર ચર્ચા કરવામાં આવશે.

કેન્દ્રીય સહકાર મંત્રાલય, KRIBHCO અને હરિયાણા સરકારના વરિષ્ઠ અધિકારીઓ, રાષ્ટ્રીય અને રાજ્ય સ્તરની સહકારી સંસ્થાઓના પ્રતિનિધિઓ, પ્રાથમિક કૃષિ ધિરાણ મંડળીઓ (PACS), ખેડૂત સંગઠનો અને અન્ય મુખ્ય હિતધારકો આ સંમેલનમાં ભાગ લેશે.

KRIBHCOએ વર્ષોથી ખાતર પુરવઠા, કૃષિ સલાહકાર સેવાઓ અને ખેડૂત-કેન્દ્રીય પહેલો દ્વારા દેશભરના લાખો ખેડૂતોને લાભ પહોંચાડ્યો છે. પંચકુલામાં આયોજિત થઈ રહેલું આ રાષ્ટ્રીય સંમેલન આંતરરાષ્ટ્રીય સહકાર વર્ષ – 2025 અંતર્ગત સહકારી ચળવળને નવી દિશા આપવા તરફ એક મહત્વપૂર્ણ પગલું સાબિત થશે.

SM/BS/GP/JD