नवी दिल्‍ली, 29 डिसेंबर 2025

राष्ट्रपती द्रौपदी मुर्मू यांनी आज (29  डिसेंबर 2025) झारखंडमधील जमशेदपूर येथे 22 व्या पारसी महा आणि ओल चिकीच्या शताब्दी समारंभाच्या समारोप समारंभाला उपस्थिती लावली आणि त्यांना संबोधित केले.

यावेळी बोलताना राष्ट्रपती म्हणाल्या की, संथाळ लोकांची स्वतःची भाषा, साहित्य आणि संस्कृती आहे. तथापि, एक शतकापूर्वी, संथाळी भाषेसाठी लिपी नसल्यामुळे, रोमन, देवनागरी, ओडिया आणि बंगाली अशा विविध लिपी वापरल्या जात होत्या. या लिप्यांमध्ये, अनेक संथाळी शब्दांचा उच्चार योग्यरित्या करता येत नव्हता. 1925 मध्ये पंडित रघुनाथ मुर्मू यांनी ओल चिकी लिपी तयार केली. तेव्हापासून, ही लिपी संथाळच्या ओळखीचे एक शक्तिशाली प्रतीक बनली आहे. 

राष्ट्रपती म्हणाल्या की, इतर कोणत्याही भाषेत शिक्षण घेण्याव्यतिरिक्त, संथाली ही मातृभाषा, ओल चिकी लिपीमध्ये शिकणे देखील संथाली समुदायाच्या सर्वांगीण विकासासाठी महत्त्वाचे आहे. संथाली भाषेच्या विकास आणि संवर्धनासाठी लेखक आणि भाषाप्रेमी काम करत आहेत हे पाहून त्यांनी आनंद व्यक्त केला.

पर्यावरण संवर्धनाची गरज लक्षात घेऊन विकासाच्या मार्गावर वाटचाल करण्याचे आवाहनही राष्ट्रपतींनी केले. संथाली लोक आणि इतर आदिवासी समुदायांकडून पर्यावरणपूरक जीवनशैली शिकता येते असे त्या म्हणाल्या. 

राष्ट्रपती म्हणाल्या की भाषा आणि साहित्य समुदायांना एकत्र बांधतात. वेगवेगळ्या भाषांमधील साहित्यिक देवाणघेवाण त्या भाषा आणि समुदायांना समृद्ध करते. भाषांतरांमुळे ही देवाणघेवाण शक्य होते. म्हणूनच, संथाली भाषेच्या विद्यार्थ्यांना इतर भाषांशी ओळख करून देण्याची गरज आहे. इतर भाषिक विद्यार्थ्यांसाठी संथाली साहित्य उपलब्ध करून देण्यासाठी असेच प्रयत्न केले पाहिजेत. अखिल भारतीय संथाली लेखक संघ हे कार्य प्रभावीपणे पार पाडेल असा विश्वास त्यांनी व्यक्त केला.

राष्ट्रपतींचे भाषण वाचण्यासाठी कृपया येथे क्लिक करा

* * *

निलिमा चितळे/हेमांगी कुलकर्णी/दर्शना राणे

सोशल मिडियावर आम्हाला फॉलो करा:@PIBMumbai    /PIBMumbai    /pibmumbai  pibmumbai[at]gmail[dot]com  /PIBMumbai    /pibmumbai