سوچھتا ہی سیوا مہم 2026 کے موقع پر قانون سازی کا محکمہ اور وزارت قانون و انصاف کے محکمہ قانونی امور نے مشترکہ طور پر یکم اکتوبر 2026 کو نئی دہلی میں صفدر جنگ مقبرے پر شرم دان پروگرام کا انعقاد کیا۔ اس پروگرام کا مقصد صفائی ستھرائی، حفظانِ صحت اور شہری ذمہ داری کے جذبے کو فروغ دینا اور یہ پیغام عام کرنا تھا کہ صفائی ستھرائی ایک اجتماعی ذمہ داری ہے اور ایک صحت مند اور ترقی پسند معاشرے کا لازمی حصہ ہے۔ اس پروگرام کا موضوع ‘‘ایک دن، ایک گھنٹہ، ایک ساتھ’’ تھا۔

شرم دان پروگرام کی قیادت قانون ساز محکمہ کے وزیر مملکت (آزادانہ چارج) جناب ارجن رام میگھوال نے کی۔ ان کے ہمراہ ڈاکٹر راجیو منی، سکریٹری، جناب چیتن شرما، ایڈیشنل سالیسٹر جنرل اور قانون سازی کا محکمہ و محکمہ قانونی امور کے دیگر سینئر افسران موجود تھے۔ ان میں ان کے منسلک دفاتر، یعنی ودھی ساہتیہ پرکاشن اور سرکاری زبان شعبہ کے افسران، نیز سپریم کورٹ اور نئی دہلی ہائی کورٹ کے وکلا بھی شامل تھے۔

اس موقع پر وزیر مملکت (آزادانہ چارج) جناب ارجن رام میگھوال نے صفائی کارکنوں میں سوچھتا کِٹ تقسیم کی اور مہم کی اہمیت، معاشرے اور ملک کے لیے اس کے مجموعی فوائد پر زور دیا۔ پروگرام کے دوران انہوں نے شرم دان میں سرگرمی سے حصہ لیا اور مقام پر موجود افسران اور صفائی کارکنوں سے بات چیت بھی کی۔

وزیر موصوف نے سوچھتا ہی سیوا مہم کی اہمیت اور نہ صرف سرکاری دفاتر اور عوامی مقامات بلکہ اپنے گھروں اور برادریوں میں بھی صفائی ستھرائی برقرار رکھنے کی اہمیت پر زور دیا۔ انہوں نے تمام افسران اور ملازمین سے اپیل کی کہ صفائی اور حفظانِ صحت کو اپنی روزمرہ کی عادت بنائیں اور ایک صاف ستھرا، صحت مند اور پائیدار ماحول تشکیل دینے میں فعال طور پر اپنا کردار ادا کریں۔ انہوں نے یکم اکتوبر کو منائے جانے والے بزرگ افراد کے عالمی دن کی اہمیت کو بھی اجاگر کیا، جو بزرگوں کے قیمتی تجربے اور رہنمائی کو تسلیم کرتا ہے اور نوجوان نسل کو صفائی ستھرائی اور ایک بہتر ملک کی تعمیر کے لیے ترغیب دینے میں ان کے کردار کو نمایاں کرتا ہے۔

اس پروگرام میں دونوں محکموں کے افسران اور عملے نے پُرجوش انداز میں شرکت کی۔ صفدر جنگ مقبرے پر منعقدہ شرم دان سرگرمی ‘‘سوچھتا ہی سیوا’’ کے جذبے کو مزید مستحکم کرنے کی ایک بامعنی کوشش ثابت ہوئی اور اس نے ہر فرد کو انفرادی اور اجتماعی کوششوں کے ذریعے صفائی ستھرائی میں اپنا کردار ادا کرنے کی ترغیب دی۔

 

 

******

 

ش ح۔ م م ع۔رض

4684U-No.

 

(ریلیز آئی ڈی: 2319475) وزیٹر کاؤنٹر : 15