نوجوانوں کے امور اور کھیلوں کے مرکزی وزیر ڈاکٹر منسکھ مانڈویہ نے آج جسمانی تعلیم کے ماہرین کے  ماڈیول کا اجرا کیا اور نچلی سطح پر کھیلوں کے باصلاحیت کھلاڑیوں کی شناخت اور ان کی صلاحیتوں کو پروان چڑھانے میں جسمانی تعلیم کے اساتذہ کے اہم کردار کو اجاگر کیا۔

مرکزی وزیر کھیل نے نچلی سطح پر سائنسی طریقے سے باصلاحیت کھلاڑیوں کی شناخت اور ان کی منظم نشوونما کو مضبوط بنانے کے لیے مقررہ مدت کے اندر ملک بھر کے جسمانی تعلیم (پی ای)کے اساتذہ کا ایک جامع ریکارڈ تیار کرنے پر زور دیا۔

ڈاکٹر مانڈویہ نے نیشنل اسپورٹس ریپوزٹری سسٹم (این ایس آر ایس) پر پی ای ٹیچرز رجسٹریشن اینڈ آن بورڈنگ ماڈیول کا اجرا کرنے کے بعد کہا، ’’اسکولوں اور کالجوں میں جسمانی تعلیم کے اساتذہ بچوں اور نوجوانوں میں کھیلوں کی صلاحیت کو سب سے پہلے شناخت کرنے والوں میں شامل ہیں۔ ان کی تعلیمی قابلیت، مہارت اور تجربے کا ریکارڈ تیار کرنا ضروری ہے، تاکہ ان کی صلاحیتوں سے مؤثر طور پر استفادہ کیا جا سکے اور ان کی مزید پیشہ ورانہ ترقی کو فروغ دیا جا سکے۔‘‘

انہوں نے مزید کہا، ’’ملک گیر سطح پر باصلاحیت کھلاڑیوں کی شناخت کی مہم کا آغاز نچلی سطح سے کرتے ہوئے سائنسی طریقۂ کار اختیار کیا جانا چاہیے۔ بہت سے نوجوانوں میں مناسب رہنمائی حاصل ہونے پر اچھے کھلاڑی بننے کے لیے درکار جسمانی صلاحیت اور استعداد موجود ہو سکتی ہے۔ جسمانی تعلیم کے اساتذہ ان بچوں کے ساتھ خاصا وقت گزارتے ہیں، اس لیے وہ ایسی صلاحیتوں کی شناخت کے لیے سب سے زیادہ موزوں ہیں۔‘‘

کھیلوں کی سائنس کی بڑھتی ہوئی اہمیت پر روشنی ڈالتے ہوئے ڈاکٹر مانڈویہ نے کہا کہ باصلاحیت کھلاڑیوں کی شناخت اور ان کی صلاحیتوں کو پروان چڑھانے سے لے کر اعلیٰ سطح کے کھلاڑیوں کی تربیت تک، اس پورے سفر میں کھیلوں کی سائنس کا اہم کردار ہے۔

انہوں نے مزید کہا کہ ’’اس لیے باصلاحیت کھلاڑیوں کی سائنسی طریقے سے شناخت کا آغاز نچلی سطح سے ہونا چاہیے۔‘‘

اس پہل کو مشن موڈ میں آگے بڑھانے کی ضرورت پر زور دیتے ہوئے ڈاکٹر مانڈویہ نے ضلعی سطح پر جسمانی تعلیم کے اساتذہ کی تنظیم کی مہم چلانے کے ساتھ ساتھ ضلع، ریاست اور قومی سطح پر جسمانی تعلیم کے اساتذہ کے رجسٹریشن اور ان کا منظم ریکارڈ تیار کرنے پر زور دیا۔

انہوں نے کہا، ایسا جامع ریکارڈ جسمانی تعلیم کے اساتذہ کی صلاحیتوں اور خصوصی مہارتوں کا درست اندازہ لگانے میں مدد دے گا اور خصوصی صلاحیتوں کے حامل اساتذہ کو قومی اور بین الاقوامی سطح پر اپنی صلاحیتوں کا مظاہرہ کرنے کے مواقع فراہم کرے گا۔‘‘

مرکزی وزیر کھیل نے ہدایت دی کہ یہ مکمل ریکارڈ چھ ماہ کے اندر تیار کیا جائے اور کہا کہ اس کی پیش رفت کا مقررہ مدت کے مطابق جائزہ لیا جائے گا۔ انہوں نے کہا، ’’اس پہل کو محض ایک ماڈیول کے اجرا تک محدود نہ رکھا جائے بلکہ اسے ملک میں کھیلوں کی ترقی کے لیے ایک مشن کے طور پر آگے بڑھایا جائے۔‘‘

جسمانی تعلیم کے ماہرین کے ماڈیول  کونیشنل اسپورٹس ریپوزٹری سسٹم (این ایس آر ایس) کے تحت متعارف کرایا گیا ہے۔ این ایس آر ایس ایک مرکزی ڈیجیٹل پلیٹ فارم ہے، جس کا مقصد بھارتی کھیلوں کے ماحولیاتی نظام سے وابستہ تمام متعلقہ فریقوں کا ایک متحد اور جامع ریکارڈ برقرار رکھنا ہے۔

اس موقع پر نوجوانوں کے امور اور کھیلوں کی وزارت، اسپورٹس اتھارٹی آف انڈیا (ایس اے آئی)، لکشمی بائی نیشنل انسٹی ٹیوٹ آف فزیکل ایجوکیشن (ایل این آئی پی ای)، لکشمی بائی نیشنل کالج آف فزیکل ایجوکیشن (ایل این سی پی ای)، فزیکل ایجوکیشن فاؤنڈیشن آف انڈیا (پی ای ایف آئی) اور دیگر اہم متعلقہ فریقوں کے سینئر افسران موجود تھے۔

जमीनी स्तर पर खेल प्रतिभाओं को निखारने के लिए आज NSRS पोर्टल पर 'Physical Education Professionals Module' का शुभारंभ किया। आदरणीय प्रधानमंत्री श्री @narendramodi जी के विजन के अनुरूप, यह पहल हमारे Physical Education शिक्षकों को सशक्त कर नए चैंपियन तराशने में मदद करेगी। मेरा सभी Physical Education Professionals से आग्रह है कि वे इस पोर्टल पर अपना रजिस्ट्रेशन जरूर करें: https://t.co/ghWowXU4zN

— Dr Mansukh Mandaviya (@mansukhmandviya) October 1, 2026

***********

ش ح۔ رک۔

U No. 4443

(ریلیز آئی ڈی: 2317707) وزیٹر کاؤنٹر : 10