தமிழ்நாடு ஆளுநர் திரு ராஜேந்திர அர்லேகர் அவர்களே, முதலமைச்சர் திரு சி. ஜோசப் விஜய் அவர்களே, மத்திய இணையமைச்சர் திரு எல். முருகன் அவர்களே, திரு நயினார் நாகேந்திரன் அவர்களே, என் தமிழ் சகோதர சகோதரிகளே, வணக்கம்.

உங்கள் அனைவருடனும் சென்னையில் இருப்பது எனக்கு மகிழ்ச்சி அளிக்கிறது. இது தமிழ்நாட்டிற்கு ஒரு வரலாற்றுச் சிறப்புமிக்க நாள். இன்றைய நிகழ்ச்சியில் 13 ஆயிரம் கோடி ரூபாய் மதிப்பிலான திட்டங்கள் இடம்பெற்றுள்ளன. நிறைவடைந்த பல திட்டங்களைத் தொடங்கி வைப்பதோடு, புதிய திட்டங்களுக்கும் அடிக்கல் நாட்டுகிறோம். சில திட்டங்கள் தினசரிப் பயணத்தை எளிதாக்கும். மற்றவை, தொழில், வர்த்தகத்தை வலுப்படுத்தும். இவை அனைத்தும் ஒன்றிணைந்து, தமிழ்நாடு முழுவதும் உள்ள இளைஞர்களுக்கு வேலைவாய்ப்புகளை உருவாக்கும். இந்த நல்வாய்ப்பில் மாநில மக்களுக்கு எனது வாழ்த்துகளைத் தெரிவித்துக் கொள்கிறேன்.

   

இன்று நவராத்திரி எனும் புனிதப் பண்டிகை தொடங்குகிறது. சிவனும் சக்தியும் போற்றப்படும் புனித பூமியான தமிழ்நாட்டில், இந்த நவராத்திரி நன்னாளில், இந்த நிகழ்ச்சிக்கு வருவதற்கு முன்பு ஜலகண்டேஸ்வரர் கோவிலில் சிவபெருமானின் ஆசிகளைப் பெறும் நற்பேறும் எனக்குக் கிடைத்தது. தமிழ்நாட்டில் உள்ள இந்த புனித யாத்திரைத் தலத்திலிருந்து, நாட்டின் அனைத்து மக்களுக்கும் எனது மனமார்ந்த நவராத்திரி வாழ்த்துகளைத் தெரிவித்துக் கொள்கிறேன்.

நண்பர்களே,

இன்று பாரத ரத்னா ஜெயபிரகாஷ் நாராயண், பாரத ரத்னா நானாஜி தேஷ்முக் ஆகியோரின் பிறந்த நாளாகும். இவ்விரு மாபெரும் ஆளுமைகளின் வாழ்க்கையும், தேச சேவைக்காக இன்னும் அதிக அர்ப்பணிப்புடன் பணியாற்ற நமக்கு உத்வேகம் அளிக்கின்றன.

நண்பர்களே,

சென்னை ஐஐடி-யில் உள்ள மூளை ஆராய்ச்சி மையத்தைப் பார்வையிடும் வாய்ப்பு எனக்குக் கிடைத்தது. இத்துறையில் நடைபெறும் ஆராய்ச்சி, பொது சுகாதாரத் துறையில் பல புதிய வாய்ப்புகளை உருவாக்கும் ஆற்றல் கொண்டது. இந்தப் பயணத்தைத் தவிர, சென்னை மெட்ரோவின் மற்றொரு வழித்தடத்தை மக்களுக்கு அர்ப்பணிக்கும் வாய்ப்பும் எனக்குக் கிடைத்தது.

நண்பர்களே,

சில நாட்களுக்கு முன்பு, உங்கள் ஆசீர்வாதங்களுடனும் நாட்டு மக்களின் அன்பினாலும், நான் அரசு தலைமைப் பொறுப்பில் 25 ஆண்டுகள் என்ற ஒரு முக்கிய மைல்கல்லைக் கடந்துள்ளேன். மாநிலங்களின் வளர்ச்சியின் மூலமே தேசத்தின் வளர்ச்சி சாத்தியமாகும் என்ற தாரக மந்திரத்தை நான் எப்போதும் பின்பற்றி வருகிறேன்.

நண்பர்களே,

முதலமைச்சராக இருந்தபோது, கலைஞர் கருணாநிதி அவர்களுடனும் அம்மா ஜெயலலிதா அவர்களுடனும் பலமுறை உரையாடும் வாய்ப்பு எனக்குக் கிடைத்தது. பிரதமரான பிறகு, ஜெயலலிதா, ஓ. பன்னீர்செல்வம், எடப்பாடி பழனிசாமி, மு.க. ஸ்டாலின் ஆகியோருடன் பணியாற்றும் வாய்ப்பும் எனக்குக் கிடைத்தது. அரசுகள் மாறின. இன்றும், அதே அர்ப்பணிப்புடன், முதலமைச்சர் ஜோசப் விஜய்-யுடன் இணைந்து தமிழ்நாட்டின் இந்த வளர்ச்சிப் பயணத்தை நாம் முன்னோக்கி எடுத்துச் செல்கிறோம்.

நண்பர்களே,

இன்று, தமிழ்நாட்டில் நகர்ப்புற மேம்பாடு எங்களின் முக்கிய முன்னுரிமைகளில் ஒன்றாகும். நகரமயமாக்கல் ஒரு சவால் அல்ல. அது ஒரு வாய்ப்பு என்று நான் எப்போதும் நம்புகிறேன். மேலும், இதில் பொதுப் போக்குவரத்து மிக முக்கியப் பங்கு வகிக்கிறது.  2014-ல், நாட்டின் ஐந்து நகரங்களில் மட்டுமே மெட்ரோ சேவைகள் இயங்கின. இன்று, நாடு முழுவதும் 25 நகரங்களில் மெட்ரோ சேவைகள் இயங்குகின்றன.

நண்பர்களே,

நமது மாநிலங்களுக்கு வலுவூட்டுவதன் மூலம் இந்தியாவை நாம் பலப்படுத்த வேண்டும். எனவே, மத்திய அரசு தமிழ்நாடு போன்ற மாநிலங்களில் உற்பத்தித் துறையை ஊக்குவித்து வருகிறது.

நண்பர்களே,

 மத்திய அரசு ஒவ்வொரு மாநிலத்திலும் முழு உற்பத்திச் சங்கிலியையும் வலுப்படுத்தி வருகிறது. இந்த முயற்சிகளின் விளைவாக, இன்று நாம் உலகின் இரண்டாவது பெரிய அலைபேசி உற்பத்தியாளராக இருக்கிறோம்.

 

நண்பர்களே,

கப்பல் போக்குவரத்துத் துறை புதிய உயரங்களை எட்டும் வகையில், நாடு முழுவதும் துறைமுக உள்கட்டமைப்பு வலுப்படுத்தப்பட்டு வருகிறது. இதிலும் தமிழ்நாட்டிற்கு மிக முக்கியப் பங்கு உண்டு.

நண்பர்களே,

நமது மீனவ சகோதரர்களுக்காக சென்னை மீன்பிடித் துறைமுகத்தை நவீனமயமாக்குவதாக இருந்தாலும் சரி, அல்லது தமிழ்நாட்டில் கடற்பாசிப் பூங்காவை மேம்படுத்துவதாக இருந்தாலும் சரி, இந்த முயற்சிகளுக்கும் மத்திய அரசு ஆதரவளித்து வருகிறது. வேளாண் கடன் அட்டைத் திட்டத்தின் மூலம், மீனவர்கள் இப்போது தங்களது செயல்பாட்டு மூலதனத்தை இன்னும் எளிதாகப் பெற முடிகிறது.

நண்பர்களே,

புதிய உயரங்களை எட்டும் ஒரு தமிழ்நாட்டை நாம் உருவாக்க விரும்புகிறோம். இதற்காக, மத்திய அரசிடமிருந்து தேவைப்படும் எந்தவொரு ஆதரவிற்கும், நாங்கள் முழு அர்ப்பணிப்புடன் உங்களுடன் துணை நிற்கிறோம். வளர்ச்சி பெற்ற தமிழ்நாட்டின் மூலம், வளர்ச்சி பெற்ற இந்தியா என்ற நமது உறுதியை நாம் அனைவரும் ஒன்றிணைந்து நனவாக்குவோம். இந்த உணர்வுடன், இந்தத் திட்டங்களுக்காக உங்கள் அனைவருக்கும் எனது மனமார்ந்த வாழ்த்துகளையும் நல்வாழ்த்துக்களையும் மீண்டும் ஒருமுறை தெரிவித்துக் கொள்கிறேன்.

நன்றி, வணக்கம்!!!

மேலும் விவரங்களுக்கு ஆங்கிலச் செய்திக் குறிப்பைக் காணவும்: https://www.pib.gov.in/PressReleaseDetail.aspx?PRID=2321939&reg=3

****

TV/PLM/RJ

(வெளியீட்டு அடையாள எண்: 2322001) வருகையாளர் எண்ணிக்கை : 34