محکمہ سماجی انصاف و تفویض اختیارات (ڈی او ایس جے ای)، حکومت ہند کی جانب سے یہاں قومی دارالحکومت میں واقع وزارت کے سمواد کانفرنس روم میں ریکارڈز کے انتظام و انصرام کے موضوع پر ایک لیکچر کا اہتمام کیا گیا۔ یہ پروگرام ’’صفائی ستھرائی کو ادارہ جاتی شکل دینے اور زیر التوا معاملات کو کم سے کم کرنے‘‘ کے لیے خصوصی مہم 6 کا حصہ تھا۔

 

 

انسٹی ٹیوٹ آف سیکریٹریٹ ٹریننگ اینڈ مینجمنٹ (آئی ایس ٹی ایم) کے سابق فیکلٹی ممبر جناب پی کے جیسوال نے یہ لیکچر دیا۔

وزارت کے ایک سینئر افسر نے بتایا کہ اس سیشن کا مقصد محکمہ کے افسران کو ریکارڈ کے منظم انتظام، سرکاری ریکارڈ کی مناسب دیکھ بھال اور حفاظت، فائلوں کا بروقت جائزہ لینے اور ریکارڈ کو محفوظ رکھنے نیز غیر ضروری ریکارڈ کو تلف کرنے کے لیے مقررہ طریقۂ کار پر عمل کرنے کی اہمیت سے آگاہ کرنا تھا۔

 

 

سیشن کے دوران شرکاء کو پبلک ریکارڈز ایکٹ، ریکارڈ محفوظ رکھنے کے مقررہ نظام الاوقات، ریکارڈ کی درجہ بندی اور اسے محفوظ رکھنے و تلف کرنے سے متعلق محکمہ جاتی ہدایات کی متعلقہ دفعات سے آگاہ کیا گیا۔ لیکچر میں سرکاری دستاویزات کے مؤثر انتظام کو یقینی بنانے کے لیے ریکارڈ کو منظم انداز میں مرتب کرنے اور مقررہ طریقۂ کار پر عمل درآمد کی ضرورت پر زور دیا گیا۔

 

 

افسر نے مزید بتایا کہ اس سیشن میں اس بات کو بھی اجاگر کیا گیا کہ ریکارڈ کے مؤثر انتظام سے دفتری جگہ کے بہتر استعمال، سرکاری معلومات تک آسان رسائی اور انتظامی کارکردگی میں بہتری میں مدد ملتی ہے۔ انہوں نے کہا کہ طبعی اور الیکٹرانک، دونوں طرح کے ریکارڈ کا مؤثر انتظام حکومتی امور میں شفافیت، جواب دہی اور بروقت فیصلہ سازی کو مضبوط بنانے میں اہم کردار ادا کرتا ہے۔

 

 

یہ لیکچر خصوصی مہم 6.0 کے تحت محکمہ کی جاری کوششوں کا حصہ ہے، جس کا مقصد دفتری احاطوں میں صفائی ستھرائی کو فروغ دینا، ریکارڈ رومز کو منظم بنانا، زیر التوا معاملات کو کم سے کم کرنا اور دفتر کے مؤثر انتظامی طریقوں کو ادارہ جاتی شکل دینا ہے۔

ایسی پہلوں کے ذریعے محکمہ سماجی انصاف و تفویضِ اختیارات، خصوصی مہم 6.0 کے مقاصد کے مطابق انتظامی کارکردگی کو مضبوط بنانے کے ساتھ ساتھ صاف ستھرا، منظم اور عوامی ضروریات کے تئیں جواب دہ کام کے ماحول  کوفروغ دینے کے لیے مسلسل کوشاں ہے۔

***

ش ح۔ش ت ۔ م الف

U. No- 6214

(ریلیز آئی ڈی: 2324394) وزیٹر کاؤنٹر : 15