এম আই এফ এফত বন্ধুত্ব আৰু মানৱ সংযোগৰ স্থায়ী শক্তি উদযাপন ছুইছ তথ্যচিত্ৰৰ
১৯ সংখ্যক মুম্বাই আন্তঃৰাষ্ট্ৰীয় চলচ্চিত্ৰ মহোৎসৱত (এম আই এফ এফ) লিয়ন শ্বুইটাৰ আৰু ফেবিয়ানা ছিটজৰ দ্বাৰা প্ৰযোজিত আৰু মৰিছ ফ্ৰেইবাৰ্গহাউছৰ দ্বাৰা পৰিচালিত ছুইছ তথ্যচিত্ৰ ‘আই লাভ ইউ, আই লিভ ইউ’ৰ সংবাদ সন্মিলনৰ সময়ত বন্ধুত্ব, মানসিক স্বাস্থ্য আৰু মানৱ স্থিতিস্থাপকতাৰ ওপৰত এক বিশেষ আলোচনা হৈছিল। জুৰিখ চলচ্চিত্ৰ মহোৎসৱত শ্ৰেষ্ঠ তথ্যচিত্ৰৰ বাবে গোল্ডেন আই আৰু দৰ্শকৰ পছন্দৰ বঁটাৰ বিজয়ী বহুভাষিক তথ্যচিত্ৰখনে এম আই এফ এফৰ বিশেষ মিড-ফেষ্ট শ্ব’কেছৰ অংশ হিচাপে অনুষ্ঠিত আন্তঃৰাষ্ট্ৰীয় প্ৰিমিয়াৰত দৰ্শক আৰু সংবাদ মাধ্যমৰ প্ৰতিনিধিৰ পৰা উৎসাহজনক সঁহাৰি লাভ কৰে।
তথ্যচিত্ৰখনত সংগীতজ্ঞ ডিনোৱে পৰিচয় আৰু সম্পৰ্কৰ সন্ধানত পিতৃৰ গৃহভূমি এংগোলালৈ যাত্ৰা কৰাৰ দৃশ্য অনুসৰণ কৰা হৈছে। এই যাত্ৰাই এক অপ্ৰত্যাশিত ৰূপ লয় যেতিয়া ডিনোৱে মানসিক স্বাস্থ্যৰ এক জটিল পৰিঘটনাৰ সন্মুখীন হয়, যিয়ে ছবিখনক বন্ধুত্ব, যত্ন আৰু আৰোগ্যৰ এক গতিশীল অন্বেষণলৈ ৰূপান্তৰিত কৰে।
ছবিখনৰ শিৰোনাম সম্পৰ্কে উল্লেখ কৰি মৰিছে কয় যে ‘আই লাভ ইউ, আই লিভ ইউ’ৱে প্ৰেমৰ অন্ত পেলোৱাৰ ইংগিত নিদিয়ে, বৰং যত্ন আৰু বন্ধুত্বৰ বান্ধোন অব্যাহত থাকিলেও যে বহু সময়ত মানুহে প্ৰিয়জনৰ পৰা বিদায় ল’বলগীয়া হ’ব পাৰে, এই ধাৰণাক প্ৰতিফলিত কৰে। তেওঁ কয় যে ছবিখনৰ আৰম্ভণি ডিনোৱে নিজেই কৰিছিল, যিয়ে নিজৰ কাহিনী ক’ব বিচৰাৰ লগতে মানসিক স্বাস্থ্য আৰু ইয়াৰ প্ৰত্যাহ্বানৰ বিষয়ে সজাগতা সৃষ্টি কৰাৰ প্ৰয়াস কৰিছিল।
মৰিছ ফ্ৰেইবাৰ্গহাউছে কয় যে ডিনোৰ সৈতে তেওঁৰ দীৰ্ঘদিনীয়া বন্ধুত্বই এই তথ্যচিত্ৰখন গঢ় দিছিল, যিয়ে এটা নিৰ্দিষ্ট চিত্ৰনাট্যৰ পৰিবৰ্তে বাস্তৱ জীৱনৰ অভিজ্ঞতাৰ জৰিয়তে নিৰ্মাণ হৈছিল। তেওঁ ছবিখনক কঠিন আৱেগ প্ৰকাশ আৰু শিল্পৰ জৰিয়তে তেওঁলোকৰ বান্ধোন গভীৰ কৰাৰ এক মাধ্যম বুলি অভিহিত কৰে। মানসিক স্বাস্থ্যৰ বিষয়ে আলোচনা কৰি তেওঁ সহানুভূতি আৰু বুজাবুজিৰ প্ৰয়োজনীয়তাত গুৰুত্ব আৰোপ কৰি কয় যে প্ৰায়েই মানুহৰ ব্যক্তিগত সংগ্ৰামৰ বিষয়ে নজনাকৈয়ে বিচাৰ কৰা হয়। তেওঁ কয় যে ছবিখনে দৰ্শকসকলক আনৰ সৈতে হোৱা কথা-বতৰাত অধিক মুকলি মনৰ, সহানুভূতিশীল আৰু সংবেদনশীল হ’বলৈ উৎসাহিত কৰে।
বাৰ্তালাপৰ আৰম্ভণিতে পৰিচালকগৰাকীয়ে চিনেমাৰ ভূমিকা সন্দৰ্ভতো আলোকপাত কৰে। তেওঁ আশা প্ৰকাশ কৰে যে এই তথ্যচিত্ৰখনে মানসিক স্বাস্থ্যৰ বিষয়ে অধিক সজাগতা সৃষ্টি কৰাৰ লগতে কঠিন সময়ত বন্ধুত্ব আৰু মানৱ সম্পৰ্কৰ শক্তিৰ কথা দৰ্শকক সোঁৱৰাই দিব।
* * *
PIB Team MIFF | Nikita Joshi/Robin Singh/Darshana Rane/NB
रिलीज़ आईडी:
2279365
| Visitor Counter:
4