تہواروں کے موسم سے قبل پیاز کی دستیابی کو مضبوط بنانے اور مناسب قیمتوں کو یقینی بنانے کی جانب ایک اہم قدم اٹھاتے ہوئے، محکمہ امور صارفین، قیمتوں میں استحکام کے فنڈ (پی ایس ایف) کے تحت بفر اسٹاک میں موجود پیاز کی تقسیم کو وسعت دے رہا ہے، جس کے تحت تریپورہ کے اگرتلہ کے لیے پہلی بار کاندا ایکسپریس کے ذریعے پیاز بھیجی جا رہی ہے۔ تقریباً 440 میٹرک ٹن پیاز پر مشتمل یہ کھیپ 18 اکتوبر 2026 تک اگرتلہ پہنچنے کی توقع ہے۔

یہ اقدام شمال مشرقی خطے میں حکومت کے پیاز کی تقسیم کے نیٹ ورک کو مزید وسعت دینے کی نشاندہی کرتا ہے۔ اس سے قبل کاندا ایکسپریس کے ذریعے آسام کو بفر اسٹاک سے پیاز کامیابی کے ساتھ پہنچائی گئی تھی۔ اگرتلہ کے لیے پیاز کی روانگی، رسد کی رسائی کو وسعت دینے، آخری مرحلے تک پیاز کی دستیابی کو بہتر بنانے اور ملک کے تمام خطوں میں کھپت کے مراکز تک مناسب قیمتوں پر پیاز کی بروقت فراہمی کو یقینی بنانے کے حکومت کے عزم کو تقویت دیتی ہے۔

کاندا ایکسپریس تریپورہ بھر میں پیاز کی تقسیم کو مضبوط بنائے گی

اس اقدام سے تریپورہ کے آٹھ میں سے سات اضلاع، ڈھلائی، جنوبی تریپورہ، کھوائی، اونا کوٹی، مغربی تریپورہ، گومتی اور سپاہی جالا میں بازاروں تک پیاز کی رسائی بہتر ہونے کی توقع ہے۔

اب تک پیاز سے لدے دو کاندا ایکسپریس ریل ریکس، جن میں بالترتیب 840 میٹرک ٹن اور 452 میٹرک ٹن پیاز موجود تھی، اور مجموعی طور پر 1,513.46 میٹرک ٹن پیاز لے جانے والی 44 ٹرک کھیپوں کے ذریعے شمال مشرقی خطے میں بفر اسٹاک سے پیاز فراہم کی جا چکی ہے۔ اس تقسیم کے تحت آسام، تریپورہ اور ناگالینڈ کے اہم مقامات کا احاطہ کیا گیا ہے، جن میں کامروپ، گوہاٹی، گومتی، دیماپور، سپاہی جالا، کوہیما، نیولینڈ اور چوموکیدیما شامل ہیں۔

ریل اور سڑک کے ذریعے تقسیم کے دائرۂ کار کو وسعت دینے کا مقصد بفر اسٹاک کی رسائی کو بہتر بنانا اور خطے میں پیاز کی کھپت کے اہم مراکز میں بازاروں کو اضافی رسد فراہم کرنا ہے۔

خریف کی تازہ آمد سے منڈیوں میں پیاز کی دستیابی بہتر، قیمتوں میں اعتدال

خریف کی تازہ فصل کی آمد میں تیزی آنے کے ساتھ ہی بڑی منڈیوں میں پیاز کی قیمتوں میں اعتدال آیا ہے۔ ہندوستان بھر میں  اوسط منڈی قیمت ستمبر میں تقریباً 3,600 روپے فی کوئنٹل کی بلند ترین سطح سے گھٹ کر اکتوبر میں تقریباً 3,300 روپے فی کوئنٹل رہ گئی ہے۔

پیاز کے بفر اسٹاک سے ضرورت کے مطابق پیاز کی فراہمی کے ذریعے بازاروں میں رسد میں مسلسل اضافہ کیا جا رہا ہے، دستیابی کو بہتر بنایا جا رہا ہے اور خوردہ قیمتوں میں اعتدال لانے میں مدد مل رہی ہے۔ محکمہ امور صارفین، بازار کی موجودہ صورت حال کے مطابق یہ اقدامات جاری رکھے ہوئے ہے تاکہ صارفین کو مناسب قیمتوں پر پیاز کی دستیابی میں مدد مل سکے۔

211 شہروں میں پیاز کی خوردہ قیمتوں میں کمی، علاقائی قیمتوں کا فرق کم

گزشتہ دو ہفتوں کے دوران 211 شہروں میں پیاز کی خوردہ قیمتوں میں 1 سے 13 روپے فی کلوگرام تک کی کمی درج کی گئی ہے۔ قیمتوں میں یہ اعتدال آندھرا پردیش، آسام، چندی گڑھ، چھتیس گڑھ، دادرا اور نگر حویلی اور دمن اور دیو، گوا، ہماچل پردیش، کرناٹک، کیرالہ، مہاراشٹر، منی پور، میگھالیہ، میزورم، اوڈیشہ، پنجاب، تمل ناڈو، تلنگانہ، اتر پردیش اور مغربی بنگال سمیت پیاز کی زیادہ کھپت والی بڑی ریاستوں اور مرکز کے زیر انتظام علاقوں میں دیکھا گیا ہے۔

آسام میں بھی حالیہ ہفتوں کے دوران پیاز کی خوردہ قیمتوں میں اعتدال آیا ہے، جہاں ریاست کے تقریباً 12 مراکز میں قیمتوں میں 1 سے 8 روپے فی کلوگرام تک کی کمی درج کی گئی ہے۔

گزشتہ دو برسوں کے دوران آسام میں پیاز کی اوسط خوردہ قیمت اور ہندوستان بھر میں  اوسط قیمت کے درمیان فرق نمایاں طور پر کم ہوا ہے۔ دو سال قبل آسام میں پیاز کی اوسط خوردہ قیمت 61.96 روپے فی کلوگرام تھی، جبکہ ہندوستان بھر میں اوسط قیمت 54.13 روپے فی کلوگرام تھی۔ اس طرح دونوں قیمتوں کے درمیان 7.83 روپے فی کلوگرام کا فرق تھا۔ فی الحال آسام میں پیاز کی اوسط خوردہ قیمت 54.30 روپے فی کلوگرام ہے، جبکہ ہندوستان بھر میں  اوسط قیمت 53.07 روپے فی کلوگرام ہے، جس سے یہ فرق کم ہو کر 1.23 روپے فی کلوگرام رہ گیا ہے۔

قیمتوں میں یہ ہم آہنگی علاقائی قیمتوں کے فرق میں نمایاں کمی کی نشاندہی کرتی ہے، اور اب آسام میں پیاز کی خوردہ قیمتیں مجموعی طور پر قومی اوسط قیمت کے مطابق ہیں۔

بازار کی صورت حال کے مطابق پیاز کے بفر اسٹاک سے نکاسی جاری رہے گی

حکومت ملک بھر میں پیاز کی قیمتوں، منڈیوں میں آمد اور رسد کی صورت حال پر مسلسل گہری نظر رکھے ہوئے ہے۔ قیمتوں میں استحکام کے فنڈ (پی ایس ایف) کے بفر اسٹاک سے پیاز کی نکاسی کا فیصلہ بازار کی موجودہ صورت حال، قیمتوں کے رجحانات اور دستیابی سے متعلق ضروریات کو مدنظر رکھتے ہوئے کیا جاتا ہے۔

بازار میں پیاز کی مناسب دستیابی کو یقینی بنانے اور قیمتوں میں غیر ضروری اتار چڑھاؤ کو کم کرنے میں مدد کے لیے، منظور شدہ عملی فیصلوں کے مطابق ضرورت پڑنے پر بفر اسٹاک سے پیاز کی مزید نکاسی کی جائے گی۔

***

ش ح۔ش ت ۔ م الف

U. No- 6199