న్యూఢిల్లీలోని యశోభూమిలో ఇండియా మొబైల్ కాంగ్రెస్ (ఐఎంసీ) పదో ఎడిషన్‌ను ప్రధానమంత్రి శ్రీ నరేంద్ర మోదీ ప్రారంభించారు. అక్టోబర్ 8న భారత వాయుసేన దినోత్సవం సందర్భంగా.. వైమానిక దళ యోధుల సేవలను ప్రారంభోత్సవ ప్రసంగంలో ప్రధానమంత్రి కొనియాడారు. వీరోచితంగా గగనతలాన్ని కాపాడుతున్న వైమానిక దళ సిబ్బందికి సగర్వంగా ప్రణమిల్లారు. ‘‘మన వీర జవాన్లందరికీ శిరస్సు వంచి నమస్కరిస్తున్నాను. వాయుసేన దినోత్సవ సందర్భంగా దేశ ప్రజలందరికీ శుభాకాంక్షలు’’ అని శ్రీ మోదీ పేర్కొన్నారు.

ప్రభుత్వాధినేతగా వరుసగా 25 ఏళ్లు పూర్తి చేసుకుని, సుదీర్ఘ ప్రజాసేవా ప్రస్థానంలో నిన్నటితో ఒక కీలక ఘట్టానికి చేరుకున్న శ్రీ మోదీ.. ఆ విజయాన్ని గుర్తుచేసుకుంటూ దేశ ప్రజానీకానికి మనఃపూర్వక కృతజ్ఞతలు తెలిపారు. సుదీర్ఘంగా సాగిన ఈ ప్రజాసేవా ప్రయాణంలో తనకు అండగా నిలిచిన ప్రతి పౌరుడికి, అంతర్జాతీయ మిత్రులకు ఆయన హృదయపూర్వక ధన్యవాదాలు తెలిపారు. ‘‘నాకు శుభాకాంక్షలు తెలిపిన ప్రతీ దేశవాసికి, ప్రపంచవ్యాప్తంగా ఉన్న భారతదేశ మితృతందరికీ కృతజ్ఞతలు’’ అని శ్రీ మోదీ అన్నారు.

తన ప్రజాసేవా ప్రస్థానానికి, ఇండియన్ మొబైల్ కాంగ్రెస్ పదేళ్ల ప్రయాణానికి నడుమ పోలికను ప్రధానమంత్రి ఈ సందర్భంగా ప్రస్తావించారు. ఇండియా మొబైల్ కాంగ్రెస్ పదో వార్షికోత్సవం జరుగుతున్న సమయంలోనే.. అంతర్జాతీయ ప్రాధాన్యమున్న జీఎస్ఎమ్‌ఏ బోర్డు సమావేశానికి కూడా భారత్ వేదిక కావడం విశేషమన్నారు. ఈ సదస్సుకు విచ్చేసిన ప్రపంచ టెలికాం సంస్థలు, పారిశ్రామిక ప్రముఖులు, విద్యావేత్తలు, అంకుర సంస్థల ప్రతినిధులందరికీ హృదయపూర్వక స్వాగతం పలికారు.

ఈ ఉదయాన్నే ప్రముఖ నటుడు నానా పటేకర్ మరణించారన్న విషాద వార్తను బాధాతప్త హృదయంతో ప్రకటిస్తూ.. ప్రధానమంత్రి తీవ్ర విచారం వ్యక్తం చేశారు. వెండితెరపై భిన్నమైన పాత్రలకు జీవం పోస్తూ ఎప్పటికప్పుడు ప్రేక్షకుల హృదయాలను గెలుచుకున్న అద్భుత కళాకారుడిగా ఆయనను కొనియాడారు. ‘‘విభిన్న పాత్రల ద్వారా ప్రేక్షకుల ఆదరణ పొందిన గొప్ప నటుడు ఆయన’’ అని శ్రీ మోదీ అన్నారు.

దివంగత నానాపటేకర్ అచంచలమైన జాతీయతా స్ఫూర్తిని ప్రధానమంత్రి కొనియాడారు. నానా పటేకర్ స్వతంత్ర భావాలు కలిగిన వ్యక్తి అన్న శ్రీ మోదీ.. త్రివర్ణ పతాక గౌరవ ప్రతిష్ఠలను నిలపడానికి ఆయన జీవితాన్ని అంకితం చేశారన్నారు. పదునైన సంభాషణలు, శక్తిమంతమైన మౌనంతో సామాజిక రుగ్మతలపై, దేశవ్యతిరేక శక్తులపై నిరంతరం తిరుగుబాటు చేసిన చలనచిత్ర విప్లవకారుడిగా ప్రధానమంత్రి ఆయనను వ్యాఖ్యానించారు. ‘‘నానా పటేకర్‌కు నా నివాళి. ఆయన కుటుంబ సభ్యులకు, అభిమానులకు నా ప్రగాఢ సానుభూతి’’ అని శ్రీ మోదీ అన్నారు.

డిజిటల్ అనుసంధానంలో సాధించిన అద్భుత పురోగతిని ఇండియా మొబైల్ కాంగ్రెస్ వేదికగా ప్రధానమంత్రి గుర్తుచేసుకున్నారు. ఇదే వేదికపై నుంచి 2022లో 5జీ సేవలను ప్రారంభించామని, 2023 నాటికి అది విస్తరిస్తుందని నాడే అంచనా వేశామని తెలిపారు. ప్రస్తుతం 5.5 లక్షలకు పైగా బేస్ స్టేషన్ల ద్వారా 5జీ నెట్‌వర్క్ సేవలు దేశంలోని ప్రతి జిల్లాకూ విస్తరించాయని, ఇంటర్నెట్ వేగం పదిరెట్లు పెరిగిందని ఆయన సగర్వంగా ప్రకటించారు. ‘‘నేడు దేశంలోని ప్రతి జిల్లాకూ 5జీ సేవలు చేరుకోవడాన్ని మనం చూస్తున్నాం’’ అని శ్రీ మోదీ వ్యాఖ్యానించారు.

ఇండియా మొబైల్ కాంగ్రెస్ అంతర్జాతీయంగా సంతరించుకుంటున్న ప్రాధాన్యాన్ని ప్రధానమంత్రి ఈ సందర్భంగా గుర్తుచేశారు. గతంలో ఈ సదస్సు స్వదేశీ సాంకేతిక ఆవిష్కరణలు, తయారీ ర రంగాలపై దృష్టి సారించగా.. 2024 ఎడిషన్‌లో ‘అంతర్జాతీయ టెలికమ్యూనికేషన్ యూనియన్’కు వేదికగా నిలిచి అంతర్జాతీయ ప్రమాణాలపై చర్చించిందని వివరించారు. టెలికాం రంగంలో భారత్ సాధిస్తున్న అపార పురోగతికి, ఉన్నతమైన దేశ స్వప్నాలను సాకారం చేయడానికి ఐఎంసీ కీలక ఉత్ప్రేరకంగా నిలిచిందని కొనియాడారు. ‘‘గత కొన్నేళ్లుగా ఈ వేదిక దేశ ప్రగతికి, దేశ ఆకాంక్షలకు ప్రతిరూపంగా అవతరించింది’’ అని శ్రీ మోదీ వ్యాఖ్యానించారు.

సదస్సు ప్రధాన ఇతివృత్తం దాని ఔన్నత్యాన్ని చాటేలా ఉందన్నారు. ఎల్లలు లేని విస్తరణకు నిదర్శనంగా భారతదేశ విప్లవాత్మక ప్రయాణాన్ని చూడాలని ప్రతినిధులకు పిలుపునిచ్చారు. ఎల్లల్లేని అభివృద్ధి అనే ఈ స్వప్నాన్ని భారత్ ఏ విధంగా ఆచరణలో పెట్టి చూపిందో తప్పక వివరిస్తానన్నారు. ‘‘ఎల్లలు లేని విస్తరణ స్వప్నాన్ని మేమెలా సాకారం చేసుకున్నామో, ఆచరణలో ఎలా చూపామో భారతదేశ అనుభవాల ద్వారా మీకు వివరించాలనుకుంటున్నాను’’ అని శ్రీ మోదీ చెప్పారు.

అనుసంధానంతో ముఖ్య ప్రయోజనాలను పునర్నిర్దేశిస్తూ... అంతర్జాతీయ టెలికాం చర్చలన్నీ స్పెక్ట్రమ్, టవర్లు, నెట్‌వర్క్ వేగం చుట్టూనే తిరుగుతుంటే - దేశంలో మాత్రం మొబైల్ ఫోన్ వీటన్నింటినీ మించి అత్యంత కీలకమైన సాధనంగా మారిందన్నారు. ‘‘గడిచిన 10-12 ఏళ్లలో మొబైల్ ఫోన్ ఒక కీలకమైన సుపరిపాలనకు సాధనంగా మారింది. డిజిటల్ ఇండియా దార్శనికతకు ఇది కేంద్రబిందువుగా నిలిచింది’’ అని శ్రీ మోదీ స్పష్టం చేశారు.

టెలికాం రంగంలో వచ్చిన అపార పురోగతికి ప్రాథమిక కారణాలను ప్రధాని ఈ సందర్భంగా వివరించారు. దేశంలో తక్కువ వ్యయంతో లభ్యమవుతున్న డేటా, అందుబాటు ధరల్లో స్మార్ట్‌ఫోన్లు, భారీ సంఖ్యలో వినియోగదారుల సంఖ్యను చూసి ప్రపంచం ఆశ్చర్యపోతోందని పేర్కొంటూ... ఈ విజయాల వెనుక ఉన్న అసలైన లక్ష్యాన్ని, నిర్వహణ శైలిని అర్థం చేసుకోవాలని శ్రోతలను కోరారు. ఈ అంతర్లీన ఉద్దేశాన్ని గ్రహించినప్పుడే.. దేశాన్ని ముందుకు నడుపుతున్న ఆశయమేమిటో స్పష్టమవుతుందని ఆయన వివరించారు. ‘‘దీన్ని మనం అర్థం చేసుకుంటే, భారత్ ఏ రంగంపై ప్రత్యేకంగా దృష్టి సారించిందో అందరికీ స్పష్టంగా బోధపడుతుంది’’ అని శ్రీ మోదీ వ్యాఖ్యానించారు.

డిజిటల్ అసమానతలపై చేపట్టిన తీవ్ర నిరంతర పోరాటాన్ని ప్రధానమంత్రి వివరంగా ప్రస్తావించారు. దశాబ్ద కాలం కిందట ఆధునిక సాంకేతికత.. కొద్ది వర్గాలకు మాత్రమే పరిమితమైన ప్రత్యేక హక్కుగా మారుతూ వచ్చిన సందర్భాన్ని గుర్తుచేశారు. డిజిటల్ ఇండియా ఉద్యమం ద్వారా సాంకేతికతను ప్రజలందరికీ అందుబాటులోకి తెచ్చేందుకు మొబైల్ ఫోన్‌ను కేంద్రబిందువుగా నిలిపామని ప్రధానమంత్రి వివరించారు. దీనికోసం టెలికాం రంగంలో సమగ్ర సంస్కరణలు అమలు చేయడంతోపాటు.. మౌలిక సదుపాయాలను భారీగా విస్తరించి, దేశంలోనే మొబైల్ ఫోన్లు తయారయ్యేలా చర్యలు తీసుకున్నామని తెలిపారు. ‘‘సాంకేతికతను ప్రజలందరికీ అందుబాటులోకి తెచ్చే దిశగా ఇదొక భారీ ముందడుగు’’ అని శ్రీ మోదీ స్పష్టం చేశారు.

సాంకేతిక పరిజ్ఞానం అందరికీ అందుబాటులోకి రావడంతో పెంపొందిన సౌలభ్యాన్ని ప్రధానమంత్రి ప్రధానంగా ప్రస్తావించారు. మొబైల్ ఫోన్లు, డేటా విస్తృతంగా అందుబాటులోకి రావడం వల్ల సామాన్య ప్రజల జీవన విధానం గణనీయంగా మెరుగుపడిందని తెలిపారు. ప్రపంచవ్యాప్తంగా లాక్‌డౌన్‌లు విధించిన సమయంలోనూ కార్యాలయాలు, బ్యాంకులు, పాఠశాలలు అంతరాయం లేకుండా కార్యకలాపాలు సాగించడానికి ఇవే దోహదపడ్డాయని గుర్తుచేశారు. మారుమూల గ్రామాల్లోని నిరుపేద పిల్లలు సైతం నాణ్యమైన డిజిటల్ విద్యను సులభంగా పొందగలుగుతుండడంపై ఆయన సంతోషం వ్యక్తం చేశారు. ‘‘డిజిటల్ విద్య నేడు ప్రతి ఒక్కరికీ అందుబాటులోకి వస్తోంది’’ అని శ్రీ మోదీ పేర్కొన్నారు.

విద్యారంగంలో వచ్చిన ఈ విప్లవాత్మక మార్పును నిదర్శనంగా జాతీయ స్థాయి ‘దీక్ష’ ఆన్‌లైన్ పోర్టల్ గణాంకాలను ప్రధానమంత్రి వెల్లడించారు. కోవిడ్ విపత్తు ఉధృతంగా ఉన్న సమయంలో.. 2022 జూలై నాటికి 5 బిలియన్ల అభ్యసన సెషన్లు, 60 బిలియన్ల అభ్యసన నిమిషాలు ఈ వేదికలో నమోదయ్యాయని ఆయన తెలిపారు. ‘‘డిజిటల్, ఆన్‌లైన్ విద్యా మాధ్యమాల ద్వారా దాదాపు 25 కోట్ల మంది విద్యార్థులను అనుసంధానించడం మా ప్రస్తుత లక్ష్యం’’ అని శ్రీ మోదీ స్పష్టం చేశారు.

విభిన్న నైసర్గిక, సామాజిక పరిస్థితులు కలిగిన దేశాన్ని సాంకేతికత ఏ విధంగా ఏకం చేసిందో ప్రధానమంత్రి వివరించారు. గతంలో దైనందిన జీవితానికి అవరోధంగా నిలిచిన భౌగోళిక, భాషాపరమైన అడ్డంకులను మొబైల్ అనుసంధానం క్రమబద్ధంగా తొలగించిందని పేర్కొన్నారు. డిజిటల్ విప్లవానికి ముందు ప్రాథమిక బ్యాంకింగ్, వైద్యం, ప్రభుత్వ సేవల కోసం గ్రామీణ ప్రజలు పట్టణాలకు ప్రయాణిస్తూ విలువైన సమయాన్ని, ధనాన్ని వృథా చేసుకోవాల్సి వచ్చేదని ఆయన గుర్తుచేశారు. ‘‘మొబైల్ అనుసంధానం ఈ వైవిధ్యాన్ని సౌలభ్యంతో జత చేసింది’’ అని శ్రీ మోదీ వ్యాఖ్యానించారు.

డిజిటల్ పాలన ద్వారా సాధించిన ఉన్నతమైన ఆర్థిక పారదర్శకతను ప్రధానమంత్రి సగర్వంగా వివరించారు. మొబైల్ ప్లాట్‌ఫామ్‌ల ద్వారా రూ. 50 లక్షల కోట్లకు పైగా సొమ్మును నేరుగా లబ్ధిదారుల ఖాతాల్లోకి బదిలీ చేశామని, దీనివల్ల రూ. 5 లక్షల కోట్ల ప్రజాధనం అవినీతిపరుల చేతుల్లోకి వెళ్లకుండా అడ్డుకోగలిగామని తెలిపారు. గతంలో ప్రభుత్వ ఫలాలు అందని నిరుపేద, చిన్నకారు రైతులకు ‘పీఎం కిసాన్ సమ్మాన్ నిధి’ ద్వారా రూ. 4 లక్షల కోట్లకు పైగా నిధులను నేరుగా లబ్ధిదారుల ఖాతాల్లో జమ చేసిన విషయాన్ని ఆయన ప్రత్యేకంగా ప్రస్తావించారు. ‘‘ఇప్పుడు ఆ నిధులన్నీ ఎలాంటి మధ్యవర్తులు లేకుండా నేరుగా లబ్ధిదారుడికి చేరుతున్నాయి’’ అని శ్రీ మోదీ స్పష్టం చేశారు.

మొబైల్ ఫోన్‌లు మాటలకే పరిమితం కాకుండా.. ప్రయాణ భారాన్ని, వేచి ఉండే సమయాన్ని, ఖర్చులను తగ్గించి, సౌలభ్యాన్ని మరింత విస్తృతపరిచాయని సాంకేతిక సాధికారత వెనుక ఉన్న పరమార్థాన్ని ప్రధానమంత్రి వివరించారు. ఈ సమగ్ర పరివర్తనను సామాన్యుడికి సాంకేతికత అందించిన మహోన్నత ఫలితంగా ఆయన అభివర్ణించారు. ‘‘సాంకేతికత ద్వారా ప్రజలకు లభించిన అతిపెద్ద ఫలితమిది’’ అని శ్రీ మోదీ పేర్కొన్నారు.

బలమైన మౌలిక సదుపాయాల కల్పన వల్ల ఆర్థిక వ్యవస్థలో ఊపందుకున్న వరుస మార్పులను ప్రధానమంత్రి వివరించారు. మారుమూల ప్రాంతాల్లోనూ సెల్ టవర్ల ఏర్పాటు, విస్తృతమైన ఆప్టికల్ ఫైబర్ నెట్‌వర్క్, చవక ధరల్లో డేటా లభ్యత... ఇవన్నీ ఆర్థిక రంగంలో సరికొత్త రంగాలకు జీవం పోశాయన్నారు. ఈ ప్రాథమిక మౌలిక వసతుల విస్తరణ ద్వారా సాంకేతికత, వినోదం, విద్యా రంగాల్లో పెద్ద సంఖ్యలో సరికొత్త వినియోగదారుల, సృజనకారులు వచ్చారని పేర్కొన్నారు. ‘‘ఇది ఆర్థిక వ్యవస్థలో సరికొత్త రంగాలను కూడా సృష్టించింది’’ అని శ్రీ మోదీ వ్యాఖ్యానించారు.

ఇంటరాక్టివ్ ఎంటర్‌టైన్‌మెంట్ రంగంలో నమోదైన అద్భుతమైన వృద్ధిని ప్రధానమంత్రి ప్రత్యేకంగా ప్రస్తావించారు. దేశంలో 50 కోట్లకు పైగా ప్రజలు, ముఖ్యంగా ద్వితీయ, తృతీయ శ్రేణి నగరాల్లోని యువత గేమింగ్ వ్యవస్థలో చురుగ్గా పాలుపంచుకుంటున్నారని ఆయన వెల్లడించారు. ఈ డిజిటల్ యవనికపై ఎదిగిన యువత... కేవలం ఆటగాళ్లుగానే కాకుండా, ఇ-స్పోర్ట్స్ అథ్లెట్లుగా, కంటెంట్ సృజనకారులుగా, ఔత్సాహిక వ్యాపారవేత్తలుగా కూడా ఎదగడాన్ని అభినందించారు. ‘‘అంటే, నేడు దేశంలో మొబైల్ ఫోన్ ఒక గేమింగ్ కన్సోల్‌గానే కాకుండా, సృజనాత్మక స్టూడియోగానూ నిలిచింది’’ అని శ్రీ మోదీ వ్యాఖ్యానించారు.

సృజనాధార ఆర్థిక వ్యవస్థ సామాన్యుడికి సైతం అందుబాటులోకి రావడాన్ని ప్రశంసిస్తూ... వేగవంతమైన అనుసంధానం, చవకైన డేటా వల్ల వీడియా-షేరింగ్ ప్లాట్‌ఫాంలు, ప్రాంతీయ ఓటీటీ సేవలు గ్రామీణ ప్రాంతాలకు సైతం విస్తరించి, గతంలో ఉన్న భాషా పరిమితులను బద్దలుకొట్టాయని ప్రధానమంత్రి వివరించారు. కంటెంట్ సృజన పరిశ్రమ నేడు వేల కోట్ల రూపాయల విలువైన రంగంగా మారి.. లక్షలాది మందికి లాభదాయకమైన ఉపాధిని అందిస్తోందని వెల్లడించారు. ‘‘అంటే, దేశంలో కంటెంట్ సృజనను కూడా మొబైల్ ఫోన్ ప్రజాస్వామ్యీకరించింది’’ అని శ్రీ మోదీ పేర్కొన్నారు.

సైబర్ భద్రత అత్యవసర ప్రాధాన్యాన్ని ప్రస్తావిస్తూ... టెలికాం, డిజిటల్ సాంకేతికతలు నిత్య జీవితంలో అంతర్భాగంగా మారిన తరుణంలో ఫోన్లు, నెట్‌వర్కుల భద్రతా వ్యవస్థను మరింత పటిష్టం చేయడం అత్యున్నత జాతీయ ప్రాధాన్యతా అంశమని ప్రధానమంత్రి స్పష్టం చేశారు. సగటు పౌరుడికి క్లిష్టమైన సాంకేతిక ప్రోటోకాల్స్ కన్నా.. తన డేటా భద్రతపై ఉండే ప్రాథమిక నమ్మకమే అత్యంత ముఖ్యమైనదని ఆయన స్పష్టం చేశారు. ‘‘తనవరకూ.. నమ్మకమే అతి ముఖ్యమైన అంశం’’ అని శ్రీ మోదీ వ్యాఖ్యానించారు.

డిజిటల్ విశ్వసనీయతకు సంబంధించిన వినియోగదారుల సూక్ష్మ అంచనాలను ప్రధానమంత్రి వివరించారు. కాలర్ల నిజమైన గురింపు ఏమిటో పౌరులకు కచ్చితంగా తెలియాలని, సందేశాల ప్రామాణికతను నిర్ధారించుకోగలగాలని, డిజిటల్ చెల్లింపులు లేదా వ్యక్తిగత డేటాను పంచుకునే సమయంలో వారు పూర్తి సురక్షిత భావనతో ఉండాలని స్పష్టం చేశారు. డిజిటల్ విస్తరణకు వినియోగదారుల విశ్వసనీయతే అసలైన పునాది అని ఆయన స్పష్టం చేశారు. ‘‘పౌరుడు తన డేటాను ఏ రూపంలో అందించినా.. అది సురక్షితంగా ఉందన్న సంపూర్ణ నమ్మకం అతడికి కలగాలి’’ అని శ్రీ మోదీ తేల్చిచెప్పారు.

దేశాల సరిహద్దులకు అతీతంగా పొంచి ఉన్న డిజిటల్ ముప్పులను ఎదుర్కొనేందుకు అంతర్జాతీయ సమాజం సమష్టిగా చర్యలు తీసుకోవాలని ప్రధానమంత్రి పిలుపునిచ్చారు. సైబర్ మోసాలు, డీప్‌ఫేక్‌లు అంతర్జాతీయ భద్రతా లోపాలను ఆసరాగా చేసుకుంటున్నాయని హెచ్చరిస్తూ... ప్రభుత్వాలు, సాంకేతిక సంస్థలు, నెట్‌వర్క్ ఆపరేటర్లు, ఆర్థిక సంస్థలను ఏకం చేసే ఒక సమగ్ర అంతర్జాతీయ కార్యాచరణ చట్రం అత్యవసరమని స్పష్టం చేశారు. వినియోగదారుడు సైబర్ మోసాల బారిన పడకుండా.. ముందస్తుగానే ఆ అక్రమాలను అడ్డుకోగల క్రియాశీలక వ్యవస్థలను రూపొందించాలని జీఎస్‌ఎమ్‌ఏకు పిలుపునిచ్చారు. ‘‘తన అనుభవాలను ప్రపంచంతో పంచుకోవడానికి భారత్ ఎప్పుడూ సిద్ధమే’’ అని శ్రీ మోదీ స్పష్టం చేశారు.

వ్యూహాత్మక భవిష్యత్తుపై దృష్టి సారిస్తూ.. ఈ దశాబ్దంలో మరో నాలుగు సంవత్సరాలు మాత్రమే మిగిలి ఉన్నాయని సదస్సు ప్రతినిధులకు ప్రధానమంత్రి గుర్తుచేశారు. ఈ సదస్సు వేదికగా జరిగే తక్షణ చర్చలే అంతర్జాతీయ మొబైల్ మార్కెట్‌ను భవిష్యత్తు దిశగా నడిపించే కీలక ప్రణాళికను రూపొందిస్తాయని పేర్కొన్నారు. రాబోయే సాంకేతిక యుగంలో ఆధిపత్యానికి అవసరమైన కీలకమైన ప్రణాళికా పునాదిగా ఈ సదస్సును ఆయన అభివర్ణించారు. ‘‘ఈ ప్రణాళిక భారత్‌తోపాటు ప్రపంచవ్యాప్త మొబైల్ మార్కెట్‌కు దిశానిర్దేశం చేస్తుంది’’ అని శ్రీ మోదీ వ్యాఖ్యానించారు.

సాంకేతిక స్వావలంబన దిశగా దేశం సాధించాల్సిన తుది లక్ష్యాన్ని స్పష్టం చేస్తూ... భారత్ ఒక వినియోగదారు స్థాయి నుంచి సృజించగలిగే విజయవంతంగా ఎదిగిందని ప్రధానమంత్రి ప్రకటించారు. ఉత్పత్తుల రూపకల్పన, వాటి ప్రాథమిక సాంకేతికత, మేధో సంపత్తిపై పూర్తి స్వదేశీ నియంత్రణ సాధించే దిశగా భారత్ నేడు వేగంగా అడుగులు వేస్తోందన్నారు. ఈ దిశగా పరిశ్రమలకు పూర్తి మద్దతు ఇస్తూ.. దశాబ్దాల నాటి చట్టాలను ప్రభుత్వం వేగంగా ఆధునికీకరిస్తోందని, సమగ్ర ప్రోత్సాహకాలను అందిస్తోందని చెప్పారు. ఈ ప్రక్రియను విజయవంతం చేసేందుకు 'టెలికమ్యూనికేషన్స్ చట్టం', 'గతిశక్తి పోర్టల్' వంటి విప్లవాత్మక నిబంధనలను, సంస్కరణలను అమలు చేస్తున్నట్లు వివరించారు. ‘‘అంటే, టెలికాం రంగంలో కూడా సంస్కరణల పరంపర అత్యంత వేగంగా ముందుకు సాగుతోంది’’ అని శ్రీ మోదీ స్పష్టం చేశారు.

కీలకమైన హార్డ్‌వేర్ దేశీయీకరణపై తాజా సమాచారాన్ని అందిస్తూ... దేశీయ సెమీకండక్టర్ తయారీ వ్యవస్థ వేగంగా విస్తరిస్తోందని, ఇప్పటికే ఐదు ప్రాంతాల్లో వాణిజ్య ప్రాతిపదికన ఉత్పత్తి ప్రారంభమైందని ప్రధానమంత్రి ప్రకటించారు. ‘ఇండియా సెమీకండక్టర్ మిషన్’ తదుపరి దశలో మొత్తం సరఫరా వ్యవస్థను సంపూర్ణంగా దేశీయీకరించడమే లక్ష్యంగా కృషి చేయనున్నట్లు ఆయన వివరించారు. ‘‘అంటే, టెలికాం రంగానికి సంబంధించిన ప్రతి విభాగంలోనూ భారత్ వేగంగా ముందడుగు వేస్తోంది’’ అని శ్రీ మోదీ పేర్కొన్నారు.

ఇండియా మొబైల్ కాంగ్రెస్ సాంకేతిక ప్రదర్శనలకే పరిమితం కాకుండా.. వికసిత భారత బృహత్తర సంకల్పానికి ఊతమిచ్చే మానవతా ఆధారిత ఆవిష్కరణలు, పరిశోధనలు, భాగస్వామ్యాలకు వేదికగా నిలవాలని ప్రధానమంత్రి పిలుపునిచ్చారు. పరిశ్రమలకు, సరికొత్త ఆలోచనలకు అత్యున్నత కేంద్రంగా ఈ వేదికను నిలిపేందుకు ప్రతినిధులు నిరంతరం కృషి చేస్తారని ఆశాభావం వ్యక్తం చేశారు. ‘‘మీరంతా దీనికోసం మనస్ఫూర్తిగా ప్రయత్నిస్తారన్న నమ్మకం నాకుంది. ఈ ఆకాంక్షతో మరోసారి మీ అందరికీ హృదయపూర్వక శుభాకాంక్షలు’’ అంటూ శ్రీ మోదీ తన ప్రసంగాన్ని ముగించారు.  

****