ہنرمندی کے فروغ اور صنعت کاری کی وزارت نے خواتین و اطفال کی ترقی کی وزارت کے اشتراک سے آج نئی دہلی کے کوشل بھون میں ایک روزہ تعارفی اجلاس منعقد کیا۔ یہ اجلاس نوجوان خواتین اور نوعمر لڑکیوں کو پیشہ ورانہ تربیت کے ذریعے بااختیار بنانے کے اقدام ’’ناویہ 2.0‘‘ (ناویہ 2.0) کے باضابطہ آغاز اور نفاذ کی تیاری کے سلسلے میں ایک اہم قدم تھا۔ اس اجلاس کا مقصد 24 ریاستوں اور مرکز کے زیر انتظام علاقوں کے 100 امنگوں والے اضلاع میں اس اقدام کے مؤثر نفاذ کے لیے ضلعی سطح کے متعلقہ فریقوں کو تیار کرنا تھا۔

تعارفی اجلاس کی صدارت ہنرمندی کے فروغ اور صنعت کاری کی وزارت کی سکریٹری محترمہ دیباشری مکھرجی اور خواتین و اطفال کی ترقی کی وزارت کے سکریٹری جناب انیل ملک نے کی۔ اس اجلاس میں ناویہ 2.0 کے لیے معیاری عملی طریقۂ کار (ایس او پی) بھی جاری کیا گیا، جو ضلعی سطح پر اس اقدام کے مربوط نفاذ کے لیے ایک منظم لائحۂ عمل فراہم کرتا ہے۔

اس تعارفی اجلاس میں حصہ لینے والے اضلاع کے کلکٹروں/ضلع مجسٹریٹوں، ہنرمندی کے فروغ اور صنعت کاری کے علاقائی ڈائریکٹوریٹس (آر ڈی ایس ڈی ایز) کے علاقائی ڈائریکٹروں، صنعتی تربیتی اداروں (آئی ٹی آئیز) کے پرنسپلوں، اطفال کی ترقی کے منصوبے کے افسران (سی ڈی پی اوز) اور دیگر اہم متعلقہ فریقوں نے شرکت کی۔ اس اجلاس کا مقصد ان کی صلاحیتوں کو فروغ دینا اور ناویہ 2.0 کے آغاز اور اس کے بعد نفاذ سے قبل ضروری ادارہ جاتی، ڈیجیٹل اور زمینی سطح کے انتظامات کو یقینی بنانا تھا۔

ناویہ 2.0 کا آغاز ناویہ کے آزمائشی منصوبے کے تجربات اور اس سے حاصل ہونے والے اسباق کی بنیاد پر کیا جا رہا ہے۔ اس آزمائشی منصوبے کا آغاز 24 جون 2025 کو اتر پردیش کے سون بھدر سے ہنرمندی کے فروغ اور صنعت کاری کی وزارت کے وزیر مملکت (آزادانہ چارج) اور وزارتِ تعلیم کے وزیر مملکت جناب جینت چودھری اور خواتین و اطفال کی ترقی کی وزارت کی وزیر مملکت محترمہ ساوتری ٹھاکر نے کیا تھا۔ اس پائلٹ منصوبے کو 19 ریاستوں اور مرکز کے زیر انتظام علاقوں کے 27 اضلاع میں نافذ کیا گیا تھا۔

پائلٹ  مرحلے سے حاصل ہونے والے تجربات اور اسباق کی بنیاد پر ناویہ 2.0 کا دائرہ وسیع کرتے ہوئے اسے 24 ریاستوں اور مرکز کے زیر انتظام علاقوں کے 100 امنگوں والے اضلاع تک پھیلا دیا گیا ہے۔ اس اقدام کا مقصد 16 سے 25 سال کی عمر کی نوجوان خواتین اور نوعمر لڑکیوں کو متعلقہ پیشہ ورانہ تربیت فراہم کرنا اور ان کے لیے صنعت کاری، شاگردی کی تربیت اور پائیدار روزگار کے مواقع تک رسائی کی راہیں ہموار کرنا ہے۔

اس موقع پر ہنرمندی کے فروغ اور صنعت کاری کی وزارت کی سکریٹری محترمہ دیباشری مکھرجی نے کہا کہ ’’ناویہ 2.0 بنیادی طور پر مختلف اداروں اور محکموں کے درمیان تال میل پر مبنی ایک پروگرام ہے اور اس کی کامیابی کا انحصار مقامی سطح پر اس تال میل کی مضبوطی پر ہوگا۔ ہنرمندی کے فروغ کے اقدامات کو اضلاع اور آس پاس کے علاقوں میں دستیاب مواقع کے ساتھ قریبی طور پر ہم آہنگ ہونا چاہیے۔ ہمارا مقصد ایک جامع نقطۂ نظر اختیار کرنا ہونا چاہیے، جو صرف ہنرمندی تک محدود نہ رہے، بلکہ خواتین کی وسیع تر امنگوں اور ضروریات کو بھی پورا کرے، تاکہ وہ باوقار، پائیدار اور انہیں بااختیار بنانے والے معاشی مواقع سے فائدہ اٹھا سکیں۔‘‘

خواتین و اطفال کی ترقی کی وزارت کے سکریٹری جناب انیل ملک نے کہا کہ ’’ناویہ 2.0 محض ہنرمندی کے فروغ کا ایک پروگرام نہیں ہے، بلکہ یہ نوجوان خواتین اور نوعمر لڑکیوں کے لیے خود اختیاری، خود انحصاری اور معاشی بااختیاری کی جانب بڑھنے کا ایک راستہ ہے۔ ہنرمندی کو روزگار کے بامعنی مواقع سے جوڑ کر یہ اقدام افرادی قوت میں خواتین کی شمولیت بڑھانے اور اس بات کو یقینی بنانے کی صلاحیت رکھتا ہے کہ وہ ہندوستان کی ترقی کے سفر میں برابر کی شراکت دار بنیں۔‘‘

تعارفی اجلاس میں تمام متعلقہ فریقوں کے کردار اور ذمہ داریوں، اسکل انڈیا ڈیجیٹل ہب (ایس آئی ڈی ایچ)، قومی شاگردی فروغ اسکیم (این اے پی ایس) اور صنعت کاری سے متعلق بیداری اور مواقع پر خصوصی اجلاس منعقد کیے گئے۔ قومی ادارہ برائے صنعت کاری اور چھوٹے کاروبار کی ترقی (این آئی ای ایس بی یو ڈی) کی جانب سے صنعت کاری کے موضوع پر بھی ایک خصوصی اجلاس منعقد کیا گیا۔

ان اجلاسوں میں ناویہ 2.0 کی نظرثانی شدہ دفعات، ڈیجیٹل طریقۂ کار، ادارہ جاتی رول اور ذمہ داریوں، ایپرنٹس شپ کے مواقع، صنعت کاری کے راستوں اور ضلعی سطح پر مؤثر نفاذ کے لیے درکار دیگر اہم پہلوؤں سے متعلق متعلقہ فریقوں کو واقف کرانے پر توجہ دی گئی۔ اس تعارفی اجلاس کے ذریعے متعلقہ فریقوں کو عملی لائحۂ عمل کو سمجھنے اور ناویہ 2.0 کے آغاز سے قبل ضلعی اور بنیادی سطح پر مربوط کارروائی کے لیے تیاری کا موقع بھی فراہم کیا گیا۔

تعارفی اجلاس ناویہ 2.0 کے باضابطہ آغاز اور ملک گیر نفاذ کی تیاریوں کے سلسلے میں ایک اہم سنگِ میل ہے۔ یہ اقدام ہنرمندی کے فروغ اور صنعت کاری کی وزارت اور خواتین و اطفال کی ترقی کی وزارت کے اس مشترکہ عزم کی توثیق کرتا ہے کہ دونوں وزارتوں کے درمیان تال میل کو مضبوط بنایا جائے اور مؤثر، مربوط اور مقامی ضروریات کے مطابق نفاذ کو یقینی بنایا جائے۔ ضلعی انتظامیہ، ہنرمندی کی تربیت فراہم کرنے والے اداروں اور خواتین و اطفال کی ترقی سے وابستہ عہدیداروں کے باہمی اشتراک کے ذریعے ناویہ 2.0 کا مقصد نوجوان خواتین اور نوعمر لڑکیوں کے لیے ہنرمندی کو پائیدار روزگار کے مواقع، خود اختیاری اور معاشی بااختیاری میں تبدیل کرنا ہے۔

***

ش ح۔ض ر ۔ م الف

U. No- 490

(ریلیز آئی ڈی: 2321390) وزیٹر کاؤنٹر : 7