પ્રધાનમંત્રી શ્રી નરેન્દ્ર મોદી 25 ડિસેમ્બર, 2025ના રોજ પૂર્વ પ્રધાનમંત્રી ભારત રત્ન શ્રી અટલ બિહારી વાજપેયીની 101મી જન્મજયંતિ નિમિત્તે ઉત્તર પ્રદેશના લખનઉની મુલાકાત લેશે. બપોરે લગભગ 2:30 વાગ્યે પ્રધાનમંત્રી રાષ્ટ્રીય પ્રેરણા સ્થળનું ઉદ્ઘાટન કરશે અને આ પ્રસંગે એક જાહેર સભાને પણ સંબોધિત કરશે.

સ્વતંત્ર ભારતના મહાન વ્યક્તિત્વોના વારસાને સન્માનિત કરવાના પ્રધાનમંત્રી શ્રી નરેન્દ્ર મોદીના વિઝનથી પ્રેરિત, રાષ્ટ્રીય પ્રેરણા સ્થળ ભારતના સૌથી આદરણીય રાજકારણીઓમાંના એકના જીવન, આદર્શો અને કાયમી વારસાને શ્રદ્ધાંજલિ આપશે, જેમના નેતૃત્વનો દેશની લોકશાહી, રાજકીય અને વિકાસ યાત્રા પર ઊંડો પ્રભાવ પડ્યો હતો.

રાષ્ટ્રીય પ્રેરણા સ્થળને એક સીમાચિહ્નરૂપ રાષ્ટ્રીય સ્મારક અને કાયમી રાષ્ટ્રીય મહત્વના પ્રેરણાત્મક સંકુલ તરીકે વિકસાવવામાં આવ્યું છે. આશરે ₹230 કરોડના ખર્ચે બનેલ અને 65 એકર વિસ્તારમાં ફેલાયેલું આ સંકુલ નેતૃત્વ મૂલ્યો, રાષ્ટ્રીય સેવા, સાંસ્કૃતિક ચેતના અને જાહેર પ્રેરણાને પ્રોત્સાહન આપવા માટે સમર્પિત એક કાયમી રાષ્ટ્રીય સંપત્તિ તરીકે કલ્પના કરવામાં આવી છે.

આ સંકુલમાં ડૉ. શ્યામા પ્રસાદ મુખર્જી, પંડિત દીનદયાળ ઉપાધ્યાય અને ભૂતપૂર્વ પ્રધાનમંત્રી શ્રી અટલ બિહારી વાજપેયીની 65 ફૂટ ઊંચી કાંસ્યની પ્રતિમાઓ છે, જે ભારતના રાજકીય વિચાર, રાષ્ટ્ર નિર્માણ અને જાહેર જીવનમાં તેમના મહત્વપૂર્ણ યોગદાનનું પ્રતીક છે. તેમાં એક અત્યાધુનિક સંગ્રહાલય પણ છે, જે કમળના ફૂલના આકારમાં ડિઝાઇન કરવામાં આવ્યું છે, જે લગભગ 98,000 ચોરસ ફૂટમાં ફેલાયેલું છે. આ સંગ્રહાલય ભારતની રાષ્ટ્રીય યાત્રા અને આ સ્વપ્નદ્રષ્ટા નેતાઓના યોગદાનને અદ્યતન ડિજિટલ અને ઇમર્સિવ ટેકનોલોજી દ્વારા પ્રદર્શિત કરે છે, જે મુલાકાતીઓને આકર્ષક અને શૈક્ષણિક અનુભવ પ્રદાન કરે છે.

રાષ્ટ્ર પ્રેરણા સ્થળનું ઉદ્ઘાટન નિઃસ્વાર્થ નેતૃત્વ અને સુશાસનના આદર્શોને જાળવવા અને પ્રોત્સાહન આપવા તરફ એક મહત્વપૂર્ણ પગલું છે અને તે વર્તમાન અને ભાવિ પેઢીઓ માટે પ્રેરણા સ્ત્રોત તરીકે સેવા આપશે તેવી અપેક્ષા છે.

SM/BS/GP/JT

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com