اہم خصوصیات اور فوائد:

• تمل ناڈو میں این ایچ-179 بی کے تامبرم-تِندِوَنَم سیکشن پر پرانور ٹول پلازہ میں پہلا ملٹی لین فری فلو (ایم ایل ایف ایف) ٹول وصولی نظام نافذ کیا گیا ہے۔
•  اس نظام کے تحت بغیر رکاوٹ ٹول وصولی کی سہولت فراہم کی گئی ہے، جس سے گاڑیوں کو ٹول  کے مقام پر رکے بغیر گزرنے کی اجازت ہوگی۔
•  ٹول وصولی میں انسانی مداخلت میں نمایاں کمی آئے گی، ایندھن اور وقت کی بچت ہوگی، ٹریفک کم ہوگی، گاڑیوں سے ہونے والے اخراج میں کمی آئے گی اور ٹول آپریشنز زیادہ شفاف اور کفایتی ہوں گے۔
•  یہ بغیر رکاوٹ اور بلاتعطل سفر کو فروغ دے گا، جس سے قومی شاہراہ استعمال کرنے والوں کے لیے ’سفر میں آسانی‘ مزید بہتر ہوگی۔
•  ٹول وصولی کے عمل کو بلاتعطل اور مؤثر بنانے کے لیے آٹومیٹک نمبر پلیٹ ریکگنیشن (اے این پی آر) اور فاس ٹیگ جیسی ٹیکنالوجیز کا استعمال کیا گیا ہے۔

ملک میں الیکٹرانک ٹول وصولی نظام کو جدید خطوط پر استوار کرنے کی سمت میں ایک اہم قدم اٹھاتے ہوئے، نیشنل ہائی ویز اتھارٹی آف انڈیا (این ایچ اے آئی) نے این ایچ-179 بی کے تامبرم-تِندِوَنَم سیکشن پر پرانور ٹول پلازہ میں تمل ناڈو کا پہلا ملٹی لین فری فلو (ایم ایل ایف ایف) ٹول وصولی نظام شروع کیا ہے۔ ایم ایل ایف ایف نظام کے تحت بغیر رکاوٹ ٹول وصولی کی سہولت فراہم کی گئی ہے، جس سے گاڑیوں کو ٹول کے مقام پر رکے بغیر گزرنے کی اجازت ہوگی۔ اس نظام میں آٹومیٹک نمبر پلیٹ ریکگنیشن (اے این پی آر) اور فاس ٹیگ پر مبنی الیکٹرانک ٹول وصولی جیسی جدید ٹیکنالوجیز کا استعمال کیا گیا ہے، تاکہ ٹول وصولی کا عمل بلاتعطل اور مؤثر انداز میں انجام دیا جا سکے۔ یہ پہل حکومت ہند کے اس وژن سے ہم آہنگ ہے جس کے تحت زندگی میں آسانی اور کاروبار کرنے میں سہولت کو بہتر بنانے کے لیے ٹیکنالوجی کا استعمال کرتے ہوئے شہریوں پر مرکوز خدمات فراہم کرنے پر زور دیا جا رہا ہے۔

ایم ایل ایف ایف:

ایم ایل ایف ایف کے آغاز سے قومی شاہراہوں پر الیکٹرانک ٹول وصولی کے نظام میں ایک اہم تبدیلی آئی ہے۔ گاڑیوں کو ٹول پلازہ پر رکنے کی ضرورت ختم ہونے سے ٹول وصولی کے عمل میں انسانی مداخلت میں نمایاں کمی آئے گی، ٹریفک  کم ہوگی، سفر کا وقت بہتر ہوگا، ایندھن کی بچت ہوگی اور قومی شاہراہوں پر گاڑیوں سے ہونے والے اخراج میں کمی آئے گی۔

این ایچ اے آئی ملک بھر کی مختلف قومی شاہراہوں پر مرحلہ وار ایم ایل ایف ایف پر مبنی ٹول وصولی نظام نافذ کر رہا ہے۔ تیز رفتار، بلاتعطل اور بغیر رکاوٹ سفر کی سہولت فراہم کرنے کے مقصد سے این ایچ اے آئی نے ملک کے مختلف مقامات پر ملٹی لین فری فلو (ایم ایل ایف ایف) ٹول وصولی نظام کامیابی سے شروع کیا ہے، جن میں گجرات میں این ایچ-48 کے سورت-بھروچ سیکشن پر چوراسی ٹول پلازہ؛ دہلی-این سی آر میں اربن ایکسٹینشن روڈ-II (یو ای آر-II) پر منڈکا-بکر والا ٹول پلازہ؛ راجستھان میں این ایچ-48 کے دہلی-جے پور سیکشن پر شاہجہاں پور، دولت پورہ اور منوہر پورہ ٹول پلازہ؛ اور ہریانہ میں قومی شاہراہ-44 کے پانی پت-جالندھر سیکشن پر گھرونڈا ٹول پلازہ شامل ہیں۔

ایم ایل ایف ایف کے ذریعے بلاتعطل سفر کی سہولت سے فائدہ اٹھانے کے لیے قومی شاہراہوں کے صارفین کو چاہیے کہ وہ مناسب توازن کے ساتھ فعال فاس ٹیگ رکھیں، تاکہ الیکٹرانک نوٹس (ای-نوٹس) سے بچا جا سکے۔

ایم ایل ایف ایف کے نفاذ سے ٹول وصولی کے نظام کو مزید مستحکم بنانے میں مدد ملی ہے۔ اس سے شفافیت میں اضافہ، ٹول پلازہ کے قیام سے متعلق آپریشنل اخراجات میں کمی اور ملک بھر میں ٹول وصولی کے مجموعی عمل کی کارکردگی میں بہتری آئی ہے۔

**********

ش ح۔ رک۔

U No. 4456

 

(ریلیز آئی ڈی: 2317790) وزیٹر کاؤنٹر : 7