وزارت آیوش
نیچروپیتھی کا 9واں دن 18 نومبر کوپورے ہندوستان میں منایا جائے گا
اس سال کی تقریبات کا موضوع ’’قدرتی طریقۂ علاج، صحت مند ہندوستان‘‘ ہوگا
قومی پروگرام کرناٹک کے ناگامنگلا میں واقع یوگا اور نیچروپیتھی کے مرکزی تحقیقی ادارے میں منعقد ہوگا
احتیاطی صحت نگہداشت، موٹاپے کی روک تھام اور طرزِ زندگی سے متعلق امراض پر خصوصی توجہ دی جائے گی
پوسٹ کرنے کی تاریخ:
17 NOV 2026 3:36PM by PIB Delhi
آیوش کی وزارت 18 نومبر 2026 کو کرناٹک کے ناگامنگلا میں واقع یوگا اور نیچروپیتھی کے مرکزی تحقیقی ادارے (سی آر آئی وائی این) میں ’’قدرتی طریقۂ علاج، صحت مند ہندوستان‘‘ کے موضوع کے تحت نیچروپیتھی کا 9واں دن منائے گی۔ اس موقع پر احتیاطی صحت نگہداشت، صحت مند طرزِ زندگی اور مجموعی صحت و تندرستی کو فروغ دینے میں نیچروپیتھی کے کردار کو اجاگر کیا جائے گا۔ اس سلسلے میں موٹاپے اور طرزِ زندگی سے متعلق امراض سے نمٹنے پر خصوصی توجہ دی جائے گی۔
اس دن کی اہمیت کو اجاگر کرنے کے لیے ناگامنگلا میں منعقد ہونے والے مرکزی پروگرام کے افتتاحی اجلاس میں کئی اہم اور وسیع پیمانے پر اثرات مرتب کرنے والے اقدامات شروع کیے جائیں گے۔ اس پروگرام کی نمایاں خصوصیات میں کمیونٹی کی صحت سے متعلق ایک خصوصی پہل کے ساتھ کئی دیگر مؤثر پروگرام شامل ہوں گے، جن کا مقصد ہمہ گیر صحت و تندرستی اور کمیونٹی کی پائیدار ترقی کو فروغ دینا ہے۔ یہ پروگرام معاشرے کے تمام طبقات سے تعلق رکھنے والے افراد کو شامل کرنے اور خطے میں دیرپا مثبت تبدیلی لانے کے لیے سوچ سمجھ کر تیار کیے گئے ہیں۔ یہ تمام اقدامات مل کر عوامی فلاح و بہبود اور سب کی شمولیت پر مبنی ترقی کے تئیں مضبوط عزم کا اظہار کرتے ہیں۔
اس سال کا موضوع مناسب غذائی عادات، جسمانی سرگرمی، یوگا، ذہنی دباؤ پر قابو پانے اور شواہد پر مبنی نیچروپیتھی کے دیگر طریقوں کے ذریعے صحت مند طرزِ زندگی اپنانے کی اہمیت کو اجاگر کرتا ہے، جو صحت مند ہندوستان کی تعمیر میں معاون ہیں۔ اس کا مقصد بیماریوں سے بچاؤ کی اہمیت کے بارے میں عوامی بیداری کو مضبوط بنانا اور افراد و برادریوں کو اپنی صحت اور تندرستی برقرار رکھنے میں فعال کردار ادا کرنے کی ترغیب دینا ہے۔ یہ دن وزیر اعظم کے صحت مند اور توانا ہندوستان کے وژن سے بھی ہم آہنگ ہے، جس میں احتیاطی صحت نگہداشت اور صحت مند طرزِ زندگی پر زور دیا گیا ہے۔
ملک گیر سطح پر عوام تک رسائی کی مہم کے تحت اس موقع پر دس ذیلی موضوعات کے ذریعے معاشرے کے مختلف طبقات اور صحتِ عامہ کے اہم شعبوں پر توجہ مرکوز کی جائے گی۔ ان میں ’’مادرِ فطرت—صحت مند ماں، صحت مند خاندان‘‘، ’’صحت مند خواتین—چاق و چوبند اور تندرست خواتین‘‘، ’’چاق و چوبند دستہ—مضبوط، متناسب اور صحت مند دستہ‘‘، ’’صحت مند کیمپس—چاق و چوبند طلبہ، صحت مند قوم‘‘، ’’صحت مند کام کی جگہ—چاق و چوبند افرادی قوت‘‘ اور ’’محفوظ سفر—چاق و چوبند ڈرائیور، محفوظ سفر‘‘ شامل ہیں۔
دیگر ذیلی موضوعات میں ’’سنہری صحت و تندرستی—فعال بڑھاپا، صحت مند بڑھاپا‘‘، ’’فطرت سے قوت—صحت مند اور فعال زندگی‘‘، ’’کھیلوں میں بہترین کارکردگی کے لیے قدرتی طاقت‘‘ اور ’’قدرتی کسان—چاق و چوبند کسان، صحت مند قوم‘‘ شامل ہیں۔ ان اقدامات کا مقصد خاندانوں، خواتین، طلبہ، پیشہ ور افراد، مسلح افواج کے اہلکاروں، بزرگ شہریوں، کھلاڑیوں اور کسانوں تک نیچروپیتھی کا پیغام پہنچانا اور مختلف برادریوں میں صحت مند عادات کو فروغ دینا ہے۔
اس موقع پر ملک میں یوگا اور نیچروپیتھی کے ادارہ جاتی، تحقیقی اور صحت نگہداشت کے بنیادی ڈھانچے کو مضبوط بنانے کے لیے آیوش کی وزارت کی کوششوں کو بھی اجاگر کیا جائے گا۔ اپنے تحقیقی اداروں اور اقدامات کے ذریعے وزارت سائنسی تحقیق، تعلیم اور احتیاطی و فروغِ صحت کی نگہداشت میں نیچروپیتھی کے وسیع تر انضمام کو آگے بڑھانے کے لیے کام کر رہی ہے۔
نیچروپیتھی کا 9واں دن ،عوام میں نیچروپیتھی سے متعلق شمولیت اور بیداری کو مضبوط بنانے کے ساتھ صحت مند طرزِ زندگی، احتیاطی صحت نگہداشت اور صحت مند ہندوستان کی تعمیر میں کمیونٹی کی شرکت کی اہمیت کو مزید اجاگر کرنے کا ایک پلیٹ فارم ثابت ہوگا۔
*********
(ش ح ۔ ض ر ۔ت ا )
U. No. 7785
(ریلیز آئی ڈی: 2337481)
وزیٹر کاؤنٹر : 16