سڑک ٹرانسپورٹ اور شاہراہوں کی وزارت (ایم او آر ٹی ایچ) نے جاری ’سوچھتا ہی سیوا (ایس ایچ ایس) 2026‘ مہم کے تحت آج نئی دہلی کے ٹرانسپورٹ بھون میں صفائی مہم (شرمدان) کا انعقاد کیا۔ یہ پہل مہم کے ’ایک دن، ایک گھنٹہ، ایک ساتھ‘ کے تحت صفائی کی سرگرمیوں میں اجتماعی شرکت کی اپیل کے سلسلے میں کی گئی۔

’سوچھتا ہی سیوا‘ مہم 17 ستمبر سے 2 اکتوبر 2026 تک منائی جا رہی ہے، جس کا مقصد رضاکارانہ جذبے کو فروغ دینا اور صفائی کے لیے اجتماعی کوششوں کو تقویت دینا ہے۔ اس سال کی مہم کا موضوع ’سوچھتا میں سَہ بھاگ، سوچھ بھارت، وکست بھارت‘ ہے۔

جاری مہم کے تحت یکم اکتوبر 2026 تک 943 صفائی کے ہدف والے مقامات (سی ٹی یوز) کو تبدیل کیا جا چکا ہے۔ مزید برآں، مہم کے تحت اب تک 123 عوامی مقامات کی صفائی کی جا چکی ہے۔

سڑک ٹرانسپورٹ اور شاہراہوں کی وزارت کے سکریٹری جناب وی. اوما شنکر نے وزارت کے اعلیٰ افسران اور ملازمین کے ساتھ مل کر شرمدان کی قیادت کی۔ افسران اور عملے نے صفائی مہم میں جوش وخروش کے ساتھ حصہ لیا، جس کے تحت ٹرانسپورٹ بھون کے باہر کے علاقے کی صفائی بھی کی گئی۔ اس موقع پر وزارت نے صاف ستھرے اور حفظانِ صحت کے تقاضوں کے مطابق عوامی اور دفتری مقامات کو برقرار رکھنے کے اپنے عزم کا اعادہ کیا۔

اس موقع پر جناب وی. اوما شنکر اور وزارت کے اعلیٰ عہدیداروں نے صفائی کارکنوں کی گراں قدر خدمات کے اعتراف میں انہیں شال پیش کرکے اعزاز سے نوازا۔ سکریٹری نے کام کی جگہ پر صفائی اور حفظانِ صحت برقرار رکھنے میں ان کے اہم تعاون کو سراہا اور ’سوچھتا‘ مہم کے مقاصد کی تکمیل میں ان کے اہم کردار کا اعتراف کیا۔

اس پہل کے ذریعے افسران اور ملازمین کو ایک ساتھ آنے اور ’سوچھتا ہی سیوا‘ کے وسیع تر مقاصد میں اپنا کردار ادا کرنے کا موقع ملا۔ وزارت نے اس بات کا اعادہ کیا کہ صفائی صرف وقتاً فوقتاً چلائی جانے والی مہمات تک محدود نہیں ہے، بلکہ اس کے لیے روزمرہ زندگی میں مسلسل شرکت اور ذمہ دارانہ طرزِ عمل ضروری ہے۔

’سوچھتا ہی سیوا‘ اور خصوصی مہم 6.0 کے تحت وزارت نے ترجیحی بنیاد پر کارروائی کے لیے کئی اہم شعبوں کی نشاندہی کی ہے، جن میں قومی شاہراہوں (این ایچ) کے ساتھ، خصوصاً شہری علاقوں میں، کچرے کو ہٹانا؛ ٹول پلازوں اور قومی شاہراہوں کے ساتھ دیگر مقامات پر بیت الخلا کے بلاکس کی مرمت، بحالی اور دیکھ بھال؛ ٹول پلازوں کی جامع دیکھ بھال، جس میں صفائی، رنگ و روغن، روشنی اور شمسی توانائی سے آراستہ کرنا شامل ہے؛ سڑکوں پر نشانات نصب کرنا اور سڑک کی پٹیوں کی مرئی حیثیت کو بہتر بنانا؛ اور دیگر صفائی و دیکھ بھال کی سرگرمیوں کے علاوہ قومی شاہراہوں کو گڑھوں سے پاک کرنا شامل ہے۔

تمام مہماتی دفاتر، جن میں ہیڈکوارٹر، علاقائی دفاتر، پروگرام عمل درآمد یونٹس (پی آئی یوز)، پروگرام ڈائریکٹرز اور دیگر فیلڈ دفاتر شامل ہیں، کو مہمات کے مؤثر نفاذ کے لیے مشترکہ کوششیں کرنے اور دیرپا و مؤثر نتائج کو یقینی بنانے کے لیے حساس بنایا گیا ہے۔

مہمات کی پیش رفت کا متعلقہ مہماتی دفاتر کے نوڈل افسران کے ساتھ جوائنٹ سکریٹری/سکریٹری کی جانب سے باقاعدگی سے جائزہ لیا جا رہا ہے، تاکہ مربوط نفاذ اور مہم کے مقاصد کے حصول کو یقینی بنایا جا سکے۔

ٹرانسپورٹ بھون میں منعقدہ شرمدان نے اجتماعی ذمہ داری، کام کے وقار ، صاف ستھرا اور حفظانِ صحت کے تقاضوں کے مطابق دفتری اور عوامی ماحول کی تعمیر میں مسلسل شرکت کے پیغام کو مزید مضبوط کیا۔

****

ش ح۔ رک۔

U No. 4633

(ریلیز آئی ڈی: 2319088) وزیٹر کاؤنٹر : 22