దేశంలోని సుసంపన్నమైన సాంస్కృతిక వారసత్వం, ప్రకృతి సౌందర్యం, విభిన్న పర్యాటక ఆకర్షణలను అన్వేషించాలనుకునే పర్యాటకులు, భాగస్వాముల కోసం పర్యాటక మంత్రిత్వ శాఖ ‘ఇన్‌క్రెడిబుల్ ఇండియా డిజిటల్ ప్లాట్‌ఫాం’ (ఐఐడీపీ) పునరుద్ధరించిన వెర్షన్‌ను ఒక సమగ్ర సాధనంగా ప్రారంభించింది. ఈ కొత్త వేదిక సందర్శకులకు దేశంలోని సాంస్కృతిక, వారసత్వ సంపద, సాహస క్రీడలు, ఆహార సంస్కృతి, ఆరోగ్య సంరక్షణ, కళలు, చేతివృత్తులు, గ్రామీణ పర్యాటకం వంటి అనేక అంశాలపై వర్చువల్ అనుభవాన్ని అందిస్తుంది. ఐఐడీపీ వేదిక కృత్రిమ మేధ ఆధారిత సాధనాన్ని ఉపయోగిస్తుంది. ఇది వాతావరణ సమాచారం, నగర అన్వేషణ, అవసరమైన ప్రయాణ సేవలను సమయానుకూలంగా అందిస్తూ సందర్శకుల అనుభవాన్ని వ్యక్తిగతీకరిస్తుంది. డిజిటల్ సమాచారాన్ని పంచుకోవడానికి, నిర్వహించడానికి ఈ వేదికలో కంటెంట్ హబ్ కూడా ఉంది.

విమానాలు, హోటళ్ళు, క్యాబ్‌లు, బస్సులు... సజావుగా బుక్ చేసుకునేందుకు పోర్టల్‌ పలు ఆన్‌లైన్‌ ట్రావెల్‌ ఏజెంట్లు (ఓటీఏలు), భాగస్వాములతో ఒప్పందం కుదుర్చుకుంది. భారత పురావస్తు శాఖ స్మారక కట్టడాల టికెట్‌ బుకింగ్‌ సౌకర్యాన్ని కల్పించడమే కాకుండా... నమోదైన టూర్ ఆపరేటర్లు, ట్రావెల్ ఏజెంట్ల గురించి సమాచారాన్ని అందిస్తుంది. ఇందుకోసం నేషనల్ ఇంటిగ్రేటెడ్ డేటాబేస్ ఆఫ్ హాస్పిటాలిటీ ఇండస్ట్రీ (నిధి) పోర్టల్‌తో కూడా అనుసంధానమై ఉంటుంది.

ఈ సమాచారాన్ని కేంద్ర పర్యాటక, సాంస్కృతిక శాఖ మంత్రి శ్రీ గజేంద్ర సింగ్ షెకావత్ నేడు రాజ్యసభలో ఇచ్చిన లిఖితపూర్వక సమాధానంలో తెలిపారు.

***