مرکزی وزیر برائے جل شکتی جناب سی آر پاٹل اور مرکزی وزیر مملکت برائے ہاؤسنگ اور شہری امور جناب توکھن ساہو نے آج نئی دہلی کے نیشنل میڈیا سینٹر میں سووچھتا ہی سیوا 2026 کے سلسلے میں مہم کے آغاز سے قبل میڈیا سے بات چیت کی۔

2017 سے ہر سال منائی جانے والی سووچھتا ہی سیوا 2026 مہم اس سال 17 ستمبر سے شروع ہو رہی ہے۔ یہ مہم سووچھتا کے لیے رضاکارانہ جذبے اور اجتماعی کارروائی کو مضبوط بنانے کے مقصد سے شہریوں، اداروں اور قیادت کو ایک پلیٹ فارم پر لاتی ہے۔ ایس ایچ ایس 2026 کا موضوع ’ سووچھتا میں سہبھاگ، سووچھ بھارت، وکست یافتہ بھارت‘اس بات کو اجاگر کرتا ہے کہ سووچھتا ایک مشترکہ ذمہ داری ہے اور سووچھ اور وکست بھارت کے تصور کو صرف تمام شہریوں کی فعال شرکت کے ذریعے ہی عملی جامہ پہنایا جا سکتا ہے۔

قومی سطح پر مہم کے آغاز سے قبل یہ افتتاحی تقریب اور میڈیا سے بات چیت منعقد کی گئی۔ پینے کے پانی اور صفائی ستھرائی کے محکمے (ڈی ڈی ڈبلیو ایس)، وزارت جل شکتی اور شہری ترقی کے محکمے (ڈی او یو ڈی)، وزارت ہاؤسنگ اور شہری امور کے مشترکہ تعاون سے منعقد ہونے والی ایس ایچ ایس 2026 مہم میں مرکزی وزارتیں اور محکمے، ریاستیں اور مرکز کے زیر انتظام علاقے، دیہی اور شہری مقامی ادارے اور دیگر شراکت دار سووچھتا کے لیے اجتماعی کارروائی کے مقصد سے ایک ساتھ آئیں گے۔

اس موقع پر اظہار خیال کرتے ہوئے مرکزی وزیر برائے جل شکتی جناب سی آر پاٹل نے اس بات پر زور دیا کہ معزز وزیر اعظم جناب نریندر مودی کی دوراندیش قیادت میں سووچھتا جن بھاگیداری سے چلنے والی ایک قومی تحریک بن گئی ہے۔ انہوں نے کہا کہ معزز وزیر اعظم نے مسلسل آگے بڑھ کر اس تحریک کی قیادت کی ہے اور ملک بھر کے شہریوں کو اس میں حصہ لینے کی ترغیب دی ہے۔ صفائی کو مشترکہ ذمہ داری قرار دیتے ہوئے انہوں نے ہر شہری، بالخصوص طلبا اور نوجوانوں سے اپیل کی کہ وہ ایس ایچ ایس 2026 میں پورے جوش و خروش کے ساتھ حصہ لیں اور سووچھ بھارت اور وکست بھارت کے لیے اجتماعی عزم کو مضبوط کریں۔ وزیر موصوف نے وزیر اعظم کے دورے سے قبل نوساری میں ’سووچھتا سے سواگت‘- مائیکرو سووچھتا ابھیان کی مثال پیش کی، جہاں معاشرے کے ہر طبقے کے لوگ دیہات میں چھوٹی سطح پر صفائی کے لیے ایک ساتھ آئے۔ انہوں نے گزشتہ سال گنپتی وسرجن کے بعد سورت میں فوری صفائی اور صفائی کارکنوں کی حمایت، اعتراف اور اعزاز کے لیے لوگوں کے ایک ساتھ آنے کی مثال بھی دی۔ انہوں نے کہا کہ اب لوگ تیزی سے سووچھتا میں حصہ لینے اور اپنا تعاون دینے کے لیے آگے آ رہے ہیں، جو ملک میں معزز وزیر اعظم کی جانب سے پیدا کی گئی بیداری اور رویوں میں تبدیلی کا نتیجہ ہے۔

ایک ورچوئل پیغام میں مرکزی وزیر برائے ہاؤسنگ اور شہری امور جناب منوہر لال نے ریاستوں سے اپیل کی کہ وہ آئندہ ’سووچھتا ہی سیوا 2026‘ مہم میں پرجوش شرکت کو یقینی بنائیں۔ انہوں نے اپیل کی کہ شہری 17 ستمبر کو اپنے اپنے گھروں کی صفائی سے اس مہم کا آغاز کریں۔ انہوں نے مزید کہا کہ تمام وزرا، ارکان اسمبلی، میئر، ڈپٹی میئر، وارڈ کونسلر، کمشنر اور ریاست کی ممتاز شخصیات یکم اکتوبر کو ملک گیر شرم دان میں حصہ لیں۔ انہوں نے یہ بھی اپیل کی کہ 2 اکتوبر یعنی سووچھ بھارت دیوس کے موقع پر مہاتما گاندھی کی یاد میں عوامی مقامات پر صفائی کی سرگرمیاں منعقد کی جائیں۔ انہوں نے طلبا اور نوجوانوں، کھلاڑیوں، فن کاروں، روحانی رہنماؤں اور دیگر سووچھتا سفیروں سے بھی اپیل کی کہ وہ اپنے پلیٹ فارم کا استعمال کرتے ہوئے عوام کی وسیع تر شرکت اور نچلی سطح پر اجتماعی کارروائی کی حوصلہ افزائی کریں۔

حاضرین  سے خطاب کرتے ہوئے مرکزی وزیر مملکت برائے ہاؤسنگ اور شہری امور جناب توکھن ساہو نے کہا، ’’سووچھتا کا پیغام اسی وقت مؤثر ہوگا جب ہمارے سرکاری دفاتر اور ادارے خود اس کی مثال قائم کریں۔ تمام محکموں کو شہریوں کو متحرک کرنے کے ساتھ ساتھ اپنے دفاتر، احاطوں اور ماتحت اکائیوں میں نمایاں صفائی کو یقینی بنانا چاہیے، تاکہ یہ مہم شراکت داری کا ایک مؤثر مظاہرہ بنے اور ’ہول آف گورنمنٹ‘ اور ’ہول آف سوسائٹی‘ کے طریقہ کار کو فروغ ملے۔ ہر شہری مقامی ادارے، گرام پنچایت، ہر وارڈ، ہر ادارے اور ہر برادری کو اس مہم سے جوڑا جانا چاہیے، تاکہ صفائی ایک مشترکہ قومی عزم بن سکے۔‘‘

پینے کے پانی اور صفائی ستھرائی کے محکمے اور شہری ترقی کے محکمے کے سکریٹریوں نے مہم کے خاکے کو اجاگر کیا۔

ایس ایچ ایس 2026 کے پانچ اہم ستون یہ ہیں:

1. صفائی کے ہدف والے یونٹس (سی ٹی یوز) اور صاف عوامی مقامات میں  یکسرتبدیلی: مشکل اور گندے مقامات کی نشاندہی، نقشہ بندی اور مقررہ مدت میں ان کی حالت میں بہتری کے ساتھ ساتھ سی ٹی یوز اور زیادہ آمدورفت والے عوامی مقامات پر صفائی مہم چلانا۔
2. سووچھ پاٹھ شالا- یووافار سووچھ: طلبا اور نوجوانوں کو ٹھوس کچرے کے انتظام کے مراکز کے مطالعاتی دوروں کے لیے ’سووچھتا گیان یاترا‘ کے ذریعے شامل کرنا اور ’سووچھتا ایوم جل سنچیے سمواد‘ کے ذریعے سووچھتا، بارش کے پانی کو جمع کرنے اور پانی کے انتظام سے متعلق آگاہی فراہم کرنا۔

• iii. صفائی متر سرکشا ایوم سمان شِوِر: ایک ہی جگہ پر صحت کی جانچ، پی پی ای اور حفاظتی سازوسامان کی فراہمی اور اہل افراد کو مرکزی اور ریاستی فلاحی اسکیموں سے جوڑنے کے لیے یکساں سہولت والے کیمپ۔ سووچھتا کے لیے ان کی خدمات کے اعتراف میں صفائی متر، سووچھا گرہی اور صفائی کارکنوں کو مقامی سطح پر اعزاز سے بھی نوازا جائے گا۔

4. سووچھتا کے لیے جن بھاگیداری: شہریوں کی شمولیت، ٹھوس کچرے کے انتظام کے ضوابط 2026 اور کچرے کو ماخذ پر چار اقسام میں الگ کرنے اور نامیاتی کھاد بنانے کے بارے میں بیداری۔ سرگرمیوں میں سووچھتا کے لیے کھیل؛ سوچھ پرو، ہریت پرو؛ ’ایک پیڑ ماں کے نام‘ کے تحت شجرکاری مہم؛ عالمی یوم سیاحت کے موقع پر سرگرمیاں (27 ستمبر 2026)؛ اور سووچھ بھارت دیوس (2 اکتوبر 2026) کے موقع پر خصوصی گرام سبھائیں اور کونسل میٹنگز بھی شامل ہوں گی۔
5. سووچھتا سے سمردھی: ’ویسٹ ٹو ویلتھ‘ اور ’ویسٹ ٹو آرٹ‘ کے ذریعے وسائل کے دوبارہ استعمال اور محوری معیشت کو فروغ دینا؛ پرانی کتابوں، کھلونوں اور کپڑوں کے عطیے اور آر آر آر اقدامات؛ اور بڑی مقدار میں کچرا پیدا کرنے والوں کی شمولیت سے پلاسٹک ری سائیکلنگ میلوں کا انعقاد۔

بچوں اور نوجوانوں کو تبدیلی کے محرک اور سووچھ بھارت کے مستقبل کے محافظ تسلیم کرتے ہوئے، ایس ایچ ایس 2026 میں سووچھ پاٹھ شالا- یووا فار سووچھتا کے ذریعے صفائی ستھرائی، ٹھوس کچرے کے انتظام کے ضوابط 2026 اور ماخذ پر کچرے کو چار اقسام میں الگ کرنے کی مستقل عادات پیدا کرنے کے لیے ان کی فعال شمولیت کا تصور پیش کیا گیا ہے۔ سووچھتا کے لیے کھیل جیسی سرگرمیوں کے ذریعے مقامی اور علاقائی کھیلوں کو استعمال کرتے ہوئے بچوں، نوجوانوں اور برادریوں کو صفائی سے جوڑا جائے گا، تاکہ صفائی کے پیغام کو اسکولوں، اداروں، شہروں اور دیہات تک پہنچایا جا سکے۔

ملک گیر سطح پر بیک وقت ’ایک دن، ایک گھنٹہ، ایک ساتھ‘ کے عنوان سے شرم دان یکم اکتوبر 2026 کو صبح 8 سے 9 بجے تک منعقد کیا جائے گا۔ اس کے تحت مختلف شعبہ ہائے زندگی سے تعلق رکھنے والے شہری ایک گھنٹے کی رضاکارانہ صفائی خدمت کے لیے ایک ساتھ آئیں گے۔

2 اکتوبر 2026 کو، جسے سووچھ بھارت دیوس کے طور پر منایا جاتا ہے، دیہی علاقوں میں خصوصی گرام سبھائیں اور شہری علاقوں میں خصوصی کونسل میٹنگز منعقد کی جائیں گی۔ خصوصی گرام سبھاؤں میں دیگر امور کے ساتھ ساتھ ایس ایچ ایس 2026 کے نتائج اور ٹھوس کچرے کے انتظام کے ضوابط 2026 کے بارے میں بیداری پر توجہ مرکوز کی جائے گی۔ دیہی علاقوں کے لیے ڈی ڈی ڈبلیو ایس کی جانب سے 15 ستمبر 2026 کو شروع کیے گئے سووچھ سیوا آکلن پر بھی خصوصی گرام سبھاؤں کے دوران تبادلہ خیال کیا جائے گا۔ اس دن شہروں اور دیہات دونوں میں ’ایک پیڑ ماں کے نام‘ کے تحت شجرکاری مہم چلائی جائے گی۔ اس موقع پر ملک بھر کے شہری مائی گوو پلیٹ فارم کے ذریعے رضاکارانہ طور پر سووچھتا کاحلف بھی لیں گے۔

تقریب کے دوران ایس ایچ ایس 2026 کے موضوع، لوگو، مہم کے کتابچے اور پورٹل کے ساتھ ایس ایچ ایس 2026 کا ترانہ بھی جاری کیا گیا۔ ایس ایچ ایس 2026 پر مہم کے آغاز سے قبل تیار کی گئی ویڈیو بھی دکھائی گئی۔

وسیع پیمانے پر جن بھاگیداری کے ذریعے ایس ایچ ایس 2026 کا مقصد سووچھتا کو مشترکہ ذمہ داری کے طور پر مزید مضبوط کرنا اور شہریوں کی شرکت کو سووچھ اور وکست بھارت کی سمت مستقل کارروائی میں تبدیل کرنا ہے۔ شہریوں اور حصہ لینے والی تنظیموں کی حوصلہ افزائی کی گئی ہے کہ وہ اپنی سرگرمیاں انجام دیں اور #SHS2026 اور #SwachhataHiSeva2026 ہیش ٹیگ کے ذریعے ان کا اشتراک کریں۔

******

ش ح ۔ م م  ۔ م ا

UR No-3864

                          

(ریلیز آئی ڈی: 2313038) وزیٹر کاؤنٹر : 21