محکمۂ انصاف، وزارتِ قانون و انصاف نے سرکاری دفاتر میں صفائی ستھرائی کو ادارہ جاتی شکل دینے اور زیرِ التوا معاملات کو کم سے کم کرنے کے لیے خصوصی مہم 6 کامیابی کے ساتھ مکمل کی

انتظامی اصلاحات اور عوامی شکایات کے محکمے (DARPG) کی رہنمائی میں محکمۂ انصاف، وزارتِ قانون و انصاف نے زیرِ التوا معاملات کو نمٹانے اور دفتری احاطے میں صفائی ستھرائی پر توجہ مرکوز کرنے کے لیے خصوصی مہم 6 نافذ کی۔

یہ مہم دو مرحلوں میں چلائی گئی۔ پہلے مرحلے (تیاری کا مرحلہ، 15 ستمبر 2026 سے 30 ستمبر 2026 تک) میں مختلف زیرِ التوا معاملات کی نشاندہی کی گئی۔ ان میں ارکانِ پارلیمنٹ کی جانب سے موصولہ حوالہ جات، پارلیمانی یقین دہانیاں، ریاستی حکومتوں سے موصولہ حوالہ جات، بین الوزارتی حوالہ جات، عوامی شکایات اور ایسے مقامات کی نشاندہی شامل تھی جن کی تزئین و آرائش، صفائی ستھرائی اور خوب صورتی پر توجہ دینے کی ضرورت تھی۔

دوسرا مرحلہ (عمل درآمد کا مرحلہ، 2 اکتوبر 2026 سے 31 اکتوبر 2026 تک) شناخت شدہ زیرِ التوا معاملات کو نمٹانے، نشاندہی شدہ مقامات اور علاقوں کی صفائی ستھرائی، مرمت اور تزئین و آرائش کے لیے مختص تھا۔

محکمۂ انصاف نے خصوصی مہم 6 کے تیاری کے مرحلے میں سرگرمی سے حصہ لیا اور نمٹانے کے لیے 211 عوامی شکایات، عوامی شکایات سے متعلق 309 اپیلوں، ارکانِ پارلیمنٹ کے 5 حوالہ جات، 2 پارلیمانی یقین دہانیوں، وزیر اعظم کے دفتر (PMO) سے موصولہ ایک حوالہ، ریاستی حکومت کی جانب سے موصولہ 4 حوالہ جات اور ایک بین الوزارتی حوالہ (کابینہ نوٹ) کی نشاندہی کی۔ اس کے علاوہ جائزے اور غیر ضروری ریکارڈ کو تلف کرنے کے لیے 20 فزیکل فائلوں کی بھی نشاندہی کی گئی۔ مزید برآں، نئی دہلی کے جیسلمیر ہاؤس میں واقع محکمہ کے دفتری احاطے میں 4 ایسے مقامات کی بھی نشاندہی کی گئی جن کی صفائی ستھرائی اور تزئین و آرائش کی ضرورت تھی۔ تلفی کے لیے ای ویسٹ اور ناکارہ اشیاء کی 49 اشیاء کی بھی نشاندہی کی گئی۔ زیرِ التوا معاملات کی صورتِ حال بھی باقاعدگی سے ایس سی ڈی پی ایم (SCDPM) پورٹل پر اپ لوڈ کی جاتی رہی۔

خصوصی مہم 6 کے عمل درآمد کے مرحلے میں محکمہ کی جانب سے پہلے مرحلے میں شناخت کیے گئے تمام زیرِ التوا معاملات کو نمٹانے کے لیے بھرپور کوششیں کی گئیں۔ دفتری احاطے، راہداریوں، لان وغیرہ کی صفائی کے لیے ایک خصوصی مہم بھی شروع کی گئی۔ محکمۂ انصاف نے مقررہ مدت کے اندر تمام شناخت شدہ زیرِ التوا معاملات کو کامیابی کے ساتھ نمٹا دیا۔ اس کے علاوہ، جی ای ایم (GeM) پورٹل کے ذریعے ای ویسٹ اور ناکارہ اشیاء کی شناخت شدہ 49 اشیاء کی نیلامی سے 2,41,000 روپے (دو لاکھ اکتالیس ہزار روپے) کی رقم حاصل ہوئی اور محکمہ میں تقریباً 300 مربع فٹ جگہ خالی کرائی گئی۔

خصوصی مہم 6 کے تحت محکمۂ انصاف کی جانب سے انجام دی جانے والی مختلف سرگرمیوں کو سوشل میڈیا وغیرہ کے ذریعے پیش کیا گیا۔ مہم کے دوران منعقدہ مختلف سرگرمیوں کی تصاویر، جن میں صفائی سے پہلے اور بعد کی تصاویر بھی شامل تھیں، وقتاً فوقتاً ٹوئٹس اور پریس انفارمیشن بیورو (PIB) کی ریلیز کے ذریعے جاری اور اپ لوڈ کی گئیں۔ خصوصی مہم 6 کا اختتام جیسلمیر ہاؤس کے احاطے کی صفائی کے ساتھ شایانِ شان طریقے سے کیا گیا۔ اس مہم کی قیادت سکریٹری (محکمۂ انصاف) نے کی اور محکمہ کے افسران و عملے نے اس میں سرگرمی سے حصہ لے کر اسے کامیابی کے ساتھ اختتام تک پہنچایا۔

*****

ش ح – ک ا–ا ک م

UR No. 7356