تجارت، سرمایہ کاری اور ٹیکنالوجی کے شعبوں میں دوطرفہ تعاون کو مستحکم کرنے کے لیے وزیر مملکت برائے تجارت و صنعت جناب جتن پرساد کا ہنگری کا دورہ

تجارت و صنعت، نیز الیکٹرانکس اور اطلاعاتی ٹیکنالوجی کے وزیر مملکت جناب جتن پرساد نے 4 سے 6 نومبر 2026 تک ہنگری کا دورہ کیا۔ اس دورے سے بھارت اور ہنگری کے درمیان دوطرفہ روابط میں بڑھتی ہوئی پیش رفت کی عکاسی ہوئی اور تجارت، سرمایہ کاری، ٹیکنالوجی، اختراع اور صنعتی ترقی کے شعبوں میں تعاون کو مزید مستحکم کرنے کا موقع فراہم ہوا۔

دورے کے دوران جناب جتن پرساد نے ہنگری کی قومی اسمبلی کے ڈپٹی اسپیکر سے ملاقات کی۔ اس ملاقات میں دوطرفہ تعلقات کو مزید مستحکم کرنے   اور بھارت و ہنگری کے درمیان تعاون کو وسعت دینے کے امکانات پر تبادلۂ خیال کیا گیا۔ اس سلسلے میں بھارت اور یورپی یونین کے تعلقات کے وسیع تر تناظر پر بھی گفتگو ہوئی۔

جناب پرساد نے ہنگری کے وزیر برائے سائنس و ٹیکنالوجی سے بھی ملاقات کی۔ اس دوران ابھرتی ہوئی ٹیکنالوجیز، تحقیق اور اختراع کے شعبوں میں دوطرفہ تعاون کو وسعت دینے اور دونوں ممالک کی صنعتوں اور تحقیقی اداروں کے درمیان زیادہ سے زیادہ اشتراک کے امکانات تلاش کرنے پر توجہ مرکوز کی گئی۔

اپنے ادارہ جاتی روابط کے سلسلے میں جناب پرساد نے ہنگری کی یونیورسٹی آف ایگریکلچر اینڈ لائف سائنسز (میٹ) کا دورہ کیا، جو وسطی یورپ کے ممتاز زرعی تحقیقی اور تعلیمی اداروں میں سے ایک ہے۔ اس دورے کے دوران زرعی تحقیق، زرعی ٹیکنالوجی، اختراع اور پائیدار زرعی طریقوں کے شعبوں میں ممکنہ تعاون کے امکانات تلاش کرنے کا موقع ملا۔

جناب پرساد نے ہنگری کی معروف دوا ساز کمپنی گیڈیون ریکٹر پی ایل سی کا بھی دورہ کیا، جس کی ریکٹر تھیمس میڈیکیئر (انڈیا) پرائیویٹ لمیٹڈ کے ذریعے بھارت میں بھی پیداواری سرگرمیاں قائم ہیں۔ اس دورے میں دونوں ممالک کے درمیان پہلے سے موجود صنعتی روابط اور ادویہ سازی، تحقیق و ترقی اور صحت کی دیکھ بھال سے متعلق ٹیکنالوجیز کے شعبوں میں مزید اشتراک کے امکانات کو اجاگر کیا گیا۔

5 نومبر کو جناب جتن پرساد نے بوڈاپیسٹ میں بھارت-ہنگری کاروباری سیمینار سے خطاب کیا، جس میں 100 سے زائد کاروباری نمائندوں نے شرکت کی۔ اجتماع سے خطاب کرتے ہوئے وزیر موصوف نے دوطرفہ تجارت اور سرمایہ کاری کو وسعت دینے کے وسیع امکانات کو اجاگر کیا اور بھارتی و ہنگری کی کمپنیوں پر زور دیا کہ وہ کاروبار کے نئے مواقع تلاش کریں، مضبوط شراکت داریاں قائم کریں اور صنعتی تعاون کو مزید گہرا بنائیں۔ انہوں نے ابھرتی ہوئی ٹیکنالوجیز، الیکٹرانکس کی تیاری، ادویہ سازی، زراعت اور باہمی دلچسپی کے دیگر شعبوں میں موجود مواقع پر بھی زور دیا۔ وزیر موصوف نے بھارت اور یورپی یونین کے درمیان قریبی اقتصادی روابط سے پیدا ہونے والے مواقع کو بھی اجاگر کیا اور دونوں ممالک کے کاروباری اداروں کی حوصلہ افزائی کی کہ وہ تجارتی روابط کو مضبوط بنائیں اور تعاون کے نئے امکانات تلاش کریں۔

صنعتی شعبے سے متعلق اپنی سرگرمیوں کے سلسلے میں جناب پرساد نے ہنگری میں فاکس کون کی پیداواری تنصیبات کا دورہ کیا، جہاں جدید ڈیٹا سینٹر کے بنیادی ڈھانچے، نیٹ ورک مواصلاتی آلات اور اے آئی سرور ٹیکنالوجیز کی تیاری کا کام انجام دیا جاتا ہے۔ اس دورے میں الیکٹرانکس کی تیاری، ڈیجیٹل بنیادی ڈھانچے اور ابھرتی ہوئی ٹیکنالوجیز کے شعبوں میں تعاون کو مضبوط بنانے، نیز مستحکم اور قابل اعتماد سپلائی چینز کی ترقی کے مواقع کو اجاگر کیا گیا۔

دورے کے دوران جناب پرساد نے بوڈاپیسٹ میں واقع امرتا شیر گل ثقافتی مرکز میں ہنگری میں مقیم بھارتی برادری کے ارکان سے بھی ملاقات کی۔ اجتماع سے خطاب کرتے ہوئے وزیر موصوف نے عوام سے عوام کے درمیان روابط کو مضبوط بنانے اور بھارت و ہنگری کے درمیان قریبی تعلقات کے فروغ میں بھارتی تارکین وطن کے تعاون کو سراہا۔

اس دورے سے ہنگری کے ساتھ اپنی اقتصادی اور تکنیکی شراکت داری کو مضبوط بنانے کے بھارت کے عزم کا اعادہ ہوا۔ اس دورے سے تجارت، سرمایہ کاری، اختراع اور صنعتی ترقی کے شعبوں میں دوطرفہ تعاون کو مزید تقویت ملی، جبکہ بھارت اور یورپی یونین کے درمیان شراکت داری کو مزید مستحکم بنانے کے وسیع تر مقصد کے حصول میں بھی مدد ملی۔

جناب پرساد کے ہمراہ آنے والے بھارتی کاروباری وفد نے بھارتی سفارت خانے کے زیر اہتمام منعقدہ کاروباری سیمینار میں شرکت کی۔ اس دوران وفد نے ہنگری چیمبر آف کامرس اینڈ انڈسٹری (ایچ سی سی آئی)، ہنگری ایکسپورٹ پروموشن ایجنسی (ہیپا) اور ہنگری انویسٹمنٹ پروموشن ایجنسی (ہیپا) کے نمائندوں کے ساتھ تبادلۂ خیال کیا۔ سیمینار کے ایک حصے کے طور پر بھارتی کمپنیوں اور ان کی ہنگری کی ہم منصب کمپنیوں کے درمیان کاروباری سطح کی ملاقاتیں (بی ٹو بی) بھی منعقد ہوئیں، جن کا مقصد کاروبار کے ممکنہ مواقع تلاش کرنا، تجارتی روابط کو مضبوط بنانا اور بھارت و ہنگری کے درمیان دوطرفہ تجارت، سرمایہ کاری اور کاروباری تعاون کو فروغ دینے کے امکانات کی نشاندہی کرنا تھا۔

***

ش ح۔ش ت ۔م الف

U. No- 7340