કેન્દ્રીય ગૃહ મંત્રી અને સહકારિતા મંત્રી શ્રી અમિત શાહે આજે ગ્વાલિયરમાં મુખ્ય અતિથિ તરીકે ‘અભ્યુદય મધ્ય પ્રદેશ ગ્રોથ સમિટ’ ને સંબોધિત કરી હતી. આ પ્રસંગે મધ્ય પ્રદેશના મુખ્યમંત્રી ડૉ. મોહન યાદવ, કેન્દ્રીય સંચાર મંત્રી શ્રી જ્યોતિરાદિત્ય સિંધિયા અને અન્ય અનેક મહાનુભાવો ઉપસ્થિત રહ્યા હતા.

કેન્દ્રીય ગૃહ મંત્રી શ્રી અમિત શાહે જણાવ્યું હતું કે દેશમાં સુવ્યવસ્થિત ઔદ્યોગિક કોન્ક્લેવની શરૂઆત ગુજરાતથી થઈ હતી, જ્યારે શ્રી નરેન્દ્ર મોદીજી રાજ્યના મુખ્યમંત્રી હતા. તેમણે કહ્યું હતું કે મોદીજીએ વાઈબ્રન્ટ ગુજરાત નામના ઔદ્યોગિક સમિટના આયોજનની વૈજ્ઞાનિક રીતે શરૂઆત કરી હતી, જે ખૂબ જ સફળ રહી હતી અને ગુજરાતમાં રોકાણ પણ લાવ્યું હતું. મધ્ય પ્રદેશના મુખ્યમંત્રી ડૉ. મોહન યાદવે રાજ્યના સંતુલિત વિકાસ માટે પ્રાદેશિક રોકાણ કોન્ક્લેવ શરૂ કર્યા છે. તેમણે કહ્યું હતું કે હવે મધ્ય પ્રદેશના તમામ પ્રદેશોમાં રોકાણ સંબંધિત પ્રવૃત્તિઓ શરૂ થઈ છે, જે અન્ય રાજ્યો માટે પણ ફાયદાકારક સાબિત થશે. શ્રી શાહે કહ્યું હતું કે આજે જે ₹2 લાખ કરોડનું રોકાણ થઈ રહ્યું છે તે પ્રથમ નજરે નાનું લાગી શકે છે, પરંતુ કોઈપણ એક ક્ષેત્ર માટે આ ખૂબ જ મહત્વપૂર્ણ સિદ્ધિ છે. તે ક્ષેત્રના લોકો માટે આ રોકાણ અત્યંત મહત્વનું છે. જો રાજ્યમાં સંતુલિત વિકાસ નહીં થાય તો રાજ્ય પ્રગતિ કરી શકશે નહીં, કારણ કે દરેક પ્રદેશમાં અપાર શક્યતાઓ છુપાયેલી છે. તેમણે કહ્યું હતું કે માળવા અને ચંબલ વિસ્તારના ખેડૂતો માટે કપાસ એ ખૂબ જૂની પેદાશ છે, પરંતુ યોગ્ય ભાવ ન મળવાને કારણે કપાસની ખેતીમાં ઘણો ઘટાડો થયો હતો. હવે, PM મિત્ર પાર્ક દ્વારા કપાસ ફરી એકવાર નફાકારક પાક બની ગયો છે.

શ્રી અમિત શાહે કહ્યું હતું કે મધ્ય પ્રદેશની સૌથી મોટી વિશેષતા તેનું ભૌગોલિક સ્થાન છે. અડધા ભારતને અહીંથી ખૂબ ઓછા પરિવહન ખર્ચે માલ પૂરો પાડી શકાય છે, પરંતુ તેનો શ્રેષ્ઠ ઉપયોગ ત્યારે જ થઈ શકે જ્યારે મધ્ય પ્રદેશમાં ઉદ્યોગો સપ્રમાણ રીતે સ્થપાય. દક્ષિણના રાજ્યોની સરહદે આવેલા જિલ્લાઓમાં, દિલ્હીને અડીને આવેલા વિસ્તારો જેમ કે ગ્વાલિયરમાં અને પશ્ચિમની સરહદે આવેલા ધાર અને ઝાબુઆ જેવા પ્રદેશોમાં ઉદ્યોગો સ્થાપવા જોઈએ—ત્યારે જ ભૌગોલિક સ્થાનનો લાભ પૂરેપૂરો સાકાર થશે. તેમણે કહ્યું હતું કે મધ્ય પ્રદેશના પ્રાદેશિક રોકાણ સંમેલનોએ રાજ્યના સર્વાંગી વિકાસનો પાયો નાખ્યો છે.

કેન્દ્રીય ગૃહ મંત્રી શ્રી અમિત શાહે જણાવ્યું હતું કે ગ્વાલિયરમાં, ગ્વાલિયરને લગતા 14 વિકાસ કાર્યોનું ઉદ્ઘાટન અને શિલાન્યાસ કરવામાં આવ્યો હતો. વિરોધ પક્ષના નેતાઓએ મધ્ય પ્રદેશને બીમારુ (BIMARU) રાજ્યમાં ફેરવી દીધું હતું; શિવરાજ સિંહજીએ તે ટેગ હટાવ્યું, અને હવે મોહન યાદવજી નવી ઊર્જા સાથે રાજ્યને આગળ લઈ જઈ રહ્યા છે. પરિણામે મધ્ય પ્રદેશ ચોક્કસપણે વિકસિત રાજ્ય બનશે. તેમણે કહ્યું હતું કે મધ્ય પ્રદેશમાં ઉત્કૃષ્ટ હાઈવે બનાવવામાં આવ્યા છે, નર્મદા નદીનું પાણી શક્ય તેટલા વધુ વિસ્તારોમાં પહોંચાડવાના પ્રયાસો કરવામાં આવ્યા છે, સિંચાઈ હેઠળનો વિસ્તાર 17 ટકા વધ્યો છે, અને પંજાબ તથા હરિયાણાને પાછળ છોડીને મધ્ય પ્રદેશે સતત સાત વખત 'કૃષિ કર્મણ' એવોર્ડ સફળતાપૂર્વક જીત્યો છે. તેમણે કહ્યું હતું કે આ અમારી પાર્ટી છે જેણે મધ્ય પ્રદેશને ખરેખર વિકાસના પથ પર મૂક્યું છે.

શ્રી અમિત શાહે જણાવ્યું હતું કે મધ્ય પ્રદેશના ભૌગોલિક સ્થાનનો સંપૂર્ણ લાભ લેવા માટે, ઇન્દોરમાં એક મલ્ટિ-મોડલ લોજિસ્ટિક્સ પાર્ક વિકસાવવામાં આવી રહ્યો છે, જે દેશભરની ઉત્પાદન સાથે સંકળાયેલી કંપનીઓને ત્યાં તેમના વેરહાઉસ અથવા હબ સ્થાપવા માટે આકર્ષી રહ્યો છે. તેમણે કહ્યું હતું કે એક સમયે મધ્ય પ્રદેશ પાવર સેક્ટરમાં નકારાત્મક રાજ્ય માનવામાં આવતું હતું, પરંતુ આજે મધ્ય પ્રદેશમાં સરપ્લસ વીજળી છે. સ્વચ્છતાના ક્ષેત્રમાં પણ મધ્ય પ્રદેશે અન્ય રાજ્યોને પાછળ છોડી દીધા છે. મેટ્રો સેવાઓ માટે મધ્ય પ્રદેશમાં ઓપરેશનલ કોસ્ટ રાજ્યોમાં સૌથી ઓછી છે. રાજ્યએ સ્ટાર્ટઅપ ક્ષેત્રમાં પણ સારું પ્રદર્શન કર્યું છે. કૃષિ, ફૂડ પ્રોસેસિંગ, ખનિજો, ખનિજ-આધારિત ઉદ્યોગો, રિન્યુએબલ ઊર્જા, લોજિસ્ટિક્સ, ટેક્સટાઈલ, ફાર્માસ્યુટિકલ્સ, IT અને પ્રવાસન સહિતના દરેક ક્ષેત્રમાં ઉદ્યોગો અને સ્ટાર્ટઅપ્સ સ્થાપિત થયા છે. આ સ્ટાર્ટઅપ્સમાંથી લગભગ 50 ટકા મહિલાઓ દ્વારા ચલાવવામાં આવે છે, જે મહિલા સશક્તિકરણનું ઉત્તમ ઉદાહરણ છે. તેમણે કહ્યું હતું કે મધ્ય પ્રદેશે માત્ર એક વર્ષમાં 4 લાખ 57 હજાર નવા MSME એકમો સ્થાપીને રેકોર્ડ બનાવ્યો છે. પરિણામે, મધ્યમ, નાના અને કુટીર ઉદ્યોગોની બાબતમાં મધ્ય પ્રદેશ સમગ્ર દેશ માટે હબ બનવા તરફ આગળ વધી રહ્યું છે, અને સ્ટાર્ટઅપ્સ તથા ઈનોવેશન દ્વારા તે નવી ઊંચાઈએ પહોંચવા માટે તૈયાર છે.

શ્રી અમિત શાહે જણાવ્યું હતું કે PM મિત્ર પાર્ક 5F વિઝન પર બનાવવામાં આવ્યો છે, જે ખેડૂતોને તેમની પેદાશોના વાજબી ભાવ મળે તે સુનિશ્ચિત કરવા માટે પણ કામ કરે છે. તેમાં ફાર્મ ટુ ફાઈબર, ફાઈબર ટુ ફેક્ટરી, ફેક્ટરી ટુ ફેશન અને ફેશન ટુ ફોરેનનો સમાવેશ થાય છે—જેનો અર્થ છે કે PM મિત્ર પાર્કમાં નિકાસ સુધીની વ્યવસ્થા છે. તેમણે કહ્યું હતું કે સૌથી મોટો PM મિત્ર પાર્ક મધ્ય પ્રદેશમાં છે, જેનો લાભ ખેડૂતોને મળશે. શ્રી શાહે કહ્યું હતું કે ટેક્સટાઈલ અને ટૂરિઝમ ઉદ્યોગો એવા ક્ષેત્રો છે જે સૌથી વધુ રોજગારી પેદા કરે છે, અને આ બંને ક્ષેત્રો માટે અનુકૂળ ઈન્ફ્રાસ્ટ્રક્ચર મધ્ય પ્રદેશમાં વિકસાવવામાં આવી રહ્યું છે. તેમણે કહ્યું હતું કે મધ્ય પ્રદેશે ઈઝ ઓફ ડુઈંગ બિઝનેસમાં પણ ઘણું સારું પ્રદર્શન કર્યું છે.

કેન્દ્રીય ગૃહ મંત્રી અને સહકારિતા મંત્રી શ્રી અમિત શાહે જણાવ્યું હતું કે પીએમ મોદીના નેતૃત્વમાં ઘણા નવા ક્ષેત્રોમાં પાયા નાખવામાં આવી રહ્યા છે, જે આગામી દિવસોમાં દેશને આ નવા ક્ષેત્રોમાં વૈશ્વિક નેતા બનવાની તક આપશે. તેમણે કહ્યું હતું કે આપણું વિદેશી હૂંડિયામણ અનામત 700 અબજ ડોલરના રેકોર્ડ સ્તરને વટાવી ગયું છે. અમે સેમી-કંડક્ટર ઉદ્યોગમાં મોડી પણ અસરકારક એન્ટ્રી કરી છે અને બહુ જલ્દી અમે આ ક્ષેત્રમાં માત્ર આત્મનિર્ભર જ નહીં બનીએ પણ તેની નિકાસ પણ શરૂ કરીશું. તેમણે કહ્યું હતું કે ડિજિટલ ઈન્ડિયા દ્વારા અમે ટૂંકા સમયમાં સૌથી ઝડપી વૃદ્ધિ હાંસલ કરી છે. તેમણે કહ્યું હતું કે જ્યારે મોદીજી પ્રધાનમંત્રી બન્યા ત્યારે દેશમાં ઈન્ટરનેટ યુઝર્સની સંખ્યા માત્ર 7 કરોડ હતી, જે સપ્ટેમ્બર 2025માં વધીને 101 કરોડ થઈ ગઈ છે. હવે બ્રોડબેન્ડ યુઝર્સની સંખ્યા પણ આશરે 99 કરોડ પર પહોંચી ગઈ છે. દેશના 95 ટકા ભાગોમાં 4G કનેક્ટિવિટી ઉપલબ્ધ છે અને 99 ટકા વિસ્તારમાં 5G કનેક્ટિવિટી પૂરી પાડવાની તૈયારીઓ ચાલી રહી છે. તેમણે કહ્યું હતું કે UPI દ્વારા અમે ડિજિટલ ટ્રાન્ઝેક્શન અને ફિનટેકના ક્ષેત્રમાં મોટી છલાંગ લગાવી છે. વર્ષ 2024-25 માં, વૈશ્વિક ડિજિટલ વ્યવહારોના લગભગ 50 ટકા ભારતમાં થયા હતા. ઓગસ્ટ 2025 માં, આશરે રૂ. 25 લાખ કરોડના 2000 કરોડ ડિજિટલ વ્યવહારો કરીને અમે વિશ્વને પાછળ છોડી દીધું છે. કોવિડ-19 સામેની લડાઈ દરમિયાન, વેક્સિન મેન્યુફેક્ચરિંગ અને R&D માટે ખૂબ મોટું ઈન્ફ્રાસ્ટ્રક્ચર બનાવવામાં આવ્યું હતું. આજે વિશ્વની 60 ટકા રસીઓ ભારતમાં બને છે. અમે મેન્યુફેક્ચરિંગ સેક્ટરમાં સારું પ્રદર્શન કર્યું છે; ભારત આજે વિશ્વનું બીજા ક્રમનું સૌથી મોટું મોબાઈલ ફોન ઉત્પાદક છે. સંરક્ષણ નિકાસ અને સંરક્ષણ ઉત્પાદનને પણ પુનઃગઠિત કરવામાં આવ્યું છે. ઈઝ ઓફ ડુઈંગ બિઝનેસમાં 2014માં ભારત 142માં ક્રમે હતું; આજે તે 63માં સ્થાને છે. ઇન્સોલ્વન્સી એન્ડ બેન્કરપ્સી કોડે એક સુવ્યવસ્થિત આર્થિક વ્યવસ્થા બનાવી છે.

કેન્દ્રીય ગૃહ મંત્રી અને સહકારિતા મંત્રી શ્રી અમિત શાહે જણાવ્યું હતું કે પીએમ મોદીના નેતૃત્વમાં ભારતને ઈન્ફ્રાસ્ટ્રક્ચર ક્ષેત્રે વિશ્વમાં પ્રથમ બનાવવાના પ્રયાસો કરવામાં આવ્યા છે. અગાઉની સરકાર દરમિયાન 90 હજાર કિલોમીટરના હાઈવે હતા; હવે 1.5 લાખ કિલોમીટર નવા હાઈવે બનાવવામાં આવ્યા છે. ફોર લેન હાઈવે પહેલા 18,000 કિલોમીટર હતા, હવે તે 46,000 કિલોમીટર થઈ ગયા છે. ગ્રામીણ રસ્તાઓ પહેલા 3 લાખ 81 હજાર કિલોમીટર હતા, હવે તે 7 લાખ 84 હજાર કિલોમીટર થઈ ગયા છે. અગાઉ 74 એરપોર્ટ હતા; હવે તેમની સંખ્યા 163 છે. અગાઉ એક પણ વંદે ભારત ટ્રેન નહોતી; હવે 164 વંદે ભારત ટ્રેનો બનાવવામાં આવી રહી છે, અને વંદે ભારત ટ્રેનના ભાગોનું ઉત્પાદન પણ મધ્ય પ્રદેશમાં શરૂ થયું છે. અગાઉ એક પણ અમૃત ભારત સ્ટેશન નહોતું; હવે 1,337 બનાવવામાં આવ્યા છે. રેલવે વિદ્યુતીકરણ માત્ર 22 હજાર કિલોમીટર હતું; હવે તે 68 હજાર કિલોમીટર છે. મેટ્રો સાથે જોડાયેલા શહેરો પહેલા પાંચ હતા; હવે તેમની સંખ્યા 23 છે. અગાઉ માત્ર 100 ગ્રામ પંચાયતોમાં ઓપ્ટિકલ ફાઈબર ઉપલબ્ધ હતું; હવે તે 2 લાખ 14 હજાર પંચાયતો સુધી પહોંચી ગયું છે.

કેન્દ્રીય ગૃહ મંત્રી અને સહકારિતા મંત્રીએ મધ્ય પ્રદેશના યુવાનો અને રાજ્યમાં રોકાણ કરવા આવેલા ઉદ્યોગપતિઓને જણાવ્યું હતું કે મધ્ય પ્રદેશનું ભૌગોલિક સ્થાન એટલું આકર્ષક છે કે ગમે ત્યાં બીજ વાવીને પાક ઉગાડી શકાય છે, પરંતુ મધ્ય પ્રદેશની ધરતી એટલી ફળદ્રુપ છે કે અહીં રૂપિયા વાવીને કરોડોની કમાણી કરી શકાય છે. તેમણે કહ્યું હતું કે જ્યારે રાજ્ય પ્રાદેશિક સંતુલન સાથે વિકાસ કરે છે, ત્યારે તેનો સૌથી મોટો ફાયદો રાજ્યના લોકો અને ઉદ્યોગ ક્ષેત્રને જાય છે, કારણ કે પ્રાદેશિક વિશેષતાઓ પર આધારિત ઉદ્યોગો ટકાઉ અને તેથી સફળ હોય છે.

પૂર્વ પ્રધાનમંત્રી અટલ બિહારી વાજપેયીની 101મી જન્મજયંતિ પર તેમને શ્રદ્ધાંજલિ અર્પણ કરતા કેન્દ્રીય ગૃહ મંત્રી શ્રી અમિત શાહે કહ્યું હતું કે આજે સમગ્ર દેશ યુગના મહાન પુરૂષ, વિઝનરી અને આધુનિક ભારતના ઈન્ફ્રાસ્ટ્રક્ચરનો પાયો નાખનાર—અટલજીની જન્મજયંતિ ઉજવી રહ્યો છે. શ્રી શાહે કહ્યું હતું કે તેઓ નસીબદાર છે કે આજે તેઓ તે ધરતી પર ઉભા છે જ્યાં અટલજીએ પોતાનું પ્રારંભિક જીવન વિતાવ્યું હતું. ગૃહ મંત્રીએ કહ્યું હતું કે તેઓ તે જ ધરતી પર હાજર છે જેની માટીએ યુવાન અટલને 'અટલ બિહારી' તરીકે ઘડ્યા હતા. અટલજીએ માત્ર આ દેશને તેના સાંસ્કૃતિક વારસાને જાળવવામાં મદદ કરી નથી, પરંતુ રાષ્ટ્રના 'સ્વ' ને જગાડવા અને સ્વરાજથી સુશાસન સુધીની યાત્રાને આગળ વધારવા માટે પોતાનું સમગ્ર જીવન સમર્પિત કર્યું છે.

શ્રી અમિત શાહે કહ્યું હતું કે જ્યારે દરેક વસ્તુ પર અંગ્રેજીનો પ્રભુત્વ હતું, ત્યારે અટલજીએ સંયુક્ત રાષ્ટ્રમાં હિન્દીમાં ભાષણ આપ્યું હતું, જેનાથી દરેક ભારતીયના દિલ જીતી લીધા હતા. શ્રી શાહે કહ્યું હતું કે મધ્ય પ્રદેશનું સમગ્ર રાજ્ય આદિવાસી વિસ્તારોથી ભરેલું છે. અટલજી પ્રધાનમંત્રી બન્યા તે પહેલાં કેન્દ્રમાં આદિવાસીઓ માટે કોઈ અલગ વિભાગ નહોતો, પરંતુ તેમના કાર્યકાળ દરમિયાન ભારત સરકારે આદિવાસી બાબતોના મંત્રાલયની સ્થાપના કરી, જે આદિવાસી કલ્યાણ માટેની નવી યાત્રાની શરૂઆત હતી. જ્યારે અટલજી પ્રધાનમંત્રી બન્યા ત્યારે દેશના ઈન્ફ્રાસ્ટ્રક્ચરમાં રોકાણને ચૂંટણી જીતવાનું સાધન માનવામાં આવતું ન હતું. તેમણે કહ્યું હતું કે અટલજીએ "ઈન્ફ્રાસ્ટ્રક્ચરમાં રોકાણથી ચૂંટણી જીતી શકાતી નથી" એવી જૂની માનસિકતાનો અંત આણ્યો અને ગોલ્ડન ક્વાડ્રિલેટરલ (સુવર્ણ ચતુર્ભુજ) પ્રોજેક્ટ અમલમાં મૂક્યો. આ યોજના હેઠળ, દેશને તમામ દિશાઓથી જોડતા છ મોટા હાઈવે બનાવવામાં આવ્યા હતા, જેણે ભારતને મજબૂત ઈન્ફ્રાસ્ટ્રક્ચરના પથ પર આગળ વધવાનો માર્ગ મોકળો કર્યો હતો.

કેન્દ્રીય ગૃહ મંત્રી અને સહકારિતા મંત્રીએ કહ્યું હતું કે તે અટલજી જ હતા જેમણે સમગ્ર વિશ્વ સમક્ષ એ સિદ્ધાંત સ્થાપિત કર્યો હતો કે રાષ્ટ્ર શાંતિ માટે પણ પરમાણુ શક્તિ બની શકે છે. વિશ્વભરના વિરોધ છતાં તેમણે ભારતને પરમાણુ શસ્ત્ર સંપન્ન રાષ્ટ્ર બનાવ્યું. ગૃહ મંત્રીએ કહ્યું હતું કે જ્યારે કારગિલ સંઘર્ષ દરમિયાન ઘૂસણખોરો પ્રવેશ્યા ત્યારે આંતરરાષ્ટ્રીય સમુદાય તરફથી ભારત પર વૈશ્વિક મંચો પર જવા અને પાકિસ્તાન સાથે વાટાઘાટો કરવા માટે ભારે દબાણ હતું. જો કે, અટલજીએ મક્કમપણે જાહેર કર્યું કે અમે શાંતિ માટે પહેલાથી જ પ્રયત્નો કર્યા હતા, અમારી સાથે છેતરપિંડી થઈ હતી, અને હવે જ્યાં સુધી એક-એક ઘૂસણખોરને ભારતીય ક્ષેત્રમાંથી બહાર કાઢવામાં ન આવે ત્યાં સુધી પાકિસ્તાન સાથે કોઈ વાતચીત થઈ શકે નહીં. તેમણે કહ્યું હતું કે કારગિલમાં વિજય એ અટલજીના મક્કમ અને મજબૂત નેતૃત્વનો પુરાવો છે. શ્રી શાહે કહ્યું હતું કે અટલજી એક મહાન વક્તા, સંવેદનશીલ કવિ અને લોકોના કલ્યાણ માટે સમર્પિત નેતા હતા. તેમને આખું જીવન 'અજાતશત્રુ' માનવામાં આવતા હતા, અને રાજકારણની દુનિયામાં દુશ્મન બનાવ્યા વગર જીવવું અને મરવું એ ખૂબ જ મોટી સિદ્ધિ છે. અટલજીના વિરોધીઓએ પણ ક્યારેય તેમના વિશે ખરાબ વાત કરી નથી.

કેન્દ્રીય ગૃહ મંત્રી અને સહકારિતા મંત્રીએ જણાવ્યું હતું કે આજે મહામના પંડિત મદન મોહન માલવીયજીની પણ જન્મજયંતિ છે. તેમણે કહ્યું હતું કે પંડિત માલવીયજીએ બનારસ હિન્દુ યુનિવર્સિટીની સ્થાપનાથી લઈને ગાંધીજીના નજીકના સહયોગી તરીકેની તેમની ભૂમિકા સુધી, અને બાદમાં હિન્દુ મહાસભાની રચના દ્વારા, કોઈપણ સંકોચ વિના દેશભરમાં હિન્દુ વિચારધારાનો—જે આ દેશનો પાયાનો વિચાર છે—નિર્ભયપણે પ્રચાર કર્યો. પાછળથી તે જ બનારસ હિન્દુ યુનિવર્સિટીએ દેશ માટે ઘણા નેતાઓ આપ્યા જેમણે આ વિચારને આગળ વધાર્યો. ગૃહ મંત્રીએ કહ્યું હતું કે આજે ભારત રત્ન સી. રાજગોપાલાચારીની પુણ્યતિથિ પણ છે. તેમણે સી. રાજગોપાલાચારીને પણ શ્રદ્ધાંજલિ અર્પણ કરી હતી.

SM/NP/GP/JD